挑戰二輪單車 (4y6m)

Ambrose的大肌肉發展不錯，很小的時候已開始踩四輪單車，當時買的是12寸車輪單車。見他踩得熟練，本打算早一點教他踩二輪單車，可發現當時的12寸車輪單車可能因為是公仔款式，車輪是原個倒出來的，不能泵脹，以致經常會滑輪，而且因不「咬」地，Ambrose需較用力踩才能前行。於是，上年二月，終於忍不住要為Ambrose轉了架BMX，真的暢順好多了！可是，為了換車變得有意義一點，當時就順便換大至14寸車輪，以致Ambrose雙腳垂下時不夠腳長踩在地上。因著這個原因，學踩二輪單車便要推遲了！

Home Art Jamming @未來的交通工具A780 (4y6m)

Ambrose興趣班今星期的Show & Tell主題是交通工具，先要搜集常見的交通工具圖片，然後再設計一款未來的交通工具作封面！因為沒太多時間及途徑搜集圖片，所以都是叫爹爹上網找了再印出來便算，哈哈！然後，就請Ambrose畫一款未來的交通工具出來！不知道是不是爹爹一直向他說A380是最大的飛機，有兩層的，所以Ambrose覺得好勁，然後佢就朝著三層的飛機方向畫了他心目中的未來交通工具了，哈哈！這架三層飛機，Ambrose叫它做A780，有六個引擎，可以在太空中飛行，勁！

畫好了封面，將圖片及封面加上透明膠片及硬咭底紙，釘了洞，再用毛絨條繫好，就成了一本書，Ambrose很喜歡呢！

Home Art Jamming @小廚師(4y6m)

Ambrose話這個人是小廚師，是他自己，哈哈！Ambrose識串自己的英文名了，不過仍然是大小楷混著寫，而且亦不理會究竟是不是在正確的位置轉行，只要沒位了，便跳落下一行繼續寫，真的很好笑！

再購電動牙刷(4y6m)

之前買給Ambrose的電動牙刷，真的不怎麼好用！先是那刷頭，雖然可更換，但就必定要用螺絲批裝上或拆下，清洗不便；再者入電位很難開，而且似乎常常因接觸不良，或輕微碰撞之後就開不動，真的令人很氣餒！一個刷頭都未換過便要報銷了！

看完某些文章，又深怕Ambrose用慣了電動牙刷而不懂刷牙，所以本打算放棄電動牙刷，但又覺得電動牙刷的好，就是比較乾淨一點！於是，媽咪就想著，平時大多數時間都讓Ambrose手動刷牙好了，一星期一至兩次用電動牙刷，當作是深層清潔，也無不可吧！哈哈！

不京(4y6m)

之前要考普通話試時，曾經教過Ambrose「北京」這個地方，可他怎都記不住！今晚，Ambrose問媽咪，「京」字點寫，媽咪奇怪，便問Ambrose甚麼「京」，然後Ambrose答，「北京」呀！真係有點莫名奇妙，不知道為甚麼他會突破想到這個字！寫了一次「北京」這字給他看，然後，媽咪才發現，Ambrose一早已寫好了「不」字，待媽咪教了他，他隨即在原先的「不」字隔離寫了「京」字！

 

哈哈哈！好一個「不京」！

Home Art Jamming @鐡甲威龍(4y6m)

Ambrose迷上了鐡甲威龍，連畫畫都要畫他。最好笑係佢竟然留意到他的手一隻有手套一隻沒有。。。。。。其他事物又不見得他留意得那麼仔細！！！

Home Art Jamming @貓(4y6m)

 

Ambrose最近在家嘅畫作，簡直又多又快，媽咪有時真的沒太多時間去處理。今次見到他畫了貓，雖然面上中間的花紋其實有點像老虎的，也不打緊吧！本來看到貓作時，就理應抽起收藏好，可Ambrose現在畫完了畫，有時又會忽然去找他的畫慢慢欣賞，所以媽咪只好過幾天才抽起。但遇到Ambrose畫得興起，又或者自己玩手工時，就會胡亂地用紙，那張貓作，就因為媽咪沒及時收起，而被Ambrose剪了個大圓形呢！真可惜！

