DIY鐡甲威龍頭盔(4y5m)

唔知幾時，Ambrose愛上了鐡甲威龍，响反斗城見到鐡甲威龍頭盔，又兩眼發光了，極少有地講左好多次好想買！仲要同完媽咪講左好多次，媽咪都唔肯，識得走去同爹爹講，爹爹當然都唔肯啦！其實個頭盔又唔係貴，只係家中已經有好多唔同嘅面罩，又刀又槍又劍，想起個頭盔大大個的不易收藏，真的不能再多，不想再買了！加上，爹爹媽咪絕對唔想開先例，俾Ambrose覺得扭買玩具係可以得逞的，所以買，一定唔可以架喇！

要安撫傷心失望嘅Ambrose，爹爹竟然話不如同佢一齊DIY整一個出黎啦！於是，大家一齊想吓有咩辦法，可以整到個咁圓嘅頭盔！真係幾難吓！去到文具店，見到有個麻質小籃，笠上Ambrose頭上，又好似剛剛好，不過就唔多夠圓，又唔知點去除兩邊手柄，上色同埋加埋條紅邊。諗黎諗去，都只係諗到吹個氣球再痴上多層報紙造模，或者可以整到！於是又買齊材料，回家開工去了！其實買齊材料個價錢，真的不比直接買個頭盔平囉，仲要唔知得唔得！＠＠

一家三口DIY，首先係用白膠漿開水，再用上畫筆掃上膠水再痴報紙，開頭Ambrose好熱衷，响街度都急住要回家整頭盔架，亦都好熱衷要幫手。不過，當佢痴吓痴吓，手上面黏上白膠漿嘅時候，佢就開始有d唔自在了，之後咋咋帝帝咁就話幫手撕報紙，唔痴膠漿了。但因為手上仍有白膠漿黏著，當佢撕報紙時，總係痴住哂，仲有就係成隻手都黑哂，見到佢望住自己對手，黏吓黏吓，就知佢有幾嫌棄，哈哈！媽咪見佢咁嘅樣，咪叫佢去洗手先囉！佢洗完手之後，就無再返黎幫手，而係走左去攞本填色冊扒在地上自得其樂咁油顏色，哈哈哈！

天氣好潮濕，要等乾後再痴多幾層至夠硬吧，且看爹爹媽咪係咪真係整到鐡甲威龍頭盔喇？！