抄畫 (4y10m)

Ambrose開始自己抄畫，佢見到有興趣嘅圖案或公仔，開始會嘗試對住照畫，無人教加上不斷練習之下，媽咪發覺佢嘅繪畫技巧有進步，原來抄畫也會有得著！呢個公仔，中間係真品，估吓邊幅係Ambrose抄畫而成？

答案係：左邊係爹爹畫的，而右邊係Ambrose畫的，媽咪覺得Ambrose畫果幅比爹爹畫得更神似喎！

星星老師@第四十六堂(4y10m)

呢期Ambrose愛踢足球，今堂咁啱畫踢波，好有動感呢！

My School Bus @ Convertiables (4y10m)

呢本My School Bus大書，可以變成一架School Bus，買左成七、八個月，今晚至攞出黎俾Ambrose玩，仲以為佢大個仔唔會有太大興趣，點知佢超興奮，仲好認真咁開門上車，而唔係心急就咁「攬」入車，哈哈！好彩仲夠位坐得落去玩咋，唔係就浪費左本書喇！

第二次溜冰 (4y10m)

對上一次同Ambrose溜冰，應該係佢兩歲九個月嘅事了！玩完果次之後，又唔覺得佢好鍾意溜冰，爹爹媽咪又覺得有少少危險，所以一直都無咩動機再去。

隔左咁耐，近排Ambrose唔知點解提出想再去溜冰，於是又同佢去左玩。以為佢都唔會點溜到，結果，陪左佢一陣之後已經可以放手唔使扶佢！不過，嚴格黎講，佢唔係溜緊，而係行緊，只係行得較快，哈哈！事前都教過佢跌低左記得要縮起手指同儘快起身，Ambrose跌過幾次，都做得到，仲要懶有型咁即跌即起擺哂pose咁，真係服左佢！ 

小旅行@香港愉景灣酒店 (4y10m)

近月，爹爹媽咪工作繁忙得很，見爹爹工作壓力不少，媽咪真的很想去一轉旅行，鬆吓抖吓！可惜，爹爹媽咪難以取假之餘，Ambrose學校亦要作評估，個評估關係住Ambrose下學期嘅成績表，第日考小一都係交呢份成績，真係唔可以任性地走左去旅行啦！無得去旅行，媽咪唯有走去睇吓討論區有咩好去處介紹，點知發現，近期好多人都講緊香港愉景灣酒店，講到好有渡假feel又好好玩咁，媽咪即管book一晚試吓，諗住唔係真係咁好玩，都當行開吓，住吓酒店輕鬆吓都好！ 

星星老師@第四十五堂(4y10m)

唔係即時記錄低每次上堂的作品，所以有時都有點混亂！

今日呢堂，應該係做黏土磁石吧！不過原本整左四個，因為帶回家途中擠壓到，報銷了一個！

Bow Ties Collection (4y10m)

買多左幾個Bow Ties俾Ambrose表演或比賽用，哈哈！無計啦，男仔唔同女仔，女仔可以著唔同款式嘅裙，男仔只可以著白恤衫同黑褲，真係好沉悶囉！為左唔好咁悶，唔好下下影d相都係同一條tie或同一個bow tie，好似全部都係同一日咁，媽咪決意為Ambrose物色多d唔同款唔同色嘅tie至得！暫時，除左H&M常見有公仔tie之外，都唔係好見其他地方有小朋友正經少少嘅tie賣咁！上次表演時買左個女裝bow tie，Ambrose用都唔算大，仲好醒目咁！今日見到果間店有特價，即時入左幾個俾Ambrose！

Home Craft Time @ 穿珠仔(4y10m)

去嫲嫲家吃飯，不經意的說起從前嫲嫲愛做珠仔公仔，講講吓原來以前嫲嫲淨落好多珠仔留起了沒有掉，於是，幾表姐弟突然興起，話要穿珠仔手鏈喎！

最估唔到嘅係Ambrose竟然都有興趣一齊穿珠仔手鏈，佢仲已經指定送俾某位女同學，竟然唔係送俾媽媽，妒忌呢！

Home Craft Time @ 印手掌(4y10m)

