2011年7月31日

上完幼兒樂園，去左附近唯一一間開左門嘅食肆食野先！其實呢間食肆都唔係真係開哂門，只係上星期試過去過，佢地都係執緊野，見我地同Ambrose一齊，至招呼我地入去坐，簡單食物有供應，白飯未有。上星期試過之後，覺得好味又抵食，於是今星期又去幫襯佢地，唔知佢地會唔會多得我地唔少，晨早都未執好野就要開工，哈哈！  

食完野，媽咪指定去海港城行吓，一來媽咪想搵一本書，二來都想睇吓海港城有無d無咁笨嘅黑皮鞋。Ambrose由山林道開車過海港城已經攰到唔使奶咀都瞓著左！唔知點解好似度度都咁多人，連平時去開嘅海港城都塞住車入咁，原來香港經濟真係咁好！趁Ambrose瞓左，媽咪快快行左Itsmagical同埋Book Buddies，如果平時Ambrose响度一齊行，想慢慢行 Book Buddies一定唔得呀！  

Book Buddies真係一間百看不厭嘅書店，可以睇好耐都唔願走！裡面嘅童書又多選擇又特別又任揭黎睇，唔似DYMOCKS成鬼日包住本書咩都睇唔到咁衰，所以打從Ambrose未出世甚至得幾個月嘅時候，媽咪已經好鍾意行呢間書店，入去睇書就好似去尋寶咁，哈哈！不過今日媽尋唔到寶，略略睇左一圈，都無想要嘅書，無哂心機！加上而家上得淘寶多，發覺有d書熟口熟面，淘寶都有得買，價錢又平好多，所以媽咪主要都係睇吓八掛吓而家有d咩得意童書教材，增值吓自己，睇完就算喇！  

行完Book Buddies，走左入反斗城行，都未行完，Ambrose已經醒左，好彩媽咪已經睇左想要睇嘅野，行去會合埋爹爹陪Ambrose玩波波！Ambrose攞左個欖球黎玩，佢好鍾意掉落地下，不過因為欖球唔同其他球類，掉响地下唔會就咁碌，而係猛咁彈吓跳吓咁碌左去，Ambrose要執番都要追住個波，爹爹覺得幾好，引Ambrose去捉實個波。見Ambrose都幾鍾意，本來爹爹都話買番個俾佢玩，但發現原來要成二百蚊一個，好貴吓，所以放棄左！再玩左一陣之後，爹爹發現原來有一個細size一d嘅欖球，只係$79.9，啱哂Ambrose手形，又唔貴，但係無新喇！舊果d又俾人玩到甩哂皮，所以買唔到呀！  

响反斗城只係買左游水片，之後爹爹同Ambrose行番出黎之後，Ambrose見到Book Buddies竟然扯左爹爹入去行，真係估唔到佢竟然咁鍾意睇書，哈哈！爹爹同Ambrose行左一陣之後，就見Ambrose手上揸住本Dinosaur書，佢好想要本書呀！爹爹要Ambrose問吓媽咪買唔買喎，就係咁，本來爹爹陪Ambrose行，變成媽咪換走爹爹陪Ambrose行喇！媽咪只係望到一眼本書嘅內容，因為Ambrose揸到實一實唔肯俾人睇呀！媽咪嘗試勸Ambrose唔好要本Dinosaur書，因為媽咪都唔識讀果d恐龍名，d名真係個個水蛇春咁長，又長又難拼，識得一個都識唔哂啦！Ambrose點都唔肯，媽咪就一味講媽咪唔識英文呀，不如買本中文啦，係咁叫佢唔好買，哈哈！隔離有個男人就係咁望住媽咪，可能佢覺得媽咪好cheap呀，咁樣同個仔講唔識英文但又走入去呢間只有英文童書嘅書店，哈哈！媽咪同Ambrose睇吓其他書，期間Ambrose都有放低過本Dinosaur書，但睇完佢又即刻記得要攞返本書，真係好笑！媽咪又嘗試說服Ambrose買媽咪想買嘅書而放棄佢本Dinosaur書，不過都失敗左！任媽咪點講點試都唔能夠令到Ambrose放棄本書，所以最後媽咪都屈服左話買俾Ambrose，好神奇地，Ambrose又知要俾錢同埋响邊度俾錢，佢好快已經走左埋收銀處等俾錢。不過佢仍然係揸實唔放低本書，要媽咪講左好多次要俾錢要“嘟”先可以俾佢攞走。  

買完書出黎後，爹爹問Ambrose邊個買書書，Ambrose話bro bro（Ambrose嘅暱稱）買書書，真係俾佢笑死！之後Ambrose一路都唔肯俾我地攞走佢本書，問佢借黎睇一陣都唔得呀！佢真係好鍾意恐龍呀！

呢本就係恐龍書嘅其中一頁 ，真係好難讀架！

幼兒樂園第六堂

今堂又係李姨姨上堂，不過就無左個電子琴喇，重以為堂堂都會有添！打左招呼點左名玩埋響板，又係故事時間喇！今堂故事主題係整蛋糕，本書係揭揭書，所以李姨姨一路講故事，一路邀請小朋友幫手揭小插圖，都幾生動！今日手工原來又係整蛋糕，所以為左同故事一氣呵成，今日講完故事洗左手就直接整蛋糕同食茶點先！  

賢姐姐為每個小朋友準備左一片蛋糕同幾粒己開半嘅士多啤利，小朋友首先利用膠刀將士多啤利切成細粒，完成左之後，由家長幫忙唧cream上片蛋糕上面，小朋友可選朱古力粒粒或彩色粒粒灑在cream上，再將已切好嘅士多啤利粒放上cream上裝飾。Ambrose好努力自己切士多啤利粒，又灑上彩色粒粒，再放上士多啤利粒，好靚！不過靚左一陣之後，Ambrose竟然又將放左上cream上面嘅士多啤利粒又放番去個碟度，搬黎搬去，真係頂佢唔住！  

Ambrose好快完成個蛋糕，李姨姨話可以食喇！媽咪教Ambrose將蛋糕切細片攞黎食，媽咪見Ambrose剛在車上食過麵包，所以媽咪都幫手食蛋糕，以免Ambrose唔知飽呀！食完蛋糕又有小食提子乾，Ambrose不知食得幾滋味，哈哈！  

茶點時間過去，開始玩遊戲！今日嘅遊戲好簡單，賢姐姐响地下舖上幾張地墊成一直線，李姨姨坐响最尾，小朋友要响地墊四腳爬爬，爬去最尾嘅李姨姨度，再同李姨姨攬攬，攬完又排隊再爬過。呢個遊戲望落都唔似遊戲咁，以前返幼潛都玩過差唔多嘅野，無咩特別！不過媽咪知道要Ambrose聽話肯同同學仔一齊排隊同爬爬都唔係易事，因為佢成日都係得個睇字唔參與，媽咪都無佢辦法。意外地，Ambrose又合作喎，排隊去爬，重要肯同李姨姨攬攬（今日都只不過係第二次見李姨姨之麻）！不過當媽咪感意外之後，Ambrose爬完攬完一次之後又拒絕唔玩喇！媽咪要同Ambrose一齊蹲响度扮鬥快，又要氹佢話個個小朋友都玩得好開心，Ambrose先至又肯玩返，表現不過不失啦！

2011年7月30日

今日晨早八點幾Ambrose就起左身喇，因為爹爹同佢一齊都係早瞓，所以爹爹瞓夠左起身，可憐媽咪夜瞓，俾Ambrose嘈兩嘈都醒哂，爹爹見反正都醒左，不如起身出去同Ambrose食早餐啦！就係咁，媽咪放假流流都八九點起身，重好健康咁出去食早餐，不過係去麥當奴喎！  

晨早市中心嘅麥當奴真係好多人，重要好多人都係一個人就坐哂成張四人檯！攪到我地都搵唔到位坐咁濟！攪左一輪，終於都食得野，原本特登叫熱香餅俾Ambrose食，點知佢食左幾啖唔食要食薯餅同蛋，又要飲橙汁，睇黎麥當奴真係唔可以成日去喇！  

食完早餐都重係好早，周圍嘅店舖都未開，無咩野好行，好彩吉之島開十點，時間啱啱好。媽咪知道吉之島做緊開學用品特價，所以去左bb部行一轉，諗住睇吓d黑皮鞋、白波鞋同埋白襪仔。點知都幾失望，d鞋仔都唔係好靚，正確黎講，對對都係一個款，就係魔術貼，咩都無！原來男仔返學鞋係咁樣，無花無款，媽咪都無諗過會係咁，哈哈！白波鞋望落又有少少膠少少笨咁，媽咪最終都係決定白波鞋都係買番牌子野喇，而黑皮鞋要再睇多幾間先至決定！所以最终媽咪都只係買左幾對白襪仔就走左！  

買完野返屋企，媽咪已經暈吓暈吓，爹爹見時間重早，想同Ambrose去游水水，媽咪因為月事唔落得水，又唔太想落去曬住睇佢地玩，所以都係留响屋企瞓吓抖吓好過！  

原本媽咪都好少可以瞓晏覺，有人湊住Ambrose，可以舒舒服服瞓一場真係好正！好可惜，呢個晏覺真係多災多難，每一次媽咪差唔多瞓著果時就有電話打黎，來來回回幾次之後，爹爹同Ambrose都返左黎喇！後尾Ambrose走埋上床同媽咪一齊瞓，都反斗左一陣，媽咪都理唔到佢咁多暈左喇！到Ambrose真正瞓著左一陣之後，媽咪又驚佢無被蓋住紮醒左！頭頭尾尾都唔知有無瞓著到一個鐘，重要因為斷斷續續瞓吓醒吓攪到媽咪超級頭痛呀！  

原本今日諗住約Ellen姨姨同HeiHei黎玩，點知我地返黎又到Ellen姨姨出去；Ellen姨姨返黎又到Ambrose瞓左覺；Ambrose瞓醒又到HeiHei瞓左。結果都係要約夜晚食完飯之後先可以一齊玩喇！  

之前成日都覺得Ambrose玩得顛，原來HeiHei玩起上黎都一樣咁顛，兩個小朋友玩玩吓又笑又叫又跑黎跑去，重走埋上床“典黎撻去”，超開心咁，男仔即係男仔，原來男仔玩起上黎真係奔放d！

原本媽咪諗住兩個小朋友可以一齊畫畫，可惜Ellen姨姨無幫HeiHei帶衫過黎畫，所以無得畫畫喇！不過又俾媽咪醒起早兩日買嘅color wonder，唔會整污糟衫同手，啱哂啦！Ambrose一見有新野已經自動自覺搬椅子，好期待咁！結果佢真係好投入咁用畫筆起勢咁畫，開始時都係少少咁畫，畫多兩下就成日用枝畫筆起勢咁想“撩”好多顏料出黎，真係多得佢唔少喇！媽咪見佢“撩”咁多，索性叫佢用手畫，唔好浪費左d顏色。至於HeiHei，似乎佢對畫畫無咩興趣咁，畫兩畫就走左去，唔好話用手畫喇，哈哈！不過佢對顏色手抓板似乎好感興趣，唔知係咪因為係魚魚嘅關係呢？  

Color mess 啫喱狀顏色用後感：其實都唔錯，可用畫筆點完畫上專用紙度，好快顏色會出黎，重好靚添，有d似水彩，色鮮得黎有透明感。用畫筆點完一隻色再點另一隻色油出黎唔見有太勁變色，幾好！係Ambrose係咁要“撩”好多出黎畫就麻煩少少喇，佢“撩”太多媽咪就要佢用手畫，即係變左fingerpaint，原來d啫喱狀顏色質感有d似漿糊咁痴立立，唔同筆狀果d畫上手都係爽囉！同埋原本已經成張紙出左色，要响有色嘅畫紙上再油顏料，似乎唔多可行，可能紙上有特別質地所以顏料上左去先會變色，而當成張紙都已經有色嘅時候果d特別質地已經被淹蓋，所以再多顏料都出唔到色喇！張紙重因為有太多顏料而變得痴立立，好似搽左成張紙都係漿糊咁，哈哈！暫時睇都幾好玩，雖然話唔會整污糟對手，但因為質感似漿糊而唔係水狀，所以玩完都要洗手同抺檯，但可接受囉！值得一諗嘅係專用紙唔平，可能圍起要$2-$3一張，重要唔大張，以Ambrose嘅玩法，好快玩完一張呀！

