Ambrose 講左好耐想動物園睇獅子老虎，爹爹媽咪一直都話安排一下先，本來都諗住算啦，佢過一排就唔記得，但一講真係講左幾個月，即係好認真想去啦！機緣巧合下，爹爹朋友計劃去長隆，媽咪靈機一觸，叫爹爹問問不如一齊去，咁大家有伴一齊去，一來又安全d，二來又熱鬧d。
於是六個大人，三個小朋友齊齊出發去長隆。今次都係揀左搭車去，可惜遲左買飛，唔可以响區內上車，要走出葵芳上車，所以一早要起身出門，去旅行仲早起過返工！順順利利上左車，去到深圳灣過車，明明就已經劃左位，但去到架車度又一片混亂，個司機見有位就叫哂我地上車，完全唔跟劃位坐，結果我地要分散坐，兩家有小朋友嘅好彩可以一齊坐，幾個鐘都無咁悶麻！
車程都算順利，Ambrose中途瞓左，媽咪又可同朋友一直傾計到下車，時間都過得很快！小插曲是朋友小女兒歲半左右，上車沒多久就嘔到朋友一身都係，媽咪正好坐响隔離，大家都非常狼狽！
今次都係揀左長隆酒店住，感覺安全d ，始終全部活動都响呢度，唔想要再搭車過黎過去，始終大陸真係危險，又帶住小朋友，都係唔好煩啦，貴成倍買少少安心都要呀！check in左擺低野就去左彩蝶谷食野，周圍行吓，又去左遊戲機中心玩左陣，之後大家自由時間一個多小時。朋友們去了游水，但因為爹爹响執行李時話游水機會不大（基於擔心國內人衞生水平低，池水水質問題），所以媽咪在最last minute將帶左嘅泳衣又抽番出黎，所以Ambrose無得同朋友仔水戰喇！無咩好做，唯有睇吓電視，食吓野，爹爹洗定浴缸，等Ambrose今晚可以浸泡泡浴！難得地輕輕鬆無野做，媽咪睇睇吓電視都不知不覺睡著了！
六點鬆d，一班人又集合埋一齊，出發去睇馬戲！本來酒店住客有優先座，但為安全計，都係要早少少排隊入場。去到閘口真係人山人海，基本上，國內文化排隊唔係成直線，所以唔會睇到隊形，只係一片人海。有人不斷找虛位向前行，有人不斷用心口頂著背脊迫住推向前，爹爹話後面有個著低胸衫嘅女人不斷用胸口撞佢手踭向前行，大有被非禮嘅感覺，真係令人哭笑不得！
好彩早左去排，酒店VIP區已經坐得滿滿的，一行九人都係啱啱好有位坐！今次坐得頗前吓，上次都係住長隆酒店，但完全唔知有酒店住客專區，坐到上山頂最後一行，真係蝕哂！今次坐得前，睇得好清楚，真係唔同d！不過其實當見到d動物違反本性不用四腳行路，反而學人類咁兩腳行路、踩單車、踩鋼線等，引得觀眾拍案叫絕，媽咪心裡反而有陣陣難過！再回想起上年看這馬戲時，也有相同感受，開始覺得人類真係好自私，自己竟然係其中一員，真係有d羞愧！唉！
睇馬戲小插曲，散場時同朋友講起，大家都覺得馬戲很精彩，但原來坐响入面位置好熱，無冷氣，而爹爹媽咪因坐近走廊位，雖然都覺得冷氣一般，但又不至於好熱。另外，最搞笑係，朋友提到全程也聞臭腳味，仲以為佢講笑個場地有動物嘅味道啦，點知佢話原來後排坐住國內人，佢地一入場坐低就除哂鞋繞腳坐，高度就差不多係佢地頭部後面，真係好恐怖囉！最好彩嘅係，原來爹爹一早見到媽咪後面個人對腳正正响媽咪頭後，佢不動聲色無話俾媽咪知，而媽咪一向嗅覺不靈，完全唔覺有味，亦唔知後面嘅人有如此可憎行為，所以可以安坐個幾鐘！
睇完馬戲至去食野，其實都好晏，不過無計啦，點幾至黎到，好晏先至食午飯，又無理由睇馬戲前又食一餐至去，唯有睇完至食，食完都成十一點幾，散哂！
沒有留言:
張貼留言