旋轉小熊 @大眾春季減價之收獲 (4y6m)

這個旋轉小熊音樂盒，材料全包，看來也簡簡單單的，好像只是剪剪貼貼的功夫，價錢才幾十元，也敗了一個讓Ambrose試試吧！

彩繪幸福摩天輪 @大眾春季減價之收獲 (4y6m)

Ambrose不時也會嚷著要做手工，可家中手工set存貨量不高，趁減價時入了這款彩繪幸福摩天輪，應該是油好顏色後再砌出來的簡單手工吧！

Art and Fun萬花筒 @大眾春季減價之收獲 (4y6m)

無意中看到了這盒萬花筒手工，敗了！希望有時間可以和Ambrose一起做做吧！

Amos 輕黏土 @大眾春季減價之收獲 (4y6m)

上次同Ambrose玩泥膠時又玩埋輕黏土，發覺原來家中輕黏土沒有了，又要入貨！本來一直都入包裝的，份量多一點，價錢亦抵d，不過又有感一包可以玩很久也用不完，反而有些顏色只有盒裝有而包裝沒有，所以今次決定買盒裝試試！

 

不過到買了回家入櫃時，才發覺，原來上次書展時買的一大盒Crayola輕黏土，原來還未用，完全給忘記了，又再入了貨，真大意！哈哈！

Play Doh Makeables – Mickey Mouse Clubhouse @大眾春季減價之收獲 (4y6m)

最近又俾Ambrose玩番泥膠。見到呢盒Play Doh Makeables係整Mickey Mouse的，知道Ambrose一定會喜歡，又忍唔住敗了一盒給他！

Batman Puzzle Book @大眾春季減價之收獲 (4y6m)

這本Batman Puzzle Book 藏了在書架深處，很偶然下給媽咪看到，便遞了給Ambrose，看他的反應也是一般，但也沒說不要，看看價錢才幾十元，又敗了給Ambrose！書面上寫著5 Puzzles Inside，媽咪望望書面，其實也有少少疑惑，怎看也不像只有5塊那麼少，也沒細意研究，回家打開才發現，原來是有五份Puzzles，每頁有一份的，真的很不錯呢！

全語文故事@大眾春季減價之收獲 (4y6m)

有感Ambrose認讀中文比英文好，感覺上是用對了教材的關係吧！學校用的就是媽咪喜歡的「我自己會讀」系列，書的內容較簡單，而且不斷重複句型，或者因為是不斷重複的，所以 Ambrose也較易掌握吧！

有時候，晚上故事時間，媽咪也會用學校的「我自己會讀」圖書跟Ambrose讀起上來，有時Ambrose會跟著一起讀，有時並不會，還說他想聽故事。對於Ambrose來說，可能學校學的又在家中再讀，感覺不是真的在講故事吧！所以媽咪一直想著找一套類似的簡單故事給Ambrose，有時睡前並沒有太多時間可以講太長的故事時，可以讀讀一些較簡單的故事，又可認讀一下生字！

創意畫班@貼堂畫(4y6m)

唔係因為要寫blog，媽咪要為Ambrose畫作影相，真係完全忘記了之前一堂畫果隻老虎。上次畫完仲未油背景，上星期打算看看係咪又忘記了油背景的時候，找來找去也找不到，於是問問 Ambrose畫在哪兒，佢就話老師撕左！可老師又沒有向媽咪交代過！

創意畫班@第六十堂(4y6m)

今堂Ambrose畫斑馬，老師話Ambrose話一隻係斑馬爸爸，一隻係斑馬媽媽，下面有一個心，一半係爸爸，一半係媽媽的，所以媽媽果半，頭上面係有一個蝴蝶結的，代表係女仔，哈哈！這幅畫，挺有意思呢！

對講機 (4y6m)

Ambrose一直都唔係好知咩叫對講機，只係有一次想買玩具時，因為爹爹媽咪唔多想買佢所指嘅玩具，因而推介對講機俾佢，解釋完後佢又不感興趣，所以咩都無買，哈哈！

 