Shining Garden –Little Learner (二期第九堂)

今日playgroup主題係beach，上一堂老師已經通知左家長今堂要著泳衣，不過媽咪諗著泳衣去咁熱，去到又要除衫又驚Ambrose凍親，而且朝早爹爹同完Ambrose游水，泳衣濕哂乾唔切，媽咪諗住都係唔同Ambrose著泳衣喇，反正以前有主題服飾嘅堂，其他小朋友都唔係全部跟住著，媽咪諗住無所謂！點知當爹爹知道原來今日有主題服飾要著，爹爹好堅持一定要俾Ambrose著泳衣，話驚其他同學有著泳衣自己無，會覺得自己同其他人唔一樣而唔開心！不過泳衣濕哂係事實，真係無泳衣可以著去。媽咪諗左一陣，決定摷番上年Ambrose嘅Mickey泳衣，不過都諗住上年都係啱啱好，今年都無理由啱著，摷出黎都係盡吓人事睇吓得唔得！  

媽咪摷到出黎果吓真係忍唔住大笑，件泳衣睇落超細，點諗都諗唔到Ambrose會啱著，但爹爹都試吓同Ambrose著。結果，出乎意料之外，Ambrose竟然著得落，重要件泳衣係背心連身嘅，爹爹開頭以為著左落去可能背心吊帶會拉到令Ambrose露點變筋肉人，點知又無喎，好啱身，背心嘅象筋完全無拉扯嘅情況，即係話件泳衣完全未發揮佢至大可能嘅size！不過爹爹就話Ambrose大個喇，著起左都無以前咁cute，都唔係丫，媽咪覺得Ambrose幾時都咁cute架喎！  

著好泳衣去返學，去到時又唔覺d同學仔有著泳衣，唔知係咪又係著左入衫裡面定點？不過time for class，做手工， 都唔見 老師話除衫，媽咪諗會唔會又係要自己除，有著就有著無著就無著呢？  

等呀等，一直都無人提過泳衣，媽咪已經打定輸數今日Ambrose件泳衣都係得個著字，直至完埋topic time，reception姐姐入黎影吓上堂相，之後見佢同老師講左幾句，老師先至宣佈有著泳衣嘅小朋友可以除面衫喇！媽咪當然二話不說同Ambrose除衫啦，哈哈！一除開件衫， 周圍嘅 老師同家長都大叫，Ambrose真係好得意，成隻Mickey Mouse仔咁，又有個大肚腩！今日無女仔上堂，媽咪見其他小朋友都係著三角泳褲仔，上身衫因為怕凍就無特別除，所以Ambrose呢身泳衣look都好突出，幾個家長都走埋黎摸Ambrose。有一個同學仔佢無著到泳衣打底，老師一講除衫，佢媽咪就同佢除光哂所有衫同佢著長袖連身泳衣，哈哈，咩都俾人睇哂喇，笑死媽咪！  

Game Time係著住泳衣玩“不”貝殼粉，再要行過水泡陣去到尾見到大籃再倒番d貝殼粉落去，好好玩咁！不過Ambrose唔肯玩，極其量都係“不”左幾吓，之後行唔到水泡陣，媽咪叫佢唔使行，直接行去倒貝殼。好勉強玩左一次之後，Ambrose已經唔玩，只係睇人玩，睇人“不”，勉勉強強只係响張檯度係咁易“不” 一兩 吓，媽咪真係唔明佢做咩成日都係咁，一齊玩嘅時間永遠都係發呆望人自己唔玩唔參與，唔通佢嘅social skills真係有問題？  

好喇，玩完之 後 老師要大家企埋去背景度黎張大合照，Ambrose唔肯埋位，俾水泡佢都唔鍾意唔要，點叫都唔埋位，媽咪真係想放棄唔影喇，不過真係好可惜囉！後尾Ambrose見到有個沙灘波，佢就攬住左，媽咪乘機拖佢埋位，勉勉強強都叫影左大合照啦！  

影完相，老師話攞椅子埋檯做worksheet，Ambrose第一次唔合作，點都唔肯埋去攞椅子，重要想拖走媽咪，媽咪其實一早見佢手抆抆件泳衣唔自在咁，見埋佢連最鍾意搬椅子都唔願搬，忍唔住問Ambrose係咪唔鍾意就咁著泳衣？係咪想著番衫衫，佢答係！媽咪即時同佢著返衫褲，Ambrose一著左衫褲就自己去攞椅子埋檯坐。  

Ambrose嘅social skills一環真係幾弱吓，人人都好開心好high，佢就唔聲唔聲又唔enjoy，媽咪都唔知應該點幫Ambrose好喇！已經同佢報兩個playgroup俾佢同多d小朋友見面上堂玩，都好似唔多有改善咁，响出面就好似好文靜好乖，衰d講有時好“鵪鶉”；但响屋企就所向無敵，咩都唔驚，又頑皮到無人有，媽咪真係頭痛，點做好呢？

Crayola Color Wonder@Artland

媽咪响書展時買左一盒以“sea”為主題嘅Crayola Color Wonder Set，入面除左有mess free嘅stamp pad同六個有關“sea”嘅印仔之外，重有五枝又係mess free嘅顏色筆同埋十八張有哂“sea”主題嘅畫紙！書展買成set都只不過係$84，包左咁多野，超抵！不過由於Ambrose重係細，媽咪諗緊如果咁快攞d主題畫紙俾Ambrose玩又浪費左，因為佢一定未識準確塗顏色，有框框嘅圖形唔啱佢油，塗鴉先啱佢年齡。由於Color Wonder呢系列產品都係顏色筆畫上手無色，要畫落專門畫紙度先有色，媽咪見呢set野已有顏色筆，都曾經响書展時問售貨員有無淨賣專門畫紙，結果係無嘅，不過媽咪見抵，仍然有買呢set“sea”！

返到屋企，媽咪拆開盒“sea”黎睇，真係幾好玩咁，但攞主題畫紙玩又真係好浪費，所以媽咪好想搵到淨畫紙俾Ambrose玩呢d咁得意又乾淨嘅顏色筆！媽咪本來諗住又要上amazon去搵crayola產品，不過諗諗吓擺得書展應該有零售店又或者貨倉，只係可能平時自己無留意，媽咪即時摷番書展嘅單，見到間店原來叫“Artland”，於是用呢個名上yahoo度search，結果原來真係有呢間店。再上佢個網頁睇，見到新產品中正正有淨專門畫紙賣，好開心！望埋地址响邊度，竟然遠在天邊，近在灣仔！

今日午飯時媽咪就走去去搵Artland，雖然佢响灣仔，不過距離媽咪公司都一段距離，媽咪都要行好遠先到。上到去Artland，都幾大間，入面有好多唔同嘅專業美術材料工具，專業到好多媽咪都唔知係咩黎，哈哈！好快就見到有crayola產品架，媽咪搵左一餐都唔見有淨畫紙賣，只係見有一pack淨畫紙二十四張加五枝mess free顏色筆比較啱媽咪想要嘅，只係媽咪已經有顏色筆，唔想再要喇！好無奈，問左售貨員原來淨畫紙無哂貨唔知幾時返貨，媽咪好想買到無主題畫紙之下，唯有考慮呢pack color wonder！對比過呢pack包嘅顏色筆同之前書展買嘅係唔同色，媽咪都係決定買啦，唔係就真係無畫紙架喇，無八折，盛惠$85！

另外，媽咪又見有一pack mess free六色顏料連畫筆一枝，都幾平，$45一pack，媽咪諗起Ambrose而家都係玩畫筆多，所以買埋呢一set俾佢用黎畫，應該可以當fingerpaint咁玩，幾方便；而呢兩set包埋嘅mess free顏色筆共十枝就可以留黎大d再配佢嘅coloring book油顏色！Ambrose畫室越黎越多工具材料喇！

Crayon畫

今晚Ambrose要媽咪俾crayon佢畫畫，都好丫，唔使開壇畫水彩，媽咪都可以唔使睇得咁實！  

媽咪俾左張白畫紙俾Ambrose畫，佢起勢咁畫畫畫，力度真係好大，通常佢都可以油到好出色，只係亂畫一通，無咩內容可言，點都好，當俾佢練吓手力都唔錯！  

唔知Ambrose係咪對白色有僻好，佢第一隻識講嘅顏色係白色，重成日講！今晚佢用crayon塗鴉，又係成日講白色，以前媽咪就教佢白色crayon畫落白畫紙度係睇唔到，佢似明非明咁，真係好少見佢用白色畫。今晚見佢咁好興緻成晚講白色，媽咪醒起之前為左令佢明白黑白色嘅關係而買嘅黑畫紙，媽咪即刻攞出黎，示範用白crayon畫上去，再即時畫埋上白畫紙度，俾佢知道有分別！Ambrose都幾叻，佢自己攞起枝黑crayon畫上黑畫紙上面，再攤開雙手表示“無”，哈哈！之後佢就繼續用彩色畫，但就不斷叫媽咪要用白色畫，唔明佢咩意思呢？！  

畫到咁上下，Ambrose好high，係咁用crayon點落張畫紙度，點到大大聲咁，好開心！結果張畫就變成左一張好colourful嘅crayon點點畫喇！

2011年7月25日

淘寶淘左幾次成功之後，媽咪發覺有時有d店舖只有一兩樣野想買，但如果間間都係咁，運費首重通常都要$30，真係好唔化算！成日聽人講集運可以將唔同店舖買嘅野集埋一次過先運，媽咪就的起心肝研究吓點攪先！睇吓人地嘅經驗，又睇吓淘點集運流程，媽咪開始明白原來集運係點嘅一回事，要學識點攪，一定要真係take action，買野run一次就會易掌握d喇！

媽咪之前分別睇中左兩本手工書，一間一本，媽咪決定利用集運買番黎，拍好之後，媽咪就開始等買家發貨轉運站簽收。第一本書好快就到轉運站，但第二本書，等左兩日都未到，媽咪有d擔心啦，如果唔見左，都唔知點攪好！好彩，等多幾日終於都現身喇，轉運站簽收左之後，媽咪開始認領貨物同埋合併物流，原本以為攪掂哂可以直接寄黎公司，點知個system又話我個地址未認證，運費未實唔俾得錢住，又等多一日，攪掂埋已經係星期六嘅事。

真係估唔到咁快，星期六先俾運費，今日已經送到黎，超開心！集運成功，下次可以諗諗買多幾間先集運，唔好好似今次咁浪費運費，買得果兩本書！

另外，自從書展果日target左買漢字500，見到都無買之後，返到屋企都好後悔，日思夜想之下，今日午飯時行去三聯諗住睇多次內容，點知原來三聯於書展期間全店做八五折，媽咪當然忍唔住又走入去睇吓有無漢字500啦！結果set裝漢字500係無嘅，但有散裝賣。媽咪見一本$48，一set五本加書套賣$260，散裝無書套五本都只不過係$240，原來散買係平d喎！加上有八五折，媽咪計過折左同書展價一樣咁平，只係無set裝買，都好丫，媽咪都唔想一次過買齊之後Ambrose唔鍾意睇就大件事喇！所以媽咪最後都買左兩本，諗住返去試住先，佢鍾意先再趁減價買囉，唔鍾意都係兩本啫，無咁傷！

見八五折都叫抵，又執多左兩本多元智能嘅貼子書俾Ambrose，不過媽咪見內頁都幾花吓，可能都要等Ambrose再大多少少先同佢玩喇！選左最近佢level嘅主題，一本$48.5，其實都少少貴，買完都後悔，雖然話貼子可重貼，不過以Ambrose粗暴嘅個性，好可能都係玩一次就KO本書，真係要再大d定性d先玩得咁，早知都係遲d先買啦！

