Shining Garden –Little Learner (第九堂)

今朝媽咪同Ambrose過左去Wing姨姨屋企玩呀！期間Ambrose真係好霸道，雅雯玩d咩，Ambrose又要搶；媽咪要食早餐，佢又想爬上雅雯張high chair一齊食，雅雯都係八掛走埋黎，Ambrose就以為佢想分享媽咪嘅早餐，唔俾佢接近，重一手推開弱不禁風嘅雅雯，雖然唔大力，但雅雯身輕如燕，一推之下向後移左幾步，一臉驚恐，嚇到媽咪死死吓呀！媽咪真係唔敢帶佢同雅雯玩呀，每次都要金睛火眼望到實一實，真係少d心血都唔得呀！今次Ambrose第一次入雅雯房玩，佢重一個唔該爬左上人張床度跳，踩住雅雯個枕頭，真係失禮死人呀！雅雯床尾有白板同數字磁石，Wing姨姨要兩個小朋友講到數字先俾磁石，雅雯當然係無問題啦，估唔到Ambrose都可以講到幾個字，其中8字尤其清楚，媽咪又係第一次聽佢講數字咋，真係日日都有驚喜呀！不過今日Ambrose玩架車仔嘅時候無啦啦拍心口話驚驚，要媽咪收埋架車，媽咪見到佢咁樣都覺得好奇怪！

今日足足玩左三個鐘，媽咪先同Ambrose返屋企，諗住Ambrose好似好精神咁，以為唔使瞓，點知返到屋企佢都係要瞓，就响未食粥嘅情形之下，媽咪好無奈俾Ambrose瞓，不過Ambrose都唔可以瞓太耐，都係瞓左半個鐘左右，爹爹同佢換衫整醒佢，要返playgroup喇！好彩Ambrose又無扭計，係攰d咁囉，見趕時間，爹爹同佢食朝早買嘅紙包蛋糕，怱怱出門去喇！搭的士嘅時候，突然有架電單車好大聲駛過，Ambrose又係拍心口話驚驚，媽咪真係有d擔心，未見過Ambrose咁樣驚法架喎，點解咁突然呢？

可能爹爹見媽咪陪Ambrose玩左成朝好攰，所以今次爹爹話佢陪Ambrose入去上堂，媽咪就响出面睇吓坐吓！今堂主題係sea animals，雖然Ambrose至愛係陸上動物，但最近佢都好鍾意睇屋企果本sea animal嘅pop up book，我諗佢對sea animals都頗有興趣，今堂真係啱哂佢啦！不過由於媽咪無入去一齊上堂，又真係好攰，有時都係搵地方坐吓無睇上堂情況，所以今堂太details嘅野都寫唔到喇！

上完堂，食完tea，媽咪又去行反斗城，其實媽咪發覺最鐘意睇玩具果個人原來唔係Ambrose，而係媽咪，哈哈！去到反斗城，又係行去特賣場望吓先安樂，點知今日媽咪見到有好多唔同嘅新玩具放左响度做特價。其中，竟然見到day & night積木，呢個係媽咪最近上其他媽咪嘅blog見到嘅一款益智玩具，原先都諗邊度有得賣，重以為要上網訂番黎，點知無啦啦俾我响呢個特賣場見到，重要只係一百蚊，真係超開心！其實媽咪行反斗城真係超多次，都無見過有呢個積木賣，今日見到真係好出奇，慳返媽咪唔少時間去搵呀！之後媽咪又見到有melissa & dough果塊鎖板，係一塊板上面有唔同形式嘅鎖，俾小朋友練習開鎖兼訓練小手指，之前媽咪又係好想買呢塊板，但一塊要二百蚊，媽咪真係唔捨得，今日塊板特價一百一十，平成九十蚊，媽咪先至捨得買咋，真係好開心呀！另外媽咪又見到有動物嘅大印章，媽咪最近不斷添置油水彩工具諗住搵日同Ambrose用水彩塗鴉一番，見到有動物印章，覺得可以塗鴉時一齊玩，又買左幾個！媽咪一直想同Ambrose買件靚靚手工衫，但媽咪又覺得去搵手工衫好花時間，見反斗城其實有crayonla手工衫，雖然唔靚同有d貴，但媽咪可以慳左時間搵，同埋買左之後隨時可以開始同Ambrose油油畫畫，咁貴少少都抵番嘅，又買埋喇！媽咪重買左一枝唔爆嘅泡泡水，諗住俾Ambrose可以用手接住d波波，俾佢有機會睇吓研究吓，事關佢好奇怪，次次人地玩泡泡水，人人都追住bubbles，佢就企定定望吓睇吓唔知佢做咩！Ambrose今次就大豐收，媽咪就大出血喇！

買完野返婆婆屋企，見未夠鐘食粥，媽咪同Ambrose就在婆婆家門外嘅走廊玩新買嘅泡泡水。媽咪已經醒目要Ambrose一定要著拖鞋出去玩，費時佢又只係fing水唔係吹，fing到一腳都係就麻煩喇！滿心歡喜去吹泡泡，以為bubbles真係好易攞上手，點知唔係嘅！一來果枝泡泡水棒棒個孔其實好細好窄，媽咪一吹，好多bubbles走出黎，不過全部都係細bubbels，用手想捉就會破，完全唔係可以停在手上幾秒；二來果d泡泡水其實比平時果d係杰d，好似膠水咁，一路吹佢又有d一路滴，手已經係痴立立架啦，腳都有埋，好彩著左拖鞋咋！重要bubbles吹左出黎之後爆左，果d泡泡水就會留响佢爆嘅地方，例如頭髮同衫上面，但因為呢隻泡泡水係杰到好似膠水咁，成身都好似好污糟咁，又唔可以好似平時果d泡泡水撥走佢唔覺，媽咪真係一路玩一路想鬧邊個諗呢d咁嘅野出黎俾人玩架！媽咪試過俾d耐心去吹，慢慢輕力吹係可以吹到大bubbles而且可以用手接到，不過就真係要耐心囉，但Ambrose其實好心急好想要自己試，所以結果都係同玩普通泡泡水無咩分別！玩到咁上下，媽咪已經發覺走廊地下已經有好多一撻撻泡泡水，真係唔敢再玩落去，俾人見到唔知會唔會罵，都係快d收野走人喇！唔收都由至可，一收先發現，玩唔夠十五分鐘，本來一枝嘅泡泡水得番少過一半！嘩！真係倒水呀！媽咪完全唔recommend買同玩呢枝野，唔平架，成十五蚊細細枝，早知買多枝普通泡泡水重有排玩呀！

返入屋，媽咪同Ambrose洗手洗腳都洗左一輪先可以洗左滑潺潺嘅泡泡水，真係貼錢買難受呀！

動物魔術貼板

之前上幼潛時學左玩撕魔術貼，媽咪已經覺得呢個遊戲唔錯，自己整又唔難，家中又有相應材料，由Ambrose興趣入手，就係佢至愛嘅動物喇！媽咪為左令到個遊戲更加實用，將幼潛姨姨教嘅純公仔撕貼，改動為有中文字嘅撕貼，諗住唔多睇中文嘅Ambrose，可以一路玩時都有機會睇多d中文，從而培養佢睇中文嘅興趣！

媽咪首先在label紙上印好哂動物名稱，再將之前買左嘅真實動物圖貼紙貼在較厚嘅紙上過膠，再按形狀剪出一隻隻動物。在顏色咭紙上先貼上動物名稱label，再在隔離位置貼上魔術貼及附有魔術貼之動物圖，好快，就可以完成一張動物魔術貼板。不過媽咪完成之後發覺，由於魔術貼較厚身，而媽咪又採用硬身咭紙做底板同貼子，所以貼子與板之間就形成左一條頗大嘅隙位，比起幼潛特意用軟身膠板與貼子，其下墜力令板與貼子之間無咩隙位，小朋友用手抓起時可能要撩起再撕，係比較困難，而我整呢塊板對於Ambrose黎講，真係easy job，但既然媽咪都整左，同當初嘅idea可能有出入都好啦，就當係認字玩意，都未嚐不可嘅！

呢d野媽咪平時都係要等Ambrose瞓左先可以諗同做，所以唔可以即時同Ambrose玩兼睇佢反應。不過，見整完第二日Ambrose一出到廳見到塊板時嘅反應，又笑又叫好開心咁急不及待要人攞俾佢，媽咪非常開心！見姨姨攞住塊板教Ambrose字，雖然Ambrose一定識哂d動物，但有埋字去指俾佢睇，我估對於姨姨黎講係好事，至少唔會話Ambrose攞本英文書要佢講佢唔識咁慘丫！睇黎，塊板都可以當係一個中文教具俾姨姨同嫲嫲日頭教吓Ambrose中文，都叫意外收穫！

原本以為媽咪次次整嘅教具都係麻麻地受Ambrose歡迎，點知可能今次係動物嘅關係，Ambrose似乎都幾鍾意玩，每日都要媽咪攞俾佢，佢再將全部動物撕出黎，再等媽咪示意要邊隻動物，應該貼去咩位度，樂此不疲，平時媽咪放工一定會要媽咪同佢玩一次，唔知日頭時佢有無要玩，但媽咪對於咁樣已經好滿足！亦因為Ambrose咁鍾意嘅關係，媽咪又見重有動物貼子，所以又再整多一張俾Ambrose玩，哈哈，今次佢又係一起身起出廳就發現左，又係好開心同急不及待要玩，媽咪覺得整呢兩張動物魔術貼板真係好值呀！

爹爹有一日重好驚訝話Ambrose可能認得d字，因為Ambrose可以自己貼啱哂位置，但媽咪始終都覺得Ambrose可能只係認到位置多過認到文字，因為媽咪相信Ambrose嘅文字敏感期重未到，不過無論如何，認到定記到都好，只要Ambrose肯玩，媽咪相信Ambrose絕對係有所得著嘅！

STOP

今晚Ambrose又玩圍圈跑同跳舞，不過今晚又有新玩意，就係佢會跑跑吓或跳跳吓舞無啦啦會“STOP ”停低，重要唔止係佢自己咁做，佢都要媽咪跟住一齊咁做，真係好好笑！媽咪又係第一次聽佢講“STOP”呢個字，媽咪估係上shining garden上堂時唱sunny day song果首歌學番黎，原來佢成日唔聲唔聲無反應得個睇字，都有學到野架喎！

今晚Ambrose又係走左去嫲嫲房度瞓，又係唔夠五分鐘就瞓左，媽咪望吓嫲嫲房究竟有咩吸引到Ambrose連續兩晚走過黎瞓，重要一陣間就瞓左，終於媽咪諗到係嫲嫲房嘅掛牆風扇。嫲嫲一向怕熱，我地又怕Ambrose細個會拉倒風扇又或者伸手入風扇度玩，所以上年開始，爹爹响兩邊廳同嫲嫲房安裝掛牆扇，但因為媽咪一直都對掛牆扇無咩好感，覺得好老土，所以大房就無安裝。呢排天氣開始熱，嫲嫲已經係開大風扇瞓覺，相比大房我地用開嘅座台風扇，掛牆扇所吹到嘅角度又真係大好多同涼好多，而因為大房風扇就放在床尾窗台上，Ambrose床仔有尾板，所以本身唔係勁涼嘅風再隔一隔之後，Ambrose個位又真係熱熱地嘅！天氣又未至於熱到可以開冷氣，Ambrose又會踢被，所以一直都係開風扇就算。而嫲嫲房風扇係由上而下吹落黎，無遮無擋勁涼，媽咪覺得呢個係一大原因點解Ambrose有大床唔瞓走去同嫲嫲迫埋一張床瞓，哈哈！