Ambrose好細個時媽咪好鍾意同佢玩印手掌，隨住佢越來越大，返學返興趣班時間越多，媽咪工作又越來越忙，Ambrose手工時間就越來越少。今日即興俾左個Stamp pad俾Ambrose印印仔，之後靈機一觸就叫佢不如印手掌，以為佢會嫌污糟唔玩，但竟然好興奮好投入咁去印，媽咪真係要俾多少少手工時間俾Ambrose至得喇！

Home Art Jamming @ 媽媽(4y10m)

Ambrose畫媽媽已經畫過N咁多次，著實也開始不太想記錄了。這幅畫，特別之處並不在畫，而是側邊的字，係Ambrose自己寫的，看到真的有點感動！除了感動Ambrose長大了不少，開始識自己寫字了；還感動著Ambrose竟然寫咁多筆劃嘅「媽媽」兩個字一點也沒錯，「爸爸」就。。。。。。。哈哈哈！

Home Art Jamming @ 火箭(4y10m)

呢幅畫Ambrose油得好求其，不過仍然想記錄一下。媽咪覺得特別嘅地方，係Ambrose有少少構圖，黑暗中的太空，除了有火箭之外，還有星星，同埋就係令媽咪驚訝嘅地球，又係一句，點解佢會識畫地球架？真係好神奇！

Home Art Jamming @ 貓 (4y10m)

呢幅畫看上去很平常，不過媽咪就好驚訝Ambrose竟然會將隻貓畫左去花嘅後面，究竟係有人教過佢？定係佢自己領悟出黎嘅呢？感覺好神奇呀！Ambrose畫畫開始有點立體了，哈哈！

Home Craft Time @ diy扇子(4y10m)

兩把扇買左番屋企好耐，都諗唔到可以點同Ambrose做手工。見今晚Ambrose印手掌印得咁開心，媽咪有d內疚，總覺得比起以前，現在陪Ambrose做手工時間真的少之又少。於是，諗起最近買回來的3D Styler，簡簡單單的叫Ambrose在上面畫畫，其實都係畫畫，無咩特別架喇，但材料用具不同了，佢又會覺得好新鮮、好興奮！

媽咪用左一個最懶惰嘅方式，勉強滿足了Ambrose做手工的慾望，哈哈！

Lego Parts (4y10m)

Ambrose除左畫畫之外，第二至愛應該係玩Lego了，大的Duplo系列常玩，正常size的Lego更常玩！所以爹爹媽咪也喜歡買Lego給他，總覺他那麼投入地專注地長時間地玩，是值得的！

之前買的Lego，都多是盒裝有主題的，可以跟書砌。後來發現，Ambrose其實也只是享受砌嘅過程，砌好了的完成品，佢好少攞黎玩，而爹爹媽咪為免碰撞之下唔見左d，所以砌完嘅Lego，小型的，會拆散入袋留番過一排再砌過，大型的便捨不得拆散，成個放入玻璃櫃中保存！ 

Home Art Jamming @爸爸我愛你(4y10m)

呢幅畫，應該要珍藏了！哈哈！唔知右下角果堆係咩，Ambrose自己都可能忘記了！不過問佢日期下面果堆數字係咩事？佢話首先佢而家四歲，個1字係首先咁解，4字係四歲；然後佢之後會五歲，所以2字係然後咁解，5字係五歲。箭咀指住係因為要留意，證明Ambrose自己好在意佢就快五歲，好期待，哈哈！

星星老師@第四十四堂(4y10m)

配合番上堂畫恐龍，今堂做黏土恐龍。不過唔知點解Ambrose要呢隻咁細嘅劍龍，俾嫲嫲哦左佢好耐，話個個同學都整大大隻嘅長頸龍！哈哈！Ambrose就係咁架啦，佢會一句話「我鍾意」丫麻！

Heroes in Music (4y10m)

一早買左飛同Ambrose今晚聽音樂會，其實都唔係好知會唔會好似小交響樂團果d音樂會咁輕鬆好玩，只係見個音樂會接受三歲以上嘅小朋友，個音樂會個名又有Heroes呢個字，即管買飛去見識吓！

