媽媽的第一次

成日寫Ambrose嘅第一次，其實媽媽都有好多第一次架！

今日爹爹要陪奶奶去醫院做個小手術，我就請左假湊Ambrose。其實都好少會自己一個人湊住Ambrose成日，最多都只會係星期六上午，下午爹爹放工就會返黎一齊湊，加上爹爹又轉左長短周，真係少之又少呀！一諗起要自己一個人對住個仔全日，其實都好大壓力，有d驚，唔知點捱過呢一日咁長！

早上九點起左身，call朋友仔睇吓出唔出到去食早餐，好彩佢都起左身！一人帶住一個b，我手抱，佢就推車，去到卓爾居食早餐！之前Ambrose幾個月果時我都有試過一個人帶佢搭的士去同親戚飲茶，對我黎講，果次嘅第一次都已經係有難度，因為平時我根本唔會自己一個人湊住Ambrose去唔係樓下惠康或萬寧嘅地方，所幸係果時Ambrose重細唔會太扭，一餵完奶就即行去搭的士，最多都係抱住佢食，只少佢唔會扭左扭右扭落地同周圍攪野！但係自從佢識得攞野學行掉野扭計之後，我都無試過一個人湊佢出去，重要係坐定定同人食早餐，真係第一次！不過點都要試吓架喇，唔通真係唔出街咩！抱吓又俾佢行吓就到左卓爾居，好快就叫左野食，一如想像之中咁，佢都係坐唔定，首先係攞左朋友b嘅餐具起勢fing，d餐具又fing哂落地，又想典落地，又掉濕紙巾，真係好失禮，唯有出絕招，俾餅餅，咁佢先稍為坐定定食，不過我都要好快食哂我嘅早餐至得，因為一包餅仔唔可以頂得好耐！無驚無險都勉強攪得掂！

食完早餐陪朋友仔同個女買鞋，呢個又係一大挑戰，因為Ambrose好似佢呀媽我咁鍾意鞋，响屋企成日都要攪鞋，出去買鞋又係咁將人地架上面d鞋放哂落地，就連個架都拆埋，真係好難攪！佢一d都無令我失望，去到鞋舖，做齊哂！連sales姨姨都忍唔住要話佢！我就好似捉牛咁成日要去捉佢，我話我食左果份早餐嘅energy真係唔頂得幾耐囉！之後我地上左頂層嘅冒險樂園，Ambrose一去到見有個駕駛盤，咁啱佢舉高手就揸到，不知幾開心係咁又抆又搖，叫極都唔走呀！引左佢一排先引到佢行入去，兜左個圈，就咁坐要入錢果d搖搖車就走喇！我諗而家真係唔可以成日同佢去呢d遊樂場所，因為佢真係開始唔肯走喇！

行完冒險樂園就開始準備返屋企，經過一間童裝店，我走入去睇衫，佢有張lego台俾小朋友玩lego，點知Ambrose又係搗亂，將一舊舊嘅積木係咁掉，真係令人煩惱又尷尬，我係咁鬧佢，佢都無反應，sales姨姨走埋黎，佢先識驚撲向我，之但係姨姨鬧佢，佢只係呆左十幾秒，一手抆住我，一手都重要繼續掉野，真係激死人！點解呢隻豬仔咁唔聽人講，咁鍾意掉野搗蛋，真係好擔心佢第日會好難教呀！無辦法之下，我唯有一手抱起佢唔俾佢掂野，一手俾埋錢走人！

返到屋企好快趣餵粥仔，佢一路食已經一路釣魚喇！個樣超好笑！勉強食完抱左佢入房瞓，我先叫鬆左一口氣！起碼都叫過左半日啦！呢一次係媽媽第一次自己帶住Ambrose出去食野同埋去屋企樓下以外嘅地方行街街，都叫可以啦！係我攰d囉！

下半日點過？嘻嘻！佢瞓左之後我都有好多野要做，洗野同準備佢第日粥仔料都用左好多時間，我想同佢一齊瞓都唔得！好彩佢成點鐘瞓，三點半四點先起身，起身之後又食一餐粥仔，時間真係快過！