今晚，媽咪第一次將畫紙用磁石條磁在白板上，顏色用具放响新檯仔上，Ambrose畫畫方便左，不過唔係幾理想嘅係Ambrose要不斷擰轉身去攞顏色，媽咪非常之驚佢會擰身時會好易一手“fing”到d顏色上牆上面。結果，Ambrose無轉身時“fing”油上牆，而係企定定專登係咁“fing”枝有顏色嘅畫筆，攪到一地一白板都有點點顏色，媽咪全程都係咁要同佢抺走顏色，驚佢行走時會踩到成屋都係就麻煩！咁睇黎好似似坐响地下畫畫方便d喇！另外就係Ambrose可能畫得興起，佢有時都會唔小心畫左出張紙，畫左上白板上面，因為今次開嘅顏色唔係真係washable，所以媽咪好緊張吓吓要抺乾淨，唔敢等乾先黎抺，攪到成程媽咪都好忙同Ambrose執漏咁，睇黎白板畫畫要再認真研究點樣run先順暢d喇！



淘寶集運嘅兩本手工書，cutting and pasting書展見賣$69，DYMOCKS賣$102，淘寶都係人仔$24

POST書展買嘅特價書

轉讓二手Playskool Shoot n Score Basketball (已售)

Playskool嘅籃球架，Ambrose唔啱玩喇，入球會有聲同count，唔知點定幾多成新喇，小朋友玩具唔會太殘啦，反斗城好似賣緊$269.9，二手轉讓$100，只作屯門／灣仔面交，有興趣請私人留言給我！

新檯仔

今日上完幼兒樂園食埋lunch直接去左mega box，而家嘅mega box真係好得人驚，超多人，爹爹揸車要排隊入停車場，入到去重要搵位搵左好耐，由响mega box門口等入到泊好車可以行得，足足攪左成四十分鐘！重要泊上十六樓，要落番四樓IKEA，自動樓梯又層層唔同位置，升降機又唔係層層停，煩爆！  

行經反斗城，走左去行吓！見到之前書展買嘅crayola產品，反斗城標價真係貴成十幾二十蚊，真係離譜！兜左個圈，無咩特別，只係買左副太陽眼鏡同埋一個哈哈笑ballon俾Ambrose，走得！今日媽咪特登去IKEA，諗住買張平檯仔俾Ambrose用，兼且搵吓d儲物盒，收拾一下屋企雜物，實在太多無謂野，要的起心肝執一執喇！不過經過一番折騰先黎到IKEA，爹爹都無咩心情，所以媽咪直接去到兒童天地，睇吓兒童用品傢俱，買左兩個儲物盒，行去自助貨倉買檯仔就算，無咩點認真行。  

今次買張檯仔，原本諗住張椅係藍色，配番張檯就梗係諗住買番藍色啦，點知無貨，個售貨員話可以訂貨過兩日黎攞，不過maga box已經淪陷左，爹爹應該唔會再想黎過，所以訂貨真係咪攪！諗前諗後，覺得又要等又要再去第二度買，好煩，見有紅色同白色，爹爹話要紅色喎！同張椅子唔同色，媽咪諗住無所謂啦，當撞色囉，好過又要等麻！講開張檯仔，真係好攪笑囉，當初有micky斜檯時為左撞色，想話買張紅椅子俾Ambrose，點知要紅色就無，結果買張藍色椅子；而家要配番張檯，想話買藍色檯，結果又買左紅色檯！  

Ambrose終於都有張新嘅平檯仔用喇！夜晚爹爹砌檯時Ambrose重一齊幫手又遞呢樣又遞果樣，哈哈！本來諗住有張新檯仔，mickey檯會收起唔好阻太多地方，不過爹爹話唔收喇，俾Ambrose睇書用番mickey檯好d喎！而家Ambrose’s corner嘅滑梯收起左，mat收起兩格，就可以放哂兩張檯，好整齊，唔使再响廳放mickey檯，個廳都鬆動d呀！

幼兒樂園第五堂

今堂開始，幼兒樂園轉左去山林道上堂，唉！今日咁早去到，成條街都係車，又整路，想搵個位停住先落車都唔得，媽咪真係唔鍾意呢度！好彩勉強都有個位停到，爹爹同我地一齊去搵果幢大廈，原來幢大廈入口有一條樓梯行上去，唔係兩三級，係一條十幾級嘅樓梯，即係話如果媽咪想自己同Ambrose黎返學，媽咪要預自己收車揹車同拖住Ambrose先上得，超麻煩喎！上到去大廈門口，其實都幾似橫街，重要裝修緊，成個地盤咁樣，成地都係泥頭同裝修材料，小朋友去好似都幾危險咁，爹爹二話不說已經唔俾Ambrose落地，手抱返學就算。由於爹爹只係停車落客唔係真係有位泊車，所以爹爹送到我地樓下就要番車度，媽咪同Ambrose上樓。  

新嘅上堂地點有reception，望落似乎有兩間房，pantry重係响房外面，唔係好似以前咁一間大課室有齊哂d野。望落好似大左，但入到上堂課室就細左喇！以前分左兩大張台俾小朋友坐，而家都係有兩大張台，不過台與台之間好迫，有人坐左落去之後，其他人要通過去課室前面都要小心奕奕就住就住過；平時俾家長放隨身物嘅矮地櫃已經無左，取而代之嘅係一個高高地嘅多層膠層架。因為媽咪遲到，所以最就手放袋嘅位已經full左，媽咪要放最頂個位，一來媽咪本身細粒，媽咪唔鍾意要掂高腳先放到野；二來媽咪覺得個架好似都唔多穩陣咁，d野又放到咁高，地方又咁窄，陣間唔覺意撞埋去d野跌落小朋友度就大件事喇！所以媽咪盡量都唔俾Ambrose行過去個層架度！  

今堂Miss Hui請假，由李姨姨代課，一開始李姨姨就介紹小朋友電子琴（佢叫鋼琴），又彈琴同小朋友唱早晨歌仔，媽咪覺得幾好，音樂好能夠吸引小朋友，媽咪鍾意，真係好生動，無平時Miss Hui就咁點名咁悶！玩左陣琴，又玩左陣響板，估唔到Ambrose都可以唔用手拍響板，而係用手夾響板，不過可能見個個都係用手拍，佢夾夾吓都轉左用手拍喇！媽咪得閒都要摷番個響板出黎俾Ambrose玩至得，順便又練吓手指力麻！  

今堂李姨姨講故事，主題係要收拾玩具，媽咪其實都幾鍾意故事時間，可能因為平時媽咪想同Ambrose講故事，尤其係中文故事，佢都一定好心散又心急咁係咁揭去後面睇，見到有d有興趣嘅公仔又會係咁指住要你講，見到一d佢識講嘅物件佢又係咁講，要媽咪回應佢，攪到本身諗住講故事，講講吓都唔成事！好無癮囉！但唔知點解Ambrose返親學聽故事佢又會坐定定聽架喎，唔係都唔會成日 都有 老師評估佢時都話佢專注力好好啦！佢真係呃哂人囉！所以媽咪鍾意故事時間，媽咪講唔到，由老師講都好丫，而且老師通常選故事題材都好適合佢地而家嘅年齡需要，真係唔錯！李姨姨講故事又比Miss Hiu生動自然，而且又會用d導具同小朋友有少少亙動，真係幾好！媽咪即時諗點解唔係李姨姨跟我地架？  

故事時間完左，又到手工時間，今堂玩泥膠！媽咪見到心諗大件事啦，Ambrose都唔係幾鍾意，佢唔會唔玩，不過佢會一直手擺開唔掂泥膠另一隻手用工具碌囉！老師放左唔同色嘅泥膠响台面度俾小朋友選，每人只可選一隻色，Ambrose要左黃色。媽咪開左包裝袋之後諗住要Ambrose搓吓，點知佢猛擰頭，要媽咪搓！媽咪幫佢搓成個波，想話要佢用手仔壓落去變番做一塊，Ambrose又唔肯，一手攞起個碌係咁碌，不過因為都無壓平，重係一個波形，Ambrose又唔係大力，所以佢都唔係好碌到，哈哈！見其他小朋友玩泥膠都ok，一個都肯用手搓，用模印，一個雖然唔印，但肯落手去搣成一粒粒放响台上，得Ambrose只肯攞工具而唔掂舊泥膠！媽咪唯有幫埋佢壓平，再俾模佢印，希望玩得多，佢又見到印左出黎嘅圖案咁得意，自己會放下介心，點知都係唔成事！攪左一輪，李姨姨行左埋黎睇我地玩，媽咪忍唔住話Ambrose唔玩唔掂泥膠，媽咪都用好多方法吸引佢玩，李姨姨好有心咁氹Ambrose撳泥膠，撳落去凹左，撳落去凹左，Ambrose睇左幾次之後又跟住撳，一下一下咁，似乎佢又ok番喎。真係唔明，平時媽咪都係咁氹佢架啦，都係麻麻地，成日都係見人時聽話合作，唉！不過肯見人時聽話合作都好過任何時間都唔聽話唔合作嘅！

玩完泥膠去洗手，返入房之後，李姨姨話要玩“吹呀吹個大波波”。小朋友同大人圍圈手拖手，爹爹之前同媽咪講Ambrose呢環都好弱，唔太肯俾其他人拖，不過今堂出奇地又可以喎，唔知係佢習慣左少少，定係佢遇著一個比較主動嘅女仔，個女仔捉住佢隻手拖，佢又肯俾人地拖喎，真係好神奇！其他小朋友都係一半一半，有人唔肯拖其他人只拖媽咪，有人甚至係唔肯到喊哂。雖然係咁，李姨姨都照開始玩，其實都只係唱歌仔，唱吹大波波就一齊向後“吞”，個圈變大左，之後唱到爆左就放手蹲低個人，Ambrose雖然肯俾人拖手，但佢都比較呆，佢就無跟住蹲，反而個女仔就係咁想拖佢隻手要佢蹲低，哈哈！下次媽咪都要痴番d女仔坐至得！唔知點解媽咪見到嘅女仔大部份都比較主動活躍d咁！男仔都係好似Ambrose咁靜d呆d，一係就扭計到爆！雖然Ambrose今次肯俾人拖手，媽咪好開心，但媽咪希望有一日Ambrose可以自己主動拖人而唔係俾人拖，唔知Ambrose幾時先可以做到呢？  

玩完唱歌仔，又係時候茶點喇！今日生果係“蕉”！Oh My God！點解又係蕉架，媽咪最憎！每個小朋友碗仔都有一條三份一嘅蕉，李姨姨要小朋友自己搣蕉皮，當然開口係要家長幫小朋友開啦！媽咪真係好唔願，又係搣蕉皮，好核突囉！只見對面個男仔好快手咁搣完塞哂入口，超好笑！佢真係好鍾意食蕉咁喎！Ambrose手慢腳慢搣完又慢慢食，其實佢都唔係唔鍾意食，比起以前佢一食就吐番出黎，佢肯食已經係進步，慢d都好正常嘅！不過李姨姨話食完生果先有茶點餅餅同條條食，Ambrose第一吓可能聽唔到定係反應唔到，無反應！但當佢見到對面個男仔有得食條條餅餅之後，李姨姨咁啱有講左一次要食完蕉蕉先有得食，Ambrose即時塞條蕉俾媽咪，話“媽媽食”！真係俾佢激死！咁肉酸，點食呀？！係其他野都話幫吓佢丫，奈何係蕉，媽咪一手又推番俾佢，一定要佢食埋先，哈哈！Ambrose繼續食，有好幾次又想推俾媽咪食，不過媽咪都拒絕左，而且李姨姨同埋賢姐姐都分別過左黎要佢自己食哂先俾食其他，Ambrose死死地氣又繼續慢慢食諗對策！結果可能真係俾佢諗到，佢將條蕉放左上張台度推，好似當左條蕉係塊碗布咁抺台，但係推兩推佢又想放入口食番，李姨姨見到即時阻止左佢，就話唔好食喇，今次就咁俾佢唔食哂就食餅餅啦！真係奸計得逞呀！  