又係約左鐡腳浠浠一齊去，有個伴開心d嘅！無預太早到達，只係剛剛好到，僅夠入場前去吓廁所，影吓相同埋攞樂器貼紙！可能因為成日講個音樂會係關於Heroes，兩個小朋友影相時係咁擺哂ironman同spiderman嘅pose，哈哈！媽咪已經好醒目咁同佢地講定，Heroes唔一定係呢d架，可能係其他人物，如士兵之類，等佢地入到去發現唔係佢地心目中嘅英雄時，落差無咁大丫麻！ 

第一次有朋友仔來家中sleep over (4y10m)

Ambrose的床係子母床，不過由佢搬黎呢間屋企開始，已經好順利自己瞓一間房了，即使偶爾要爹爹媽咪陪瞓，佢都要一齊擠在子床，所以張母床，真係無咩人瞓過！不過佢就好似成日好proud of自己有張子母床咁，成日同人講佢自己有兩張床，當佢想留人在家一齊瞓時，佢就會不停咁話可以一齊瞓架，但細問佢點一齊瞓時，佢一定會話自己瞓上面，其他人瞓下面，掉轉位置都唔得，哈哈！

Ambrose好鍾意邀請其他人留家過夜，好想有人同佢一間房瞓，大概因為獨生子太寂寞吧！之前曾經有表姐仔同姨婆來過夜，Ambrose都會興奮得不停係咁同人傾計唔瞓覺，搞到對方都無覺好瞓，哈哈！見佢成日都想有伴同佢玩，都會周不時問吓佢去唔去姑姐家中過夜，佢之前去過一次咁多，但果次之後，點叫點氹佢都唔再肯了！

星星老師@第四十三堂(4y10m)

今堂畫恐龍，Ambrose呢隻畫得好可愛，仲有火山爆發！

Home Art Jamming @火箭(4y10m)

呢幅火箭畫，Ambrose都係用左四、五分鐘完成！雖然機身畫得簡陋左d，但欣賞佢畫埋入面嘅人仔同埋都算畫得較仔細！機司位有軑盤之餘，仲畫左個風扇俾佢！每個人都有個氧氣罩架！中間果個人仲有披肩添，哈哈！

Home Art Jamming @城市(4y10m)

Ambrose二十分鐘內一連畫了好幾幅畫，呢幅應該用左三、四分鐘完成！畫入面嘅箭咀，其實係馬路上的箭咀，係大左少少嘅，哈哈！

Home Art Jamming @開心兔(4y10m)

Ambrose用左約八分鐘畫左呢幅開心兔，仲畫左間屋俾佢！成幅畫構圖都好豐富呀，果然都係用鉛筆畫，唔使油顏色嘅時候可以畫多d同仔細d！不過，唔知佢知唔知，兔子嘅尾巴應該唔會咁長呢？！哈哈！

Home Art Jamming @又畫老虎ssssss(4y10m)

Ambrose成日畫畫都會不停重複又重複，有時候，媽咪覺得佢係諗唔到有咩好畫，所以畫黎畫去都係果d野。但爹爹就話Ambrose係不停自我練習，透過重複畫畫令自己畫得更純熟同完善。聽落都幾有道理！

幅鉛筆老虎，媽咪睇住Ambrose唔夠兩分鐘畫好左，勁快！

Home Art Jamming @聖誕小子(4y9m)

聖誕節有排都未到，Ambrose竟然無啦啦畫左個聖誕小子出黎，係咪即意味住佢好想聖誕節快d到呢？嘩哈哈！

Home Art Jamming @ 甩頭媽媽(4y9m)

一向以來，媽咪都會記錄Ambrose在家的畫作，但Ambrose每日畫畫量甚高，一日都會畫到十幾廿幅咁，而有d亦會畫得較求其，所以媽咪只會盡量記錄一些畫得比較好或甚有意思的作品！ 

Art Jamming @ 眼影媽媽(4y9m)

Ambrose又勁畫媽媽了，今次同之前有少少唔同，佢畫到媽媽隻眼有好多色。問佢媽媽隻眼做咩事？佢話媽媽對眼化左妝，好似姑姐咁呀！ 

Art Jamming @ 白兔小籃子 (4y9m)

