BB衫

老公一路都唔係幾想我咁早就買定BB野，即使係BB節有特價，佢都話唔好，成日都話遲吓先。我唔太反對穩定d先買嘅，不過我都四個幾月，都定定哋啦，我又成日擔心到七、八甚至乎九個月嘅時候，我未必會有力氣去行街買野，所以成日都想早d買定，早d安心啦！其實都唔係好多時間，距離七個月前都只係有兩個幾月，咁多野要買又要揀，差唔多啦！

 

可能九號睇完醫生知道胎盤低，老公怕我唔開心啩，復活節嘅時候終於去左買BB衫，咁啱Mothercare响四月用AE咭有八五折，原本老公恩淮買一pack衫，哈哈，我最後買左兩pack，有六件架嘞！老公見有折，佢竟然想買個沖涼盤，個盤係set裝，有個兩格盤仔、海棉同長頸鹿包頭毛巾，未折都要三百幾四百，我覺得貴左少少，老公話好抵，一set咁多野折左都係三百鬆d，我從來都無見過佢咁熱衷想買BB野，我就無阻止佢，雖然個盤咁早買番去都好阻地方，哈！

 

Ellen Law之前話花園街d衫仔質料ok，價錢又抵，復活節嘅時候，我哋又去過一次，原來呢次係我第一次去花園街，我成日以為女人街就係花園街，到真係去到花園街嘅時候，我先發現我未去過果度！好攪笑！花園街真係好多衫仔賣，不過我哋都係睇多，同埋我哋發覺無論响邊度，b女嘅衫仔一定係靚過同多過b仔嘅衫！好似我見到一個檔口d衫超靚，我重睇左好耐，問左好多野，到最後一様野都買唔到！後尾去左一檔呀叔開嘅，果度d衫仔應該係做出口嘅，牌子係carter’s，我响網上商店都見過，佢d款又好cute，所以都忍唔住買左幾件，其中一件係南瓜，個pat pat位同包腳位都係南瓜造型，好啱萬聖節著呀！