食埋茶點，原來無聲無息咁落左堂，好似都無正式圍番圈派手冊，真係好突然囉！

2011年7月23日

尋晚媽咪做完苦力搬書返屋企，成個人散哂，今朝八點幾九點Ambrose醒左係咁叫媽咪起身，唉！想瞓多陣、懶多陣床都唔得！起左身齊齊換好衫，落左樓下食早餐，行埋萬寧又返屋企喇！   

好耐都無同Ambrose一齊睇DWE嘅碟喇，唔知佢平日响屋企有無睇/聽碟呢？見攰攰地，媽咪決定開隻Play Along俾Ambrose睇吓，媽咪可以唔使咁集中精神同佢玩！只見Ambrose一開始就跟住d歌仔攞DWE嘅玩具出黎一齊玩，又跟住做哂d動作，媽咪以前都見過Ambrose會跟玩跟做，不過就未試由頭跟到尾囉！今日Ambrose足足睇哂玩哂成隻碟，見到佢跑黎跑去攞玩具個樣真係好得意！  

睇完Play Along，媽咪再同Ambrose玩SpecialLuk，之前玩pattern 1 – 7，今次媽咪同佢玩7 – 12！雖然媽咪望過好似好簡單咁，都係果幾塊圖形板，只係底色唔同左，又或者圖案顏色唔同，又或者係圖案變成陰影，最後係圖案放大左有少少邊show唔哂，見Ambrose玩嘅時候都要搵要望，有時搵唔到時隻手揸住塊板“fing fing”吓好攪笑！原來小朋友要配對唔係100%嘅野唔係大人心目中咁易，媽咪重諗住Ambrose好快就玩完呢個level，睇黎以佢而家呢個熟練情度，尤其係最尾果個放大左show唔哂嘅練習做得唔太順利，媽咪都係同Ambrose玩多一排先轉level喇！  

玩完SpecialLuk，媽咪攞左本之前買嘅撕貼塗鴉書出黎俾Ambrose玩！呢本書都幾得意，一頁入面有一隻動物圖案係俾小朋友油顏色，另一個相同但空白嘅圖案，係要小朋友响書入面撕番一隻相同動物圖案出黎貼番上去！最特別嘅係，呢隻動物圖案係分做三份，小朋友撕左出黎再要拚貼番上空白位置。媽咪等Ambrose塗鴉完後，就同Ambrose撕開隻斑馬做拼貼，媽咪仍然係要Ambrose用手指搽漿糊，唔買膠水俾佢，等佢搽漿糊練吓手指靈活度同埋等佢唔好太抗拒痴立立嘅感覺。媽咪高估左Ambrose，原來撕開左三份嘅斑馬，要Ambrose搽完漿糊再拚貼番係好難，佢真係貼到離哂位，哈哈！不過Ambrose對用手搽漿糊已經無問題咁喇！所以之後媽咪同Ambrose貼袋鼠，媽咪無再將袋鼠跟虛線撕成三份貼上，而係整隻袋鼠撕出黎之後要Ambrose搽上漿糊直接貼上空白處，咁樣似乎對於Ambrose適合少少，雖然都唔係百份百貼得靚，但起碼離貼得啱位都唔係差太遠囉！  

玩完撕貼畫，食埋粥仔，媽咪都開始攰，捉Ambrose入房瞓吓，瞓醒又要返playgroup喇！  

今堂playgroup，Ambrose叻叻，當老師topic time時俾導具小朋友時通常都要小朋友跟講果樣物件嘅英文。Ambrose一向唔識講野唔會跟講，媽咪一路耐心等佢開金口，結果今日上堂，佢竟然可以跟講所有生字：ice-cream / coke / jelly / water，其中coke一字重超級清楚同啱音！媽咪真係好開心呀！  

上完playgroup，返左婆婆屋企，Ambrose同表哥玩得超開心，成日笑唔停，笑到要抖大氣，真係好攪笑呀！

轉讓全新MOON SAND (已售)

五月時買左兩盒MOON SAND諗住响屋企有時間俾Ambrose玩（見之前blog文：http://hk.myblog.yahoo.com/vienna-wah/article?mid=701　），不過要返工嘅媽咪實在無咁好精力放工後同Ambrose玩沙，驚一發不可收拾要執一餐，但假期又會去左返playgroup同出街，所以買左兩個月都未開黎玩過！有見Ambrose嘅書同玩具越黎越多，為左屋企有更多空間放Ambrose真係有興趣嘅玩具教具，媽咪決定轉讓呢兩套MOON SAND！一套係Fairies，另一套係Royal Castle！但由於媽咪買返黎時應該係灣仔春園街嘅貨尾，包裝盒都好殘舊，亦為左慳位，所以買左返黎之後用手機影過相之後，包裝盒就掉左，但入面所有膠袋包裝都未開過，亦附有說明書！由於沙重，郵費一定貴，所以媽咪只作屯門／灣仔面交，亦prefer一次過出售兩set，有興趣請私人留言給我！



Fairies主題,盒已掉,有兩色沙,共六個模

Royal Castle主題，盒已掉，有三包沙，吹氣沙池，king & queen以及城牆模

2011年書展

一年一度嘅書展又黎喇！上年去完，覺得值得一去，所以今日媽咪攞左半日假入場，諗住唔會勁買野，見識吓有咩新教材教具都係一件好事！媽咪一點鐘放工，見時間好早，書展今晚收十二點，又真係唔使太早入場行到攰哂，所以媽咪爭取時間剪頭髮，剪完至去食tea，再慢慢行過會展。同上年一樣，媽咪之前買定飛，响政府合署地下穿過去，再由人地落黎嘅方向上，完全無遮攔，好順利，三點鐘已經上到三樓。媽咪懶醒無睇floor plan，一開始行就發覺有好多文具檔，媽咪雖然無咩需要買，但都照行，諗住行得徹底d。一路行一路行，媽咪覺得點解成個場都係宗教野，好鬼悶，媽咪終於忍唔住攞張floor plan出黎望，至知兒童天地係响隔離，真係激死媽咪，白白行左成個鐘！挨近四點鐘，會合埋Wing姨姨正式開始行！不過因為湊住雅雯關係，進度有少少慢！

一開始我地就行新雅，一來媽咪諗住唔會買圖書，二來可能媽咪平日都行書局，所以黎黎去去都係見番d熟口熟面嘅書，媽咪無仔細睇，大致行完之後，無收獲，諗住臨走睇情形返黎再行多次。之後行去小樹苗，都係啦，又係平日果d書，不過頭十本書有八折，之後唔知幾多本就七五折，媽咪download左電子coupon買滿$200再減$20，問左工作人員可以用，又真係好吸引喎，淨計八折加埋coupon都有七二折，媽咪即時好俾心機睇吓有咩買。好好彩俾媽咪見到之前响書局買唔到嘅兩歲剪貼教室，重要得最後一本，媽咪當然二話不說攞起死都唔放啦，選埋另一本動動手嘅運筆塗鴉訓練書，呢兩本都係媽咪嘅心頭好，因為手工塗鴉書真係唔多，合兩歲嘅更少，見到就要買架喇！再選左可重複畫寫數目字嘅書仔。媽咪好努力咁搵，但都無咩啱心水嘅書，一係就之前响書局都買左，所以選極都係三本咁多。呢個時候Wing姨姨已經選左一盒書，由於我地啱啱至開始行，所以Wing姨姨要求keep起所有野响cashier晏d先返黎俾錢攞走，媽咪擔心d書一離手就無又或者擺擺吓俾人攞左，真係好唔捨得放低，但無辦法啦，無理由一開始就開始托書架麻！

之後媽咪見到target嘅Robin就即刻飛埋去，因為啱啱書展前姑姐送左枝I-PEN同幼兒字典俾Ambrose，而呢隻I-PEN亦有好多唔同書仔可配番睇，價錢唔貴，爹爹媽咪上年見到都有諗過買，不過當時已買DWE，Ambrose又重細，覺得無必要再買其他書住，所以無買。今年有枝筆响度，媽咪梗係忍唔住去睇吓d書仔，幫Ambrose配番幾本睇吓都好，唔使吓吓DWE咁悶，而且頁數少d，媽咪一個人都應該易handle一d掛！一坐低已經有sales招呼媽咪，上年媽咪同爹爹一齊企左好耐都無人理架，個sales其實都幾好，唔hard sell，知道Ambrose年紀細，推介左低level一d嘅書仔俾媽咪；當媽咪十五十六選邊套好時，又攞呢本又攞果本想睇番做比較，佢都好有耐性招呼媽咪。Robin嘅套裝書，大多係一set四或五本，頭一套八折，第二套六折，所以媽咪最終買左一套baby animals，一套fairy tales，十本書，有得點讀又有Q&A功能，都只係$259，真係好抵！

同一時間，Wing姨姨又買左一大叠書，本來媽咪又係想自己攞返走d書，但見Wing姨姨又係放低晏d攞，媽咪將d書擺埋一齊，走先再攞返啦，不過媽咪都有d擔心會唔見又或者無左d架，下次都係要推行李至得，推住行輕鬆d，唔使吓吓買左放低又心掛掛！

媽咪同Wing姨姨行黎行去都行到亂哂，有時Wing姨姨要照顧雅雯，媽咪又會自己行其他野，有時又無咩方向，突然見到有d野吸引又行過去睇，所以之後行嘅先後次序已經唔記得咁多喇！

去左target嘅crayola，原本只係想買washable嘅markers俾Ambrose有時可畫吓白板，點知發現入面d產品好平，未折嘅價錢都平過反斗城，再加埋有八折，真係平得好緊要！以媽咪平時用開嘅kids’ paints為例，反斗城一盒六枝賣$59.9，之前媽咪用$100減$15嘅coupon買左兩盒，圍返都要$52.4一盒，但呢度標價都只係$45，八折埋只不過係$36，真係平到離哂譜！重要有一盒十枝顏色，標價都係$70，折左$56，唉！早知係咁都係等埋書展先買啦，咁平，托番去都抵呀！媽咪最尾忍唔住响crayola掃左一盒十枝kids’ paints、十六色washable markers、二十四色twistable crayons、五色paint brush pens（有d似畫筆／毛筆咁，諗住俾Ambrose試唔同質感嘅筆）、Under the Sea主題嘅color wonder(唔會整污糟手嘅顏色筆連sea animals印仔同under the sea主題畫紙)，盛惠$246，超勁抵！媽咪以後都唔會去反斗城買crayola喇！寧願一次買多少少存定一年貨啦！不過媽咪後悔無買多set washable makers囉！kids’ paints存貨都可以用好耐架喇！crayon本身已經有，係見平唔抵得又買多set比Ambrose大d時玩多d色。Washable Markers以Ambrose平時好豪咁畫法，應該都捱唔到成年架喇！媽咪真係蠢左，買多盒又唔會重得去邊，都無買添！

去到晶晶，呢個唔係媽咪嘅target，不過媽咪記得上年有磁石教育貼賣，上年想買嘅“我的身體”買唔到，今年都無一定要買，經過就睇吓啦，點知都係無，sales話斷左貨好耐，佢地都係清貨唔會返貨喎！咁即係同佢無緣啦！算啦！反正Ambrose都識辨別身體唔同部位，最多咪自己整d字咭俾佢認字配對就算，慳返啦！再行吓見到有Sing and Learn Big Book，其實媽咪都知道小朋友都鍾意大書，不過媽咪成日都覺得Big Book又大又軟，唔知可以收去邊度好，又入唔到書櫃，所以一直都係鍾意但唔會買。今日响晶晶見到呢本Big Book有埋歌仔CD，打開入面除左有英文字有圖睇，重有埋琴譜添！媽咪見d歌仔唔係好長，望落係單手彈嘅，屋企又長放電子琴出黎俾Ambrose亂彈，所以媽咪覺得呢本Big Book啱哂，一來可以一嘗睇Big Book嘅滋味，二來攞黎彈琴仔俾Ambrose都唔錯，Ambrose大d自己睇譜彈都得，價錢重要一套兩本連兩CD都係$100，抵呀！

