我的相機

其實我都幾鍾意影相,而家好多手機都有影相功能,我部手機都有,不過總覺得唔太靚,同唔慣用手機影相,可能我都係d電子野既白痴,用電話只係識打出打入,唔識入線,飛線,開頭連響震同部都唔識較,所以用手機影相對我來說都有d難度,因為攪唔清方邊個製影相,成日攪錯開關製來影相,所以成日跳左出去,講起都羞家!

都係用番相機影相先攪得掂,因為無論咩牌子既機,永遠都係果個位係影相製,唔會攪錯,影完又係推一粒製就可看回那張相片,好方便~~~但係老公番公時常都要用相機,佢又成日唔記得d野擺响邊,突然想影相都無相機,加上而家寫blog,好想有部相機跟身,所以都唸過下買部新既相機……

老公成日話Canon相機好用,但呢期Canon部新機唔太靚,我見雜誌有部Samsung機好靚,推蓋式既,重有金色紅色,不過未出就唔知價錢,又唔知Samsung得唔得。Sony都有好多選擇,部部都靚,不過老公曾經話Sony機唔太好,重話唔知用Sony機就要另外買Memory卡,因為唔Common,我記得佢講關於相機既野就係咁多………以我對電子野咁白痴同有限既認識,我都係唸住買本DC雜誌鑽研下,順便等下部Samsung機再唸,可能過多一陣我都唔恨買……….

點知今日自己行街,行下百老滙八下Samsung部機出未, 新到Sales重唔知我講邊部,又再睇下Canon部相機,都係麻麻,又順便睇下Sony機,嘩!!!又真係好鬼靚。Sales哥哥重話其中一部Sony機今日有特價,更送1GB卡同百佳現金卷,唔…即係唔使再買Memory卡?問埋有無得分期…今日買好似抵d喎……..就係咁我自己買左部新相機,無問過人既意見,無做research……雖然我鍾意既粉紅色無貨,如要粉紅色就要買高一型號的相機,即貴成六百蚊,相機呢家野,我真係用唔得到幾多function,再多都係浪費,所以我都係買左最平又唔太out (function方面)果部,得白色同銀色,我梗係要白色啦~~~~

心情好興奮!!!不過老公返來知道覺得點解我咩都唔識又唔問下佢就咁快買左部機,重要係Sony,好似麻麻地開心咁,唉!!!

捐血

今日同同事落左centre捐血,初初話捐血既時候大家都好驚訝我都去。事關我既形象實在太潺弱嘞,捐血似乎唔多啱我,就連老公都叫我唔好去,不過我好堅持我係長期捐血者,唔會有問題,而且我夠重,係可以捐,就係咁我就毫不猶豫走左去。

唔知點解落到去見到自己既record最後果次捐血原來已經係2003年既事,開始有d緊張......

瞓落去床等量血壓既時候重有d暈咁,不過可能係緊張。護士問我夠唔夠重,我都瞓低左,先問人,你唔識睇份form架咩?

捐完血,比印象中累,可能身體已經不知不覺差左,以前都唔會累到咁.........老公重話想去深水埗睇game,我真係累到死,但都唔敢出聲,費時佢話鬼我唔聽佢講走去捐血.....

都係佢醒,見我無神無氣反應遲鈍,匆匆食完野就回程.....好體貼!!!

大師

今晚又係上鋼琴班,工聯會既班,係就係平宜,但係人多,成十個人一班,所以每堂都個半鐘咁長,比起一對一私人教授半小時,實在有理,因為老師要逐個逐個去聽學生彈都很花時間啊!但對於音律一曉不通同唔知有無恆心學下去的我,工聯會既堂應該啱我,夠平!!!到我認真要學至找私人教授都未遲!

今晚要彈既係有和音的Jingle Bell,因為唔想咁早上去同成班人一齊練琴等老師埋身聽,故意遲到。點知老師病左,黎左個代課呀叔,我去到既時候剛好他叫同學停止彈琴,並要我們逐個出去彈俾佢聽…….吓!!!即係Solo? 好驚喎!我都無點練過,點彈呀?重要咁多人望住…………

Wii

今日係我侄女兩歲生日,同屋企人出街食飯。難得佢呢兩日好乖,終於無見到我就即走,都肯同我玩下。食完飯後叫左二哥二嫂同侄女上我屋企玩Wii.......