就係咁，媽咪終於妥協，准許爹爹在大房都安裝掛牆扇，等Ambrose瞓好d！

2011年4月27日

今日爹爹放假，唔知點解佢今日咁早起身湊Ambrose，唔似平時咁一路瞓，瞓到Ambrose無癮再齊齊瞓番，真係好奇！今朝起身，爹爹出去開奶，媽咪提議不如試吓俾個杯Ambrose自己飲奶，唔用奶樽，同時間，媽咪將之前買落嘅魚肝油cream塗在麵包上面再切粒，諗住包包奶奶做早餐，好美滿咁！點知Ambrose見到杯奶，係咁望入去皺哂眉咁，試飲左之後就擰哂頭又係咁望住入面嘅奶，佢一定係覺得點解d奶會咁飲嘅？！哈哈！不過魚肝油麵包佢都肯食！由於時間關係，媽咪要出門返工，睇唔哂Ambrose食早餐嘅過程，係事後再問番爹爹，Ambrose最後食哂d包包，但成杯奶都唔肯飲，倒左！反而用杯裝水俾佢食包送水，佢又飲哂成杯水，睇黎，要Ambrose用杯飲奶都係未得，可能直接戒奶重易d！其實佢而家早上枝奶都唔會扭要，唔提唔問佢又唔會問攞黎飲，媽咪都好想同佢戒左佢，事關佢真係食好多野，成日食唔停口，媽咪驚佢過肥，將來健康唔好呀！奈何有時媽咪唔响度，又或者無準備包包或其他乾糧做早餐，都係要開枝奶俾佢飲。同埋，老人家好似覺得bb係要食奶架啦，唔食唔好架，呢個concept就令媽咪好似唔俾個仔飲奶係罪人咁，唉！

爹爹同媽咪講，Ambrose今日又係自己走入房瞓覺，唔要人陪都瞓到，真係叻仔，不過媽咪唔明點解Ambrose無啦啦有呢個轉變，係咪代表佢大個仔，要自己做好多野呢？咁傳聞中嘅trouble two又係唔係開始發生呢？

今日爹爹好嘆呀，佢自己一個人走左返大陸按摩，鬆弛一下。佢重買左幾件衫仔同褲仔俾Ambrose，人仔九十已經有三件衫同兩條短褲，超抵！Ambrose試衫之後係唔肯除番落黎架！哈哈！爹爹都有買左幾件衫俾媽咪，又係靚靚嘅，不過可能要唔係湊仔嘅日子先著到喇，唔係一陣Ambrose一手扯爛件衫就唔好啦！

今晚Ambrose又係好奇怪呀，佢飲完奶刷左牙响床又唔願瞓，結果佢落床自己行左出去，媽咪以為佢過一陣會入返黎，點知又無咩聲氣咁，過多一陣聽到嫲嫲講野聲，真係有d出奇，媽咪忍唔住行出去睇，見到Ambrose原來爬左上嫲嫲床上面瞓，真係超好笑！媽咪由得佢唔理佢，過左唔夠五分鐘再入去睇，原來佢已經同嫲嫲迫住瞓著左，又會咁都有嘅，自己有張大床唔瞓，走去同人迫先瞓到，哈哈！呢排Ambrose實在有太多surprise俾媽咪，媽咪覺得Ambrose真係成長緊喇，再唔係小bb，感覺有少少矛盾。一方面會好高興佢有唔同嘅進步，另一方面又覺得Ambrose一日一日成長，唔知幾時有一日唔再需要媽咪爹爹陪佢，幫佢支持佢，感覺又有少少失落咁，真係有d傻！

2011年4月26日

今晚雅雯過左黎同Ambrose玩，Ambrose又係嘈住哂，又叫又大大動作，真係唔知佢做咩，不過佢都係唔俾雅雯掂佢d玩具，人地都未埋身，佢就已經攬定d玩具，say no，媽咪又係第一次聽到佢講no呢個字，真係唔知好嬲定好笑！次次雅雯黎玩都係斯斯文文，唔會同人爭野，好易驚，呢個Ambrose又唔會憐香惜玉，粗粗魯魯咁，又唔俾人攪佢d玩具，真係失禮哂呀！唯一嘅係佢肯俾雅雯攞波波，媽咪就同佢同姨姨雅雯齊齊碌波波，算係咁架喇！

講開say no，今晚雅雯黎左，佢都可以講到“雯”字，可能雅字難發音，佢都未ready啦！另外，呢排Ambrose其實都識講／自發講duck / fish / car / cat / bird / boat / down，似乎佢好似識講英文字多過中文咁喎！

2011年4月25日

今日爹爹朋友黎我地度gathering，因為會有小朋友黎嘅關係，媽咪想Ambrose瞓吓先，瞓夠下午就可以同小朋友玩！想氹Ambrose瞓時，Ambrose又推走媽咪要自己瞓，好，就再俾佢試吓！今次，Ambrose真係自己瞓左，真係好正，如果佢以後都眼瞓自己去瞓就好喇，咁媽咪又會多番d時間做吓野，唔使咁夜先有得瞓喇！

Ambrose呢一覺都瞓左幾耐吓，小朋友黎左佢重瞓緊，哈哈！過左一排，媽咪突然發覺大房門口邊企左個人仔，哈哈，Ambrose原來起左身落左床，可能見人多唔敢行出黎呀，好好笑！過左一陣之後，Ambrose開始自在d，行左出黎同小朋友爭玩廚房玩具，呢個哥哥仔大概二十八個月，大Ambrose八個月左右，但係人家真係斯文，唔搶玩貝，唔爭野玩，Ambrose似乎同佢麻麻地夾，都係各有各玩，耐唔時搶野咁！

玩玩吓，另一個朋友黎埋，佢有兩個仔，一個三十二個月，一個九個月大。Ambrose都係比較喜歡同大d嘅小朋友玩，重要係大得黎要比較活躍嘅小朋友，佢尤其投契。呢個大哥哥就係Ambrose杯茶，雖然係第一次見，Ambrose竟然好鍾意佢咁，佢竟然開口叫“哥哥”，叫佢玩滑梯，重要係一人一次輪住滑，好守秩序，每一次自己滑完就叫“哥哥”，之後自己行開少少又或者去自己個位坐，咁乖嘅Ambrose真係第一次見！呢一聲“哥哥”重要係我第一次聽佢講，好清楚嘅發音添呀！Ambrose又會同哥哥一齊彈琴，比著平時嘅佢，唔一定肯同人一齊彈囉，可以同哥哥並排彈之餘，佢重要哥哥自己彈佢個琴，相比起之前同另一個哥哥仔玩，真係好唔同，原來Ambrose唔係唔識同其他人玩，而係唔係個個啱佢心水，唔係個個都夾到！玩左一陣，Ambrose重要叫埋細佬仔一齊玩，工人姐姐手抱細佬仔“sir”滑梯，Ambrose不知幾高興，原來Ambrose對細過自己嘅bb都有興趣！佢竟然叫細佬仔同佢一齊上床玩，不過細佬仔未識行，反而要佢坐佢唔肯，係都要人抱企，而Ambrose又係咁想佢一齊坐床玩，慘食檸檬，哈哈！之後Ambrose轉而目標叫哥哥上床同佢玩，呢個Ambrose就係咁架喇，好鍾意“雷”响張床，可能佢開心，所以就係咁叫人同佢一齊“雷”，哥哥當然奉陪啦！兩個人又笑又叫又跳，超開心，有時跳到跌埋一堆又起身再跳過，不過媽咪見兩個人走落床仔跳，驚真係跳爛床有意外，所以都係叫番佢地出廳玩喇！

出廳前Ambrose要攞埋abc poster出去玩，同哥哥一齊搵媽咪指示嘅野，開頭哥哥搵唔到，Ambrose反而好快搵到，之後哥哥樣樣都比Ambrose快搵到，重突然一個屁股坐落張poster度，Ambrose想搵公仔搵唔到，推開哥哥又推唔走，佢開始發脾氣要攞番張poster，哥哥又同佢爭埋一份，玩左咁耐都係第一次有爭執！不過亦係poster事件之後，Ambrose唔俾哥哥攪佢d玩具，係咁“唔”“唔”聲，又攬住d玩具，無手重要將個身烏前黎保護自己嘅玩具！真係好笑！再講另一個哥哥仔，反而佢唔係Ambrose對手，佢明明玩緊廚房玩具，Ambrose走埋去大力搶，佢唔搶，好快就放手，但就咀扁扁嬲嬲地頭“dup dup”向後行左去，雖然係男仔，我見到咁嘅表現都覺得好可憐咁！亦都不約而同同另一個媽咪慨嘆，性格真係天生，咁細個小朋友，大人真係無教佢反應，要教都教唔黎，但同一樣野，唔同小朋友真係有唔同反應，做人父母可能真係無得選擇，不過希望後天多加教導可以慢慢改善啦！

今晚有一樣得著，就係之前媽咪成日都擔心Ambrose講野麻麻地，唔達標，上網睇又話唔好等政府check同治療，因為speech delay治療黃金時間係三歲左右，所以之前媽咪都好心急想同Ambrose去做speech assessment。媽咪以為自己係過份擔心，經Tweety姐姐俾意見後都係等兩歲返健康院做評估先，因為一般男仔都係遲識講野，一般兩歲後會無啦啦識講好多喎！雖然我接受Tweety姐姐意見，兩歲再睇進度，但個心態都依然係想出去做assessment，其他人知道總會覺得我好似過份緊張，唔使咁早做，唔使做小朋友自然都會識講野！但今晚果兩個媽咪，原來都不約而同都有同佢地小朋友做speech assessment，重係不約而同係同一間中心，兩個都係around兩歲左右做，知道左之後令我覺得原來做assessment都唔係想像中咁唔common，亦唔係一d過份緊張嘅做法！至少兩個人check完之後，雖然唔係咩大問題，但都有speech problem，係可以有treatment follow up嘅！好似哥哥仔咁，佢唔係唔識講野，不過原來佢係有d音發唔到，要做treatment幫佢郁多d個咀同舌，不禁令我覺得其實做treatment唔係一定係唔識講野先要做，發唔到音都係問題，而我有時都真係覺得Ambrose有d音好似點教佢係唔識發咁，好似教佢講“please”，佢會講“dale”，唔知係咪發唔到“p”音，所以今晚知道左朋友都有去做assessment，對於講野問題又知多左少少，就更加覺得如果兩歲Ambrose都重係講得果幾個字，就一定要同佢去做assessment喇！唔可以猶豫呀！聽哥哥仔媽咪講平時要小朋友多d用咀吹野，但我發覺Ambrose係好鍾意吹，有時自己都不停吹氣玩，但係相對啜呢一個動作，係極少做！一來好早之前俾飲管杯佢唔太飲，媽咪已經跳過飲管，直接訓練佢用杯飲水；二來平時生活真係無咩野可以涉及啜呢個技巧，媽咪不禁問哥哥仔媽咪，唔肯啜野係咪都會影響講野，答案係！佢話要知佢係唔肯定唔識啜，但我相信Ambrose係唔肯多d，不過亦唔排除佢識啜但係唔識控制流量速度同協調又啜又飲果個動作，所以唔識就索性唔飲，媽媽真係估估吓，唔知道！不過媽咪決定每日都要攞個飲管杯出黎俾Ambrose至少用一次，當然我唔想佢完全用哂飲管杯啦，因為佢已經識用杯飲水，又無理由倒退番要佢長期用飲管飲水架麻！

Ambrose今日有人同佢玩，真係好開心，唔知哥哥佢地幾時又再黎同佢玩過呢？

2011年4月24日

今日媽咪要陪婆婆買太陽眼鏡，等佢對眼唔好成日俾太陽曬到視力受損，同埋預手術之後都要有副鏡遮吓風擋吓沙，所以今朝一家三口就同婆婆去市中心出發喇！Ambrose一出去無耐竟然在bb車中瞓著左，我地見佢瞓左，眼鏡都唔睇住，急急腳去食野，真係好耐都無得舒舒服服食一餐飯喇！Ambrose瞓左，重唔速速醫肚，嘆番餐？！哈哈！重以為我地一開餐，Ambrose會起身，懷住戰戰兢兢嘅心情飲完餐茶，Ambrose都係昏睡！

今日陪婆婆同公公買左三副太陽眼鏡，婆婆兩副，公公一副！同婆婆再行時，再買左個手袋，俾婆婆平時出街用，比起皮手袋真係輕便好多，就當係媽咪送俾婆婆嘅生日禮物啦！買完野行完街，Ambrose都未起身，我地都係時候返屋企餵粥仔，抖一抖，晏d再出發去葵盛食飯喇！

今日同Ambrose著好衫，佢又要自己選鞋著，又係要著番尋日果對麵包鞋，係咪因為對鞋面濶身啱佢對肥腳，著得佢好舒服，所以次次都要著呢對呢？佢咁堅持，媽咪都無辦法，佢著左對鞋係完全唔襯套衫架，媽咪唯有同佢除左件衫換過件襯d嘅先出去啦！

出到去，表姐們已經到左，三個小朋友玩汽球，不亦樂乎！不過原來Ambrose係好驚party用果d吹氣紙卷，尤其係條紙卷一吹出黎變直時佢真係嚇到眼眨眨，係咁拍自己心口，媽咪要勒令所有人收埋唔准吹先得！