去到target嘅青田，媽咪第一時間睇“我自己會讀”系列，呢套係中文教材，都幾啱幼兒，係市面唔係好多中文教材之中其中一個選擇。一套十二本書連廣東話普通話CD加一本練習冊，每本書其實都係得八頁，每頁可能只有一個生字又或者一句句子，透過重複句式、圖畫及成人提問，幼童邊讀、邊猜測故事發展同結局，培養觀察力、聯想力和猜測能力等閲讀技巧；書中另有可撕出黎嘅字咭仔，家長可利用字咭同小朋友認字玩遊戲，鞏固認讀生字，同埋仿作句子嘅能力。雖然睇落一本幾頁得幾隻字，不過就係因為咁先啱幼兒，市面上真係無咩圖書係咁少字同埋學認字。媽咪見Ambrose對於屋企果d中文圖書無咩心機睇，媽咪想買一set同Ambrose試吓，少字d可能佢會接受到都未定！奈何書局又唔係間間有，有又唔係個個level都齊，重要一set賣$225，書展一套$18x，媽咪好快就決定買一套紅輯試吓！之後媽咪再搵埋oxford reading tree嘅書，呢套又係for幼兒step into reading嘅英文故事書，分唔同level，由無字書開始上，step by step學英文。媽咪見DWE有時又長又多字，雖然Ambrose有時都有耐性睇書，但媽咪覺得佢只係睇圖多過字。見Ambrose都差唔多兩歲，又開始認得幾個英文字母，可能無啦啦有一日佢會對文字敏感，媽咪希望試吓用呢套書仔鼓勵佢多睇字，所以媽咪最後無選最低級嘅stage 1無字書，而選左stage 1+，透過patterned stories同簡單句式，貼近生活嘅故事內容提高Ambrose對文字嘅興趣！一set六本加parent guide及CD，原價$255，其實有d貴，不過平時書局又係level唔齊，又無人可以問到，書展好似只係做九折，唔係平得多，不過媽咪一早target要買一套試，所以唔係特別平都照買，起碼比平時書局平少少！呢兩套中英文step into reading套裝書，盛惠$409.5！

再响target嘅KUMON買magnetic number board 1 – 30，其實1 – 100都係一樣價錢，不過1 – 30字體大d啱Ambrose多d，所以媽咪都心儀呢set多d！雖然Ambrose未夠兩歲，呢套教具對於佢黎講可能都係難左少少，不過媽咪記得上年好似只賣$100，今年已經去到$120，如果出年先買，都唔知又加到幾多錢，咁不如都係早d買，早d俾Ambrose當配對數字咁玩住先都抵！不過呢set野咁貴，原來質量好好，媽咪一攞上手，超級重，同埋原來套教具有個靚膠盒放番好d數字磁貼同磁板，磁貼係可以磁上盒入面整齊排列，而唔係就咁一個盒擺埋d磁貼“散修修”就算，怪唔知得要賣成$120啦！

經過一間不知名嘅counter，無端端俾媽咪見到Scholastic嘅 Spelling Machine，呢本書之前媽咪見有blog友提過話幾好，而且一般書局都無呢本書，book buddies同book castle都未必有貨，媽咪一見到嘅時候，二話不說攞起望兩望已經決定買！呢本書有咩好？入面有幾頁圖係教生字，可以叫小朋友搵番果樣野出黎，好簡單，而重點就係書後面有個大輪盤，個輪盤就好似舊式電話咁，上面有齊a – z英文字母，小朋友透過撥呢個大輪盤串生字，撥完之後响個flip flag位打開睇吓係咪果個字，練到手指仔之餘亦非常之生動咁學串字。雖然Ambrose應該都要再大少少先識串字，不過媽咪見本書只係$79，又係機緣之下俾媽咪見到，所以一定要買定俾Ambrose第日玩啦！俾錢時先知重有九折，盛惠$71.9，抵呀！

唔記得幾時食飯，雅雯爹爹接走雅雯返去，好等Wing姨姨可以專心咁行，亦都幫Wing姨姨攞走d戰利品先。媽咪都係第一次行書展行到要响入面食埋飯再行，哈哈！不過無小朋友一齊行真係專心集中好多，除非小朋友已經四五歲啦，媽咪諗呢幾年都只會自己行書展喇！

之前行過恆健睇立體書，不過因為尚有其他野要睇，所以無買，臨近尾聲，媽咪同Wing姨姨又行番去恆健，不過媽咪已經負重太多，真係唔可以再買，加上又驚Ambrose好易撕爛d立體書浪費左，媽咪忍住唔買，到佢再大多少少識唔會亂黎先再買啦！不過唔買唔買，媽咪都買左trains, boats and planes立體書，呢期Ambrose愛上左車仔船仔同飛機仔，媽咪忍唔住買俾佢等佢開心吓啦！$180三本，好彩Wing姨姨買夠三本，媽咪膽粗粗問人第四本可唔可以都計$60，又得喎，所以恆健收獲係一本$60嘅立體書，超值！

再行過之前見到有兒童較剪嘅counter，雖然知道出面書局有得買，同埋又無哂鮮色嘅長頸鹿造型，但一場黎到書展，又再經過呢個counter，都係忍唔住行番入去買埋把斑馬造型兒童較剪，唔平架，$28！

行過一間賣內地書嘅counter，唔記得點解會吸引到我地停低，不過媽咪睇睇吓竟然見又有本手工書，又係剪貼，重有分起步進諧篇，雖然係簡體字，但媽咪相信玩呢本書都會有媽咪指導，所以簡唔簡體字都無咩問題，一本$18，超平，重抵過响淘寶買KUMON workbooks，大本d麻，俾Ambrose玩大張d方便d呀！不過因為媽咪近期入左好多手工書，而行左咁多個鐘d野又好重，係重到連有免費嘅育兒雜誌攞媽咪都放棄左，所以諗黎諗去都係買一本算啦！俾錢時收銀姐姐話$15，原來$18重要有折，媽咪見$15咁平，又忍唔住走番入去攞多本俾錢，盛惠$30，哈哈！

原本之前想搵思展買漢字500，不過唔知係媽咪抄錯左號碼定點，搵極都無，睇埋floor plan都搵唔到，為左唔拖慢進度，媽咪唯有放棄唔搵！世事嘅野就係咁啱，要搵果陣就搵唔到，唔搵果時又無啦啦俾媽咪見到！漢字500啟蒙篇一set五本書局賣$260，呢度賣緊$205，媽咪即時兩眼發光，平左咁多喎，重要係媽咪target要買嘅書，响書局成日都係散書無set裝，而家呢度set裝得黎又咁平，只係二百喎，媽咪好想買，但Wing姨姨話好悶唔吸引，雖然媽咪都好認同本書好悶，但因為網上好多好評，加上媽咪諗住小朋友都無分悶唔悶，係大人覺得啫，所以都係想入場買番去試吓！見Wing姨姨堅持唔好，加上媽咪真係攞住超多野好重好辛苦，買埋呢一set書真係唔知返唔返到屋企，再加上今日媽咪target出血一千蚊左右，之前crayola已超出預期要買嘅野而over budget左，所以媽咪最終都放棄唔買喇！

行到八八九九，媽咪同Wing姨姨終於回程去收番放响cashier俾左同未俾錢嘅書，真係有驚無險，無唔見無漏！而之前响小樹苗選嘅三本書，因為Wing姨姨買左盒裝書嘅關係，無啦啦由本來幾本得八折變成七五折，再加上媽咪有印到電子coupon，同Wing姨姨對減每人$10之後，三本書都只係$68，超抵！媽咪都係第一次咁婆仔真係走去睇有咩coupon印，重要印左之後真係走去問人用唔用得，婆仔到爆呀！

十一點幾，估唔到真係行到咁夜，重諗住早左入場會早d走到，點知都一樣咁夜。返到屋企沖得涼已經十二點幾，雖然身心疲倦，但買到咁多咁平嘅心頭好，再攰d都值得啦！沖完涼不知幾想摷哂d戰利品出黎欣賞，不過全部人都瞓哂，媽咪又勞累左成日，都係第日至慢慢欣賞過喇！

二十三個月之語言發展

Ambrose嘅語言發展一直都係媽咪幾擔心嘅一環，因為Ambrose一直都只講bb話，歲半時返健康院評估時又唔合格，識叫媽媽都係歲半打後嘅事。原本媽咪好想同佢出去做語言評估，但好多人都話男仔係講野慢d，同埋好多都會兩歲後先講野，所以媽咪決定多等一陣，兩歲依然無大進展嘅話就同佢盡早做評估跟進。隨住時間一個月一個月咁過去，Ambrose都唔係有好大嘅進步，媽咪都打定輸數兩歲出去評估，點知六月去完新加坡之後，Ambrose好似開始有進步喇！  

去新加坡之前，爹爹每日都同佢講魚尾獅同史力加，又同佢講搭飛機去新加坡，所以果時開始，Ambrose識得講“獅”、“加”同埋“坡”，雖然係單字，都叫有進展，媽咪已經好開心！之後去完旅行返黎嘅某一日，Ambrose突然識講“巴士”、“的士”、“挖車”；過多一排又識講“白色”、“落地”、“啤酒”、“栗米”、“good nite”等。其實Ambrose重識講其他唔同字，只係呢幾個字佢係成日都會講。而且，媽咪發覺Ambrose開始大人講一個字佢會識跟住講，以前真係對牛彈琴，講極都唔理我地架麻，佢肯跟講，又係另一大進步！及至早幾日，媽咪發現Ambrose開始講短句喇！Ambrose有日同媽咪講：“媽媽食”同埋“積木、媽媽砌”，真係好利害，因為媽咪都係第一次知佢識講積木，佢唔係跟人講，而係自己無啦啦講，真係好驚喜！  

有人話小朋友之前唔識講野，一到識講果陣就會全部都識，連珠爆發咁，唔知Ambrose係咪呢類型呢？  

媽咪發覺Ambrose呢一個多月以黎嘅語言發展真係好快，係好突然嘅事！呢排嫲嫲又攞番英文字母手抓板出黎俾Ambrose玩，原來Ambrose已經識睇讀A / B / C / D / E / G / K / O / Q等，而F/ / H / L / S / W 佢就只能發到尾音！數數字方面，又係另一個驚喜，都唔知佢係一早識左但未識講俾我地知丫，定係真係呢排語言發展一起，好快學識左，無論點都好，Ambrose終於開始發展語言，媽咪可以擔心少d喇！希望到下個月兩歲嘅時候，又會有再多嘅驚喜啦！

SpecialLuk Level 1

今晚，媽咪攞左之前响美國訂番黎嘅SpecialLuk俾Ambrose玩，雖然話呢套野係for age 2+嘅，但媽咪見Level 1望落似乎都應該唔難，以Ambrose平時玩手抓板配對、影子咭配對同埋相片實物配對嘅情況睇，應該難唔到佢，所以媽咪決定早d同佢試玩吓，睇吓佢對呢類型嘅教具有無興趣！

不過媽咪除左訂番黎收到之後仔細研究過點玩之後再無攞出黎睇，今晚攞出黎玩之前又無特別再準備過，所以媽咪開頭同Ambrose玩係掉轉左上下玩，哈哈！因為係Level 1，真係由零開始，開頭幾個練習只係教小朋友將板塊放上指定格格，所以係無答案對照到，媽咪要去到唔知pattern幾多時，開始要睇板後pattern啱唔啱，先發覺點解明明放啱左但個pattern同答案唔match嘅呢？呢個時候媽咪先發覺板塊應該放在上面，配對落下面；但媽咪教Ambrose相反，係由下而上，媽咪又要從新教過喇！

