日本之旅 – Day 3

酒店既冷氣好強勁，但佢張羽絨被真係又輕又暖，雖然個枕頭好唔掂，扁到死，但都瞓得幾舒服，起身果下要出被窩，超凍，好似平時冬天咁！尋日都無見到啱既頸巾或者褸，所以今日都係著多件衫出去好d！連埋打底件小背心，一共著左四件衫，不過因為全部都好薄，唔覺得好暖。

 

今日落雨，唉！好彩都知天氣麻麻，有帶遮過黎日本。出左門口，兩個人用一把遮，老公個相機袋要斜揹，兩個人都要淋雨，都唔係辦法，去左seven買把大遮至得。日本人好鍾意透明遮，街上既人好多都用呢隻遮，我地就買左把磨沙既，攞上手都好紮實，圍起港紙都係四十蚊，重平過响香港seven買既帆布遮，好抵！

 

今日真係好凍，可能因為落雨啦，感覺係好似香港十三、四度著住短袖衫咁凍！我地搭車去到京都，再要轉車去嵐山，因為唸住去搭嵯峨野觀光小火車，唔會坐激流船，所以唸住直去左亀崗，坐番觀光小火車去嵐山先至仔細咁行。買左飛（都成400 yen搭唔係好多站咋）上左車睇到佢有幅圖關於嵯峨野觀光小火車路線，發覺小火車既尾站亀崗並唔係JR站既亀崗，而係叫馬堀，呢個時候，我都突然醒起好耐之前睇過一個網友既遊記，講過類似既經歷，不過人地就真係响亀崗落左車至發現，行去馬堀都遠遠地，最重要既係佢話果度附近係農田，無咩人可以問路（不過就算有都問唔到d咩架啦，雞同鴨講）。因為驚貿貿然响馬堀落車要搵小火車個站，出面又濕又凍又落雨，老公話去返嵐山先（去嵐山只要230yen咋，每人蝕左170yen嘞@_@）。其實因為行程plan係我plan，睇人地既遊記又係我，發現呢個問題都係我，老公咩都唔知，我同佢講有問題既時候佢又反問番我好多野，我又要解釋一大餐，攪到我鬼死咁。因為覺得佢之前真係一d都無理過，而家又問長問短，如果佢一早同我有discuss過行程，又或者有睇過d書有番少少concept，我就唔使攪錯左煩緊果陣重要解釋咁多啦！嬲嬲地响嵐山落左車，好易咁搵到小火車個站（喺正隔離），但係班車要成九個字之後先開，老公話行左呢度先晏d返黎，是但啦，九個字真係耐左少少，好難响個站度hea咁耐嘅！

 

我地唸住行去附近天龍寺，一路行既地方都好靜，周圍都係民居，唔太像樣！老公突然好醒咁話轉左（定轉右？我唔記得嘞），我問佢點知，佢話見到有路牌喎！嘩！個路牌超細個，高度係去到我膝蓋架咋，重要响轉角位，有d樹蔭咁，睇唔到都唔出奇。見到天龍寺，無即刻行入去，因為反正回程都行返同一條路，回程至行都唔遲，咁我地就再行入d搵渡月橋。

 

雨一路都無停過，天氣又凍，加上之前既小意外完，個頭開始赤赤哋。見到渡月橋，其實d水都唔係好澎湃，但係條河真係幾濶，都幾壯觀，加上背後連綿既山脈、河邊小船、微雨煙霧、天空飛鳥等，構成一幅好靚既景象，我相信有陽光既時候，又是另一番境像！

 