過後，忽然有一日Ambrose就追討要返對講機，真係有點莫名奇妙！不過廿四孝爹爹當然又話OK啦！只是，爹爹唔想去玩具店買玩具對講機，所以特意托爺爺走一轉男人嘅天堂　－　鴨寮街，買來了一對真的對講機給Ambrose！

Monster Attack (4y5m)

海港城Book Buddy半價時購入的手工套裝，未諗到係俾 Ambrose玩定係留黎將來送禮用，見減價又幾得意，買左至算，哈哈！

Home Art Jamming @ 流星(4y6m)

今朝一早Ambrose出奇地早醒，佢第一時間竟然衝左出廳畫畫，真係對畫畫非常狂熱！起初，佢畫左一個多角嘅黃色物體出黎，媽咪以為係雞腳印，點知Ambrose好嬲咁話係星星黎，嘩哈哈！媽咪仲諗緊佢究竟點解一起身就衝左出黎畫畫，只見佢無啦啦又打開左最近睇開嘅圖書，之後就攞起唔同顏色筆係咁畫，原來，佢係想畫番圖書入面果粒流星呀！真係服左佢呀！

英文名牌咭 (4y5m)

忘記記錄這兩packs英文名牌咭。前排海港城的Book Buddy搬遷半價時買下的，其實係classroom pack，俾學生寫上自己的名字用的。不過媽咪見到，想起Ambrose對於如何在線上寫小楷字仍然不甚熟悉，覺得這些咭也很精美，半價也不算貴，所以打算買來給Ambrose練練字的！而且，當時也在想著可以將咭紙過膠，一張咭可以不停重用，多好呢！

 

不過，買回家才發現家中的過膠機之前jam過，唔知係咪咁，而家開著一陣就好似又想jam過咁，同埋，咭可能太厚了，硬是捲不進機內，失敗了呢！

Home Art Jamming @ 牛(4y5m)

唔知Ambrose對畫畫係咪有練習嘅概念呢？見佢有時响畫班學完嘅畫，又或者自己創作嘅畫，有時會重複咁畫番出黎，都幾有趣！呢隻牛，才剛剛在畫班學完，又由木顏色畫了一隻出黎，哈哈！

Home Art Jamming @ 蹲著的青蛙(4y5m)

最近Ambrose在畫班學會了畫蹲著的青蛙，之前佢一直都只係畫橫躺的，這陣子就係咁畫蹲著的青蛙，畫得很可愛呢！

Home Art Jamming @ 女孩子 (4y5m)

相信呢幅畫係「與Matthew暢飲」的延續，問Ambrose係邊個，佢只係話女孩子囉！

Home Art Jamming @ 與Matthew暢飲 (4y5m)

同學仔當中，Ambrose最鍾意Matthew，日提夜提，一見面，就好似情人咁，好想痴埋去，行到邊，對眼就跟到邊，好不痴纏！佢兩個投契程度係連老師都定左佢地唔可以一齊上堂，只怪佢地一齊果陣太易進入忘我境界啦，哈哈哈！

 

Ambrose畫嘅呢幅畫，仍不忘Matthew，佢話係佢同Matthew喎，果然係好兄弟！

Home Art Jamming @ 史力加城堡 (4y5m)

Ambrose畫左個城堡，佢話係史力加套戲果個，而出面有架馬車，就係史力加被人捉左，驢子唔記得左佢果幕，真係服左Ambrose，套戲都好耐無睇啦，咁都仲記得！

Puzzle的突破 (4y5m)

一直以來，Ambrose玩Puzzle方面，真的可以話牛皮燈籠，點極都唔明，講完又講，應該要砌左條邊，再去找相類似嘅顏色再拼砌，可是，他都不理解，又成日睇都唔睇吓就話搵唔到，唔識砌！有時候，媽咪懷疑佢對眼係咪有毛病，但眼科醫生都睇過幾次了，都話一切正常，媽咪不得不承認，呢方面佢真係笨得要死！