媽咪今次都係試玩性質，諗住俾Ambrose玩吓，睇吓佢有無興趣，好彩Ambrose對於呢套教具都有少少興趣，肯聽媽咪教點玩同埋真係玩左一陣，無話中間想放棄！今晚做左七個練習，由只放指定幾塊板塊，到放哂所有板塊再配對下面相同位置，再撈亂哂配對唔同位置，再由黃底紅圖案配落去白底紅圖案，似乎都好順利做到！媽咪原來都低估左Ambrose，早知係咁，媽咪應該再早少少攞出黎同玩啦！

其實市面上都有好多類似嘅smart book，不過似乎俾兩歲嘅真係唔多，最細都要三歲！由於之前做皮紋測試時分析到Ambrose邏輯一環比較弱，要多做訓練，所以媽咪一直都四圍打探有咩教具啱Ambrose！結果俾媽咪搵到Luk。媽咪鍾意呢套教具，一來係佢嘅內容真係適齡，唔會話成套野得幾頁啱玩，二來市面好多smart book嘅操作板都係十幾塊，而Luk只有六塊，對於專注力唔強嘅兩歲小朋友比較啱d，每個練習都只有六塊板要操作，令小朋友覺得快d容易d，成功感大d，有成功感先至會有動力再玩架麻！最重要嘅係好多市面嘅操作板塊係以數目字排列，雖然好似睇落唔錯，可以教埋數字排序咁，但媽咪覺得以兩歲小朋友黎講，圖案又比數字容易自行跟書擺放，如果想要小朋友自己玩，似乎圖案會好少少，數字好似真係要有少少排序concept先可以自行玩到咁！所以，雖然同價錢Luk係比市面smart book買到嘅書係少d，香港又唔係好多地方有得買咁，但媽咪好好彩搵到美國網站訂番黎平過响香港買，媽咪覺得值得一試！

經過今晚之後，媽咪決定多同Ambrose玩呢套教具，話唔定唔使到三歲已經可以玩高一個level嘅BambinoLuk！

幼兒樂園第四堂

今日返學有少少遲到，一去到已經有好多小朋友玩緊玩具，爹爹見老師未叫收玩具，就叫Ambrose去攞玩具玩，點知慢手慢腳嘅Ambrose攞住份飛機玩具倫倫盡盡行番位之後，老師就叫收玩具，Ambrose都未開始玩，媽咪又要催促佢bye bye玩具，真係唔係幾好意思！  

收好玩具，又係圍埋坐、點名、講一次日期、故事時間！聽完故事，今日手工係玩水果印畫！只見助手姐姐預備左幾個膠盒，入面有索哂色嘅海棉，而每盒都有唔同水果，媽咪見到都覺得好玩呀！小朋友用手仔攞起水果大力撳吓，再印落畫紙度，估唔到咁有新意，印出黎亦都好靚！睇黎Ambrose畫室又可以多樣新玩意喇！Ambrose對於顏色其實都幾熱衷，佢好專心咁係咁印，媽咪覺得欣慰嘅係Ambrose識得將水果分散印响唔同位置度，同响屋企坐地下畫畫，畫黎畫去都係同一位置唔同，媽咪再一次諗Ambrose可能真係唔適合坐响地下畫畫！媽咪望吓其他同學仔，發覺其他同學仔嘅印畫又真係無Ambrose印得靚（自我陶醉中），因為d水果全部都印到重覆哂，又或者只集中响畫紙某個範圍，又或者根本印得唔夠大力再攞開，成個圖像化哂！Ambrose好快已經印滿哂成張畫紙， 連 老師叫印好交俾助手姐姐，Ambrose都充耳不聞，照繼續印，媽咪要發功先叫到佢停，再去洗手，佢係全場最尾洗完手入番課室嘅小朋友！  

歌仔時間，玩有隻雀仔跌落水，做吓動作，排隊一路唱一路睇吓 邊個俾 老師捉到！不過好老實講，開頭做動作部份，真係無咩小朋友跟，就連大人都跟唔到，因為都唔識，老師又無教一次先開始，攪到媽咪都覺得有少少無所適從！玩完後，又到茶點時間！今日食啤梨，不過d啤梨超硬，Ambrose用叉好努力都篤唔到，媽咪都要出手相助！好合理地，今次無人舉手要添食，因為我諗小朋友都唔多鍾意咁硬嘅野食，大人見到就更加唔想俾小朋友添食啦！之後茶點食物有提子乾、字母餅、小蛋糕、蔬菜條，媽咪見到蔬菜條都有d驚訝，同大人食果d蝦條薯條差唔多，怪唔知得隔離個男仔一手攞起黎食得好滋味啦，重要其他野都未食完已經舉手要添食。Ambrose後知後覺啦，食左提子乾先，見人地食得咁滋味先至急不及待去攞黎食，哈哈！茶點完，分類收拾，Ambrose係第一個食哂d野食行出去擺番好d餐具，响屋企又唔見佢咁落力做，出去上堂唔知點解佢一定要做，而且好肉緊架喎！  

攪掂哂，老師宣佈下堂開始搬課室，由而家嘅加連威老道轉去山林道，唉！又會咁都有架，果邊d標位唔係成日有，真係麻煩好多囉！

2011年7月16日

最近爹爹諗緊換樓好定係買多層樓收租當儲錢好，媽咪都無咩意見，換樓環境會比而家好，不過感覺上將所有野投資落一層貴樓度，好冒險咁；買多層普通兩房收租照keep住响而家呢度，環境雖然係一般，不過勝在近屋企，而且負擔似乎無咁大，有事上黎，調動可以彈性d，亦都分散投資，尤其是Ambrose已經去到讀書年齡，真係有好多變數都唔定！爹爹媽咪都未諗定，不過反正都係諗，爹爹今朝早就約左經紀去睇樓，brainstorm吓先！  

一早起身去左三聖食早餐之後去左愛琴海岸睇樓，不過因為以前爹爹媽咪都睇過，今次去只係重溫番單位間隔同埋周圍環境！媽咪以前睇過呢度已經好鍾意，間隔四正實用，周圍環境又清幽，只係交通有點不便。今次再去，雖然事隔幾年，媽咪同樣鍾意！尤其今日睇到個千鬆d尺望海嘅單位，真係好正！不過呢個單位只係放租，而且過千尺又望海嘅爹爹媽咪負擔唔起，睇吓恨吓都開心嘅！之後另一個九百幾尺嘅單位，望山，真係唔錯，九百幾尺比起之前千鬆d尺唔係細得幾多，爹爹喜歡佢嘅士多房係在廳有門入，而且呢個士多房都比一般嘅大，迫迫地都可以當一間細房，勉強都可以叫四房單位喎，哈哈！  

由於只係睇間隔，所以都係睇左兩間唔使約業主嘅就算喇！再睇佢個會所，好大，入面有個好大嘅遊樂場有哂軟墊，啱哂Ambrose玩，又有遊戲室，有哂室內細slide、屋仔、工具台等玩具，如果真係搬黎呢度，真係唔使諗要買大型玩具，屋企條slide都可以bid走埋都得呀！會所又有室內外泳池，好吸引！最主要嘅係媽咪留意到四圍嘅小朋友除左本地人，重有外國人同埋內地人，媽咪相信嫲嫲一定好鍾意呢度，因為佢一直都覺得環境好係好重要！行去出面，又有好幾個遊樂場，雖然自己屋企樓下都有唔少遊樂場，但就硬係覺得呢度嘅好玩d同乾淨d咁！哈哈！  

睇完樓，媽咪依然好鍾意呢度，不過換樓買樓嘅決定真係唔細，要諗嘅野真係好多，所以爹爹媽咪都係睇完有個參考先至再諗之後嘅野喇！  

返左屋企瞓午覺，起身又話返playgroup！今日主題係樂器，topic time時好罕有地圍埋電視度坐，教生字同唱歌仔。不過媽咪始終都唔太鍾意對住電視，真係唔知望老師好定望電視好，而且返playgroup媽咪覺得都係有限時間，唔expect以電視輔助囉，反正snack time又會開電視，俾得錢上堂媽咪就覺得唔想有電視元素囉，响屋企又唔同喎！所以媽咪再一次覺得有d反感！  

上完堂，約左表姐過南浪游水，好彩係有室內池，唔係落堂過得去黎都成六點半，游室外一定嫌凍！今日媽咪都係第一次見Ambrose用水袖，真係唔錯喎，雖然都見佢有時都要平衡身體，但比起水泡，感覺又安全d！大表姐落到水就顛左，本來佢對Ambrose已經夠熱情，落左水就更加，係咁又要拖又要攬，可憐Ambrose俾佢又拖又撳又拉之下飲左幾啖水，開始驚啦！而二表姐，佢直頭係由一開始已經唔肯落水，等我地玩左成半個鐘之後佢先肯落水，重要痴住姑仔唔放，哈哈！三表姐弟足足玩左七十分鐘先走，下次如果可以真係想早d過去游吓室外池，曬吓太陽呀！  

游完水，响舅婆屋企食埋飯，姑仔同兩個表姐又過埋黎我地屋企過夜，三表姐弟又可以玩埋一堆，唔知幾時Ambrose可以自己响表姐度過夜呢？咁媽咪就有覺好瞓喇，嘩哈哈！

2011年7月15日

今晚媽咪攞左之前托Ellen姨姨買嘅治療膠俾Ambrose玩，點知舊膠真係好實，要好大力先可以搓圓撳扁，爹爹見到舊膠時又好好興緻同我地一齊玩，所以其實主要都係靠爹爹搓多過我同Ambrose搓，哈哈！不過媽咪知道Ambrose對於泥膠物體都好抗拒，媽咪都唔期望佢會玩得耐，都係諗住攞出黎俾佢摸吓掂吓就算！好神奇，唔知係因為爹爹同佢一齊玩，定係舊治療膠嘅質感無一般泥膠咁軟綿綿，Ambrose竟然都可以幾投入咁一齊玩，放响地下同我地一齊碌長條，又搓波波，雖然佢力就唔係幾夠，但睇佢真係學我地一齊玩，媽咪好開心！爹爹不斷整唔同嘅野俾Ambrose，Ambrose不知幾開心，周圍彈吓彈吓，又攞俾嫲嫲睇，嫲嫲又整左餃子俾Ambrose，佢真係笑到見牙唔見眼！睇黎，下次都要搵埋爹爹一齊再同Ambrose玩過至得，希望Ambrose玩多d，對唔同質感嘅野都會易接受d啦！媽咪希望Ambrose有一日可以接受到正常嘅泥膠，咁佢又可以多一樣益智玩具可以玩麻！  

講開舊治療膠，真係好得意架喎！玩耐左，舊膠都軟左，易搓易撳好多，重要佢好有彈力，搓左個波波出黎，Ambrose一掉，真係四圍彈，Ambrose見到不知幾興奮！玩完用水沖吓d塵，抺番乾擺番入盒，過多一陣佢就會變為同個盒同一形狀，真係幾好打理！Ellen姨姨果然無介紹錯！  

