今堂開始，幼兒樂園轉左去山林道上堂，唉！今日咁早去到，成條街都係車，又整路，想搵個位停住先落車都唔得，媽咪真係唔鍾意呢度！好彩勉強都有個位停到，爹爹同我地一齊去搵果幢大廈，原來幢大廈入口有一條樓梯行上去，唔係兩三級，係一條十幾級嘅樓梯，即係話如果媽咪想自己同Ambrose黎返學，媽咪要預自己收車揹車同拖住Ambrose先上得，超麻煩喎！上到去大廈門口，其實都幾似橫街，重要裝修緊，成個地盤咁樣，成地都係泥頭同裝修材料，小朋友去好似都幾危險咁，爹爹二話不說已經唔俾Ambrose落地，手抱返學就算。由於爹爹只係停車落客唔係真係有位泊車，所以爹爹送到我地樓下就要番車度，媽咪同Ambrose上樓。
新嘅上堂地點有reception，望落似乎有兩間房，pantry重係响房外面，唔係好似以前咁一間大課室有齊哂d野。望落好似大左，但入到上堂課室就細左喇！以前分左兩大張台俾小朋友坐，而家都係有兩大張台，不過台與台之間好迫，有人坐左落去之後，其他人要通過去課室前面都要小心奕奕就住就住過；平時俾家長放隨身物嘅矮地櫃已經無左，取而代之嘅係一個高高地嘅多層膠層架。因為媽咪遲到，所以最就手放袋嘅位已經full左，媽咪要放最頂個位，一來媽咪本身細粒，媽咪唔鍾意要掂高腳先放到野；二來媽咪覺得個架好似都唔多穩陣咁，d野又放到咁高，地方又咁窄，陣間唔覺意撞埋去d野跌落小朋友度就大件事喇！所以媽咪盡量都唔俾Ambrose行過去個層架度！
今堂Miss Hui請假，由李姨姨代課，一開始李姨姨就介紹小朋友電子琴（佢叫鋼琴），又彈琴同小朋友唱早晨歌仔，媽咪覺得幾好，音樂好能夠吸引小朋友，媽咪鍾意，真係好生動，無平時Miss Hui就咁點名咁悶！玩左陣琴，又玩左陣響板，估唔到Ambrose都可以唔用手拍響板，而係用手夾響板，不過可能見個個都係用手拍，佢夾夾吓都轉左用手拍喇！媽咪得閒都要摷番個響板出黎俾Ambrose玩至得，順便又練吓手指力麻！
今堂李姨姨講故事，主題係要收拾玩具，媽咪其實都幾鍾意故事時間，可能因為平時媽咪想同Ambrose講故事，尤其係中文故事，佢都一定好心散又心急咁係咁揭去後面睇，見到有d有興趣嘅公仔又會係咁指住要你講，見到一d佢識講嘅物件佢又係咁講，要媽咪回應佢，攪到本身諗住講故事，講講吓都唔成事！好無癮囉！但唔知點解Ambrose返親學聽故事佢又會坐定定聽架喎，唔係都唔會成日 都有 老師評估佢時都話佢專注力好好啦！佢真係呃哂人囉！所以媽咪鍾意故事時間，媽咪講唔到，由老師講都好丫，而且老師通常選故事題材都好適合佢地而家嘅年齡需要，真係唔錯！李姨姨講故事又比Miss Hiu生動自然，而且又會用d導具同小朋友有少少亙動，真係幾好！媽咪即時諗點解唔係李姨姨跟我地架？
故事時間完左，又到手工時間，今堂玩泥膠！媽咪見到心諗大件事啦，Ambrose都唔係幾鍾意，佢唔會唔玩，不過佢會一直手擺開唔掂泥膠另一隻手用工具碌囉！老師放左唔同色嘅泥膠响台面度俾小朋友選，每人只可選一隻色，Ambrose要左黃色。媽咪開左包裝袋之後諗住要Ambrose搓吓，點知佢猛擰頭，要媽咪搓！媽咪幫佢搓成個波，想話要佢用手仔壓落去變番做一塊，Ambrose又唔肯，一手攞起個碌係咁碌，不過因為都無壓平，重係一個波形，Ambrose又唔係大力，所以佢都唔係好碌到，哈哈！見其他小朋友玩泥膠都ok，一個都肯用手搓，用模印，一個雖然唔印，但肯落手去搣成一粒粒放响台上，得Ambrose只肯攞工具而唔掂舊泥膠！媽咪唯有幫埋佢壓平，再俾模佢印，希望玩得多，佢又見到印左出黎嘅圖案咁得意，自己會放下介心，點知都係唔成事！攪左一輪，李姨姨行左埋黎睇我地玩，媽咪忍唔住話Ambrose唔玩唔掂泥膠，媽咪都用好多方法吸引佢玩，李姨姨好有心咁氹Ambrose撳泥膠，撳落去凹左，撳落去凹左，Ambrose睇左幾次之後又跟住撳，一下一下咁，似乎佢又ok番喎。真係唔明，平時媽咪都係咁氹佢架啦，都係麻麻地，成日都係見人時聽話合作，唉！不過肯見人時聽話合作都好過任何時間都唔聽話唔合作嘅！
玩完唱歌仔，又係時候茶點喇！今日生果係“蕉”！Oh My God！點解又係蕉架，媽咪最憎！每個小朋友碗仔都有一條三份一嘅蕉，李姨姨要小朋友自己搣蕉皮，當然開口係要家長幫小朋友開啦！媽咪真係好唔願，又係搣蕉皮，好核突囉！只見對面個男仔好快手咁搣完塞哂入口，超好笑！佢真係好鍾意食蕉咁喎！Ambrose手慢腳慢搣完又慢慢食，其實佢都唔係唔鍾意食，比起以前佢一食就吐番出黎，佢肯食已經係進步，慢d都好正常嘅！不過李姨姨話食完生果先有茶點餅餅同條條食，Ambrose第一吓可能聽唔到定係反應唔到，無反應！但當佢見到對面個男仔有得食條條餅餅之後，李姨姨咁啱有講左一次要食完蕉蕉先有得食，Ambrose即時塞條蕉俾媽咪，話“媽媽食”！真係俾佢激死！咁肉酸，點食呀？！係其他野都話幫吓佢丫，奈何係蕉，媽咪一手又推番俾佢，一定要佢食埋先，哈哈！Ambrose繼續食，有好幾次又想推俾媽咪食，不過媽咪都拒絕左，而且李姨姨同埋賢姐姐都分別過左黎要佢自己食哂先俾食其他，Ambrose死死地氣又繼續慢慢食諗對策！結果可能真係俾佢諗到，佢將條蕉放左上張台度推，好似當左條蕉係塊碗布咁抺台，但係推兩推佢又想放入口食番，李姨姨見到即時阻止左佢，就話唔好食喇，今次就咁俾佢唔食哂就食餅餅啦！真係奸計得逞呀！
食埋茶點，原來無聲無息咁落左堂，好似都無正式圍番圈派手冊，真係好突然囉！
沒有留言:
張貼留言