HeiHei迷你生日會

媽咪之前約好Ellen姨姨今晚上佢度玩，一來諗住之前去旅行時問Ellen姨姨借防走失帶要還，二來買左手信諗住俾Ambrose親手送俾HeiHei，三來媽咪見HeiHei就黎生日，咁啱生日前一晚即今晚，媽咪同Ellen姨姨都有時間，所以今晚媽咪就帶Ambrose過去玩順便同HeiHei慶祝生日！  

估唔到Angus叔叔都响度，唔知係咪Ambrose少見Angus叔叔，佢未入屋已經好緊張咁，入左屋又一定要痴實媽咪。無論媽咪點叫Ambrose同HeiHei玩，佢都一定要痴住媽咪，一係要媽咪拖住，而且玩亦都唔係好投入。Ambrose有好勉強自己玩同睇HeiHei玩，媽咪趁佢玩時影吓相，Angus叔叔就入左廚房準備蛋糕。攪左一輪，蛋糕ready，Ellen姨姨熄剩廚房燈，Angus叔叔攞個蛋糕出黎，Ellen姨姨拍短片，媽咪負責影相，奈何Ambrose成日都捉實媽咪，媽咪好難去捕捉HeiHei見到蛋糕嘅一刻！不過HeiHei真係好攪笑，佢見到蛋糕之後就走左去，又合埋對眼好似好用力許願咁，好鬼得意！媽咪充當攝影師，幫個靚靚生日蛋糕影相，再同Ellen姨姨一家三口影合照。HeiHei真係好叻仔，好多時候叫佢望鏡頭，佢都可以有求必應，抬起頭俾個招牌笑容出黎，Ambrose真係從未試過，有時甚至我地叫左佢十幾次個名佢都唔望過黎睇咩事，唔好講話望鏡頭！影完合照，原本媽咪要Ambrose過埋去同佢地一家三口影張合照，點知原本已經痴到媽咪實一實嘅Ambrose，俾媽咪推兩推叫佢行過去之後就忍唔住放聲喊，真係醜死怪喇！  

媽咪之前準備左份禮物俾HeiHei，花紙無買，就用Ambrose平時嘅塗鴉作品做花紙，嫌寡左少少，又想Ambrose有份包禮物，媽咪在外層另加一張玻璃紙，要Ambrose一齊包同貼膠紙，大功告成！媽咪之前又同Ambrose講左份禮物係送俾HeiHei，佢似乎都明白，媽咪再教佢講生日快樂，雖然係執口水尾講，但Ambrose都講到。一切準備好，媽咪影完合照就攞左份禮物出黎要Ambrose送俾HeiHei，點知一係HeiHei成日走左去，一係Ambrose太求其咁一塞左俾人盲　走左去，都唔理HeiHei係咪接住左份禮物，攪到Ambrose送黎送去都送唔到，唯有玩多陣熱吓身至送啦！本來媽咪要Ambrose講生日快樂，不過佢唔肯講！  

媽咪以為Ambrose呢排都比較痴身，不過通常佢去到其他人屋企都係warm up一陣就夠，今晚佢反常，就算Ellen姨姨播碟俾佢睇，都只係令佢輕鬆少少，唔係太自在！最後Angus叔叔話Ambrose係驚左佢，媽咪唔太信，不過Angus叔叔話Ambrose一味望實佢，佢行到邊對眼就跟到邊，媽咪先至明白Ambrose原來係驚Angus叔叔而唔係怕生保！Angus叔叔重叫媽咪影佢相放响屋企，Ambrose一唔聽話就攞佢張相出黎嚇佢，哈哈！都不失為一個好主意喎！  

Ellen姨姨見Ambrose實在太緊張，叫左Angus叔叔攞HeiHei嘅Thomas生日玩具砌出黎玩，開頭Ambrose都係睇，慢慢佢就伸手玩，雖然又未至於好放，但比之前自在多左喇！玩左一輪，已經近十一點，Ambrose未沖涼，媽咪驚佢太眼瞓沖涼會扭計，都係同佢走先。不過臨走時Ambrose先至開始自己攞玩具玩，佢嘅warm up實在太耐喇，見Ambrose有少少唔捨得咁走，媽咪應承下次早d同佢上黎同HeiHei玩耐d！不過下次媽咪真係要早d同Ambrose講會有叔叔响度，睇吓佢會唔會無咁驚先！