玩完治療膠，要平伏番情緒唔好咁高漲，媽咪攞左印仔出黎同Ambrose玩！媽咪唔鍾意市面上印仔一放上紙上細細力就印到咁容易，所以走左去做左一個原子印，要Ambrose放好印後都要用少少力撳落去先印到，一來可練手力，二來可練埋耐性，唔係亂印一餐就得！媽咪知Ambrose鍾意太陽伯伯或者哈哈笑，所以做原子印時都以呢兩個公仔為原則去做。最後，睇左圖樣，媽咪選左哈哈笑俾Ambrose！做左個哈哈笑印之後，媽咪意外又响間文具店見有ABC原子印，不過就好細粒，應該係酒樓吸點心用嘅，見Ambrose呢排成日講“B”，媽咪又買多個“B”字印仔俾Ambrose！今晚兩個印仔一齊輪住玩，Ambrose先選左哈哈笑印仔，媽咪用白紙响上面隨意畫唔同圈圈，要Ambrose印哈哈笑在圈入面，一個圈一個哈哈笑。可能Ambrose唔係第一次咁玩，所以完全難唔到佢，之前玩嘅時候，媽咪重會用電腦畫好圈圈印出黎好似好整齊咁，但後尾因為Ambrose印得好快，而媽咪又無預備太多，所以要即時用筆畫。畫過以後媽咪就覺得畫係好d，因為唔需要之前整定可慳返d時間，二來手畫真係可以好隨意，彈性大好多，有時Ambrose甚至未等媽咪畫完就開始印，媽咪一路畫佢就一路印，媽咪覺得咁樣唔多唔少都練到追視。而“B”字印仔因為細過哈哈笑印仔，所以媽咪畫嘅圈圈都因應而畫細d，手眼協調技巧又高d！  

今晚Ambrose玩印仔有新玩法，哈哈！佢見媽咪畫圈圈咁開心，佢竟然要媽咪印印仔，佢自己就揸住筆畫圈！雖然Ambrose畫圈力度有待訓練，同埋佢會畫好一圈之後唔係好識停，要轉多一圈先停到，不過媽咪見佢真係好用心畫，揸筆姿態係同大人一樣，再唔係一手抓住枝筆亂咁畫，媽咪非常欣慰！

呢張係Ambrose吸印媽咪畫圈！

而呢張係媽咪吸印Ambrose畫圈！

白色

今朝Ambrose一瞓醒就攞左份顏色手抓板上床玩，自得其樂之餘重係咁叫同拍媽咪同佢一齊玩。Ambrose倒哂d手抓板出黎，又再自己擺番上啱位度，突然間，佢話“白色”，講左好幾次，一次比一次清楚，媽咪唔知咩事，係咁讚佢好叻，識講白色，點知Ambrose都重不停講，原來媽咪唔小心壓住半塊白色手抓板，Ambrose攞唔到係咁叫“白色”，今次係佢第一次自己講白色，重要唔係講一次咁少，媽咪真係好驚喜！

2011年7月11日

今晚爹爹返夜，又係Ambrose嘅craft time！  

呢期Ambrose開始識講好多野，其中佢最近識講“牛”，所以為左配合番Ambrose，今晚媽咪攞左之前淘寶淘番黎嘅手工，就係紙袋乳牛喇！呢set野其實幾好，有齊哂整牛牛嘅材料，一pack包哂成個手工，媽咪唔使煩自製材料再俾Ambrose整，好方便！不過呢pack乳牛手工應該係抄美國嘅Alex’s little hand嘅手工，人地一盒有幾個呢d類似紙袋動物手工，配嘅係glue stick，淘寶呢個係逐個動物手工買，配嘅係一卷超細同超幼嘅雙面膠紙！平又真係ok平，幾蚊一set，不過呢次淘嘅運費超貴，加埋再計番港幣，一set都成十幾二十蚊，比起正版嘅Alex’s little hand一盒有四五個手工賣一百左右，其實媽咪今次買貴左喇！不過香港唔係好多地方賣Alex’s little hand，咁媽咪當慳左時間出去買都叫ok嘅！  

因為配嘅雙面膠紙超細，就算媽咪一早幫Ambrose痴好哂位再叫佢搣出黎貼，相信佢對又肥又粗嘅手指都好難搣，叫佢咁辛苦咁搣到最後可能又係求助媽咪都係無意思嘅，所以媽咪決定今次用漿糊做。一來之前Ambrose試過抗拒用漿糊而放棄左做手工，媽咪希望今次隻牛牛可以吸引到佢去做從而慢慢接受掂漿糊；二來媽咪原來手上係無glue stick，只有漿糊，為左唔好浪費，都係試一試用漿糊啦，哈哈！  

Ambrose開頭見到隻牛牛同罐漿糊都好興奮，媽咪指導Ambrose用手指撩完搽落手工紙度再對位貼上去，Ambrose一開始都ok，係眉頭有少少皺，哈哈！試左一對眼之後，似乎佢開始唔太自在，想搵番個漿糊蓋蓋番唔玩，媽咪唯有幫佢手快快痴好對耳先，再氹佢牛牛未有手腳，不如幫吓佢先啦。半推半就之下，Ambrose開始接受到用手撩漿糊搽喇，可能佢high得濟，有時媽咪一時唔為意，轉過頭佢已經將成條牛尾牛腳搽哂漿糊（但其實只要搽少少在頂部就夠），攪到隻牛好多漿糊痴立立！  

整好左牛形，媽咪幫Ambrose抺手就俾張斑點貼子Ambrose同隻牛貼喇！開頭成張貼子係黑色，好平無坑紋，Ambrose好難認到邊個位有斑點可搣，所以媽咪將全張紙嘅黑底貼子撕走，所有斑點貼子登時留响張紙上好清楚，咁就好好多！唔知係咪近排Ambrose無玩貼子，睇佢好似就咁搣都比以前無咁純熟，有張重搣爛埋添，睇黎，媽咪要諗d方法轉過個形式同佢玩多d貼子至得喇！  

完成品！好靚！不過媽咪發覺Ambrose好多時候都係enjoy做手工嘅過程多，佢會見到媽咪攞手工出黎同佢做而兩眼發光尖叫，好開心同期待；佢會有耐心咁聽媽咪講點做再慢慢跟住做直至完成，但當佢做好個完成品之後通常會玩一陣之後就掉左去唔知邊度，有時甚至整整吓玩玩吓爛埋，d完成品每每都唔會完整無缺咁捱得過三日！今晚呢隻咁靚嘅牛牛，唔使十分鐘，媽咪只係轉頭攞個磁貼俾Ambrose，佢竟然一手將隻牛分屍，係咁搣係咁周圍撥，真係激死媽咪呀！雖然媽咪買得手工野都預左做左出黎唔擺得耐，但都唔係即整即爛，重要咁爛囉！好貴架，Ambrose！真係想罵佢敗家呀！媽咪即時問Ambrose係咪好鍾意個磁貼，佢答係，媽咪即時話好，你鍾意，媽咪要收埋，無得玩！Ambrose嘴都扁埋，真係好好笑，之後媽咪要佢自己收拾同掉垃圾先至可以攞番磁貼，Ambrose即時做，媽咪睇見呢隻牛就咁入左垃圾桶，真係好心痛呀！

執好隻牛牛，媽咪醒起早前托Ellen姨姨淘寶團購買番黎嘅貼子書，見Ambrose貼貼子鈍左，又見佢呢排講多左野，不如都係攞出黎俾佢練吓手指仔之餘，又可教佢生字同顏色啦！Ambrose見到本書好興奮，媽咪將內頁中間嘅貼子成張撕出黎俾佢睇，佢開心到係咁指住d貼子講出果張貼子係咩黎，見佢係咁講，媽咪由得佢，最衰媽咪攞唔切攝錄機影低佢啦！之後媽咪教生字“red”，其實Ambrose都講到，不過唔知佢明唔明，哈哈，媽咪要Ambrose响張貼子度搵番紅色嘅貼子貼番去個影度，不過Ambrose就叫極都唔應人囉，成張貼子太多喇，佢一味就睇其他貼子，唔係搵紅色貼子囉，又係咁指住d挖泥車講“挖車”（唔識講“泥”字），媽咪最後好辛苦先控制到Ambrose貼哂紅色同黃色嘅貼子，怕情況失控，今晚只學呢兩隻色就算喇！

 

2011年7月10日

今日爹爹同Ambrose上幼兒樂園，所以媽咪都唔係好知上左d咩，不過問番爹爹大致同平時流程差唔多，而今日手工係透明膠袋做嘅魚魚！爹爹似乎唔太喜歡呢度，覺得老師準備麻麻地，好幾次都叫左Ambrose中文名，但其實Ambrose已經出過去攞野，老師根本唔係諗住叫Ambrose，而係其他小朋友，爹爹覺得老師得幾個小朋友都認唔到，吓吓叫左Ambrose出去，Ambrose都好confused喎！加上好多時都係做做吓野先叫未得，要好期待嘅小朋友等待，明顯準備功夫麻麻喎！聽落都覺得有d唔合理，以前上幼潛，姨姨一對八個小朋友，第二堂一定認得，甚至乎上左一期換左第二個姨姨，再上返第一期姨姨嘅堂，姨姨都一眼認得Ambrose，可以叫出Ambrose全名！而家幼兒樂園，感覺上係少左學生，可能堂堂都返唔齊人啦，老師咁都唔記得，係有d失望囉！  

上完幼兒樂園，姑仔話mega box有米奇妙妙屋可以影吓相，諗住都要食野，就過左去mega box一齊食飯同影相！點知原來今日米奇妙妙屋封左，入唔到去影呀，好失望，好彩Ambrose未見到d公仔咋，唔係有得睇，無得行埋去，我地真係有排先捉到佢走呀！响宜家坐低左食野，見有個小小遊樂設施响餐廳中間，Ambrose食完野就同表姐入去玩過痛快，媽咪當然趁呢個時候入去行吓兒童天地啦！媽咪想買張平嘅台仔俾Ambrose，因為之前DWE送果張係斜面，睇書就啱，但要响斜台面上有活動就好難攪。而買平台面嘅台，一來可以俾Ambrose習慣埋台坐椅，第時返學都會係咁，唔會再坐响地下地墊上；二來又可以响台玩玩具，積木畫畫等等，唔使下下都坐地下，坐地下又無再矮d嘅台仔放玩具，好似成日要烏低身咁，有左張台可以坐好d玩，條腰都應該好d！媽咪睇左一輪，又叫左爹爹俾意見，可能爹爹都唔係第一次聽媽咪講想買台仔，今次佢再無意見，著媽咪鍾意就買啦！媽咪聽到不知幾開心，不過最後都因為未諗定邊張好而無買，媽咪諗住諗多一星期先，反正爹爹都應承左買，唔急啦！  

去完宜家，因為夜晚爹爹要返夜關係，我地又要返屋企俾爹爹瞓吓先返工！不過Ambrose而家去親街都會在車瞓著，但一泊好車一抱出車佢又會醒，返到屋企好少再肯瞓番，所以佢唔瞓，爹爹都無得休息。媽咪見Ambrose夠鐘要食野，所以同佢出左市中心搵嫲嫲同姨婆食tea同行街，夜晚就去左姨婆屋企痴餐喇！呢隻豬仔日頭唔肯瞓，食食吓飯可能都飽飽地佢就開始發吽哣，好好笑！媽咪知佢好攰，為怕推佢返屋企途中瞓著覺，返去整醒佢沖涼又好慘咁，唯有問姨婆借左件大人衫俾佢即場沖涼著走啦！哈哈！借左表舅父件衫著，著左成條睡裙咁，領又大，衫身又長，結果要响領口同衫尾用象筋綁實先得，好攪鬼！

大尾篤踩單車

尋晚媽咪發燒，諗住今日邊度都唔使去，點知今朝媽咪退左燒，雖然起身有d攰，見好似無咩事咁，難得爹爹提議去踩單車，望出去又好好太陽，唔想掃爹爹興，所以決定同Ambrose去大尾篤。出門前問埋爺爺去唔去，爺爺都想去，所以一行四人十點幾就出發喇！  

去到大尾篤停車場，嘩，超多標位呀，簡直係任泊！睇左免費嘅車位已滿，都係泊標位啦！泊好車，大家行左去食早餐，忠誠嘅早餐幾好食，環境唔錯，最好係呢d地方嘅茶餐廳竟然有bb high chair，真係好驚喜！舒舒服服食完個早餐，一行出去就係租單車嘅舖頭，本來諗住一家三口坐架家庭車，爺爺自行踩單車，不過經一輪試坐後，發現Ambrose若坐後座有危險之餘大人都好辛苦，坐前座就有前欄護住但又唔可以單獨坐，結果媽咪要同Ambrose一齊迫少少坐前座，爹爹同爺爺剛好坐後座齊齊踩單車！  

