與雅雯共畫

今晚雅雯黎左同Ambrose一齊畫畫，一如以往，Ambrose一見雅雯就好high咁叫佢停落黎都唔得，一味攞d野出黎好似show off咁，又會行黎行去無時定。平時同Ambrose畫畫佢都比較定，知道要坐响膠台布上，今日佢真係顛左，係咁行黎行去唔理張膠台布，結果，佢無啦啦一次唔知點跌到撞到個濕紙巾盒，眼角瘀左；之後一次就踩左上膠台布上“線”左落地，重係頭落地“卜”左一下；再之後係佢坐响度伸長手擰少少身想攞枝畫筆，無啦啦都可以中左個頭落地。呢三次重創真係喊到好慘呀！媽咪知道Ambrose一定係眼瞓，因為食飯果陣佢已經摔眼摔面摔頭髮，只係媽咪以為沖完涼有野玩佢會精神番，點知唔係！今日Ambrose真係不在狀態。睇吓佢對手同手工衣都唔係好污糟就已經知啦，平日畫畫佢一定成對手都係顏色，連腳都有顏色先安樂架麻。  

今日同雅雯一齊畫畫，媽咪每人俾左一大張畫紙佢地畫，唔知係咪因為咁，大家就各有各畫，哈哈！後來雅雯走左去Ambrose畫紙度一齊畫，雖然唔算有太多交流，不過都總叫係一齊完成左幅畫！今日Ambrose有個小小突破，唔知係咪佢今日真係好攰，不在狀態，平時佢畫嘅畫，手腳並用，左撥加撥d顏色溝埋哂一埋，好深好沉色，今日張畫，佢用海棉棒印左好多大波波，有紅有綠咁，好靚，媽咪問佢係咪荔枝，佢好似都有少少點頭，嘩哈哈！  

Ambrose又有少少攪笑野，佢好鍾意油到成隻手板都係顏色再印隻手上畫紙度。Ambrose見媽咪會用另一隻手去按實要印手掌果隻手，等手掌窩都可貼平印落張畫紙度，Ambrose油完手掌學媽咪咁用手撳隻手落去，不過佢成日都撳錯手，佢成日都會將有顏色果隻手落力撳落去根本無顏色嘅手上面，撳完一輪都印唔到隻手囉，媽咪之前都已經教過好幾次，唔知點解佢都係會攪錯哂，哈哈！  

最後，媽咪見Ambrose一手都係顏色，又再摔面摔眼，好似有少少色入左眼咁，媽咪驚再摔會入哂眼，睇Ambrose都真係好攰咁，都無理雅雯想唔想停就捉左Ambrose去洗手洗面唔玩喇！