食完粥仔之後，我第一次自己帶佢去搭小巴去市中心！無車仔又無揹帶，就咁手抱！如果唔係咁，我根本都搭唔到車出去，我唔想行喇！成功去到市中心，個腦不停諗做咩好，但因為我真係好肚餓，我諗今晚又唔知幾點先有得食晚飯，成四點幾只食左份早餐，真係無哂力！所以我決定去食野！！！身上又無錢，第一站係去櫃員機禁錢！禁錢都有d難度，因為我無力單手抱住Ambrose又單手禁錢，唯有放低佢，但又驚佢行左去，好彩我排左個櫃員機係近一個角落，咁我就由佢响個角落度拍吓牆，係咁同Ambrose講叫佢唔好郁，等一陣媽咪，當佢想行開去嘅時候，又用好誇張嘅語氣指住個出錢位同佢講話陣間有野出架，咁佢先定左一陣望，到有錢出黎我好快手攞左收好就一手抱番起佢走人！

諗緊邊度有d地方有得坐好少少又快，最好有人送埋餐，咁我可以唔使煩！最後我去左Euro go go食下午茶，買完飛响最近出餐位嘅地方竟然有張台四張椅，啱哂我，夠哂大唔怕Ambrose攪攪震！好好彩亦都好順利，我又係用餅仔定住Ambrose自己嘆埋個下午茶，又氹到佢飲少少水添，重勁過朝早食早餐呀！今次係我第一次單對單同Ambrose出去食野，哈哈！

嘆完個tea，終於都有力氣喇，同Ambrose行入左Bossini，果度有張玩具台，佢去到唔知點解又好興奮咁睇人玩，又自己揸住d玩具fing，我就响附近睇衫仔，期間有d姨姨同sale姐姐走去撩Ambrose，我都有埋去應酬吓，不過見d姨姨好似好鬼熱情咁又摸Ambrose又流哂口水大讚佢皮膚靚，我即刻有d毛管棟，又怕d人不懷好意，都係快快抱起Ambrose叫佢同人say goodbye就走人喇！出到去見有Xbox遊戲機擺出黎任人玩，有d扭扭格同大食鬼公仔，Ambrose見到又好奇又有d驚咁，想擺佢去同食鬼影張相係咁都要走番黎，玩扭扭格又係咁。我地玩玩吓頭先流哂口水個姨姨又出左黎見到我地又撩過，我真係有少少唔太鍾意d陌生人咁熱情，一來我要應酬講幾句，二來我又唔識佢地，又摸又搣Ambrose又流哂口水咁，真係怕左佢囉！

我地玩完又走左去二樓bb部行吓，見到有件抓毛外套好抵，同左Ambrose試完又幾好睇咁，決定買喇！去到俾錢果度要排隊，好衰唔衰隔離係玩具部，啱啱有部Mickey Mouse單車放左出黎，佢一見到就想落地，但我又要排隊俾錢，唔俾佢落地，佢又係咁典，我真係手都斷埋，好辛苦不斷格硬抱實佢，一手又要攞住件外套同摷手袋攞定錢，又係咁不斷同佢講要等陣，真係驚險呀！好辛苦俾完錢之後我就放佢落地，但佢睇完架單車就俾隔離袋波波吸引左，係咁响度篤！好攪笑！

之後我驚Ambrose睇太多玩具唔願走，我俾佢睇左陣玩左陣一手又抱走佢，去左我行開間時裝店睇衫喇！雖然Ambrose去到都好痴我，唔肯俾人抱抱，但佢都無點扭計，sales姐姐好主動攞左條絲巾出黎同佢玩，佢又ok，玩到咯咯笑，之但係一定要响我附近先得，每當我一行遠兩步佢就苦哂口面望住我！雖然因為咁我唔可以去試衫同試褲，但咁樣都有個好處就係我唔可以盡情購物，慳返！最終，我都係買左件衫同一條legging就走喇！

望吓錶，原來已經六點幾，天都黑喇，係時候返屋企！經過藥房，用埋今日到期嘅減二十元嘅優惠卷買埋包學習褲就走。唔知好彩定唔好彩，小巴站排哂長龍又無車，我見又抱住Ambrose，又揹住手袋，又抽坐包紙尿褲，即刻行去搭的士返去，減左果二十元就用黎幫補的士錢，呵呵！