既然係笨得要死，媽咪亦放棄了要佢玩Puzzle，畢竟，小朋友也不一定要樣樣皆能，如果佢真係對Puzzle無興趣，教多幾百次，結果都一樣吧！所以，家裡甚少Puzzle玩意。

聖誕節時交換禮物，恰巧抽了一盒怪獸大學Puzzle，於是Ambrose又開始接觸Puzzle了。當然啦，本來唔叻嘅佢，咁耐唔玩Puzzle，一玩起就真係要再從新黎過，Oh my God！

部件識字遊戲 (4y5m)

趁書店減價，買了這套部件識字遊戲給Ambrose，打算用此教他字形相似但不同部首的字，例如「楊」及「場」，「他」及「地」等。這些字很相似，Ambrose很易混淆了。不過，買了回定後才發覺，要重組一個字，可能需要好幾張咭，又要對位，並不是叠齊就可以出字，好像有一點點麻煩，以Ambrose這年齡用，似乎買早了，哈哈！

Home Art Jamming @ 青蛙(4y5m)

Ambrose最近好鍾意畫呢款青蛙，無人教佢，唔知點解佢會咁畫！爹爹仲取笑佢話好似蟑螂，哈哈哈！後來才發現，原來呢隻青蛙，係响一本英文故事書中出現，而且唔係主頁公仔，只不過係其中一頁的背景公仔。真係估唔到，Ambrose竟然睇到咁仔細，小小的一隻背景青蛙，佢都可以咁有印象，如果讀書係咁好喇！

創意畫班@第五十九堂(4y5m)

今堂Ambrose畫生肖動物，由於佢係牛年出世，所以揀左畫牛！隻牛，畫得真的不美，失望！

裝裱水仙花畫 (4y5m)

之前Ambrose在畫班畫了一幅水仙花畫，用嘅係宣紙，薄薄的一張畫，都不知怎處理。收起嗎？似乎太長了，要摺起；掛起嗎？又似乎薄了一點點，潮濕天氣很易捲起來吧！

 

結果，媽咪嘗試買了紅色咭紙自行裝裱起來，雖然效果一般，但似乎裝裱後較易處理吧！

Perfect Pop Maker @ Play Doh (4y5m)

已經好耐無俾Ambrose玩泥膠了，原因之一，係怕泥膠污糟，可以嘅話，都係俾輕黏土佢玩會好d！近排表姐買了泥膠套裝，Ambrose次次去親，都一齊投入地玩，那怕其中是公主套裝，哈哈！

 

昨日行經反斗城，看到一些泥膠套裝，不貴，只是$99，見Ambrose呢排咁鍾意玩，媽咪自動自覺就話買一盒俾無扭買玩具嘅Ambrose，見到佢個樣，既驚且喜！

 

今日開出黎俾Ambrose玩，不知幾開心，仲要攞埋以前買落嘅泥膠配件一齊玩，整吓怪物公仔，非常興奮！記得以前好似有過薯蛋頭先生套裝賣，可以任意砌上眼衣口鼻手腳等，如果仲有得賣就好了，相信Ambrose會好鍾意呢！

影像英文默寫法 (4y5m)

Ambrose嘅英文認字真係非常之差，教過的多會轉過頭就忘記，又或是在這本書認得，同一個字出現在另一本書上，又話唔識，成日都要攞番d書出黎俾佢知道係同一個字，叫佢再諗吓佢就會識番，真係令人頭痛！

 

中文字方面，Ambrose進度亦不算很好，但總算可以，總覺得佢認中文係好過英文好多，唔明點解。但肯定的是，教Ambrose認中文時，如果可以盡量描述個字形似咩似咩，佢係易d去記到。而且，加上之前有用過「有趣的文字」，以圖像方法顯示個字係點變成的，似乎也有點點幫助。當時，媽咪就想，如果英文有類似的教材幫到Ambrose認字就好了！

Art Jamming @ 青蛙 (4y5m)

今晚出外晚飯，Ambrose等食無野做，隨手攞左枝鉛筆，在餐紙上又畫畫畫了，畫左兩隻青蛙。一隻係佢今日上畫班學識嘅，正面伸脷的，很可愛；另一隻就係瞓左响度嘅，唔講真係唔知佢係青蛙，哈哈！

