Baby Plus

前日去完巫醫生度，唔知係咪睇完果度嘅雜誌，老公忽然間話想買部baby plus胎教機。之前喺forum都聽過吓，不過就無咩研究，只係知道俾小b聽d類似心跳聲，上網check過都成千幾蚊，好貴！星期六果日去左沙田荷花望吓，嘩！千八蚊，真係貴左d！我唔想嘥錢，而且人哋話十八週開始用，我都二十週幾，遲左又好似好唔抵，小b出世又無用嘅，所以都係叫老公唔好買！唔知點解佢都好想買咁，返到屋企佢就上網睇吓有無得bid，又俾佢搵到一、兩個，二手都係五、六百蚊，咁我見又平左咁多，而且呢d野二手都唔會污糟得去邊，咪話都好啦！不過部機要帶住早晚聽一個鐘，老公都有問我會唔會聽，我唸都無壞嘅，對小b好嘅，買左返來都會聽嘅！好啦，決定左買嘅時候，佢又話都係唔好買二手，呃左我話好！！！後尾又俾佢搵到個人話直接攞貨，重係全新嘅，同荷花果部一樣，都只係賣八百蚊，佢就即刻留contact俾人話要買。因為係半夜留言，都唔知幾時先有人覆，又唔知點解老公咁心急，佢話聽日無人覆佢，都要買千八蚊果部！我真係覺得佢好得意，唔知佢唸咩？！平時我話買小b野佢又話遲d先，自己又．．．．．．．小b第一份玩具，都係爹爹食lunch見到自己買返黎，我見到嘅時候忍唔住笑佢，唔俾人買，自己又走去買！

 

星期日瞓醒覺都無左回事，唸住老公要買baby plus嘅衝勁都減哂啦，點知佢電話响，原來賣家call佢，只係聽到佢問人今日可唔可以交收，咩都無問，只係一心要約好今日要貨，好攪笑！最尾我哋都專登揸車去黃埔攞！

 

部機真係新嘅！因為個seal都無搣過，同荷花果部一樣，係packing個顔色唔同，重有部機賣家保七日，過後就要自己send返去美國攪，咁可能荷花果部貴在响香港做保養啩！

 

原來部機係會發出d“咚”“咚”聲，有十六個節奏，根據佢嘅説明去聽，本來應該大概九日轉一次節奏，不過老公話有機會早產，驚未完哂就生得喎，咁我大概計過一個星期聽一個節奏，差唔多去到三十六週就完哂，咁一個星期轉一次又易記d嘅，所以都係用一星期黎做指標嘞！我起初以為部機有得較大細聲，原來係無嘅！而且一開機，其他人都會聽到果d“咚”“咚”聲，咁我日頭要聽果一個鐘就有d難度，無可能攞出街聽啩！好odd啫！咁因為我朝早或者半夜成日都會醒左瞓唔到，所以都plan住醒左果時聽，雖然d聲唔太大，不過瞓緊覺全屋都無聲嘅話，細細聲都會覺得嘈架，咁就難為爹爹嘞！