返到屋企已經六點九，近七點鐘，老爺黎到，接手湊住Ambrose，我可以抖吓！今日真係超充實！估唔到除左第一次同Ambrose出去食早餐成功之外，我竟然可以自己帶住佢去市中心，嘆下午茶同埋shopping，呢個第一次令人太振奮喇！有左第一次，應該之後再有第二三次唔會太難掛！Ambrose，媽咪終於可以同你出街街喇，唔使再等人返黎先出得門口喇！嘻嘻！

第一次搭自動電梯

屋企樓下商場近日新開左吉之島十蚊店，今晚老公要出去應酬，我同奶奶就帶左Ambrose去趁熱鬧。十蚊店在商場二樓，所以要搭自動電梯，原本最近我有機會就放Ambrose落地行，去到見有自動電梯嘅時侯，我就想抱起佢，點知奶奶又話俾Ambrose自己搭。其實我就唔係幾想架喇，好似有d危險咁，又驚Ambrose周身郁，又驚佢隻腳仔唔及時伸高踏入同踏出條樓梯，不過見奶奶堅持話唔怕，又諗住一人拖佢一隻手，有咩事都可以一人一手“的”起佢先，所以都試吓啦！點知Ambrose原來都識行入去，之後又好乖唔郁，不過佢其實唔鍾意兩個人拖手，佢一直都係只肯每次俾一個人拖一邊手，所以搭自動電梯果陣佢都企圖想甩開我地其中一隻手，不過我同佢講，話平時可以拖一隻手，但搭自動電梯嘅時侯一定要兩個人拖手至得架，咁佢又好似明明地無再要甩手喇！

今次係Ambrose第一次搭自動電梯，重要係上兩層同落兩層都係自己搭架，佢自己搭完都笑哂，覺得自己叻叻！

新一代幼稚園開放日

Ambrose已經十三個月喇，想佢兩歲讀N班，原來要成年之前要開始攪，即係而家！大部份幼稚園都係九月先開始接受報名，有d早到一出世有出世紙就報得，有d要足二十個月先交得表。其實區內有N班的學校不多，最近就是樓下的啟思，但我自己其實又唔太喜歡一落樓就返學，好似好奇怪咁，哈哈！不過勝在近同方便！加上近年實在太多人生BB，我覺得報一間幼稚園都未必穩陣，分分鐘隨時無得返學，所以我另外都有物色多兩間學校俾Ambrose！

心儀另外果兩間都係區內有好多人話好嘅學校，其實點好，又真係唔係好知！好多時d野都係人地話好，到自己嘅時候又唔係心目中果回事，所以今次選幼稚園，除左人地講之外，我都好想親身去睇吓個環境，望吓d老師，所以都會非常留意學校幾時有開放日！

今日係新一代嘅開放日，呢間係一間英文幼稚園，而區內其實數得出係英文幼稚園真係唔多，我自己知就得兩間，所以呢間學校多人話好，我唔會覺得出奇！三間心儀學校入面，我比較看重呢間，英文幼稚園喎，讀到呢間，可以唔使再搵上咩英文playgroup好，可以集中著重體力肌肉發展嘅playgroup，反正N班又無學卷，呢間學費又同其他學校差唔多，好似比較一舉兩得！不過讀呢間就要諗搵人湊返放學問題，有好大機會要搭校巴！

同個朋友仔一齊去新一代，都搵左一陣個門口再問人先搵到！好奇怪，個入口係响商場唔起眼嘅緊急出入口門入去上樓梯先到！一入門口已經有好多本地同外藉老師係咁good morning，我放Ambrose落地任佢行！開放日schedule左唔同時段有普通話同英文劇場，見未夠時間，又直行出去已經係室外遊樂場，咁我地都係出左去玩！

Ambrose都麻麻地投入咁，都係行吓望吓有時又要你抱吓咁，睇唔到佢入到去見到咁多colourful嘅野同遊樂設施有多大興趣，呢個我都有d意外，我以為佢一定會開心到怪叫添！