玩左一陣媽咪同爺爺帶左Ambrose同表姐們去樓下遊樂場玩，Ambrose都係對滑梯興趣不大，成日都係爬左上去之後唔滑落黎，就咁企左上面玩其他玩意，真係無佢收！成個遊樂場其實都只係分左四組野玩，不過四組野係分開四個地方放，而其中一組已經俾一班村童圍住左玩爆旋陀螺，一組係拱型好傳統嘅爬架，兩組係滑梯！Ambrose無興趣玩滑梯，反而成日想去爬拱型爬架，不過佢手短腳短，個爬架一格都長過佢對手腳，媽咪唔扶佢係一定唔得囉！而佢只係爬得兩格，太高媽咪都扶唔上去玩，所以後來Ambrose都放棄左，轉而走去周邊嘅長椅，張張長椅都走埋去爬上去，哈哈！

夜晚食飯，Ambrose叻叻，我地俾佢坐在茶几邊度食，食呢方面真係唔使擔心Ambrose，佢有得食就真係好滿足，自己重會好專注地食，即使身邊嘅表姐唔食飯扭計，又行開又玩又食，Ambrose一直都無離開自己個位，自己乖乖食飯，唔使人餵（雖然食到一地都係，哈哈）！Ambrose係會一直食，食到佢見到台面無野食佢先肯罷休，如果只係佢個碗無而台面重有野食，佢都一定要繼續食！所以每次我地食飯都要好快同一定要食哂，如果唔係呢隻仔真係食唔停呀！

食完飯抖多一陣我地就走喇，Ambrose只要一上車，坐左上自己個car seat，真係會好易瞓著覺，真係好神奇！今晚，佢又係上車無耐無奶咀都瞓左，重要返到屋企抱佢落車佢都係照瞓無醒到！今晚佢破例無沖涼上床瞓，希望唔會有野咬啦，哈哈！

探訪太舅婆

今日無咩特別野做，嫲嫲話Ambrose出世以黎都未去過太舅婆度，而太舅婆亦都只係响Ambrose滿月時見過抱過之後都無再見過Ambrose，所以今日爹爹媽咪同嫲嫲齊齊同Ambrose探訪太舅婆！

太舅婆平時幫手湊孫，一男一女，男大概兩歲幾，女大概五歲左右，所以Ambrose去到都應該有伴玩！果然，Ambrose初初去到時係有少少怕生，一直都攬住媽咪腳，不過當佢見有小朋友同一堆玩具時，佢就自己行左去玩，完全無理過其他人，招呼都無打呀！哈哈！

太舅婆家玩具都幾多，不過就係亂d，Ambrose都無理，照玩可也，不過原本以為佢會有伴玩，但發覺佢都係自己有自己玩，唔同人玩，而呢兩個小朋友比起表姐們似乎都要斯文好多，可能係咁，Ambrose覺得無趣，自己玩就算！論輩份，雖然呢兩個小朋友都係比Ambrose大一歲至幾歲左右，但Ambrose係要叫佢地表姨同表舅父之類，佢地係大Ambrose一輩架！表姨玩玩吓自己都入左房自己玩，而表舅父，哈哈，有幾次同Ambrose爭野玩，Ambrose俾人搶野玩就喊，超渣囉！重要係有時人地想搶佢d野搶唔到，佢都照喊，呢個仔真係眼淺呀！真係唔好睇佢平時响屋企成個少爺仔咁，對我地又粗魯又惡死，一出去啫，少少野就喊，呢方面真係要多加訓練呀！

今日Ambrose又同平時有少少唔同，尋日佢就無啦啦要自己瞓覺唔使人陪，今日佢出街竟然要自己選鞋著，攞左幾次唔同鞋俾佢，佢都唔肯著，直到攞左對佢要嘅鞋，佢自動自覺坐低等媽咪同佢著呀！媽咪見對鞋同一身造型都唔襯，重咋咋帝帝換番對鞋，點知佢一見對鞋唔係佢要果對，又擰哂頭唔肯著，又要媽咪攞番佢想著果對鞋出黎至安樂，媽咪都無佢辦法，就由佢唔襯就唔襯啦！

Harry哥哥+港樂 彩虹交響世界

期待已久去聽嘅交響樂，今日就係喇！為左等Ambrose有足夠精神去聽音樂加睇魔術，又等爹爹朝早放工返黎有覺好瞓，媽咪就帶左Ambrose落樓下十蚊店行吓。十一點幾落樓，一行差唔多一點至返屋企！返到屋企俾左個奶咀Ambrose，佢竟然第一次推開媽咪要媽咪走，佢要自己瞓！好啦，自己瞓重好，媽咪樂得出房收拾，重好添呀！媽咪八掛幾次行入房莊Ambrose，見佢對眼都差唔多合埋瞓著，感覺真係好神奇呀！Ambrose竟然會要自己瞓唔使人陪？！媽咪又行左出去繼續收拾，突然聽到有玩具鈴聲，跟住係Ambrose咯咯笑，之後就見到Ambrose攞住個玩具跑左出黎！媽咪諗，Ambrose應該係瞓到咁上下，對手插左入枕頭底，咁啱有個玩具之前攞左入房俾媽咪塞左入去枕頭底唔記得攞番出黎，就係咁俾Ambrose摷到，兼且醒哂！唉！真係前功盡廢！Ambrose咁樣跑出黎之後就唔肯再瞓喇！

接埋Ellen姨姨同heihei一齊出發去尖沙咀聽音樂睇魔術！嘩！今日超多人呀！因為爹爹無興趣聽，同埋慳番張飛，爹爹都係做柴可夫，車我地去到之後自己搵位泊車，媽咪就要獨力同Ambrose入場！入場前諗住去廁所，點知大排長龍，結果我地一行四人一齊入左去個殘廁，一個拖住兩個小朋友背住另一個去廁所，真係第一次咋，哈哈！

原來因為我地買嘅係平飛，山頂位就預左架喇，點知真係好山頂，只係尾二果行，亦因為係山頂位，媽咪同姨姨要抱住bb一路行上樓梯對號入座，真係好金呀！今次呢個場雖然望落好似靚d，但座位真係好窄，人坐左落去之後，前面已經係另一行人嘅頭，完全係少少企位都無呀，媽咪開始擔心無位俾Ambrose中場可以企吓伸展吓，唔知佢會唔會好扭計，如果扭計，我地又係坐正中間，要行番出去要穿過所有人嘅位先得，真係大件事！另一樣係呢度無上次果個加高座攞！雖然全場呈梯級落，照道理都唔會被前排人遮住睇唔到，但因為交響樂已經set到個台full哂，Harry哥哥要企到去台嘅好前，以我地山頂望落去嘅角度，Ambrose其實都要烏前先睇到，結果媽咪覺得烏前有危險，都係抱起Ambrose坐膝蓋睇好d囉！

Ambrose開始時有幾吓俾交響樂好大聲嚇Harry哥哥嚇到咁，係咁拍自己個心口仔，媽咪都有安慰佢無事，媽咪攬住，過左果幾吓，Ambrose又無咩野咁。媽咪見有場刊，攞起同Ambrose一齊睇，場刊中間一大頁係一個台嘅圖，解構番唔同樂器一般放置嘅地方，Ambrose對於豎琴非常之有興趣，係咁又指場刊上個豎琴，又係咁指台上面果個真豎琴，要媽咪講，媽咪全程唔知有無講過二三十次，連Ellen姨姨都有份幫手講左幾次，都忍唔住笑住叫媽咪買番個豎琴玩具滿足吓Ambrose至得！除左豎琴，媽咪都有盡量講同指俾Ambrose睇其他樂器，有d樂器Ambrose應該睇DWE嘅書已經見過學過，今次正好俾個機會佢去睇真嘅樂器同演奏，加強佢嘅印象！呢個解構圖真係好好，媽咪真係攞住佢同Ambrose不斷睇同對足全程咁濟呀，自己都學到野，非常有用呀！

因為當初媽咪諗住Ambrose重細，唔想投資太大去買前排座位，諗住當聽音樂就算，bonus係有魔術睇，雖然係遠少少，哈哈！不過媽咪想像中嘅魔術同實際表演又好似有少少落差，其實魔術成份真係唔係咁高咁，加埋其他表演全部都係圍繞住彩虹主題，不過不失！媽咪慶幸真係無買貴飛黎睇魔術囉！哈哈！

音樂會完結前有個好細個小朋友出黎唱“I can see a rainbow”，我估佢都係得四五歲左右，要响咁多人前唱歌，真係好叻！媽咪打開場刊搵到歌詞果頁，一路唱一路用手指指俾Ambrose睇，Ambrose都好投入睇歌詞，聽完首歌，一個鐘頭十五分鐘嘅音樂會就咁結束，今次Ambrose比之前又可坐多十五分鐘，真係唔錯，如果有多d呢類音樂會俾咁細小朋友聽就好喇！

散場又係好鬼多人，由山頂落番去地面，當然又係勁多樓梯要行啦！因為人多，媽咪都係抱起Ambrose行快d，而家嘅Ambrose都唔知有無 三十磅 ，重到媽咪對手真係軟哂！爹爹好勁，竟然就响正山腳等我地，媽咪即時塞Ambrose過去俾爹爹，哈哈！

見時間重早，爹爹提議去搭渡海小輪，一來Ambrose未搭過船，二來渡海小輪唔會太長時間，短短地俾Ambrose體驗吓，又係一項唔錯嘅節目，Ellen姨姨無異議，go go go！

媽咪生平都唔知搭過幾多次渡海小輪，可能真係十隻手指都數得哂呀！所以今次搭船媽咪都覺得好有新鮮感呀！我地由尖沙咀去到中環，沿途有用cam拍低，兩個小朋友望住個海，指手畫腳，我地大人都好興奮呀！去到中環，是但搵左個位坐低，兩個小朋友對住個海食包包，真係一大樂事呀！包包重要係Ellen姨姨自己整架，真係好健康！食完包包影吓相，真係到此一遊，又係時侯搭返去尖沙咀喇！

 

我地真係超級大鄉里，去程時收$3，回程時見收$2.4，我重以為係好似巴士咁有回程優惠，而爹爹就以為買錯飛，即時問員工，架船係咪去尖沙咀，員工話係呀，爹爹再問咁點解平d嘅，員工話因為我地坐下層喎！噢！原來我地之前係坐上層，舒服d，所以貴d！呢程唔知道，誤打誤撞去左下層，原來係臭d同超多人囉！真係只係差六毫，一早知就寧願搭上層啦！大鄉里唔知，真係無計啦！

美男廚房

一直都想買個座地嘅kitchen set俾Ambrose，因為一來可以俾佢多d模仿，二來又可透過玩嘅時侯學到唔同食物同用具名稱，三來可以俾佢有多d唔同類型玩具，一物真係有幾用。媽咪之前不斷睇kitchen set，發覺好多kitchen set都係粉紅色又或者係細細件咁，真係好難搵到一d中性嘅款式，點解呢d玩具成日都有分男仔女仔咁架？！去反斗城就有兩套紅藍色嘅kitchen set，不過要成五六百大元，一來好貴，二來又總係覺得只係無選擇中嘅選擇咁。媽咪於是上網睇，去左amazon個網見到有好多好靚嘅廚房，雖然係膠，但都好真，又多元化，真係好吸引，不過計過條數，最平果個連運費都要千鬆d，雖然真係好靚，比起反斗城果d都只係多幾百蚊，但千鬆d一個玩具又真係好奢侈咁，不如都係俾佢入真廚房重好過喇！反覆又睇到宜家有個廚房，好真，成座係木造，爐頭位唔會好似膠做果d一擰制有聲，其實都唔錯，只係一座咁嘅廚房都要$799，未計配件，最重要係媽咪諗唔到究竟呢座廚房擺响邊同埋點襯番Ambrose個corner。最後媽咪都係將買廚房嘅念頭擱置先，直到見到吉之島有一個廚房，細係細d，但係一座可以企起度玩，顏色又係中性嘅紅藍灰，個價錢只係$279，最重要係個廚房係portable嘅，收起左成個公事包咁，即係話萬一Ambrose唔玩嘅時侯，我地都可以選擇收起佢擺埋唔使阻地方，如果係其他廚房似乎就做唔到收得靚靚嘅效果喇！為著屋企唔會充斥住Ambrose嘅大型玩具，媽咪決定細細地都係買呢個喇，最緊要係平，又可以達到目的！不過媽咪都好師奶仔架，$279咁平都諗住等吉之島吉日有折先去買，吉日玩具部係有九折架，不過好可惜等到吉日時個廚房又無貨，無得買！媽咪諗住唯有再等吓先啦，反正又唔急！早幾日媽咪見到終於有貨番，不過唔多，得三盒，本來都好想即買，但媽咪一個人要買一盒咁大玩具係有少少吃力，媽咪又醒起過多幾日係感謝日，咁不如都係等到感謝日有九五折，又可叫爹爹去買，唔使自己攞餐死。等到感謝日，媽咪叫左爹爹去買，爹爹下午至出發，本來諗住早幾日有三盒，唔知今次又會唔會咁唔好彩去到又買哂，終於，爹爹不負媽咪所望，佢買到最後一盒返黎，盛惠$265，重可以揸車去買，有得免費泊車，哈哈！呢個廚房真係好抵呀！

