Lego 70724 (4y5m)

尋日朝早好衝動之下買左套Iron Man Costume 俾Ambrose，返到屋企試著時就發現有爛，爹爹當機立斷，即時再返去反斗城要求換貨。因為Packing問題，基本上套衫一開就係要拆哂成個盒，剪斷哂所有索帶，要換貨都好似有點唔好意思咁！不過，件玩具有爛，真係唔拆開又點知呢？！所以，唯有硬住頭皮去換。因為玩具構造問題，爹爹媽咪深知就算換番同一件貨，都好易再爛，所以爹爹寧願加錢都想換第二件玩具。

去到反斗城，同個經理講左件貨點爛，佢第一個反應都係話公司規定只可換回相同貨物。當經理質疑個圓膠片其實係咪本身都係分開，唔係痴响盔甲上，同時間，另一職員入店內拿取另一盒貨過黎做對比。攞出黎果盒，個藍圓膠片係痴埋嘅，個經理見到都無話可說，但爹爹媽咪真係係唔多想再要件貨，就同個經理講，塊膠片而家就痴埋，但個設計真係好易爛囉，點有信心換回去玩呢？！本來都已經打定輸數無得換架喇，呢個時間個staff正測試果塊藍圓膠片係分開定痴埋，無啦啦俾佢大力一撳，“click”一聲成塊膠片甩左，爹爹就已經即時話，「拿，你都見到架啦，撳吓都爛左呀」，於是，個經理無再講其他野，答應俾我地換其他野喇！實在太好彩！又，不得不讚反斗城，雖然有時貨品價格係比其他地方貴些，但有換貨制度，又真係買得放心d嘅！

之後，就係換咩玩具好嘅問題，真係頭痛！有d玩具，基本上係唔想買俾Ambrose，覺得多一件唔多，花了錢又唔大得著咁，所以爹爹媽咪都盡量引導佢選擇Lego，認為砌Lego都係益智，而且砌完再拆再砌，都可以好耐玩。點知呢個Ambrose就唔大件都唔話要，吓吓都話要成千蚊一盒果d！本身套Iron Man Costume都只不過係$250，無啦啦又無特別理由就買成千蚊玩具，也太過份了吧！幾經拉鋸，終於都選擇左一盒飛機，呢個系列之前都未買過，家中又多數係車，所以極力推介俾Ambrose試吓，好彩佢都接受，哈哈！不過埋單要$500，比起套Iron Man Costume多個double，真係無啦啦出血喇！

雖然盒Lego寫嘅歲數係8-14，但Ambrose大致都可以應付到，佢可以跟住說明書每個step去砌，只是可能有時有少少錯漏，要大人出手望一望糾正返，又或者有parts係要大力少少去砌或拆番開，佢至要大人幫手，整體而言，Ambrose可以自己坐响度砌唔使人點理，媽咪覺得佢好叻，亦都開始明白，唔試過真係唔知小朋友嘅潛力係點！