Ambrose學校做的手工，係白兔小籃子，應該係復活節時候做的，到現在才有時間記錄，哈哈！

白兔是畫完後剪下來貼在籃子上的，很喜歡Ambrose畫的白兔，望落去，隻白兔好醒目呀，多得佢幫白兔畫左精靈眼！

K2繞口令卓越獎@第15屆GAPSK普通話朗誦比賽 (4y9m)

Ambrose在五月初參加了普通話繞口令比賽，雖然三甲不入，只是拿到卓越獎，對於Ambrose不怎麼對普通話有興趣或天份來說，已經很不錯了！比賽當天即日知道分數及名次，但頒獎禮則需個幾月後的今天才舉行。由於三甲及卓越獎得主才有獎盃，Ambrose今次真係「掹車邊」終於可以真係攞盃了！媽咪告知Ambrose之後便會有獎盃，佢不知幾開心，仲周圍同人講佢有獎盃，真係服左佢！ 

淘書 (4y9m)

很久很久也沒有淘寶了，總覺得自己出街買感覺好一點吧！買書的話，其實亦有需要和Ambrose一起揀，要佢鍾意至得，唔係買左返去，佢都未必有興趣睇！ 

 

咁啱姑姐問有無野要買，佢搞集運，只要揀完俾條link佢，佢就會幫手買，媽咪咩都唔使理，咁又唔錯喎，所以即管上去望吓，哈哈！

星星老師@第四十二堂 (4y9m)

仲以為上星期畫左父親節嘅畫，今星期就會係第二個主題，點知今堂又整父親節嘅相架！點解上次母親節，只係得一個花籃架，媽咪都無畫嘅？！真有點吃醋！相架上的爹爹和Ambrose很有Superman的感覺！

3D Styler＠Amos (4y9m)

今日响書店發現呢隻3D Styler ，唔知係咪新產品呢？之前都未見過的！見佢畫完之後好似都有d立體，脹卜卜咁，都幾得意，買左一盒俾Ambrose試吓，嘻嘻！

傻雞豆丁＠紅番雞智取魔法羽毛 (4y9m)

偶然見到呢本傻雞豆丁，故事帶出與其他人相處之道，媽咪覺得幾啱Ambrose，於是就買左返屋企！

寶寶愛音樂 (4y9m)

Ambrose的第一個參加的音樂會，就係香港小交響樂團舉辦的！香港，真係無咩音樂會係會歡迎咁細個嘅小朋友參與，好多都要6歲以上，而仲係要好認真嚴肅咁坐定定欣賞，對於小朋友黎講，其實真係幾難。香港小交響樂團舉辦嘅幼兒音樂會，真係好好，感覺較平時嘅音樂會輕鬆不少，因為唔會有人太介意舉行中忽然傳來小朋友的喊聲或說話，樂曲之間，指揮亦會稍作介紹，又或者與在坐各人有少許互動，所以媽咪帶Ambrose去亦唔會有太大壓力！

飛sssssss (4y9m)

有好一段時間都無帶Ambrose去睇任何表演了，工作實在有點忙，媽咪實在無時間四處留意有咩啱Ambrose的節目可去看看。以為帶Ambrose也不會在意，但事實係佢都有問起點解咁耐都無show睇。

Home Art Jamming @ 給媽媽的信II (4y9m)

呢排Ambrose好鍾意寫信俾媽咪，自己摺完個信封，再入d畫入去俾媽咪，雖然佢摺同痴到個信封唔多靚，但見佢在信封上寫哂上款下款，又一臉認真咁俾媽咪，真係好應該再次記錄下來！唔知幾時佢會真係俾封信而唔係畫俾媽咪呢？

Home Art Jamming @ 再一次媽媽(4y9m)

再一次，都係畫媽媽！成個窗台嘅一堆廢紙加畫作堆中，有好多張都係畫左媽媽，哈哈，唔通佢好掛住媽媽？

Home Art Jamming @ 彩虹下的媽媽(4y9m)