爹爹知媽咪心意，買左之後都無即時拆開俾Ambrose玩，等到媽咪收工食埋飯先一齊拆。Ambrose一知可以拆不知幾開心，自己攬住個咁大嘅盒行埋黎我地度叫我地幫手拆開，佢真係好大力呀！首先拆開左d散件，係d杯碟匙剷同食物，Ambrose一手攞起開始玩，都唔理爹爹同佢砌廚房，睇都無睇過呀！估唔到Ambrose都幾投入玩煮飯仔，姑娘講得無錯，小朋友真係無分男仔女仔玩具，睇Ambrose用叉篤住食物中間嘅魔術貼，又餵我地食野又餵阿喜食，真係似模似樣呀！

爹爹最後砌左個廚房出黎，比想像中細左少少，不過又剛好放到入Ambrose’s Corner度，咁樣就歸一d喇！Ambrose今晚對於個廚房好大興趣，係咁玩，睇黎呢個廚房都會有一段時間唔使收喇！

幼潛三期 – 第二堂

呢一期幼潛上堂時間適逢爹爹shift pattern好多星期六日時間都要返工，所以又係媽咪要自己同Ambrose出去返學喇！好彩媽咪今期只係選擇左尖沙咀centre，一個人出去都可以搭西鐡，唔使收車真係方便好多！不過今堂有嫲嫲一齊出，媽咪都無咁驚！今日預出門時間九點半左右，實際九點七八先出到門口，以為去到都只係啱啱好，點知出到去都只係十點十，距離上堂時間有成十五分鐘，我地坐响課室門口等，Ambrose都叫乖，肯坐定定同我地一齊等！

今堂一開始玩嘅遊戲係撕魔術貼，姨姨俾左一塊軟膠板，上面有四個圓形，全部都係用魔術貼貼在塊膠板上面，姨姨要小朋友用頭二指用力撕d圓形出黎，撕左之後又要貼番上去，個圓形要貼得啱啱好，唔可以露邊出黎。另外，係一塊紙板，上面唔同位置都有魔術貼同公仔，家長要指示小朋友撕下公仔貼去指定位置。其實兩塊板玩嘅都係撕魔術貼同貼魔術貼，姨姨話呢個遊戲可訓練小朋友運用頭二指，唔會好似細個唔識野咩都係一手抓落去亂抓，而係有技巧咁用頭二指掀起撕開，同埋撕魔術貼要用嘅力量要求都比較大，可訓練指力，對於日後抓筆寫字亦有幫助，至於要小朋友按指定貼公仔位置，亦都係可提高小朋友嘅空間感，一個遊戲可以有唔同功能，真係幾好！媽咪其實响屋企嘅白板上面用魔術貼貼左Ambrose個名出黎，Ambrose細細個時已經成日走埋去逐個英文字母都抆出黎，我諗撕魔術貼遊戲對佢黎講唔算陌生，媽咪真係誤打誤撞都俾到Ambrose唔同嘅訓練，哈哈！加上近期媽咪都有比大型膠貼子Ambrose玩，佢好興貼好之後，又用手指括起撕出黎貼去第二度，而因為貼子一旦貼左之後都幾實吓，Ambrose再撕出黎都要用超大力去做，媽咪都已經見識過好幾次，佢要用力嘅程度真係比起撕魔術貼重要大得多，所以今日要玩撕魔術貼遊戲，真係難唔到Ambrose！四個圓形好輕鬆咁撕好又再貼上，係貼上時有時會露邊，但都好快修正；而公仔魔術貼都可以按指示貼去唔同地方，非常輕鬆！姨姨過黎睇Ambrose嘅時候都有讚佢收起哂三指用頭二指去撕收得靚喎！媽媽見呢個遊戲都唔錯，似乎都易做，屋企都應該有相關材料，媽咪都諗住整番 一兩 塊俾Ambrose玩吓，好過成日要買貼子俾佢玩一陣就無哂痴力咁花錢！復活節假得閒先整喇！

之後姨姨set場做大肌肉訓練，一邊係軟墊叠高嘅梯級，兩邊係唔同質感地毯，另一邊係隧道，姨姨話可以自由起步，而佢只會守响梯級果邊睇住小朋友上落。媽咪同Ambrose由隧道開始，諗住Ambrose一定好歡喜爬隧道，點知前面個小女孩爬極都唔郁，Ambrose本來都預備爬，都係企番正等人爬先，點知等等吓佢忽然咀扁扁喊，之後更加扯媽咪走。媽咪都唔知發生咩事，正確黎講係咩事都無發生過佢就無啦啦喊，真係未試過咁樣喎！媽咪唯有同Ambrose行埋一邊氹佢啦，不過Ambrose時而收聲時而諗兩諗又扁咀想喊，真係令媽咪摸不著頭腦！媽咪諗緊係咪佢之前玩大肌肉訓練通常爹爹都响度陪佢玩，今日玩就得媽咪，所以佢諗諗吓掛住爹爹就喊？真係唔知係咪咁，媽咪都係估！氹到Ambrose唔走其實都算好喇，媽咪嚐試氹Ambrose行樓梯，因為果邊有一隻大龜，媽咪諗住Ambrose鍾意動物，可能佢會俾隻大龜吸引左而行去玩，點知Ambrose又係咀扁扁要喊，媽咪都無佢符！媽咪真係好奇怪平時熱愛大肌肉訓練嘅Ambrose，因咩事而咁傷心，剛才都重預備要爬隧道架麻，轉頭就已經咩都唔肯玩之餘又喊哂，佢上咁耐playgroup都係第一次咁樣扭計唔玩咋！詩詩姨姨都話記憶中嘅Ambrose好鍾意呢類活動，點解佢會喊哂口扯媽咪走真係唔明！Anyway，最終Ambrose係維持左成個大肌肉訓練都無去玩。之後姨姨要小朋友排隊去攞椅子埋台坐，平時shining garden都攞得多喇，不過就唔使排隊。Ambrose都肯同媽咪一齊排隊，不過因為佢之前扭計要warm up番，所以我地都係排最尾，見Ambrose肯排隊以為佢無事啦，點知差唔多到佢時佢又再扯媽咪走，真係唔知佢做咩！詩詩姨姨都無法，將佢張椅放响位就由得我地，不過媽咪都氹到Ambrose番位坐。原來今堂姨姨教小朋友搽麵包呀，麵包放台面，用膠刀仔撩起一堆果醬放响麵包頂再用手掃落黎，直到麵包都搽滿果醬，就用手仔對摺塊麵包攞上手食。媽咪都無比過Ambrose食果醬，更加未試過自己搽啦，呢個活動都幾得意。不過Ambrose搽兩搽成塊包有八九成果醬時，佢已經急不及待攞起黎食喇，佢都無對摺塊包，就咁食咋，真係服左佢呀！Ambrose今日心情真係麻麻地，就連食野都好慢，唔知有咩心事呢？食左兩塊包之後，又係落堂時間喇！詩詩姨姨整左d白兔仔俾小朋友，每人一隻，Ambrose又係最尾一個去攞，都叫做好有耐性喇！似乎佢都幾鍾意隻兔仔，一直揸住唔放手！

放左學又係時候食粥，媽咪同嫲嫲一齊落左三樓餵Ambrose粥仔。Ambrose周身郁，又扭計，但總算都係响個位度無落地。突然間Ambrose個樣呆左一下望住媽咪，隔左兩三秒之後暴喊，媽咪望吓佢咩事，原來Ambrose隻手放左响椅背上面，後面有個男人坐左响張椅度“捱”後，佢張椅背同Ambrose張椅背即時夾埋左，Ambrose嘅手指就係咁俾張椅夾住左，見到都超痛呀！媽咪即時叫個男人起身，佢至知發生咩事，雖然佢有道歉，而媽咪都明白唔關佢事，但媽咪總覺得個男人都係循例道吓歉，唔覺得佢有一d愧疚，反而男人嘅太太就真係同媽咪一樣有切膚之痛，神情緊張不斷道歉。Ambrose應該都幾痛吓，佢喊完一輪，停左十秒，諗諗吓又再喊過，同平時嘅佢喊完一陣就算真係好唔同，攪到男人太太真係好唔好意思，媽咪要反過黎安慰佢今日Ambrose扭計先喊咁耐，其實媽咪都好肉痛架，所謂十指痛歸心，我諗佢咁樣夾一夾重痛過佢尋日跌到頭仔呀！

食完粥仔之後，又係時候返歸！返到市中心媽咪同嫲嫲先至坐低食野，Ambrose全個車程都無瞓，我地食野佢又食埋一份，直到我地返到屋企，同佢換片換衫，加上天黑黑落大雨，Ambrose終於都瞓著喇！

遊南生圍

今日難得爹爹同媽咪一齊放假，爹爹提議入元朗食野行街街，再去南生圍親親大自然。Ambrose唯有又做一次逃學威牛，唔返shining garden喇！

首先，爹爹揸車入左元朗，車泊好之後我地就去搵野食，不過元朗實在太多人，而且好多食肆都好地道，完全唔會有卡位或者係bb椅，重要只係圓椅，係唔適合我地帶住手多多又周身郁嘅Ambrose入去食，無辦法之下，唯有去pizza hut食啦，保證坐得舒服，又有bb椅困住個百厭星麻！

Ambrose第一次pizza，似乎都津津有味好enjoy，哈哈！食完野，行左一陣千色廣場，Ambrose見到d精品非常之開心興奮，佢而家行街會伸手去攞起有興趣嘅野黎睇，睇完又會放番低，真係十足十大人行街咁，比著佢以前，行街係咁要攞起d野再放响地下，搬黎搬去，而家佢又大個左喇！最攪笑係佢見到mickey公仔裝飾品，唔知係咩質地，大概係會打得爛嘅，佢不斷好high咁叫，又好肉緊咁指吓呢個指吓果個，佢好想攞上手，但係我地驚佢整爛唔俾佢攞，只係淮佢睇，見到佢咁肉緊個樣就好笑喇！

行左一陣商場，避過左中午暴曬時間，我地就去攞車正式出發去南生圍。途經阿伯街邊檔賣氫汽球，見廿五蚊好平，當然又忍唔住買番個俾Ambrose玩啦！拉左堆汽球落黎俾Ambrose選，佢又發哂呆咁，問佢咩都唔答，好似無咩興趣咁，似乎都係媽咪一箱情願要買氫汽球俾佢玩！問左一輪，媽咪又指吓插在車上細細個有條棍仔嘅細氫汽球，問Ambrose想要大果d定呢d細氫汽球？佢竟然真係攞起左一個紫色Minnie氫汽球，爹爹問佢不如我地要大嘅Mickey & Minnie啦，而且試圖攞走佢手上果個細Minnie，但Ambrose發難，唔俾人攞走，細氫汽球其實都要十五蚊，比大果d會飄嘅差十蚊，好似大抵d咁，Ambrose唔肯要都無辦法啦，唯有買個細啦！再行經士多，爹爹買多樽吹泡泡水，go go go！

Ambrose早上起左身之後都無再瞓覺，食埋pizza行埋街買埋ballon，上左車之後已經好快豬左！元朗去南生圍唔算遠，好快就到，Ambrose都係瞓左一陣，又俾我地叫醒左！