見佢唔太投入，我同個朋友都有問題要問，所以就衝入去招生間房問野喇！等候期間，我地都有睇吓唔同級別嘅書本係點，原來佢地三份二時間都係英文，其他時間係普通話教學，真係幾好！書本亦有普通話架！Ambrose落左地之後又要我幫佢攞本書出黎睇，但到我攞左出黎，佢又同我走左去攞第二本書出黎，一味就响度做搬運工人咁，真係失禮哂！終於等到有老師去解答我地問題！而我地亦都順便取埋報名表喇！不過原來唔係報名先要交錢，係攞form就已經交錢喇！有d市僧咁！而憑老師小小嘅舉動，我已經覺得佢唔夠細心！因為我地之前已經話bb係八月出世，佢地係八月中開學，咁bb要足兩歲先返得學，佢地就會變左插班，無得同其他小朋友一齊開學之餘又無左家長陪小朋友返學果個星期嘅適應期，個老師又好似覺得係咁架喇，我覺得呢個安排同佢呢個態度好似有d唔係幾好！再之後我地都有問佢interview幾時，佢又話十一月，我已經覺得好奇怪，十一月，Ambrose只係得十五個月，咁佢又話要歲半先interview，十五個月見黎就咩？咩都唔識架啦，佢又問我地bb幾大，好似完全唔記得之前我地先講要插班嘅問題，同埋問佢d報名程序，佢都有少少猶豫去答咁，令我覺得好似攪得個開放日唔係預左人問架咩，咁都有？！最後，因為我地兩個bb都有少少坐唔定，我地隨手攞左d糖呀餅仔俾佢地攞住，點知佢又好似好好心話d糖硬喎，大佬呀，我地都只係話俾佢地攞住啦，都無話俾佢食，同埋，唔好唔記得佢地都只係十三個月，你唔會覺得佢地係食到架麻？！我話佢地邊食到嘅時候，佢先至話係喎，食唔到架喎！係有少少覺得我如果交左個仔俾你地，你地係咪真係可以睇實佢架？！

之後我地去望吓d班房同廁所，無咩特別！入左其中一個班房做手工串珠仔，不過好明顯呢d都唔係for我地咁細嘅bb玩，係有d失望！我覺得佢地有N班同K班，攪得開放日，總要照顧吓細bb囉，無奈地又走去睇英文劇場，點知因為佢地要用projector而較暗左間房，又係一d剪影晝咁，成間房好似灰灰暗暗咁，而個故事唔知點解要講小紅帽俾狼食嘅故事，佢地扮聲扮得唯妙唯肖架，不過對於咁細嘅bb，其實真係唔係好啱囉，朋友仔個b一坐埋去無耐已經驚驚，Ambrose就坐坐吓都唔肯撲去我度，我地又走番出去室外遊樂埸玩喇！

我由Ambrose自己行去玩佢想玩嘅野，佢大部份時間都去左玩三隻搖搖板嘅大玩具，行左去又走番去！見有條蟲蟲隧道，佢都有幾次走埋去裝入面有咩咁，不過就無爬，唔知係咪佢覺得唔係可以爬嘅地呢，佢都有好多次想跌想跌而去盡力定住唔跌！不過好彩佢無爬，唔係真係有排同佢抺手抺腳喇！加上佢又著左短褲，地下果d墊又好“鞋”咁，都唔知會唔會擦損架麻！

總括黎講，呢度唔係好似我想像中咁大，個戶外遊樂場都好鬼曬，都唔緊要，我覺得有戶內遊樂場都緊要囉，呢度又唔覺有！再者又覺得佢唔係想像中乾淨咁，可能始終我地大部份時間在室外玩啦，其他野又好似睇唔到d咩咁！同埋佢套校服，一d都唔smart又唔cute囉！哈哈！唔知其他學校係咪都係咁上下嘅呢？定我要求高呢？暫時黎講，呢度嘅好都重係英文囉！其他野又唔係覺得好好又或者好差囉！

第一次去機場

爹爹之前無心插柳走左去見工，點知人地請佢，但返機場同要返shift，不過就可以揸車返工！為左睇吓揸車去機場要幾耐同幾遠，我地今日就入左機場兜一轉！入到去機場泊terminal 2，泊車優惠都係三百蚊三個鐘，唔貴丫！

Ambrose第一次入機場咋！我地同佢去左戲院隔離睇飛機展覽，又坐飛機椅，佢見到有一架直昇機模型好似好興奮咁，笑哂同埋係咁拍個玻璃膜，我抱遠左佢，佢都會轉身手指指返架直昇機果邊！

今日都係係咁易睇完d飛機，飲左餐茶，我又買左少少pocket size嘅認字puzzle俾Ambrose就走左，啱啱三個鐘！唔知第日爹爹返左工，我會唔會可以帶到Ambrose去搵爹爹探班呢？