原本以為佢地無興趣,因為二哥呢期醉心直昇機,從來好少見佢打機,點知一開網球Game打,佢好鬼投入,重大動作揮"拍" (因住打爛我部電視呀!!!);二嫂俾我感覺佢唔多敢試新野,點知一樣打開就上癮,唔夠二哥打重話今晚唔贏佢唔返屋企@_@ (唔係下話???!!!)

响佢地投入打機既同時,佢地個女就無停咁搵野玩,行來行去,講Bebe話,飲水,可幸係佢竟然俾我抱。細路仔就精力無窮,我第日重要返工,唉........

突然間只見欣欣成杯水倒左,成個人扒响地....嘩!!!! 我二哥竟然打波打到佢個女,佢係打中欣欣頭後,所以欣欣成個扒前,好彩佢見唔到邊個打佢.......不過佢喊都喊傻,二哥係當真波咁打,果度無情力,....唸都唸到好痛!!!!

不過佢地都無影響心情,擾攘一陣又黎過.......重要唔理個女條尿片已經爆哂,無褲仔通屋跑 @_@ (求神拜彿你唔好尿尿呀!!!!)

壽星女都係好運d....中頭獎都一不離二.....今次係呀媽,同埋中前額,重要係親眼見到呀媽打落黎,佢喊住叫爸爸,唔肯俾呀媽掂。雖然欣欣咁慘,但係我地呢幾個大人就笑到碌地,呢個生日唔係佢最難忘,而係我地!!!

就係咁連中兩元後,佢呀媽終於叫走!奉勸各位玩Wii真係要小心d~~~

 

教堂行禮

尋日老公個朋友結婚,响教堂行禮,第一次去觀禮,唸住幾romantic,教堂喎!!!!果段咩無論將來疾病、困苦……都此志不渝, 重有我願意, 唸起都正啦~~~點知呢d都只係電視橋段,係精髓版本,原裝教堂行禮,得罪講句,好悶!!!!我唔係教徒,唔識佢地既儀式,又讀經又唱歌,我以為行入去後就講果段野同我願意跟手唱下歌就得……..個幾兩個鐘,唉!!!!

錶

我有既錶話多唔多,話少唔少,都有5隻,一律都係鋼帶表,皮帶既錶,總係覺得怪怪的………出左汗吸哂,好似好dirty咁……….

日常鍾意(應該係習慣)戴黑或白錶面果兩隻多,圓錶面銀鋼帶,夠平實。有一隻很幼錶帶,錶面粉紅色,小小的,我覺得很elegant,平時很少戴,總會是夏天穿吊帶或連身裙時才戴,感覺身體也幼幼的,很纖細,哈哈!!!上年貪新鮮買左隻白色Mickey Mouse錶, 好鍾意,它的表面還圍了粉紅色的水晶,很sharp,一見鍾情之下即買!!!

Baby G 鋼帶錶係老公拍拖既時候送,一樣是我喜愛的粉紅邊,係我唯一的跳字錶。只是錶面很凸,有點重,所以很少戴。

老公成日話我鞋多,唔明我點會穿得哂,女人要買野從來都唔需要理由,一定要有既就係襯邊件邊件衫……….

但我唔明點解老公今晚會無端端會靜雞雞走左去買隻錶送俾我,好驚喜!!!!佢話見我呢期勁愛衛衣,所以買隻紅錶俾我襯衫,我鍾意呢個理由,哈哈!!!

可惜既係我隻手重痛,隻錶係鈪形,戴上手後會不斷撞上手背,所以未戴得囉~~~

手鈪

三月十六日係我公司假期，好開心無端端多日假。

之前呀媽問我幾時得閒陪佢買玉手鈪，唸落自己都少左好多陪佢，連電話都少左好多（梗係怕我發脾氣，嫌佢煩），衰衰咁，所以專登放假陪佢揀番隻玉鈪仔帶下。

玉呢家野真係佢唔識你，你又唔識佢，我地淨係揀色水就算，不過都花多眼亂，心大心細，我自己又揀埋一份，好開心。

我記得我第一隻鈪係我大學year 2暑假時侯買既，果隻係瑪瑙，色澤好，紋又靚，簡直係一見鍾情，雖然難戴左少少，但係好貼手好靚，重越戴越令，可惜幾年後既一日突然裂左……………………..好唔開心！！！唯有搵過隻，唔知點解當你要搵既時候周圍都無，心急之下响間賣水晶既鋪度買左隻近透明藍的冰玉鈪，戴左上手都麻麻地鍾意，但都無得話唔要，張就下啦！！！呢隻鈪大概都戴左年零兩年就自己除左，之後有太多人結婚自己又結，就無特別搵，費時同d晚裝唔match啦～～～

