自己食藥水

以前一叫親Ambrose食藥水，佢都會走左去，氹一輪都唔掂，最尾都係捉住佢用針筒快趣唧俾佢食，食一次藥就好似打仗咁，分分鐘手又係藥水地又係藥水，連衫都有藥水，真係好難攪！隨住Ambrose大過，又重又大力，爹爹媽咪又唔想吓吓都咁樣捉佢食藥，一來佢好慘咁，二來佢實在太大力反抗，驚整親佢之餘又無咁好力去撳實佢啦！爹爹媽咪唯有盡量氹佢就咁食，不過都係試過 一兩 次氹到佢肯就咁飲藥水，試過 一兩 次之後，Ambrose又再唔肯喇，可能都係覺得好難頂掛！  

今次新加坡之旅，事前爹爹成日攞本旅行書話俾Ambrose知我地將會去新加坡，話佢知新加坡有魚尾獅又有史力加，唔知係咪佢睇得多，開始鍾意左，同埋開始知道我地要去旅行，一問佢去旅行去邊度，佢就會答“坡”，哈哈！不過真係唔好彩，去新加坡之前一兩日佢就開始病，要食藥，爹爹不知幾擔心，唔知最後Ambrose出唔出到發，爹爹成日同Ambrose講要食藥先可以快d好番去新加坡。雖然最後Ambrose都係帶病出發無好番，不過响新加坡期間，神奇嘅事就出現左喇！平時唔肯食藥嘅Ambrose，次次都要兩個人捉實佢先餵到藥，响新加坡期間，每次叫佢食藥，佢都乖乖走埋黎，俾爹爹放枝針筒放入口唧藥，一d掙扎都無，重要係即使唔响酒店，响街食藥，都無問題，真係方便左好多呀！新加坡之旅五日四夜，一日食四次藥，真係食足咁多次都係咁，實在令爹爹媽咪好欣慰，唔通佢明白去旅行唔可以病，所以佢自發肯合作食藥？  

返到黎香港之後，原本都已經好番，但早排佢同表姐玩完又病過，今次餵藥就已經唔同响新加坡時咁合作喇，係要慢慢氹先得，令媽咪更相信之前Ambrose咁乖係真明白去旅行係唔同，要合作嘅！原本諗住Ambrose食藥又要打回原狀，又要捉又要氹先得，但突然早幾日，Ambrose竟然肯食藥之餘，佢重要自己食，爹爹見佢要自己食，就教左佢點擺針筒同唧藥入口。Ambrose一學就識左，佢重不知幾鍾意自己唧藥食，食完d藥要飲水，爹爹都係用番針筒吸水俾佢唧入口飲，好利害！而家要Ambrose食藥，真係easy左好多！甚至乎Ambrose都愛上左食藥咁，因為爹爹話有一朝Ambrose衝左入廚房想攞野，問左一輪之後，原來Ambrose係想食藥，真係好好笑！  

媽咪諗，可能之前姑姐將二表姐自己唧藥食嘅片放左上facebook，Ambrose有睇果段片，可能佢見二表姐叻叻，自己又想試吓，點知一試又真係好易同好好玩，從此愛上左，哈哈！睇黎，將來返學同多d其他小朋友相處都一定對Ambrose有唔少幫助，媽咪好期待呀！