Ambrose好瘀

上次同Ambrose返公公婆婆屋企玩得好開心，氹到公公婆婆鬼死咁開心。Ambrose以前返親去都時不時扭吓計，喊吓，攪到公公婆婆都唔可以好開心同佢玩，而家大個左d先越黎越自在同肯跟人，不過一入門口就點都一定要warm up先，如果唔係又係好難投入。不過有樣好奇怪嘅野，就係佢好似好驚舅父同公公，通常舅父都好少惹佢，而公公有時都瞓左覺或在房無同佢玩。Ambrose好鍾意斜斜地頭去裝佢地，裝完又好驚咁跑番黎，但其實公公或舅父都無望過佢，無理過佢架喎！Ambrose次次都係咁，不過warm up左之後佢就可以同公公玩到好顛，公公一拍手佢又跟住係咁拍，公公作勢衝埋去想捉佢嚇佢，佢就好似老鼠見到貓咁掉頭跑返黎我地度，如果我地坐在沙發，佢重會死命擒上沙發，之但係佢係笑到咯咯聲架！如果佢已經在沙發，佢就會橫衝直撞咁亂爬去避開公公。但係有時候，我地會見到Ambrose唔係玩，有時候個樣係驚囉！所以真係唔明點解，總之每次去公公婆婆屋企都一定有呢d場面，所唔同嘅係究竟佢係玩得咯咯笑定係驚到想喊！有時都好激氣架，我成日餵緊Ambrose食粥，公公就走埋黎引佢攪到佢唔專心食野，又有時候都玩左好耐，Ambrose跑到笑到喘哂氣，我要捉實佢等佢唔好玩到失平衡撞到跌到攪到我手都軟埋都重玩，呢個公公真係好麻煩！

尋日同Ambrose返去婆婆度食飯，入門口Ambrose都未warm up，公公已經抱左佢入去，可能個頭開得唔好，佢有少少抗拒。之後Ambrose又係咁裝舅父同公公，但只有公公俾佢聊到出房同佢玩。又係貓捉老鼠遊戲，今次Ambrose在沙發橫行，我就捉實佢，佢無啦啦有一下爬得超快，想由呢邊沙發爬去L型放置嘅另一邊沙發度，但果張沙發嘅手柄位又高d又硬d，由於Ambrose真係跑住爬過去，我都捉唔實佢，佢一跑住爬過去時，可能又無睇清楚，成塊面下半部撞左埋去個沙發柄度，暴喊！我諗佢咁樣撞埋去都真係好金！某個程度上我都有少少怪公公成日同佢玩到咁顛，雖然係Ambrose自己唔小心撞埋去，但唔係公公咁樣同佢玩又點會撞到咁應丫！

食完飯，Ambrose有表姐同佢一齊玩，二舅父又在隔離陪玩，咁我同爹爹分別就比較放鬆咁一個睇電視一個响遠少少嘅地方食生果遙望Ambrose。原本爹爹都話佢想睇吓電視而要求我行埋去睇實Ambrose，但我又成口橙，見有二舅父响度，表姐又好識照顧Ambrose，同埋Ambrose都只係在離地一尺左右嘅沙發床邊玩緊，我諗住都無咩野，就話食埋先啦！點知說時遲那時快，Ambrose唔知點解响沙發邊打側跌左落地，頭落地“卜”左一聲好大聲，嚇死我，Ambrose喊到氣都回唔到呀！表姐第一時間話唔關佢事，哈哈！

重創左兩下之後，見佢又喊到好累，又未沖涼想瞓覺咁，我地都係走人先。返到去同Ambrose沖完涼之後，就見到佢左面頰一撻瘀左，同埋眼角加右額都瘀左一撻，真係見到都痛！夜晚等佢瞓左之後我地同佢搽喜療妥，希望佢快d散瘀無咁痛啦！

今晚放工返黎，老公話Ambrose今朝又唔知跌左落地定撞左埋牆度，又喊到回唔到氣，今次Ambrose真係“好瘀”呀！

郊遊@彭福公園＋城門河畔踩單車＋沙田市廣場Snoopy World

今日打算同Ambrose去彭福公園玩吓，我記得以前小學年年去旅行都係去彭福公園，真係唔知有咩好玩架，不過咁多年之後，都想同Ambrose去睇吓呢個媽咪細個去旅行嘅地方而家變成點！隨車已經有Ambrose架單車仔，我諗就算彭福公園無咩野好玩，我地自己都有架車仔推吓Ambrose，佢都當係玩左，我地咪當行吓囉！行一陣咪去埋Snoopy World，影吓相，又近商場有冷氣，真係好辛苦好累都可以入番商場休息吓麻！呢個行程真係唔錯！