南生圍成日都有人放搖控車搖控飛機，今日都唔例外，爹爹泊車泊正人地放車放飛機果度，Ambrose一起身就有得睇喇！Ambrose係咁望住，不過我地都驚驚地會墜機，所以都係行遠少少。Ambrose一路坐住佢架Mickey單車仔，一路周圍望，係有少少呆咁，不過似乎佢唔太抗拒呢度，有時都會要落地行吓跑吓，攰嘅時候又上番車度要我地推。沿途都有人放狗，Ambrose又要想睇想摸，但又驚要縮縮吓，企定定望實，可能佢都係未瞓醒，哈哈！

悠悠閒咁行吓停吓影吓相拍吓片，其實都幾輕鬆寫意，係有d熱囉，下次可以嘅話都可以黎呢度野餐，呢度地方大，又有草地，啱哂小朋友跑，唔驚佢地跌親，係就係一鞋都係沙塵，不過如果唔想下下都行商場，呢度近近地都不失為親親大自然嘅好地方。

其實Ambrose唔係第一次黎南生圍，早在佢六個幾月嘅時候都有同佢黎過，果時佢都未識企，坐都只不過係學坐緊，我地重要攞埋佢張bumbo chair去俾佢坐低影相，而家睇番上次嘅相，真係覺得時間過得好快！而家嘅南生圍多左好多人去，多左人去踩單車，重要個個都會攞住部單鏡機，可能就係多人去左，之前就有火燒南生圍，今次去到見到有唔少地方都重係黑黑焦焦咁，又多左垃圾，真係好慘呀！希望大家都愛惜我地僅有嘅大自然，唔好俾佢地再受傷害啦！

玩左個幾鐘，出哂汗，立痴痴，成身都係沙塵，Ambrose係時間要瞓覺喇，都係打道回府啦！

Ambrose返左去之後都係瞓左一陣，起身無啦啦臭臭左，爹爹出左去整電腦，媽咪唯有獨力同佢洗白白，唔知係媽咪真係唔識湊仔定真係太黑仔，繼之前媽咪同Ambrose洗pet pet抱起佢由洗手盤高度跌左落地之後，媽咪已經有好大陰影，今日同佢洗白白，都係好似平時爹爹同佢洗白白一樣開花灑企响度沖，Ambrose都可以跣腳跌落地，好彩係佢跌坐左响度至失平衡慢慢瞓低跌到撞到頭仔，雖然見到Ambrose都唔係跌得咁勁，但見住佢跌又接佢唔住，聽到細細聲撞頭仔聲，望到佢個驚嚇樣，真係肉都赤埋，都唔顧得佢成身濕，拿拿聲抱起佢攬番呵番，好彩佢都只係喊左一陣，攬完呵番佢又繼續沖涼。同Ambrose沖完涼之後，媽咪一身都濕哂，都要沖個涼換番衫至得，攪掂哂之後，爹爹至番黎，再同我地出發去姨婆屋企打邊爐。

今日真係非常充實呀！

2011年4月14日

今日幫婆婆book左做白內障手術喇，定左5月6日中午做左眼先，真係令我都緊張埋一份呀，唔知做左手術會唔會真係好d呢？

今晚Ambrose好奇怪，同我地食飯時佢竟然食食吓唔食要落地，攞左本書再上番high chair坐响度睇，唔係去番自己書台睇，真係攪笑喇！

食完飯，Ambrose又捉實我同嫲嫲又要跑跑跑，真係無佢符！跑完之後我地要佢坐低，跟我地做動作，叫佢踏腳就踏腳，游水就游水，舉手就舉手，自己都做到咯咯笑！見Ambrose成日都natural high，我攞左張貼子出黎俾佢玩，等佢唔好咁情緒高漲，靜態少少玩吓貼子，練吓d手指仔！

臨瞓前又係食藥嘅時候，尋晚好成功自己飲藥，今晚我都係就咁將d藥水溝落個杯度俾Ambrose。今晚Ambrose都有自己飲，不過就飲一大啖又擺低，嫲嫲要用個杯灌佢飲，佢又攞番個杯自己飲，飲一啖又擺低，嫲嫲又再灌，佢又再搶，如是者，半氹半推佢飲左杯藥，雖然無尋晚咁利害自己主動飲哂一杯藥，都算好叻仔架喇，唔使我地夾實佢至飲，真係慳左唔少力氣！

呢兩晚爹爹都返夜，我重驚Ambrose半夜反瞓扭計會無得瞓，出奇地呢兩晚Ambrose都瞓得好好，半夜無嘈，甩左奶咀都可以一覺到天光，真係好彩呀！

2011年4月13日

今晚Ambrose食晚飯嘅時候釣魚呀！今晚只有媽咪、Ambrose同嫲嫲一齊食，Ambrose一路自己“畢”野食，自得其樂，隔左一陣之後，媽咪同嫲嫲發現Ambrose每“畢”一啖黎食，佢嘅動作都減慢緊，而且對眼好似打唔開咁慢慢細，媽咪知道Ambrose就黎要瞓著覺，但佢仍然好落力係咁“畢”黎食！媽咪見Ambrose個樣實在好好笑，加上食住黎釣魚實在太少見，媽咪即刻衝入房攞攝錄機想拍低呢個咁攪笑嘅時刻。點知到媽咪出返黎用部機對住Ambrose嘅時候，佢又好似醒番咁無再打眼唔開喇！媽咪一路拍左兩分鐘左右，以為Ambrose已經醒番，媽咪又要錯過佢嘅攪笑時刻，都諗住收機繼續食野嘅時候，Ambrose終於又忍唔住開始打眼唔開喇！雖然如此，佢都係手不停咁繼續“畢”野食，過多一分鐘都唔夠，Ambrose已經合埋對眼釣緊魚，一時向左中，一時向右中，一時向前中之後張開眼望一望媽咪，又再忍唔住繼續釣魚，如是者，又繼續左中右中同張開眼再繼續釣，真係好好笑，到最後媽咪見Ambrose向前中差唔多要撞落張台度就停左無影喇！嫲嫲順手抱起Ambrose入房瞓，點知呢隻小馬騮一放在床上又醒左唔願瞓，又走番落床，企响房門口望我地食野，好似好想我地陪佢入房咁款！當然佢唔瞓我地又繼續晚飯啦，由得佢自己行黎行去，過得一陣之後，佢成個人醒哂，重非常之生猛咁周圍跑，同之前釣魚嘅佢真係兩個人！媽咪執碗時發現Ambrose個碗入面已經無哂野食，釣住魚都要食哂碗粉先至安樂，真係為食豬呀！

呢排Ambrose愛上左跑，佢成日都會放樣野响個廳中間，之後走去攞起playskool份膠積木台上面塊月亮形嘅膠蓋，一路揸住個蓋一路兜圈跑重一路大講外星話。今晚佢又係咁樣跑喇，而且重要叫埋媽咪攞住另一塊月亮膠蓋同佢一齊跑，跑得一陣又要媽咪抱埋阿喜一齊跑，媽咪真係投降喇，頭都暈埋呀！Ambrose唔知係咪太愛跑呢，佢已經學識講“跑跑”喇！

另外，之前同Ambrose玩蔬果磁石板自創入孔玩法之後，爹爹見佢玩得好開心又開埋交通工具磁石板俾佢，呢段日子，Ambrose就係不斷玩入孔，重要玩得好叻，成塊底板掉轉左，爺爺唔知道重叫佢入孔，佢就一個唔該成塊磁石底板抆出黎掉轉痴過先入孔，媽咪都真係好佩服佢！

第一次自己飲藥水

Ambrose自從去完舅婆樓下嘅遊樂場後，鼻水就長流不息，由開頭嘅透明稀鼻水到之後嘅黃鼻涕，都食左好幾日藥喇！次次同Ambrose食藥都好似打仗咁，一定係夾實佢用針筒灌，佢就一定係喊哂口，一路叫一路周身郁，從來都未試過順順利利無反抗咁食哂d藥水。只係而家大左少少，佢又可能俾人灌慣左少少，佢通常都係得個叫字，唔係真喊，係無眼淚嘅！一食完藥水放開佢，佢又好似咩事都無發生過咁走去食提子乾走去玩。

今晚又要同佢食藥喇！好幾枝藥溝埋一齊用兩枝針筒都入唔哂，我地氹Ambrose食藥佢又周身郁兩頭擰，最後，我忍唔住同佢講，一係你自己食藥啦，一手將入剩左針筒果杯藥水遞俾Ambrose，估唔到Ambrose接住左個杯真係自己飲藥水，我見佢真係乖乖飲藥水，即刻將已經入針筒嘅藥水一次過唧埋落個杯度由佢自己飲埋，今次係Ambrose第一次自己飲藥水，重要係用杯一次過飲哂，真係好意外，我都忍唔住讚左佢好多次叻仔呀！唔通原來佢係唔鍾意俾人灌藥嘅？！

2011年4月12日

之前媽咪重整過Ambrose嘅字咭袋，因為之前送果個實在太鬆，放左咭入去之後個咭袋會“啤”哂出黎，嚴格黎講，我地係用黎放雜物多過認真放咭俾Ambrose睇，有見個字咭袋真係好差，媽咪之前訂左一個細嘅黎試吓好唔好用。呢個字咭袋其實唔係好深，字咭係插上去，大概10cm高左右，雖然係咁，都算插得幾挺。媽咪重整字咭袋，無放新咭出黎，只係將之前放開出黎嘅人名稱為放番出黎，放番整齊。但媽咪都無用d字咭教Ambrose，只係純粹放左黎睇。

今晚臨瞓無野做，媽咪突然見到d字咭，諗住教Ambrose讀。Ambrose平時係唔會跟我地口水尾學講野，所以媽咪都係諗住自己講完一次就算，點知Ambrose竟然跟住講媽媽同爸爸，見佢肯跟住講，媽咪又繼續讀佢個中文名，當然，佢係唔識講，之後再繼續其他稱為，爺爺／嫲嫲／公公／婆婆／太嫲／姑姐／姑丈／舅父／舅母／哥哥／姐姐／表姐／叔叔／姨姨，Ambrose竟然一一跟住講，都係第一次咋，有d佢未識講可能會唔出聲，有d佢識一個字唔識一個字佢都有嚐試講一個字，見佢講開野，我連一d無字咭嘅字都同佢讀，好似波波／車車／水水／菜菜／餅餅／包包，爹爹見到呢個奇境，忍唔住攞埋部cam影低我地！

今晚又同Ambrose“畢”波子，其實唔係成日同佢玩呢個玩意，一來Ambrose未係好掌握到，二來佢無耐性逐粒“畢”，佢“畢畢吓”會用手攞起玩，媽咪一見佢攞起玩就會收埋唔俾佢亂黎。今晚攞出黎玩時，Ambrose竟然可以自行“畢”到幾粒，重要佢已經識“畢”起左定住再慢慢倒落每一格度，佢之前都唔識定住架，真係令媽咪好驚訝！不過，當佢成功“畢”到一半波子之後，佢又忍唔住又用手擺喇，媽咪唯有又收埋，要吊佢胃口，下次先再俾佢玩過喇！

失聲

媽咪終於都病左喇！經過兩日假期，湊足Ambrose兩日，又上playgroup，撲撲頻頻，媽咪原本已經聲沙沙，去到昨日已經失聲，叫外賣都差d叫唔到，今日真係頂唔住，唔想攞病假都要攞喇！如果攞病假可以有人工，我真係好想放多一兩日，以我嘅病情，我相信我返到工都嚇親d同事！當然，呢個世界係無free lunch啦！一日都好過無喇！

十一點幾，爹爹同Ambrose陪我出市中心食野同睇醫生，今次因為病情較嚴重，所以要食抗生素，療程五日。睇完醫生食完野，返左屋企食藥休息吓，再起身嘅時候都只係四點幾。媽咪見時間尚早，提議同Ambrose落樓下公園玩，今次媽咪終於都記得攞埋枝長泡泡劍落去玩喇！Ambrose其實都唔係話好熱愛遊樂場，次次去都係睇人玩多過自己玩，唔會表現到好狂熱好興奮，可能只係媽咪一箱情願想佢去玩多d！Ambrose又唔係好熱愛滑梯，只係媽咪次次都叫Ambrose去玩，Ambrose只會應媽咪要求爬上去之後，叫極都唔會“sir”落黎，反而佢只係鍾意爬上爬落，行上行落樓梯同埋扭滑梯上個駕駛盤。媽咪見Ambrose都唔係咁興奮，一於攞把泡泡劍出黎fing泡泡，點知Ambrose唔係好似其他小朋友咁追泡泡，佢都仍然係得個望字，之後佢就要搶枝泡泡劍，要自己浸入去再抆番出黎，可惜佢唔識搖枝棒，無泡泡出，但佢都重好有興趣又抆出黎又對好耐插入去，來來回回都係得個攪字，無咩泡泡！

