今日book左私家照結構性超聲波，睇吓小b嘅器官有無問題。本身睇緊嘅私家醫生無得做呢樣檢查，政府又要遲成個幾兩個禮拜先有得照，到時都成廿三週，好似好遲咁，聽人話政府照得求其，所以我早响十四週嘅時候已經book定巫醫生。之前做第一次產檢都有唸過搵佢，但d人話佢好full，見Ellen Law睇開果個都ok啦，所以最後都無睇巫醫生，而家照結構，第一時間就唸住搵佢嘞！
我都唔太緊張，反而老公重緊張過我，可能我日日都可以feel到小b响我個肚度，感覺踏實d啩！三點幾去到診所，唔使等好耐就到我嘞！個女醫生好nice，雖然知我睇開第二個醫生都無咩唔高興，氣氛都好輕鬆，唯一係佢比較疑惑我個預產期點解早左！咁佢問完d資料，好快就去照小b嘞！
成兩個禮拜無見小b，好掛住佢呀！巫醫生話小b啱啱“僕”左响個胎盤上面側左塊面仔過黎，姿勢係差唔多同我一樣，即係我瞓左响度，佢同我一樣，頭仔係我個頭嘅方向，腳仔係响我對腳嘅方向，而唔係打橫响我個肚度，我覺得好得意，嘻嘻！巫醫生開始逐樣照，不過小b唔知係咪太聽爹爹話，爹爹前一晚叫佢乖乖哋伸高兩隻手仔俾醫生睇佢d器官，唔好遮住唔俾醫生睇，點知小b真係舉高手仔，攪到巫醫生一開始想睇佢有無兔唇同鼻骨都睇唔到，要轉頭照完其他野先再睇。咁巫醫生就開始睇頭仔，大腦，小腦，脊骨，心臟，肺，腎，大脾，仲有數手指仔同腳指仔，有d部位我哋都唔係好睇得明，巫醫生重好仔細咁解釋，甚至乎做埋動作俾我哋睇，真係好細心。之後再睇番面仔，小b應該全程瞓左，佢無轉過姿勢，亦都無郁過，巫醫生唯有震吓我個肚，小b兩隻手仔重係遮住左右眼，不過都啱啱好淨係見到嘴仔同鼻仔，醫生話都睇到九成，ok喎！
巫醫生話我嘅預產期都係偏向番之前計出黎果個，即係九月九日，不過因為我睇開果個私家醫生改左去九月二日，佢就無話幫我改番，佢話差一個禮拜都唔大問題，只係如果用九月二日，咁小b照出黎就細左幾日，用九月九日就照出黎大左幾日咁解，如果唔係差成個月咁多，都叫正常喎！
另外，巫醫生話我胎盤低，佢重解釋得好詳細俾我哋知胎盤低係咩黎同埋會點，雖然我自己都上forum睇過，大概知道係咩一回事，我都好appreciate巫醫生講得咁清楚俾我哋知，even好多人遲d會升番高而對佢哋係無影響，巫醫生都無話費時講咁多你知住！不過聽佢嘅口吻，我哋feel到佢覺得我應該唔會點升，就算升，亦都唔會升得好多，要開刀嘅機會好大。我又唔醒起要問佢我而家係胎盤前置第幾級，只係聽完佢講之後，唔似得之前咁有把握遲d可以升番去可以順產，開始意識到可能我嘅胎盤係好低，所以就算俾我升到都未必順產到！我又唸巫醫生無講我第幾級，可能係而家斷症又太早，始終距離三十至三十二週又重有時間嘅！我從來都無唸過開刀呢樣野，今時今日，聽完巫醫生咁講，真係要有d心理準備！老公一出醫生房就問我不如book定私家開刀生喎！我就話而家咁遲，私家都無位啦！其實呢個係原因之一啦！我都係怕去私家，一來唔知最終幾錢先落到樓，好難預錢咁，二來而家又唔知係咪真係唔升一定要開刀，咁急book又好似一定開硬刀咁，我都好驚，重未有呢個準備，三來我又覺得如果真係咁嚴重，又會大出血，又呢樣果樣嘅，咁响政府生好似重安全d咁！老公同我講話佢頭先响醫生房，緊張到肚痛，雖然我有時都唔係好明點解佢成日都咁緊張同咁大壓力，不過佢都係緊張我啫！但係我都忍唔住要笑吓佢！
今次睇巫醫生可以加一百蚊要埋DVD，因為我果個私家無DVD，咁我哋又未必會照4D，所以我都有加錢要隻DVD。返到屋企開黎睇，雖然只有畫無聲，重係黑白嘅，感覺好得意，巫醫生重由2D轉左4D影左少少俾我哋睇，見小b係咁用手仔遮住塊面仔擰擰吓咁，好似講緊：「唔好啦！唔好睇我啦！」好似好怕醜咁，好攪笑！