Ambrose食完十一點幾餐粥之後，我地就收拾行裝出發！揸車去到馬場附近個停車場，因為唔知應該响邊泊車，我地見有個保安員就問佢喇！　

老公：「我想問吓去彭福公園泊車係咪泊呢度架？」

保安：「唔係，係後面果度！」

老公：「哦！」

保安：「你去彭福公園諗住做咩架？」

老公：「無架，行吓架咋！」

保安：「行吓？今日無開喎！跑馬呀！」

真係激死！我地之前果晚都已經check左彭福公園開放時間，不過真係無諗過跑馬呢個問題，咁熱，d馬唔係要抖暑架咩？！

無辦法啦，都出左黎，我話咁去城門河踩單車啦！但奶奶就話而家中午時份，咁熱，驚Ambrose曬到發燒，又要取消喇！之後我地直去沙田市廣場，見到個Snoopy World，正想行入去，奶奶又話曬得咁應，好熱，行陣商場先，晏多少少先出黎玩啦！我地就行入商場，行左 一兩 間店，又好似無咩好行。行去賣bb野果層，俾Ambrose落地自己行，估唔到佢而家識得睇野喇，佢走左去間玩具店係咁拱個頭埋去個櫥窗度睇玩具唔走，我地抱佢走，過左玩具店又放佢落地，今次佢去左間衣服用品店，又係去個櫥窗手指指，個口又“e e ur ur”咁，個櫥窗有個Elmo公仔同bb模特兒公仔，佢係咁指Elmo，又係咁想同果d模特兒公仔握手，同埋行入間店度，好攪笑！我地又抱走佢，今次係老公抱佢入間玩具店，我同奶奶去睇鞋仔，睇完一輪都重未見兩仔爺出現，我又走番轉頭去搵佢地，原來Ambrose入左間玩具店，有好多發聲玩具，佢玩到唔捨得走呀！又要格硬抱走佢先得，睇黎，我地以後都係少去玩具反斗城為妙喇！出左黎之後，我地突然驚覺Ambrose又夠鐘食粥仔，我地即刻搵間餐廳坐低餵粥，順便自己都食少少野。

食完野，見無咩想行，都係一心黎Snoopy World，咁諗住過左勁曬時間，都係唔好再行商場，早d出去玩吓影吓相好過啦！出到去，鬼咁翳焗！去到Snoopy World，見有個員工企响度，旁邊有個牌寫住雷暴警告關係，場地關閉！！！有無攪錯，光天化日，雨都無滴，雷暴警告？重要唔開？有無咁黑仔呀？！

好失望！估唔到今日諗住去郊遊，結果竟然意外咁行左商場！見門口都有d公仔，為左到此一遊，我地當然都有同公仔影吓相，好過無啦！

流鼻水

Ambrose又病左喇！早幾日見佢流少少鼻水，瞓覺又因為鼻水倒流抖氣都塞住，夜晚食住個奶咀要用口抖氣又甩咀，成晚可能因為唔舒服又甩咀係咁喊，爹爹抱住佢打直瞓先瞓到，我地見佢咁樣都有餵之前睇醫生嘅收鼻水藥，餵左幾次藥，雖然都唔係好嚴重，但係都要同Ambrose睇醫生至得！

睇完醫生食左一次藥，Ambrose好似好返好多，無咩鼻水。原本我想第二晚臨瞓前又餵多一次藥俾Ambrose清埋去，爹爹又話唔好食咁多藥，咁就算啦，由Ambrose身體自己打仗喇！點知過多兩日，Ambrose鼻水又多左杰左同開始黃，我地都被迫再餵Ambrose食藥，希望佢快d好返啦！