玩左一陣開始天黑同大風，都係返屋企喇！媽咪今日乖乖食左藥，把聲都重係超沙，開唔到聲咁濟！今次隻菌真係勁呀！

幼潛三期 － 第一堂

幼潛上第三期喇，今日媽咪把聲沙哂，可能係尋日湊足Ambrose一日，加埋上兩場playgroup，說話太多嘅關係，今日把聲好難開呀！爹爹今日要返工，又係媽咪湊Ambrose返學，爺爺見媽咪一個人湊Ambrose出尖沙咀咁遠，話陪我地一齊去，有個照應，媽咪直頭想提議爺爺代媽咪入房同Ambrose上堂，不過都係諗，媽咪無要求囉！

今朝一早起身，奶奶已經出左去排隊掛號睇醫生，見排得前，佢又幫Ambrose掛埋號，所以今朝八點幾Ambrose飲完奶之後，媽咪就開始好忙，執埋野碌出去同Ambrose睇醫生先，再碌出去尖沙咀上幼潛。同爺爺出去其實都幾悶吓，因為媽咪同爺爺無咩話題，而且媽咪已經好唔舒服，實在唔太想出聲應酬。媽咪都係第一次同Ambrose搭西鐡出尖沙咀上幼潛，所以到左尖東之後都要望吓搵吓先知邊個出口，爺爺就重誇張，直頭行去客務中心問人，哈哈！雖然搭西鐡比自己揸車無咁方便，不過其實搭西鐡唔使收bb車，真係比搭巴士輕鬆好多。搵啱出口，一路推出去，去到中心門口，又有斜坡可推上，一入中心又有升降機，由屯門家出發到中心，真係全程唔使收車，勁方便！

可能今日係第一堂，所以中心都比較多人同混亂。今次我地上堂都係四樓，不過房號唔同左，估唔到今次間房比上次大，舒服少少。一入房，媽咪咩都無望，只顧放低行季，突然聽到有人叫Ambrose中文全名，話Ambrose高左好多，媽咪好奇一望，原來係第一期嘅詩詩姨姨，真係估唔到呢一期又係跟佢，最估唔到嘅係佢竟然認得Ambrose！

今堂詩詩姨姨俾媽咪嘅感覺nice左好多，同之前板起口面有d唔同！今堂第一個遊戲係開紙包食餅餅，呢個遊戲上一期幼潛已經玩過，係將一粒粒星星餅用紙好似包中藥咁包住，要小朋友自己用手指打開個紙包去攞粒餅黎食，詩詩姨姨話，如果小朋友開紙包係純熟嘅話，可以將紙包用多一張紙包住，等小朋友要開兩次先可以食到粒餅，又可以將一d無餅嘅紙包混入去，務求令小朋友多用手指去撩去開紙包。食野對於Ambrose黎講係一個好好嘅動力，要佢自己開黎食當然係無問題啦，不過Ambrose太為食又心急去打開，佢都有唔小心撕爛左少少紙。詩詩姨姨有問家長有無同小朋友咁樣玩法，大部份家長都無，得媽咪話有，詩詩姨姨問起，我話上期幼潛至玩過，佢竟然突然哄埋媽咪度話可能呢期會有d遊戲同上期一樣，不過佢會不斷調整，媽咪覺得好奇怪，因為覺得呢d野唔需要同媽咪交代，媽咪唔會覺得上期上左嘅遊戲今期唔可以再出現，唔明點解姨姨點解咁鬼祟同我咁講？！

之後姨姨派左一籃衫仔同夾仔，要小朋友運用頭三指力去開夾仔夾衫，姨姨話主要俾小朋友按開個夾，夾衫呢個動作就係媽咪幫手就啱俾小朋友夾到就得。姨姨又問家長有無俾小朋友玩夾仔，無人俾過，又係得媽咪話有，原因係上shining garden一定有碟同夾仔做太陽，所以個個星期都玩囉！雖然話個個星期都玩夾仔，Ambrose開夾仔能力係一般。佢掌握到點攞隻夾仔，但往往都唔識用力按開隻夾，媽咪發現Ambrose唔係好似姨姨咁教用三隻手指，佢通常都係用兩隻手指，用兩隻手指真係好難按開夾仔，只係有時偶然開到，但媽咪又趕唔切將衫仔夾入個夾入面，miss左好幾次，哈哈！姨姨行埋黎睇Ambrose玩夾仔時，Ambrose都偶然開到少少，不過媽咪同姨姨講覺得Ambrose都只係識用頭二指，唔識用埋第三指時，姨姨又無出聲，可能媽咪把聲太沙掛，媽咪都無心機追問，下次有機會先至問過啦！夾完衫仔，姨姨同助手攞左一條繩出黎，一頭一尾攞住，要小朋友响條繩度晾衫仔，不過Ambrose完全唔聽話，一件都無晾，係咁走埋去姨姨度要幫姨姨攞住條繩，攪到媽咪自己扮晾衫，好無聊呀！

晾完衫，詩詩姨姨同小朋友唱太陽伯伯，不過佢做嘅動作同之前張姨姨教嘅有少少唔同。之前張姨姨教太陽伯伯對手都係打開放在面兩邊，今次詩詩姨姨教嘅係將對手高舉做圓形；快d出黎嘅手勢，張姨姨教攤開兩手手指摺上黎就係出黎，但詩詩姨姨教係兩手水平伸出抓入黎。雖然首歌有d動作唔同左，而我地都有一段時間無同Ambrose唱呢首歌，但Ambrose竟然跟到哂全首歌，做足哂所有動作，詩詩姨姨重要對正Ambrose，見到佢做足同做啱哂讚佢，媽咪當然好開心！最後唱bye bye歌，唔知點解Ambrose唔肯坐靚靚，一定要企，唔知係咪佢上慣左shining garden，唱bye bye歌時都係企响度呢？幼潛嘅bye bye歌同shining garden唔同，不過都係要左右擺動個身，唱完歌仔要排隊攞番手冊，詩詩姨姨同媽咪講Ambrose頭先唱bye bye歌動作做得好好，雖然唔係好明有咩好，點解要咁樣抽出黎同媽咪講，好似好特別咁，但媽咪當然照單全收，媽咪好開心，唔係因為姨姨讚Ambrose，而係姨姨真係有留意Ambrose囉！

落左堂出課室，唔見爺爺，媽咪唯有好狼狽咁同Ambrose搵位著鞋，攪左一輪都唔見爺爺，媽咪見夠鐘食粥，再唔食Ambrose晏d瞓左就麻煩，所以雖然地方有d唔就手，媽咪都照餵粥。中心姨姨見到有叫媽咪落三樓餵粥會舒服d，媽咪唔係唔想，不過爺爺又唔見人，媽咪又倒左粥仔，要湊住Ambrose搭升降機落三樓，又要攞住碗粥同bb車，真係攪唔掂囉！唯有人迫迫都照餵住先！媽咪最激氣就係已經同爺爺講左十二點鐘放學，講左幾次，爺爺都可以唔見人！最後爺爺係十二點十五分先出現，見到媽咪時重話咦你地係度呀？食粥呀？媽咪心諗我地可以去得邊度呢？最需要人幫手果時都唔知去左邊，真係！

食完粥仔都係時候返去喇，爺爺要去親戚度，媽咪唔想去，想同Ambrose一齊休息吓，至少在自己家可以hea吓，所以決定唔同佢地去，自己同Ambrose返屋企！媽咪上完呢堂推佢返屋企之後已經無左大半條命，攤左响床唔郁得，Ambrose搭西鐡時已經瞓左一陣，好彩Ambrose真係好生性，返到屋企响房玩左一陣，無扭計要出房。媽咪瞓佢又瞓，重要一瞓瞓左三個鐘先起身，等媽咪都可以休息吓，媽咪都係湊多佢兩個幾鐘等爹爹返黎接力，算係好輕鬆喇！

Playgroup Day Again

呢幾日已經有少少喉嚨痛唔舒服，今朝早醒左重周身骨痛頭重重，但媽咪報左今朝嘅sunkids playgroup，雖然好唔想去上，覺得好悶，但錢又俾左，又係同Wing姨姨一齊報嘅，都係捱埋去，起身梳洗出發啦！

今日Ambrose個schedule又係full左，上下午都有playgroup，又係媽咪獨力湊Ambrose返學，媽咪下次再唔敢一日走兩場喇，實在有點吃力！

準時去到sunkids，今日主題係夏威夷，首先又係做手工，老師派左一條繩，唔同長度飲管粒，已經剪好蘇蘇嘅皺紙。首先係將皺紙捲住飲管粒黎做花花，當然Ambrose係唔識做，都係媽咪捉住佢對手捲好，再要求佢用膠紙貼實。做好幾朵花之後，媽咪要求Ambrose穿花花同飲管粒去做花圈，但Ambrose一向對串野係無興趣嘅，佢唔做，只係好勉強由媽咪手揸繩，佢揸花花就咁串就算，總算都串好條花圈！之後就係出去free play，再入返房扮上飛機，又係有個電視箱搬出黎手動轉相介紹夏威夷，落機又行出房睇玻璃窗。今次係睇水中動物，令人失望嘅係睇左咁耐，都只係有angelfish / sea horse / nemo，三隻咁多！有無攪錯囉！睇完水中動物又行去洗手入房食野！今堂係夏威夷主題，食物係唔知咩椰汁糕之類嘅野，加幾粒菠蘿，感覺怪怪地！Ambrose未食過菠蘿，諗住菠蘿好濕，驚易敏感唔係幾想俾佢食，但Ambrose又好堅持要食，就俾佢食啦，點知佢自己食左都吐番出黎，哈哈！媽咪唯有快快咁幫佢食埋餘下嘅菠蘿，等佢快d食完clean up唔再食喇！最 後 老師派左一塊花布圍住做裙仔，再叫小朋友去攞沙槌仔，小朋友就係咁跟住音樂跳吓舞un吓身，咁又一堂！雖然成堂我都覺得有少少悶，不過Ambrose最後投入咁圍花裙搖沙槌跳舞，又真係幾好笑嘅！慶幸報左兩堂，上埋今日唔使再上喇！

放左學之後，媽咪同Wing姨姨一齊去公園俾Ambrose同雅雯玩一陣，不過今日公園有好多小朋友，而且小朋友重要頭下腳上面向天咁“sir”滑梯，攪到Wing姨姨都皺哂眉，媽咪又唔係幾舒服，所以都提議早d返去休息吓再趕下一場。

Ambrose返到屋企當然又係瞓覺啦，呢一覺係自己醒，真係好，唔使媽咪叫醒咁慘！食完粥換好衫，又係時候出發喇！今堂主題係fridge，一開始係做小手工，係响一個fridge形狀嘅worksheet油顏色裝飾，之後老師俾食物stickers俾小朋友貼响個fridge入面。今堂生字有cheese / egg / juice / fish / coke / cake。又係每樣都有實物或咭仔派，要小朋友試讀至俾，再唱吓生字歌仔，之後輪流出去放入相對袋袋度，Ambrose都放啱哂，亦耐心等待到自己出去先出，好叻仔！教完哂所有生字又係時候混埋一齊小朋友自己取一件自己配對入袋度，可能因為今次fish係公仔而其他都係咭仔，Ambrose每次去攞都只係攞fish去配對，不過佢都放啱哂嘅！

總括今堂表現，Ambrose都有跟歌仔做動作，不過反應唔係好快，而且，佢已經識得踏腳喇！唱bye bye歌時都可以生硬地踏腳拍手say bye bye！

 

食手指

Ambrose成日都好鍾意放隻手入口度食，真係話極佢都唔聽，同佢抆番隻手出黎轉頭佢都係塞番入去，真係無佢符！唔知佢係因為出牙牙痕定覺得食手好得意先至咁做，佢食手呢個問題都令我好頭痛！上親堂都見其他小朋友唔流口水唔食手，點解Ambrose由細到大都有流口水問題，而家重要食埋手，真係唔知點好！