呀媽同個老細都話戴左手方便做野，我以前戴開右手，唸下唸下聽下佢地話啦，唔使十秒就戴左，隻鈪係圓身，我又好脆弱，戴一戴就紅左，第日重瘀埋………..最慘係我原來真係唔慣戴左手，成日同隻錶撞到鈴鈴聲好煩，就係咁我又走左去叫呀大叔幫我轉番右手。

我都知隻鈪細，我自己响屋企試除過，少少都郁唔到，呀大叔話無問題既時候我都鬆一口氣……………點知？除已經好痛，直頭痛到腳仔軟，好彩佢好快手，除完之後佢見我個痛樣就攞支藥油幫我摔幾下，再摸下我隻右手同我講：「傻女你隻右手咪重硬？！」但佢都話可以轉……………梗係啦都除左嘞！！！

哇～～～原來真係好難戴，重好鬼死痛，最終都攪店左，唉！！！！代價係兩隻手背都又紅又瘀，好恐怖呀！！！呢個故事教訓我要忠於自己，如果當初我一早堅持要戴右手就唔使咁慘啦！！！

電子琴

好開心,今日終於買到個電子琴,以後都可以留在家練琴,唔使限時限刻落會所練。雖然個琴係最cheap既,又無touch response (即彈鋼琴是需要力度,一般電子琴無論你彈大力細力都一樣大聲,而且琴鍵亦輕,但鋼琴則會隨你彈的力度而不同,現時有些電子琴有touch response,即和鋼琴一樣,手感亦一樣),我可以幾時練都得,最主要係練手指位同看譜.....

呢一部係我生平第二部琴,第一部係我小學時父母買俾我,大概係想補償我,因為小時侯我都學過琴,家裹無琴,所以媽咪會帶我出入琴行,學學下佢就懶得帶,我就從此同琴絕緣....後來就買左個琴俾我日彈夜彈,我重記得細個既時候個琴擺响床邊彈...而家呢個琴有成61鍵,要擺上餐桌上先彈到。

雖然個琴都只係一千蚊(d鋼琴有d貴到要成十萬蚊),但係我真係好開心~~~希望第日陀bb既時候我已經識彈多d歌,人地話彈多d歌俾bb聽,第日佢會多d天份喎!

九型人格

自我型

自我型正正是藝術家的性格，多愁善感及想像力豐富，會常沉醉於自己的想像世界裡，表現會比較抽離，都是因為跟身邊人比較，覺得自己不同，其他人不會明白，又覺得其他人都擁有很多你們沒有的東西，所以在現實的社交圈子裡很難得到滿足。

自我型的朋友很敏感，與人相處很多時靠直覺，因為他們對自己、朋友及環境的需要及變化都很敏感！他們很喜歡獨處呢，因為他們很享受不斷內省，認識自己，尋找自我。曾聽有人說：「不懂獨處的人，不會懂得與人相處」,正正反映這種性格的表現。他們既能專注自己，也懂得尊重別人的特質和看法。很容易，自我型的人會把自己在社交圈子中抽離，因為他們覺得自己跟別人不一樣，其他人不能體會他們的處境及心情。所以他們會沉醉之自己的想像世界裡，不願意打開自己。因此，他們可能會變得任性、傲慢、離群。

我覺得幾啱喎！！！

一念之間

前面有條分岔路,做定唔做好呢?究竟繼續走下去還是走另一條路呢?

有無搞錯

大年初三...係二月二十日。今日係三月二日。

我發現一樣極之恐怖既野响廚房.....年初三煮過飯既飯煲重浸緊呀!!! 芝士就話要發酵啫,飯唔使下話!!!

Do Re Me....

今日去左上堂，唔係讀書，係鋼琴～～～

係唔係每個女仔都對鋼琴有情意結既呢？好多女仔都會在出來工作後走去學琴，我都唔例外。ｄ人話人大左手指無細路仔咁靈活，又無時間練琴，不過有理無理，我都報左先，之後先唸啦！

下個星期就要彈到２首歌，好緊張～～～ 歡樂頌同Twinkle Twinkle Little Star～～～