今次係繼五月之後再要睇醫生，都keep到有成四個月喇，算係咁啦！

運動場

Ambrose呢個星期好似突然間識行咁，响屋企耐唔時都會自己行，唔使扶，好叻叻！爹爹見佢都有行嘅意慾，今晚就帶左Ambrose去運動場散步！

Ambrose唔係第一次去運動場，只係今次係佢第一次踏足賽道真正咁行！今晚Ambrose都有少少嗲，一定要痴住大人，所以沿路即使我有推架bb車去以防Ambrose太累要坐車，都無用過，爹爹一直抱住行到運動場。開頭放Ambrose在賽道上，佢都唔係好肯，成日想要抱，後尾我行前面引佢，佢就肯行，想追我喇！之後爹爹同佢响賽道行，我要睇住架bb車，只可以坐觀眾席，離遠都見Ambrose時而行，時而要抱，不過其實都旨在俾佢見識吓，玩吓同行吓，行幾多又真係無咩所謂，反正運動場都唔太遠，就當係親子活動囉！行左一陣，以為佢地會行一個圈返黎，點知行左一百米就折返喇！爹爹又帶左Ambrose去運動場中間嘅草地邊度行一陣，返黎時爹爹同我講草地邊有青蛙，Ambrose係咁望，怪唔知得我離遠見佢唔行係咁望住個草地啦！再後來，Ambrose唔係沿賽道行，佢打橫橫越賽道行黎觀眾席搵我，所有人都要避開佢，而我又因為攞左個電話出黎拍佢，d人又要兜開黎避我，行左一陣，拍左一陣，Ambrose唔知係咪有d累，開始企唔住腳要做四腳爬爬喇！佢一掂到個地就係咁刮吓摸吓，再掂埋落賽道個地下，真係忘形到唔記得左果度唔係屋企，開始周圍爬喇！好彩同佢著左長褲仔咋，唔係佢咁爬法都唔知會唔會擦損對腳呀！

最後，我地見佢爬到咁阻街，咁影響市容，都係返歸沖涼睇書瞓覺喇！不過我地覺得一星期如果都起碼有一晚可以同Ambrose行吓運動場都唔錯，慢慢培養佢喜歡或者係唔抗拒運動！希望堅持到啦！嘻嘻！

滑梯

之前有朋友借左一個麵包超人鞦韆滑梯爬架比我，滿心歡喜砌好左，諗住Ambrose一瞓醒見到會好開心，會好好奇咁走埋去玩吓爬吓研究吓。點知，佢好似無咩興趣，抱佢上鞦韆，佢都會盪一陣，好快又行快落黎；滑梯又只係不斷由條滑梯爬上而唔係响樓梯上；爬架幾乎無爬過入去，我又太大舊唔可以示範佢睇可以爬入去，甚至乎爬上去。成個遊戲架放左响屋企幾日之後，佢終於都識由樓梯同滑梯直上架面喇，鞦韆同爬架依然係零興趣，可能佢同爹爹玩開人肉鞦韆激好多，唔鍾意呢個小兒科鞦韆？！不過有樣野係估唔到嘅，係佢會爬上滑梯頂之後，係咁搖成個架，搖到成個架郁哂，都真係有d擔心佢會搖到自己企唔穩跌落黎，又驚佢會搖爛個架，大佬，個架都成二千蚊，我唔敢俾個仔咁攪法喇！玩左幾日，都係拆番佢還俾人喇！

咁啱之前去左個bbq場係有膠滑梯玩，我係咁同Ambrose玩，見佢都幾開心，都有諗如果屋企都有條滑梯就好喇！因為講真我地又好少同Ambrose落公園玩，如果屋企都有滑梯，真係隨時隨地都玩得！之前行開反斗城，見有滑梯賣，一條五尺長賣$699，一條三尺長賣$399，兩隻都可摺埋，我見$399果條又唔係貴又唔係好阻地方，真係好有興趣買番條，不過老公就有d擔心開左之後會好大條，放响屋企就多左件大玩具，越整越多野，越整越迫！所以都重係要諗吓先！

今日又行反斗城，又係走去睇條滑梯，老公見我念念不忘，終於都肯買喇！Ambrose又多一件大玩具喇！條滑梯重係防UV，又可摺埋，咁有時去郊遊，都可以帶埋條滑梯去玩，都唔錯丫！

