學琴

今日唔知點解勁累,朝早唔知醒,成日都恍恍惚惚咁。拖著疲乏既身軀都要去學琴,因為上堂已走左一堂,唔可以再走。我覺得自己都幾乖,走左堂我都有練後面既歌,未聽過老師彈,自己睇譜自己練,練多左兩首,希望唔會落後大家太遠。

一如以往,去到學琴果度,都係响嘈吵聲中一路練一路等老師過來聽下自己彈的歌有無問題,我已即刻表態上堂無返,老師叫我彈之前既歌,ok無問題,到彈我自己練的那首,拍子唔啱,再黎,都唔啱,再黎,彈錯音既,再黎,你都無數拍子既,數住黎彈啦,再彈,你唔覺呢度拍子唔啱咩?你識唔識數拍子架!!!!

我想講,唔知點解佢好憫,咁啱佢話我既時候個個都靜哂落黎,個個都知我彈唔到(我覺得), 重要我係彈緊之前既歌,感覺好瘀。已經唔太熟,佢話多兩話,錯音,周圍又嘈,我又數唔到,我都好大壓力。我都係第一次彈唔到啫,又唔係次次,唔使咁呀麻!!!

佢响我本琴書打星,要我下次再彈番俾佢聽,跟手叫我彈下首,其實下首我更唔熟,聽都未聽過,我無信心彈俾佢聽,加上我都俾佢話到燶哂,我索性叫佢轉頭先再黎睇我,我要冷靜下!!!

結果佢無再黎就夠鐘講書,我上堂無返,佢無教番我,佢重講再後d既野,又叫我地搵番個音,佢行到黎我度我索性話唔識,佢好勞氣,畫哂whiteboard講,我背住佢無擰轉頭睇,我都係俾錢响度學野,唔係黎受氣,彈琴昵家野係好平和既,你咁憫,我都好嬲囉!!!

今晚好累,又唔開心,我都無行街直接搭車走,返入屯門先遊蕩,行黎行去,無野買到,有d失落!!!