第三次政府產檢

今日一早要去灣仔做產檢，原本應該係去贊育，不過贊育已經將我refer去附近嘅母嬰健康院，都好嘅，贊育果條斜路咁斜，行番落去再搭車都好“甘”，而家間健康院都近公司，睇完就返工，唔使咁頻撲！唯一唔好嘅係今日九點要去到，重早過返工咁，睇完又無咩地方可以行，唯有早左返公司，d同事話我蝕左囉，無計啦，周圍行都累啦，返公司休息吓都好嘅！

 

今日自己去產檢，都ok啦，政府果d產檢好簡單，都唔值得攞假去。今朝起身有d反胃，其實過左四個月嘅時候已經好好多，好奇怪今朝會反胃同有d頭暈，如果唔係要產檢，可能我都請左病假！好勉強食左個唔好食嘅早餐就去健康院嘞！去到都係磅吓重驗吓尿等叫名。第一次叫名係見姑娘，循例問左幾句，睇你有無特別唔舒服，睇吓你有無期要返贊育咁，就又出返去等見醫生。邊睇佢哋播嘅片邊等叫名見醫生，都唔係等左好耐就叫我，入到去又係問你有無唔舒服，咁我又無咩咁咪話無囉，然後問我小b郁未，咁我話郁啦，佢就循例摸左我個肚兩下就話ok正常，之後都有聽小b心跳一陣，就係咁就話我走得喎，快到真係唔知檢查左邊様，好似純粹聽吓小b有心跳就話得咁！如果唔係要响政府生，都真係唔想黎，講真，我都有睇私家，所以都係以私家為重，呢d政府產檢俾到診都係半日，如果唔係近公司，我唸我都唔想大住個肚又要產檢，又要撲返公司，你估唔辛苦咩？重要係呢d產檢又唔係full paid俾我，都要扣人工，咁嘅質數，真係睇唔睇都罷咁！

 

講開胎動，自從兒童節開始“好似”feel到之後，又有幾日唔係咁feel到，後來復活節假嘅時候，我就好confirm真係小b郁嘞，因為佢大力左同郁多左！個感覺都好得意，唔知佢响肚入面係游緊水、打筋斗定轉身，又唔知邊度係佢嘅頭同腳，總之個肚有時震震吓咁，好奇妙！放完復活節假後，個肚好似突然間大左咁，可能因為小b郁多左要多d空間啦！