星星老師@第二十八堂(4y5m)

今堂畫青蛙，媽咪覺得好靚呀！唔知幾時，Ambrose知道蝌蚪就係青蛙的bb，哈哈，有d慚愧，媽咪無教過佢！其實細心d睇幅畫，都係用綠色為主調，只係有好多唔多深淺嘅綠色，所以成幅畫嘅色調都好搶眼唔會悶。

 

Ambrose話，畫青蛙塊面要溝色架，中間位置同邊位有d唔同深淺的。不得不讚老師，喜歡她會教Ambrose這些技巧，令平平無奇的一幅畫，看上立體很多，亦很豐富呢！

創意畫班@第五十八堂(4y5m)

今堂Ambrose返畫班時，媽咪見到有不少小朋友畫財神揮春。上一堂， Ambrose其實已經畫左一幅「大吉大利」，媽咪有點擔心老師並唔知道，又會叫Ambrose再畫揮春，有感農曆新年已開展了多天， 再多嘅揮春也都不會再貼上了，所以，在Ambrose進課室前，已不斷提醒Ambrose，如果老師派紅紙畫畫，便要同老師講佢已經畫過揮春了，畫其他吧！

幸好因為交學費的關係，媽咪送了Ambrose進課室並未離開，剛好真是見到老師派紅紙，見Ambrose竟然無反應，媽咪忍唔住同老師講，Ambrose已經畫過了，老師才轉了畫正常畫。

今堂老師話教Ambrose畫老虎，佢話Ambrose畫得好快喎，不過，都係未油哂，只畫左老虎，背景未油，要留待下堂繼續。呢隻老虎，略嫌唔夠威嚇，其實有少少似貓咁！

DIY鐡甲威龍頭盔(4y5m)

唔知幾時，Ambrose愛上了鐡甲威龍，响反斗城見到鐡甲威龍頭盔，又兩眼發光了，極少有地講左好多次好想買！仲要同完媽咪講左好多次，媽咪都唔肯，識得走去同爹爹講，爹爹當然都唔肯啦！其實個頭盔又唔係貴，只係家中已經有好多唔同嘅面罩，又刀又槍又劍，想起個頭盔大大個的不易收藏，真的不能再多，不想再買了！加上，爹爹媽咪絕對唔想開先例，俾Ambrose覺得扭買玩具係可以得逞的，所以買，一定唔可以架喇！

要安撫傷心失望嘅Ambrose，爹爹竟然話不如同佢一齊DIY整一個出黎啦！於是，大家一齊想吓有咩辦法，可以整到個咁圓嘅頭盔！真係幾難吓！去到文具店，見到有個麻質小籃，笠上Ambrose頭上，又好似剛剛好，不過就唔多夠圓，又唔知點去除兩邊手柄，上色同埋加埋條紅邊。諗黎諗去，都只係諗到吹個氣球再痴上多層報紙造模，或者可以整到！於是又買齊材料，回家開工去了！其實買齊材料個價錢，真的不比直接買個頭盔平囉，仲要唔知得唔得！＠＠

Lego 也要洗白白 (4y5m)

Ambrose好鍾意砌完大粒Lego之後，將佢嘅製成品長期放响Lego檯上唔拆，不時自我欣賞。唔太阻地方媽咪都由得佢，但，Lego長期放响度，其實有積塵問題，尤其是Lego果d圓形孔，要抺都唔會乾淨。最好嘅辦法，就係用水洗啦！一直都無時間去處理，直到農曆年假嘅開展，終於都可以同Lego 洗白白了。成桶Lego 倒左落個浴缸，順便用滴露浸吓，估唔到，可以多到成個浴缸都係！由於Lego 入面有屋頂有人仔，浸左落浴缸度，就好似打完風咁，有點慘不忍倒嘅感覺！

 

第二日，爹爹話Ambrose見到Lego洗白白，笑到咯咯聲，唔知有咩咁好笑呢？！