本來已經決定等Ambrose病好之後就同佢試吓寶寶金水，等佢唔好食手，如果可以重順便戒埋奶咀，不過Ambrose持續都病，又要食藥，真係唔可以實行住。但唔知點解，我早幾日突然發覺Ambrose好似已經無食手喇！真係好突然之間發現，唔知係幾時！我好努力諗，Ambrose唔食手係咪因為牙仔已經出左黎唔再痕？定係我用阿喜黎同佢講食手好核突，又臭，阿喜唔食手，Ambrose都唔好食手，呢個係咪阿喜嘅功勞呢？如果係嘅話，阿喜買得咁貴都真係值番哂喎！

DWE Review

買左套DWE返黎唔經唔覺都一年喇！買嘅時候Ambrose都只係六個月大左右，由以前唔識咩係碌咭，只係識搶住咬張咭，到而家可以自己一手一腳去碌咭睇，真係長大左好多！

爹爹今晚特意叫左Flora黎review番我地用套DWE嘅情況，因為我地覺得用左成套系統一年，自己都有少少悶，而之前Ambrose重細，main programme一直都未正式開始加入，而家Ambrose都歲半喇，都係時候review一下，睇吓佢個schedule可以點改吓等我地可以加入新嘅野入去之餘亦用得好少少！

Flora話而家Ambrose好多野都聽得明，係未開口講野，同佢玩左一陣之後，佢話Ambrose好似佢個姪女，兩歲左右就開始不停講野喎！我都希望佢係啦！Flora話而家要教佢自己揭書，揭書嘅定義唔係就咁揭，因為Ambrose一早已經識揭架喇，而係要佢一路聽住隻碟，一路自己用本書跟住揭，一頁一頁去，咁先為之係識揭書！哈哈！聽落都幾難，因為Ambrose唔係唔識揭，有時佢都可以跟到一頁一頁去揭，但有時佢又會好多心咁又揭前又揭後咁，要佢乖乖自己揭唔攪破壞，都幾難！另外，Flora話可以加入少少Step by Step，拉張台俾佢對住部電視，打開本書，等佢一路睇住電視，一路對番本書，呢一part可以同storybook間住咁做，咁就唔使成日都係果幾本storybook咁悶。Flora即場同Ambrose試睇，睇黎Ambrose都幾鍾意呢part咁！

Flora問我地碌咭碌哂所有咭未？哈哈，真係慚愧，因為幾百張咭嘅關係，我地開頭就住用咩分類黎開始碌咭已經花去左唔少時間，試過跟編號，又試過分類，總之試試吓一樣又轉左另一樣，所以開頭開都唔好，成日都兜兜轉轉咁，到真係落實左用分類黎分之後，又成日懶得執咭出黎，一叠咭真係可以幾個星期都唔郁，呢度我地真係做得比較差！Flora建議我地都係分顏色俾佢碌，同之前我地用分類又唔同，所以睇黎我地要再重新執過幾百張咭，又再重新黎過喇！Flora建議我地可以每日都換咭，俾Ambrose有新鮮感，每日唔需要太多咭，五張都夠喇！其實我自己都覺得Ambrose唔係唔鍾意碌咭睇，佢都會好主動去碌咭，不過睇過嘅咭佢又真係少左興趣去睇，久而久之佢又會少番睇咭，佢少睇左又間接令我地執咭動力細左，睇黎，我地都係要勤力少少喇！Flora話Ambrose未識講野，要引佢出聲，所以碌咭機又駁埋個咪仔，錄低我地講野，又引佢對住個咪仔講野，呢個方法都幾得意，不過似乎Ambrose對個咪嘅外形有興趣d，佢一味拉扯個咪，哈哈！

之後Flora又再教我地點用套教材，介紹一d玩法俾我地，其中原來我地有兩盒野係完全未開封，入面原來有ballons，又有唔同人物手偶，Flora話我地可以攞d手偶出黎同佢一齊玩，講故事，角色扮演等等。原來盒入面重有一set圖咭，Flora問我地有無同Ambrose玩認圖咭，我話最近我地有玩影子配對咭，圖咭就無試過！Flora即刻同Ambrose玩，其實係一張九定十二幅圖嘅大咭，一共五張，再有果d圖嘅細咭，攞張大咭出黎，再俾細咭Ambrose搵番一樣放上面。爹爹話Ambrose形狀配對好叻，呢d睇圖放咭難唔到佢，果然，Ambrose好快可以搵啱放好，Flora要增加難度，同時間加入幾張大咭出黎要Ambrose搵啱放咭仔，開頭都幾順利，我都諗呢個唔係好難啫，攞住張咭去搵番一樣嘅圖放上去就係，佢而家係玩緊影子配對，唔係重難咩？！點知玩多幾張之後，問題出現喇！Ambrose攞住一張一朵花嘅咭仔，佢竟然搵唔到幅圖，但佢見到有幅圖係幾朵花，佢唔理三七二十一放左落去，要我地提佢再引佢望另一邊佢先可以放啱！另一張咭係四隻貓仔，佢放落去五隻貓仔度！原來套咭有咁巧妙嘅地方，其實d圖來來去去都係果d野，唔係動物就係花花屋仔咁上下，不過佢地都係一樣樣，所唔同嘅係有時呢幅圖同果幅圖嘅數量唔同，太快望埋去時以為係一樣其實係唔同，一張一張大咭玩時唔覺有問題，幾張大咭放出黎就會好易混淆左！都真係幾好玩！之前我重諗過買類似嘅memory board俾Ambrose玩,，而家原來有呢set野，咁就更加可以慳返喇！呢套野重有度好，就係細咭後面係英文字，例如two flowers， four cats咁，到Ambrose大d識字時，套咭嘅玩法就唔係圖對圖咁玩，而係睇英文放，對答案時只要反轉張咭，圖一樣嘅話就啱，多個玩法，真係唔錯，我又可以慳返唔使再諗呢方面嘅教具喇！

總括黎講，今晚Flora黎同我地review套DWE，真係有d用！

忽然發現

媽咪真係好唔細心，好多時Ambrose嘅第一次都錯過左，唔知佢幾時發生左，好多野都好似變得順理成章咁，到再回想番嘅時候至發現Ambrose朝夕成長！

之前Ambrose已經有想跳嘅動作，但一直都跳唔起，成日都係得個“un”字，又或者十次只係好偶然跳到一次，媽咪一直都不以為意，因為佢真係日日不斷練習，我都見慣見熟。但唔知幾時，Ambrose已經學識左跳喇，明明Ambrose在我眼前跳起，我都無為意，直至佢跳左好幾次之後，我先至忽然發現佢已經跳到喇，真係唔知係幾時嘅事，媽咪諗番都覺得好可惜咁！

媽咪呢幾日都重有好多忽然發現到嘅野，Ambrose已經識得唔使反轉身，正面坐响度落床，比著以前佢一定會仆左响度，但佢而家已經識慢慢就番速度落，直到對腳掂地企穩先行；Ambrose自己可以扶野落樓梯，比著以前佢一定要我地拖住佢先會敢開步；Ambrose已經識得好清楚有意識咁叫“媽媽”；Ambrose已經識每晚飲完奶之後行去廁所要媽咪唧牙膏俾佢刷牙，同時要媽咪一齊刷；Ambrose已經唔再成日放隻手入個口度食；Ambrose已經識得自己爬上爬落成人餐椅度坐；Ambrose已經識得分咩叫大大力“打”咩叫細細力“摸”嘅分別。呢d成長都係媽咪忽然之間發現到而又唔知正確黎講佢係幾時開始，真係失敗！

2011年4月5日

Ambrose今日九點九起身，十一點幾食粥仔就扭計想瞓覺咁，但到俾佢瞓佢又唔瞓，足足攪左成個鐘先瞓著覺，一瞓又成三個鐘，結果，今日可以出街嘅時候都已經係四點幾喇，爹爹返夜，只可以陪我地行一陣咁多！

行經反斗城，都係忍唔住入去，竟然俾我見到平時Vtech嘅ABC Food Fun賣$199今日竟然大特價$159！雖然啱啱我至買左盒fridge phonics，同呢盒ABC Food Fun差唔多功能，但呢盒有多少少function，ABC係stand for唔同食物，入ABC 部機又係雪櫃造型，我覺得比起fridge phonics多d色彩，可能更加吸引Ambrose，而食物字母亦可平時當煮飯仔咁玩都得，見平左成四十蚊，我又忍唔住要買俾Ambrose，最多真係太多太duplicate嘅時候都可放响婆婆度玩麻！Ambrose今日唔知點解瞓左咁多都幾扭計吓，但佢似乎都幾鍾意盒Food Fun，全程都自己攞住唔放！

今晚爹爹返夜，我無地方去無飯食，奶奶去左舅婆屋企，咁見之前舅婆有幫手湊左幾日Ambrose，雖然通常我唔會選擇去佢屋企，今次都去一轉，唔好成日叫親都唔到！不過其實上去就預左悶，所以我都係行完街六點幾至上去等開飯。好彩舅婆家會所有室外遊樂場，爺爺話我前幾年都係住呢度竟然唔知有遊樂場，真係好攪笑喎！咁又係呀，以前只係知有泳池，自己無小朋友又好少落會所，真係無為意！上左舅婆屋企一陣，我地都係借d易落左去遊樂場玩！

唔知點解樓下永遠都係咁大風，好奇怪！不過諗住Ambrose著夠衫都唔怕！遊樂場原來都幾大，以前真係唔知有呢度，其實都好開揚，真係無為意就無為意！Ambrose第一次玩氹氹轉，佢好似都幾鍾意咁，好多叫佢去滑梯玩，佢都唔玩，又走番去氹氹轉度，又要我同佢一齊上去玩，我老喇，轉多幾轉頭都暈埋，佢重不知幾開心咁咯咯笑！玩左一陣，見真係大風，頭都吹都亂哂，Ambrose都好似有少少鼻水，都係拿拿林上番去，費時佢凍親！

點知上到舅婆度佢又開始有d扭計，完全唔知佢想點咁，摸吓佢頭又唔似發燒，但手腳又出奇地暖，鼻水亦開始長流，我諗佢可能真係有燒唔舒服先咁扭計。食完飯已經好想走，因為Ambrose又唔舒服，又未沖涼，我第二日都重要返工，早d走早d返去執埋d野都好夜先有得瞓麻，點知奶奶又話九點半至走，真係一反常態。但Ambrose當然無理九唔九點半啦，佢不斷扭，又扯我要我企身，問佢係咪要返屋企佢又點頭，咁我唯有慢慢同佢著鞋著衫，捱到九點四就叫走人喇！Ambrose都係第一次咁樣叫住我話要走要返屋企咋，我估佢都幾唔舒服吓喇！

平時嘅我一定會打的飛返屋企，不過同老爺奶奶同姨婆一齊，結果都要被迫搭輕鐡，要等車之餘落左車都重要推Ambrose行一大段路至返到去！都唔明點解今次Ambrose咁唔舒服奶奶都好似唔緊唔張咁，重咁夜先走！返得屋企咩都唔理即同Ambrose白白豬都十點幾喇，捉佢食左收鼻水藥食埋奶，好快佢就豬左！

2011年4月4日

今日要同婆婆出去驗眼，睇吓佢對已經差無可差嘅眼重有無得救。Ambrose都有跟我地一齊出去，不過都係我陪婆婆去診所，Ambrose在car seat瞓左，爹爹在車上等佢起身餵粥仔再同佢去行金魚街行。

話番轉頭，去到間診所時出奇地多人，我以為呢d專科又有約期，應該門面唔會多人。登記左之後以為要等好耐，但好快已經有人叫婆婆入去用機check眼。部機同平時出面配眼鏡嘅機大同少異，可能都係初步睇吓視力係點，之後就係戴住特製眼鏡去睇個“Ｅ”字。一開頭一個大“E”字，姑娘問腳响邊，婆婆都講到，之後嘅“Ｅ”字係細d，婆婆已經答唔出，姑娘用片遮住一雙眼要婆婆由個孔望出睇吓會唔會清d，但都唔得，試左一陣，除左第一個大“Ｅ”字婆婆係睇到之後其他都攪唔掂，姑娘直情都放棄，直接走到婆婆尺幾兩尺前嘅位置，舉起手指問婆婆睇到幾多隻手指。估唔到嘅係，即使咁近距離，只係睇有幾多隻手指，婆婆都唔係可以快而準咁講到，重要係有d錯左，明明只得一隻手指佢答左兩隻。雖然好明白婆婆雙眼視力好差，但萬萬都估唔到連咁近咁簡單嘅測試，婆婆都fail左，我在一邊睇到咁樣，個心都好實，點解可以咁差？婆婆平時自己行出行入買餸煮飯一手包辦又係用左幾大努力得黎呢？自己果幾百度近視唔戴眼鏡又算得咩野呢？面對住眼前嘅婆婆，心裡面好明白呢次睇醫生，結果係點對佢真係好重要，雖然唔想佢有太大期望，卻又唔忍心不斷打沉佢，真係好矛盾！