又係畫媽媽！Ambrose呢期好鍾意畫媽媽，哈哈！唔知係咪因為佢親眼見過彩虹，所以印象特別深刻，而家成日畫畫，都鍾意畫埋彩虹，仲畫到成隻門咁大！

Home Art Jamming @ 郊遊(4y9m)

媽咪見到Ambrose呢幅畫覺得幾靚， 因為構圖都幾豐富，但同時又覺得佢好懶，哈哈，竟然畫火柴人都有！Ambrose話呢幅係佢同爹爹去郊遊，响草地上有好多跌左落黎嘅蘋果可以食喎！

星星老師@第四十一堂 (4y9m)

今堂係因應父親節而畫的，Ambrose鍚爹爹，多溫馨！

Home Art Jamming @13點手錶 (4y9m)

放工返屋企又見到Ambrose自己創作嘅小手工，就係一隻手錶喇！哈哈！佢自己畫完，就用較剪剪左出黎，話送俾爹爹喎！真係幾得意，可以扮放在手上戴！不過留心d睇，隻錶點數去到13，唔係12，真係夠哂特別，哈哈！

足球狂熱(4y9m)

Ambrose唔見左個足球之後，一直都無再講過要再買，直至今日，唔知點解又對足球好狂熱咁，於是爹爹就買左個新足球俾佢，仲要一買完就話要即刻返屋企，捉左爹爹落樓下同佢踢波。又估唔到Ambrose踢波都幾有力，而且仲唔使好似以前咁，捉定個波至可以踢。只見佢同爹爹你一球我一球咁踢黎踢去，好開心同滿足，可以預期佢會戀上足球，哈哈！

Home Art Jamming @花蝴蝶 (4y9m)

又係一早未起身就收到Ambrose送嘅一幅畫，有花、蝴蝶、蜜蜂、雀仔等，感覺好開心的一幅畫呢！

Home Art Jamming @Ambrose與單車 (4y9m)

Ambrose自己畫自己去踩單車！不過佢唔記得畫番對手俾自己，嘩哈哈！

Home Art Jamming @街境 (4y9m)

Ambrose以十分鐘時間，畫左一幅街境出黎！ 

Home Art Jamming @Man with Gun (4y9m)

呢幅畫，係有d九唔搭八。唔知點解有架車，但角落又有個蛋糕，仲要寫埋“I like Cake”！唔知Ambrose諗咩？！ 

Home Art Jamming @爹爹與蘋果 (4y9m)

呢幅畫，唔知Ambrose係咪畫緊爹爹呢？哈哈！問佢地下果d係咩？佢話係蘋果跌哂落地喎，至於點解跌哂落地，佢又無再講，不過見到就覺得好搞笑！

Home Art Jamming @老虎 (4y9m)

自從Ambrose畫班學過畫老虎之後，佢就無啦啦變身小老師，係都要教爹爹媽咪畫老虎，家中已經畫了無數張老虎了，服左佢！見佢真係一步步教到爹爹媽咪畫到老虎，就覺得老師真的教得好，原來老虎不難畫的！問Ambrose點解老虎腳打哂交叉的？佢就答係因為老虎行緊路係咁樣架喎！有時候，不得不服佢嘅小腦袋，咁都有留意到同埋真係會畫番出黎！

Home Art Jamming @給媽媽的信 (4y9m)

一個早上，Ambrose起身又去左畫畫，媽咪仍在睡覺！過左一段時間後，佢走左入房遞了一封信給媽咪，入面原來係一幅畫，so sweet，唔起身都唔得，哈哈！

Home Art Jamming @媽媽過馬路 (4y9m)

Ambrose畫了這幅畫媽媽過馬路嘅畫，其實見佢畫得好快，真係唔使十分鐘就畫好，但油顏色就有d求其。今次又覺得Ambrose又進步了，之前佢畫嘅雀仔，都係一橫再加個Ｖ字，呢幅畫，佢畫嘅雀仔，係有埋個頭同個嘴嘅，無人教佢咁畫，可能係佢自己悟到出來！

另外，以前佢畫紅綠燈，都係就咁畫三個圓形油番顏色就係，今次見佢有埋個底板，仲有枝杆仲頗有心機咁間住黑白色咁油，哈哈！