我要同小b玩遊戲

自從兒童節feel到小b郁之後，我就開始等待住小b，開頭都無咩點郁，攪到我以為係自己嘅腸胃抽抽吓咋！後尾到復活節，小b郁大力左多左，我肯定係佢郁嘞！放假嘅時候，我好鍾意瞓醒左之後唔起身，响張床靜靜哋等小b起身，我會心裡面同小b講，叫佢起身就踢吓媽咪，哈哈！但係到小b真係踢我嘅時侯，我又會話小b你係咪真係瞓夠架，佢又會踢吓我，咁我又會話小b係咪想媽咪起身，佢又踢吓，我又想佢踢多d我，我都唔起身，再問真係？哈哈！問多幾次可能嫌我煩得濟，小b就唔理我嘞！咁樣玩法通常都玩成個鐘，放假都無所謂嘅！要返工就唔可以太耐嘞，不過自從有左之後都瞓得好差，一晚醒幾次再瞓番又有，定時定候醒左要去廁所又有，到最近係瞓幾個鐘醒左就瞓唔番！所以我都重可以同小b玩一陣，咁我返工就唔會一而再，再而三咁問佢係咪要媽咪起身，可能佢都知媽咪要返工，通常小b都踢得快d同密d黎回應我，唔似得放假時問一句要等一排先肯踢我（唔通小b瞓唔醒，賴床？！）重有好幾次我自己都半夢半醒，我都未同小b傾偈，佢就係咁郁，好似知道我要起身返工，叫我唔好再瞓咁！

 

我又發現小b郁係有模式嘅，返工嘅日子會有規律d，午飯過後都有小小郁動嘅，到五點幾，小b好似知我放工咁，開始活躍起黎，斷斷續續都會郁到八、九點嘅，再之後就係到我臨瞓果陣嘞！臨瞓果陣就會微弱d，但係一瞓低打側瞓佢又會大力d郁好幾吓就靜落黎，唔，我覺得小b鍾意我打左側瞓多d，因為通常打左側瞓，佢又會郁多過打右側瞓架！小b有幾次好百厭，大肚婆可能個肚大會壓住膀胱啦，所以容易d急vivi，有幾次我放工前去完vivi，到上車坐落無耐又急過，小b又係咁踢，我叫小b唔好向下踢啦，向左向右都得，係唔好向下，點知佢都係繼續向下踢+__+！可能小b响肚入面係打橫，所以佢唔係向下踢緊而係向左右踢緊啩！