郊遊@錦田鄉村俱樂部

之前有同事介紹我去西貢一個比較偏僻地方摸蜆，見人少，水清，又係一個幾好嘅親子活動，Ambrose又未去過海灘，所以一直都好想去。但係正正又七月節，無得去，諗黎諗去唔知去邊好，老公之前同同事去過錦田鄉村俱樂部燒野食，佢話果度都幾大，又有野啱小朋友玩，結果，我地同姑仔一家兼老爺奶奶，一行九人就去左呢度燒野食喇！

下午一點幾去到，無咩人，計埋我地都係兩台客，唔知係咪因為日間太熱定係星期日無咩人呢？成個燒烤場好大，有蓋，唔怕落雨，又唔怕太曬。只係好多唔知咩野咬手腳，好痕！我地要狂噴防蚊水，好彩Ambrose有自己嘅防蚊機，再加蚊水，見佢都無點比野咬。燒烤場對開有一大片草地，好靚，真係幾啱小朋友玩，見有人同狗玩添！

Ambrose坐車時瞓左，出奇地我地泊好車抱落車嘅時候只係開眼望兩望又繼續瞓，重要放左落bb車度瞓都無話醒，就係咁我地至可以輕輕鬆鬆食一陣野。到Ambrose醒左，我地開始同佢行出去草地玩。首先係果度有幾條膠嘅滑梯，重要係高身嘅，我即刻抱左佢去玩，不過可能Ambrose啱啱瞓醒，都幾“吽”吓！之後我地俾Ambrose坐佢架單車仔，推佢出去草地，好曬，不過曬一陣都幾好，可以俾Ambrose習慣吓唔係成日都係有冷氣，個草地真係好靚好青綠，雖然真係踩落草地度係有少少“吉”腳（因為著左拖鞋）。

燒多陣野食，又忍唔住抱左Ambrose行出去，睇吓有d咩睇。首先係一塊田，唔知種緊咩，睇左陣，好似唔知咩黎，又無人，我地出返黎又繼續行，又見到有一格格嘅籠，行近d，見有個細路擇樹上嘅葉餵羊，我地竟然開口問佢攞左塊葉俾Ambrose餵，Ambrose見果d羊又無話驚，係咁眼定定望，好攪笑！其實我自己都有少少驚，因為d羊黑麻麻，都唔係白雪雪果d，係有d恐怖架！見個細路餵得興起，我地都自己擇葉餵羊，不過其實都有少少奇怪，因為我唔覺得d樹葉係可以俾人咁樣擇法，同埋覺得d羊應該係食草唔係食葉，不過見葉佢地都食，咁又繼續啦！我見Ambrose第一次餵羊，攞左相機去影佢啦，點知影佢餵果時佢又突然好驚咁大叫同縮手，重撲左响爹爹度，實在太好笑喇！見佢驚，咁就去左隔離睇兔仔，d兔仔都好大隻，不過好多都唔多願郁嘅，亦都唔係隻隻“so”我地d葉！不過俾Ambrose睇吓真兔仔都好，餵野食都係其次啦。行過對面有倉鼠，Ambrose又係睇到眼定定，好想伸手去摸，不過我地驚有菌，佢又成日食手，所以都係制止左佢喇！

睇完小動物已經身水身汗，去返個位度坐！燒烤場隔離其實擺左個超大彈彈床，電動車同埋騎馬仔。全部野都係二十至二十五蚊不等，限時十分鐘。由於太貴，加上Ambrose咁細，我地都無俾錢玩。Ambrose係咁指住d馬要我地過去，咁我地都唯有抱左佢過去放响馬上面就算，當騎左架喇！彈彈床又係，我地只係放佢企起個彈床邊入口睇人玩，咁佢企左响邊度，我幫佢“un un un”，又當彈左喇！哈哈！可能Ambrose真係幾鍾意馬，响屋企已經成日攞張馬馬咭俾我地要我地讀，所以佢黎到呢度見到有咁多隻馬仔，成日要我地抱佢過去，我地已經分別唔同人抱佢過去幾次，我地又唔係俾錢玩，都有少少唔好意思！

由於我地實在太唔習慣戶外活動，加上天氣太熱，又已經玩左幾個鐘，野又食埋，咁我地已經頂唔住要走喇！其實呢度都唔錯，重有得打波、踩單車、撈金魚、畫畫、入沙樽，重有應該有個士多卑利園，如果下次天氣涼少少，都係一個好地方！

睇吓下次幾時真係可以帶Ambrose去沙灘玩沙又好，摸蜆又好先！