租好車之後，爹爹踩住架家庭車去左停車場打算再入標，點知好好彩俾我地見到個免費車位，爹爹快快手揸番架車過黎泊好後，我地就無後顧之憂咁向水霸方向踩上去喇！踩上水霸要上一條斜路，爹爹開頭堅持唔落車推，不過一車四人坐哂响度，上斜真係好吃力，最終，爹爹同爺爺都係忍唔住落車推上山，哈哈！上到水霸，一邊係海，有好多風帆；另一邊係湖，好平和翠綠，踩住單車陣陣涼風，好舒服！踩左三份一左右，爹爹同媽咪掉轉角色，爹爹同Ambrose坐，媽咪負責踩，媽咪真係踩到有d腳軟架！  

去到水霸尾，見有一家庭放風箏，媽咪後悔之前在士多見到時無買，重諗住無機會玩，點知原來水霸都幾大風，下次一定要同Ambrose放一次風箏至得！好彩媽咪有準備泡泡水同泡泡槍，所以停左落黎休息吓，影吓相同玩泡泡水！今日天氣真係好熱，但就係因為有太陽，周圍又多青綠色草樹，加上星期六朝早嘅大尾篤原來無咩人，所以今日影d相好靚，唔會有人肉佈景！其實唔係玩左好耐，只係玩左一陣，影左一陣相，又係時候開始慢慢踩番去還車，媽咪諗，下次如果又有免費車位，都可以租三個鐘車，咁樣可以放埋風箏，玩耐d先落山麻！  

還左車，食埋午飯，又係時候返屋企，抖一陣又要出動返playgroup喇！

第四次淘寶收獲

媽咪平日午飯時鍾意周圍行睇吓野，早排見DYMOCKS特價，又去左睇書。媽咪見到KUMON嘅幼兒手工書，全部都係for兩歲以上嘅幼兒，系列中有分let’s colour，let’s stick and paste同埋lets’s cut paper，媽咪覺得d書真係唔錯，有系統咁分左train咩野，colour可以train認顏色，partial同whole嘅概念，stick and paste可以train手眼協調，cut paper就更加係高層次嘅手眼協調、手指靈活度同整合概念，而且每頁一幅圖一個task，對於要返工嘅媽咪黎講，真係好方便，只要順住俾小朋友去做，唔使自己諗整d咩响邊度有free download，慳左好多時間。加上市面其實都無咩類似嘅手工書賣，媽咪見到呢系列嘅書時真係愛不惜手，好想一次過買哂，不過一本$60，買哂其實唔平。媽咪就住Ambrose嘅程度，只係買左let’s colour同埋let’s stick and paste各一本，盛惠$120。其實媽咪買完之後重念念不忘其他書，不過媽咪諗七月有書展，可能到時會有特價，反正又唔急住用，都係見啱就買定第日唔使周圍搵，咁都係等書展時有特價再買啦！

早排老公個朋友俾左條淘寶買童書嘅link俾媽咪，媽咪先發現原來淘寶嘅童書真係好平，望落好似都唔差！媽咪誤打誤撞link左去其他書店睇，無啦啦發現左一直念念不忘嘅KUMON手工書，每間總有 一兩 款賣，媽咪先至醒起其實可以去淘寶買，唔使等書展啦！就係咁，媽咪好辛苦搵左一間有KUMON最多唔同嘅手工書嘅店舖落ORDER買，因為書細本，要盡用首重運費，買得越多運費圍番先抵，如果間間都係得 一兩 本就唔抵啦！結果媽咪搵到一間有四本唔同嘅手工書，不過每本都只係得一本存貨，一本$15.8，比其他店舖貴，不過勝在有四本咁多！同埋對比番媽咪响DYMOCKS買嘅$60一本，差果 一兩 蚊真係唔係好多囉！

落order時其實媽咪都有諗過$60同$15.8嘅分別，差別咁大，唔知係咪得個樣，黎到又唔係果回事！不過媽咪都決定買，係因為諗住衰極都係紙質差d，內容應該唔會變掛？手工書又唔使好靚嘅紙材，做過就已經有得著，唔需要留為紀念，所以如果真係紙質差都應該可以接受，媽咪係買個概念囉！

估唔到落order之後隔日就送到，開包裝時媽咪不斷期待究d貨究竟得唔得？究竟媽咪今次有無被騙買左劣質貨？媽咪原先買嘅DYMOCKS貨一直都放在公司，confirm左淘寶店之後就打算貨到即開即比較，所以無攞番屋企。一開包裝，望落無咩分別，拆開打開入面睇，嘩！好得喎！入面色彩紙質同DYMOCKS果兩本真係無咩分別，媽咪忍唔住同同事分享，同事都即時比較過，大家都覺得兩者無分別，只係淘寶買番黎果幾本書面有少少壓痕同輕微可抺嘅污跡！四本連運費只係人仔$81.2，如果媽咪一早知道偉大嘅祖國都有一樣嘅書，又咁平，一定唔會捨得响DYMOCKS買$ 120兩本囉！

左面兩本係DYMOCKS買嘅，右面四本就係淘寶貨！

淘寶

好幾年之前聽人講淘寶好多野買，又平又抵，我都忍唔住上網研究吓，開哂戶口，不過當時要開戶口同埋攪俾錢果part真係好煩，最終我開左戶口之後就不了了之，未試過淘過任何野。生bb果時，又係好多人話淘寶bb野又平又ok，我雖然心郁郁，但都係敵唔過一個煩字，最終都係的唔起心肝自己去試，只係有時其他媽咪攪淘寶團購時，我會搭單買少少野，主要都係玩具多。買過幾次之後，就覺得淘寶貨真係好平，質量亦唔差，小朋友玩具有時真係玩一陣，如果下下都買咁貴嘅野，真係倒水咁倒，買平嘅，啱年紀玩一排唔要都唔肉赤麻！不過由於係團購嘅關係，每每都要响指定某幾間店舖選購產品，我又唔係間間都啱，想買果d又唔响list入面，所以我覺得如果自己識淘，真係方便好多囉！  

本著唔識就慳返嘅心態，我一直都係得個諗字，無實行過去試淘。眼見周圍同事一個又一個加入淘寶行列，加上我早排有d手工野想買俾Ambrose玩，check過美國網站有得買，但運費極貴，一係就唔接international order，十五十六諗緊好唔好買嘅時候，我靈機一觸諗起去淘寶搵吓先。雖然我想買嘅野最終都係搵唔到，不過响搵嘅過程入面見到淘寶都有唔少美工用品，平時香港書店又唔會有，有又無咁平，我覺得價錢好吸引，所以終於忍唔住試左人生第一次淘寶！哈哈！第一次淘寶簡直錯漏百出，又唔識拍落黎，又唔知點同賣家講改運費，最慘係開戶年代久遠，我完全唔記得個支付密碼，唔記得左就俾唔到錢買唔到野，我撞左幾次又鎖左戶口，又話要等幾個鐘先可重試，又話搵密碼要搵客服，真係煩到想放棄！結果我用左幾日誤打誤撞撞番個密碼，俾到錢，淘到野喇！送黎嘅貨都ok，最緊要係慳左搵嘅時間，坐响度就送上黎，真係好方便！  

就係咁試左一次之後，就有第二、三次喇！第二次嘅淘寶，全部都係手工貼子野，好輕，d貨大部份都ok，不過運費到付，而賣家可能包裝問題令我只係買左九十幾蚊貨就俾左九十幾蚊運費，真係貴到嘔，經此一役，我都係覺得一次過同賣家傾好運費一次過俾好過到貨先俾，無哂預算咁！第三次淘寶，係幾本書，質量唔錯，而且唔知點解唔係首重$30，買左三本都叫重嘅書同一幅畫，總運費都只係$27，今次原來賣家係用EMS，又令我識多樣野，原來EMS平過快遞，但都一樣咁快收到，哈哈！  

人人都話會中淘寶毒，睇黎我可能都走唔甩喎！

我發燒了

今朝晨早五六點，喉嚨痛痛醒左，起身飲杯水再瞓過，七點幾又話要起身，真係好想唔返工，唉！返到公司，開頭都無咩野，係有少少喉嚨痛，到中午時份，開始有少少頭痛，我都知自己應該作病架喇，拿拿聲食左粒頭痛藥就去開會。開完會差唔多放工，以為都無咩事啦，點知返到屋企之後開始覺得肌肉痛，全身都無咩力咁，似乎真係要病。同完Ambrose玩陪佢瞓著再起身，硬係覺得好病，有d熱，攞起探熱針，原來我發燒呀，不過都唔係好高，實在好突然，放假先黎病，真係麻煩！食左藥，貼埋退熱貼就去瞓覺，希望快d好番，唔好浪費左兩日假期啦！

自己食藥水

以前一叫親Ambrose食藥水，佢都會走左去，氹一輪都唔掂，最尾都係捉住佢用針筒快趣唧俾佢食，食一次藥就好似打仗咁，分分鐘手又係藥水地又係藥水，連衫都有藥水，真係好難攪！隨住Ambrose大過，又重又大力，爹爹媽咪又唔想吓吓都咁樣捉佢食藥，一來佢好慘咁，二來佢實在太大力反抗，驚整親佢之餘又無咁好力去撳實佢啦！爹爹媽咪唯有盡量氹佢就咁食，不過都係試過 一兩 次氹到佢肯就咁飲藥水，試過 一兩 次之後，Ambrose又再唔肯喇，可能都係覺得好難頂掛！  

今次新加坡之旅，事前爹爹成日攞本旅行書話俾Ambrose知我地將會去新加坡，話佢知新加坡有魚尾獅又有史力加，唔知係咪佢睇得多，開始鍾意左，同埋開始知道我地要去旅行，一問佢去旅行去邊度，佢就會答“坡”，哈哈！不過真係唔好彩，去新加坡之前一兩日佢就開始病，要食藥，爹爹不知幾擔心，唔知最後Ambrose出唔出到發，爹爹成日同Ambrose講要食藥先可以快d好番去新加坡。雖然最後Ambrose都係帶病出發無好番，不過响新加坡期間，神奇嘅事就出現左喇！平時唔肯食藥嘅Ambrose，次次都要兩個人捉實佢先餵到藥，响新加坡期間，每次叫佢食藥，佢都乖乖走埋黎，俾爹爹放枝針筒放入口唧藥，一d掙扎都無，重要係即使唔响酒店，响街食藥，都無問題，真係方便左好多呀！新加坡之旅五日四夜，一日食四次藥，真係食足咁多次都係咁，實在令爹爹媽咪好欣慰，唔通佢明白去旅行唔可以病，所以佢自發肯合作食藥？  

返到黎香港之後，原本都已經好番，但早排佢同表姐玩完又病過，今次餵藥就已經唔同响新加坡時咁合作喇，係要慢慢氹先得，令媽咪更相信之前Ambrose咁乖係真明白去旅行係唔同，要合作嘅！原本諗住Ambrose食藥又要打回原狀，又要捉又要氹先得，但突然早幾日，Ambrose竟然肯食藥之餘，佢重要自己食，爹爹見佢要自己食，就教左佢點擺針筒同唧藥入口。Ambrose一學就識左，佢重不知幾鍾意自己唧藥食，食完d藥要飲水，爹爹都係用番針筒吸水俾佢唧入口飲，好利害！而家要Ambrose食藥，真係easy左好多！甚至乎Ambrose都愛上左食藥咁，因為爹爹話有一朝Ambrose衝左入廚房想攞野，問左一輪之後，原來Ambrose係想食藥，真係好好笑！  

媽咪諗，可能之前姑姐將二表姐自己唧藥食嘅片放左上facebook，Ambrose有睇果段片，可能佢見二表姐叻叻，自己又想試吓，點知一試又真係好易同好好玩，從此愛上左，哈哈！睇黎，將來返學同多d其他小朋友相處都一定對Ambrose有唔少幫助，媽咪好期待呀！