今日去私家覆診，同上次覆診都只係相差兩星期多少少。因為上次醫生話我胎盤偏低，會容易出血，見血要去急症室。而家都過左頭四個月嘅危險期，叫穩定，之前都見過啡，就算再見血都唔會太慌，亦知道一定要去急症室先會有醫生睇，預左自己係渣d架嘞，所以我聽到醫生咁講都無為意係咪嚴重野。返左屋企上網睇吓先知咁様唔係幾好，如果胎盤太低，除左會出血，重唔可以自然分娩，要開刀生，如果唔係會失血過多。我睇完先知驚，上次唔知咩事又無問詳細d，所以都係睇多次，一來睇吓有無升番上去，二來都順便問多少少安心d！
去到診所我就磅重，先發現之前睇錯。之前以為兩劃等於一磅，原來兩劃係兩磅！所以上次同醫生講四個月先重得一磅係錯嘅，兩磅至真。自從上次醫生叫我一定要食維他命，老公晚晚都卙好水捉我食藥，有時我都好驚好抗拒唔肯食，老公都要氹到我食至罷休，我都知佢好有壓力好擔心，為左老公為左小b，幾唔想都要頂硬上。可能有食藥，可能係差唔多周數開始要重，又可能小b知道媽咪已經過左見工可以無顧慮咁長大，都只係相差兩星期多d，就重多左兩磅，即係成五個月重左四磅，都合標準！
入到醫生房照，醫生話小b細左兩日，呢個消息我唸對老公黎講會比較緊張，我暫時覺得都可以，始終生長總會有快有慢，之前小b都快左成個禮拜啦，而且醫生係度小b頭圍、肚圍同大髀骨黎計番小b幾大，度都會有出入，同埋可能差果小小就差一日，所以如果唔係差太遠，我都放心嘅！我都係比較在意胎盤低呢個問題，醫生話都係偏低，但係醫生話响32週前升番都無問題，否則就會斷定為胎盤前置，咁就到時先可以決定開刀定自然分娩。醫生話有七、八成人都會升得番，而我都只係十九週，重有時間升，叫我哋唔使咁擔心，聽完佢咁講，我都放心d，我要俾心機教小b努力升番上去，用自己嘅力量出世，咁對媽咪同小b都好d，而且媽咪怕開刀呀！
上次醫生睇小b男定女，都只係話九成，老公都擔心會唔會出錯，會唔會出世嘅時候唔同左，有時我都唔明佢點解咁大壓力，陪我睇醫生都會緊張到呌唔到氣，想話買定d野又話唔好，成日話重未穩定，而家醫生話有九成係仔，佢都唔放心咁。講真，之前真係唔太穩定又成日唔舒服，都會好唔開心，但係過左四個月嘅時候我就安心好多，就連醫生都講過左頭三、四個月，流產機會大大減少，雖然無野係絕對嘅，但係我覺得我哋要對小b有信心，因為唔係只有佢孤單一個，重有媽咪同爹爹，所以小b唔使驚架！至於男仔又好女仔又好，而家知道都係方便去買衫仔，如果到時仔變女，女變仔，我覺得問題唔大，只係衫仔顏色唔啱，都係幾個月嘅問題，係會好surprise，不過仔女都係自己嘅，無咩好擔心，亦都唔使覺得同人講左，到時又唔係會有壓力。所以我開始唸男人會唔會有產前抑鬱呢？
今日醫生唔知係咪心情好，佢最尾竟然幫小b影左張４D相，唔使另加錢架！見到小b恰埋眼好似瞓緊覺咁，嘴角有d笑意咁，好得意架！自從兒童節後，有時都感覺到小b郁咁，不過唔係日日都有，又唔係好大力，所以都唔sure係我嘅腸胃抽動定係小b真係郁，都想問醫生胎動係點，不過都係算啦，佢又唔係我，都答唔到係邊様，我寧願唸係小b踢我，開心d麻！
沒有留言:
張貼留言