影完相開始行下周圍既商店，都係賣野食既多，有d就賣江户時代既油紙遮呀、布袋仔呀、公仔咁，我就無咩興趣買嘞！反而平時唔“好”食既我都肯睇下野食。我地入左間小店睇精品同野食，見到有盒手信個様包得好靚咪研究下囉，個老闆娘好客氣咁話叫我地試（當然係我地估佢係咁意思啦），以為佢剪少少俾我地試食（香港好興剪到一粒粒俾人試架麻），點知佢一件三角形既菓子，剪左一半俾我老公食，重要好熱切地望住你既反應，因為老公覺得好甜，都無咩意思買，見人地咁好剪成半俾佢，攪到超唔好意思咁！我就係咁意買左包糖仔同一罐Hello Kitty餅（我鍾意儲靚既公仔鐡罐麻），Hello Kitty著和服背景係京都紅葉，當係留念囉！行行下見到有間店賣燒米餅，係新鮮燒出來重暖嘅，重有好多唔同味，忍唔住一人買一塊。再行下，見到有間幾大既店買d一盒盒既手信，重有碟仔擺d試食出來，咪走入去試下，點知攞起一件來吃既時候，有個sales已經好快撲左過來講左一大堆野，當然我地又係唔知佢講咩，我只係知道果件野勁甜，佢又係好殷勤咁望住我，攪到我都唔係幾好意思表現出好難食咁！其實間店都好多人，個sales都真係好快反應咁來招呼我，係抵讃嘅，不過我就冇expect過會有人行埋來，因為擺哂d野食出來俾人試，我以為會好free！經此一役，老公無唸住要再試，我就師奶仔一名，梗係想試埋其他果d啦，咁我咪唯有睇下邊個位冇sales，以好快既速度攞左擺入口然後行開，好鬼祟咁，都係試左一、兩次咋！最後都俾我買到一盒，好靚架，不過呢盒無得試嘅！

 

出返去天龍寺，果度真係好寧靜，最衰係落雨，好麻煩！天龍寺裡面有d葉開始轉紅色，真係得少少，我就係咁叫老公幫我影相，一定要影埋d紅葉（但係其實d紅葉响好高，但係我又矮喎，哈哈）！

 

人地話天龍寺附近有個竹林幾靚，我一早都唸住去，唸住有陽光射入個竹林會好靚，但係今日落雨，冇陽光，冇哂我唸既野！老公就好想去，我個心就重响小火車度，不過唸住唔太晏，搵埋竹林都唔遲嘅！開頭以為天龍寺通向竹林，點知搵極都冇路行，要出返去搵左一陣就發現嘞，個入口唔太突出，分分鐘過左都唔知！入到去，當然真係唔係果回事啦，一d陽光都冇，都幾陰暗，影d相出來唔靚，同入左個樹林冇咩分別！

 

行完竹林，都七七八八，老公話唔搭小火車，都幾失望，一路都唸住係must go架麻，佢話都係睇風景，應該唔太特別喎！唉！我見又凍又累，重要係大家都凍到極之頭痛，真係捱唔到咁耐，去返京都站行商場暖下至得，唯有放棄小火車啦！咁我地見有個巴士站寫住返京都站，咪費時行番黎果條路咁遠搭JR囉！點知等左好耐都未有車，再試下睇下個牌幾耐一班，嘩，半個鐘先一班，重要等多幾個字，唸下唸下都係行番原路搭JR算嘞！

 

唔係我渣，連老公都凍到頭痛，真係好凍！至慘係我地口渴㩒機買茶飲，果枝茶凍到入心入肺，可能就係呢枝茶令到我地忍唔到企响條街等巴士，咁辛苦都寧願行去搭JR。

 

去到京都站，果然暖d！去左手塜治蟲博物館，本旅遊書推介嘅！去到簡直有受騙既感覺！本書講到果度好大好多野睇咁，去到大就大，果d俾人影相既公仔好零落咁擺左出來，間賣紀念品既店細細間响一邊，其他咩都冇，地方大但冇野响裡面，真係俾本書騙左！

 

夜晚返去心齋橋行衘，除左指定行藥房外，我地重行埋賣衫既舖頭，再唔買番d野保暖，都唔知過唔過到聽日，褸又好，冷衫又好，底衫都好啦！其實日本衫真係幾靚，日本女仔好識打扮，响條街度既女仔，個個都著高跟鞋同化哂裝，唔會有人著T-shirt牛仔褲波鞋，有既我唸都係好似我咁，係遊客！所以我好難買到衫或褸襯番我d咁sporty既衫，最尾都買左條頸巾，紅色格仔，又靚又軟熟，方便帶出街，又唔使返香港入喼既時候阻位麻！