今日行程只是去動物園，回程車成五點八，所以唔使特登早起！十點幾集合之後，就去左飲茶，食飽飽先入去。因為擔心園內嘅食物質素，所以响酒店買左大量麵包入場，足足買左人民幣百二蚊，真係幾貴！除左因為擔心食物質素問題，亦因為回程車係五點八，呢個時間食野就真係唔湯唔水，所以決定回到香港至食，中段時間就靠麵包頂一陣先喇！
動物園其實唔俾帶食物入去，入口有人Check袋，我地將麵包分左兩個人袋住，一個係Wang叔叔，一個就係Ambrose，哈哈！唔知係咪 Ambrose係小朋友關係，工作人員完全無打開佢個袋睇，如果有，其實都係擺响面，一眼就睇到，真係好彩。至於Wang叔叔，佢個袋有幾隔，工作人員只係Check左佢其中一隔就俾佢走喇，無俾人捉到嘅Wang叔叔不禁偷偷大笑左一下！點知就係呢一聲笑聲，引來工作人員追上來要再檢查佢個袋，呢一幕都算經典喇！當然，今次工作人員就搜到麵包啦！Wang叔叔就話出去再處理一下先，然後竟然响面口側面嘅草叢將麵包遞入响園內嘅力叔叔，自己再由正門再入過黎，成功偷運麵包！呢次經驗真係好似人地嘅小小小電影咁好笑呀！
由於之前已經黎過呢個動物園，而大家都target左要坐車睇動物，所以一入園，幾乎咩都唔睇，就直接衝去坐車！今次嘅經驗無上次咁好，唔知係咪因為暑假人多嘅關係，之前架小火車都會站站停吓俾人欣賞吓影吓相，但今次係無囉！仲要就係另一條專俾揸私家車入去睇動物嘅車道，比起之前果次要full，幾乎係排住隊咁，而呢條車隊又偏偏响多動物果邊，即我地前面，所以要影相或睇動物，都俾佢地遮左少少先囉！
坐完車至慢慢睇返其他場區，首先係大象，本來大象唔係target，但今次黎到發現大象區竟然又有得餵蕉，上次都無架，所以又忍唔住買左d蕉俾小朋友去餵！不過由於大象同旅客有少少阻隔，所以大家都只能擲蕉，其中有幾條就擲中象身，真係唔好意思喇！之後當然就係去餵長頸鹿啦！記得上次黎時都唔係好多人，可以輕輕鬆鬆買葉行埋去餵鹿，但今次真係萬人空巷咁，賣葉果度已經好多人圍住，餵葉果度更係行唔入去咁濟，就連影相都好難影到呀！
之後，都係行吓唔同嘅館啦！天氣好熱，館內冷氣聊勝於無，但每個館都有工作人員不斷催促遊客向前行，所以諗住入館過冷河，其實唔多work！
今年動物園新開左個侏羅紀公園，入面有唔同嘅恐龍，一齊行入去場區時，不斷聽見恐龍叫，d小朋友真係以為有恐龍，好驚咁，仲話唔去，估唔到平時好鍾意恐龍嘅Ambrose都怯怯地！哈哈！但大家都無打算唔入去走番出去！結果就係Norman喊哂口咁捉住佢媽咪，Ambrose都還可，係要爹爹抱住，叫佢响恐龍隔離影相就死都唔肯，驚佢地隨時會郁，真係好好笑！
行過百虎園，撞啱跳水時間，上次都無睇過，所以今次就企定定睇，工作人員吊d生肉出黎，老虎跳起去食，因為前面係水道，所以佢地接完肉一定會跌落水，原來老虎識游水，佢地接完又會游番上岸，又再接過！而當老虎跳起接肉嘅方向，就正正响遊客面前，其實都有少少擔心佢地會唔會衝力太大撞埋塊玻璃度架！不過如果無左塊玻璃，有隻老虎咁樣撲埋黎，都咪話唔驚囉！
行吓抖吓咁，好快到五點，又要趕番酒店攞番寄存嘅行李，準備上車回港了！今次車程間又有塞車，真係好驚，好彩Ambrose上車無耐瞓左，起碼有少少時間回吓氣！返到屋企樓下約九點幾，食埋晚飯至回家，比想像中要早！
沒有留言:
張貼留言