姑娘驗完眼之後，好快就見得醫生喇！醫生好驚訝點解婆婆對眼可以退化到咁，我地講番太婆有夜盲症遺傳到婆婆同大姨婆都有，而近年另一個表舅父都發病重有白內障啱啱做左手術，算係有家族歷史！一直以黎我見婆婆視野範圍都好窄，視力集中在中間，問婆婆佢又答唔出自己對眼有咩病，上網睇一直都以為佢係青光眼，但呢個醫生話婆婆唔係青光眼，佢眼壓無問題，係夜盲症令視力退化，已經退化到好差，而且就住黃斑點視力退化其實無得醫，而家雪上加霜嘅係視力已經差之餘，雙眼中間都有白內障，佢形容眼睛係一片透明晶片，白內障就會令呢塊透明晶片變濁，本身唔清嘅野就更加矇矓！醫生即時寫紙到樓下另一間店度眼，其實唔知度咩，不過佢話如果可以做手術，做埋呢個test就可以順便度埋孤度配晶片喎！

度完眼又攞番個report上醫生度，醫生就同婆婆講手術係可以做，只不過係就住白內障呢part改善視力，即係話，本身婆婆視力已經差，果d係無可挽救同改善嘅，但白內障問題係可以將原本混濁嘅晶片換番塊透明嘅，咁樣可以幫到佢睇光少少同清少少，如果話佢以前只可以睇到一尺內嘅野，可能做完手術之後都只係可以睇多一尺，以前可能連夾餸都睇唔到嘅，做左就至少夾到餸，手術唔係幫佢重見光明，但至少可以幫到少少，睇多少少，睇清少少！我相當明白婆婆對眼唔會有好番嘅一日，但對於醫生肯定可以做白內障換晶片手術都不無欣慰。因為婆婆以前不斷在政府覆診，到後期醫生話佢無得醫，索性唔使佢番去，重同佢講佢嘅白內障生响視網膜中間，無得攪，攪到婆婆一直都無話我地知佢有白內障。係大姨婆响政府做左手術真係睇清左少少，而表舅父最近又在私家做左白內障手術，先至激發婆婆走去私家度驗吓聽吓第二d醫生講咩。我問醫生點解佢咁肯定婆婆可以做白內障換晶片手術而政府又話無得醫？佢話政府資源有限，婆婆對眼無白內障都已經係差無可差嘅視力，白內障只係雪上加霜，對於政府有限資源黎講，同婆婆做左手術唔會改善到d咩野，唔係由無變有嘅問題，只係由無變為差唔多無，政府根本唔會花資源做呢d手術，所以話無得醫，而其實在某d人心目中，睇清少少睇多少少，係比以前好嘅，已經係好開心，覺得值得做，所以唔係做唔做到問題，係值唔值得嘅問題！聽到呢度，唔使諗都知道婆婆一定好想做，我明白，睇得幾多得幾多對佢黎講真係好重要，如果能力負擔得起的話！問明左診所做手術一隻眼收萬五，醫院係二萬九，價錢真係差太遠！好彩婆婆明白醫院做貴左都係醫院收費，所以佢都唔介意在診所做手術！不過咁大件事，我地都唔係即時confirm話做就做，都要同公公傾吓至得！

攞藥嘅時候，姑娘又話醫生recommend做左眼先，我地好奇怪，因為以為一做就做一對眼，一來打理都一次過麻，二來又唔使出去兩次，姑娘答唔到我地點解，其後又安排左我地入醫生房再講過。醫生都好坦白咁話婆婆對眼視力好差，白內障手術只係將佢濁左嘅晶片換清左，番黎嘅視力就係婆婆自己本身嘅視力，做左手術係清少少光少少，唔係睇番好多野，佢叫我地試左一隻睇吓個效果係咪咁理想先，始終一隻眼都要成萬五蚊，如果做完先覺得唔係自己心目中咁樣，覺得做同唔做都差唔多，咁不如做左一隻先決定花唔花錢在右眼上面，呢個係從經濟角度去考慮，我都覺得好有道理，如果做左都係覺得差唔多，又何苦再俾錢受多一刀？呢一點我都不由得覺得個醫生都幾有醫德，真係好坦白！

出番黎會合左爹爹同Ambrose，買左個魚缸仔同幾條魚仔，算係兒童節禮物又好咩都好啦，反正都係爹爹比較熱衷想買，要搵一個好好嘅理由去買！食埋飯我地就送番婆婆返屋企喇！Ambrose又响car seat度自己瞓左，呢張真係神奇car seat，Ambrose次次坐上去一陣就已經問攞咀瞓覺！返到屋企都未醒，我地放低左Ambrose俾奶奶睇住，兩個人出左去吉之島行街街。今日終於都的起心肝買左個門欄，用黎欄住廚房門，唔俾Ambrose再入去爬櫃桶喇！佢而家除左可以踩住櫃桶柄上，重可以打橫爬過另一個櫃桶柄上，單手扶住另一隻手去摷野，見到佢咁雖然覺得好得意，但廚房實在太危險，真係唔可以下下睇到咁實，萬一佢攞起玻璃跌落地又或者攞到熱湯，真係唔知有咩後果，為左安全，呢個門欄真係唔可以慳！爹爹成日話買個門欄唔俾Ambrose入廚房，佢無得入去爬好似好慘咁，重話加左個門欄Ambrose一定嘈嘈斃。我地買完門欄返去Ambrose都竟然未醒，重要set好哂Ambrose先起身，佢對於多左個門欄嘅反應又唔係好大喎，無話扭計要搶住入去，都係企左响門欄外望望吓，我諗可能因為個門欄係鐡枝佢都可以見到我地响廚房做咩佢先無扭計，如果係膠果d一塊過遮多d嘅話，可能佢又無咁好反應，哈哈！

By the way，今日想買埋個廚房組合俾Ambrose，點知無貨，真係整定我地唔使買咁！

太嫲九十大壽

今日太嫲九十大壽响黃金海岸酒店擺壽宴，等埋Ambrose瞓醒晏覺，全家四點幾出發接人攞餅同到會場。原以為自己都叫早到，點知去到已經有人打緊牌，有不少親友都到左閒聊緊，重諗住人唔多嘅話再揸車出返去市中心行街街添！

好彩我地醒目，一早幫Ambrose攞埋佢架單車仔黎玩，唔係真係咁早去到等到八九點先開餐都唔知有咩好做。其他親友見到都話早知攞埋單車黎玩，攪到Ambrose架單車成日都俾其他小朋友虎視眈眈，哈哈！黃金海岸酒店呢期做緊鴨鴨主題，所以大堂放左隻大鴨出黎，引得Ambrose爬入去大力拍，好興奮！不過隻鴨有野欄住，所以要係咁捉番Ambrose出黎，又好難同佢同隻鴨影相，真係可惜！

之前我見黃金有個幾大嘅playroom，好似幾好玩咁，見今日有幫襯，就膽粗粗入去睇吓可唔可以玩。點知一入門口佢有個area有哂軟墊，地方唔大但幾啱Ambrose年齡玩嘅地方，佢話係要酒店住客先可入去玩，其他設施係可以自由玩，眼見前面有波波池同tunnel爬黎爬去嘅大型設施，重諗住發達喇！點知一行埋去有個牌寫住$50半小時定十五分鐘，原來自由使用係要收費嘅，怪不得咁大間playroom一個人都無啦！知道要收費我地就梗係唔玩啦！我記得酒店應該有室外遊樂場，因為之前我上網見過有諗過join member任玩，只係我未見過個遊樂場啱唔啱玩，所以無join到，趁今次黎到，順便望吓都好！行番去酒店問人，有個好心人同我地講一個室外遊樂場响泳池隔離，係細d嘅，另一個係收費嘅，大d同新起嘅，唔知點解佢係咁叫我地去呢個收費遊樂場，重話無人理可以照入去玩，呢個職員都有少少奇怪，不過佢咁講到，當然我地都走左去試一試啦！

沿海邊行到酒店尾近商場位，果然有一個比較大嘅遊樂場，入口有圍繩欄住但無人看守，我地誇欄而入，唔理咁多喇！裡面有一幾大型同特別嘅爬架，我走埋去試爬都覺得有少少奇怪，唔知點爬好，而且好明顯，呢個爬架絕對唔啱Ambrose！見到有條好幼嘅滑梯，兩邊都無得扶，條滑梯都算又高又斜，我爬左上去之後坐低“sir”，發現pat pat重濶過條滑梯，兩邊無野扶，“sir”落黎果吓都幾得人驚！都唔知點解咁窄咁危險，小朋友點玩呢？

行過去有另一個滑梯組，呢個都叫好正常啱細d小朋友玩，而佢中間係好攀石牆咁，唔係幾高，幾得意！滑梯組附近係一隻好大嘅船，驟眼睇以為係俾人坐吓休息，點知上到去坐嘅時候先發現係搖搖船，一路“un”架船一路搖，啱哂d小朋友，盡情放哂d精力狂“un”呀！再過少少就係兩個鞦韆，不過係軟膠一塊加兩條鏈果種，Ambrose都係未啱玩，咁我唔客氣自己又玩埋一份！鞦韆後有條一長長幼幼嘅平衡木，都幾高吓，爹爹走上去行，只見條平衡木係分幾節，佢一路行每節平衡木都會變得高低，向上向下斜，望落幾驚險，我又忍唔住玩埋一份，真係幾高吓，我要爬上去先得，唔知同重量有無關係，我一路行又唔覺得條平衡木有高低，好似無改變到斜度咁，好easy，一d都唔驚險，有少少失望！玩完呢個見有幾朵花型高椅，坐上去之後朵花會自動轉，張椅有少少暗斜，轉動時就感覺到，而且朵花係會越轉越快，攪到大表姐叫哂救命，好好笑！呢個設計真係幾得意，我都係第一次見！再行返去個大爬架，真係唔係幾好爬，即連大人如我都覺得有d地方都幾高，如果小朋友自己玩大人睇住都幾驚！爹爹忽然行左去個幼滑梯後發現滑梯頂有指示點玩，原來之前我就咁坐上去夾埋對腳“sir”係錯嘅，條滑梯係要張開腿夾實條梯“sir”，怪唔得知條梯幼到連個pat pat都好似坐唔落啦，知道左之後真係笑死我地！爹爹同姑丈忍唔住自己走上去玩，當然表姐們見到又要爬上去玩啦，Ambrose見到又話要玩，唯有抱佢上去，爹爹同姑丈一左一右扶實佢“sir”落去啦，笑到Ambrose騎騎聲，估唔到平時唔多吼滑梯嘅Ambrose都咁enjoy！不過綜合黎講，呢個遊樂場都唔適合Ambrose玩，要比錢join member真係可以免喇！

玩完一輪好快天黑，又係時候入番會場，黎番d大合照，食吓粥仔抖吓喇！今晚最尾一道餸係壽包，大碟上有一個超巨壽包响中間，側邊係中型壽包圍住，而原來中間超巨壽包係一個殼，打開佢入面有好多細壽包仔，好得意架！主家席果碟，碟邊重有一條木枝，上面再放有超迷你壽包，寓意四代同堂，好鬼別緻！吸引左好多人去主家席睇同影相。爹爹忽發奇想將超大壽包殼“cup”左落Ambrose個頭度，超好笑，好似頭盔咁，加埋Ambrose個傻樣，唔知發生咩事，點解有舊野响個頭度嘅？！爹爹重嫌個殼孤度唔夠深“cup”得唔夠好，佢重用手抆走包殼入面嘅包整深個弧度，一“cup”果然真係啱啱好，超爆笑！不過呢度都未算，最笑到標哂眼淚嘅係，因為個包殼被抆過嘅關係，有好多麵包粒甩哂出黎，Ambrose一抆走個包殼之後，成頭頂都係白色麵包碎粒，好似成頭頭皮咁，真係笑到彎哂腰呀！爹爹真係大整蠱呀！

飲宴關係，今晚都成十一點先走得，Ambrose已經好攰喇，平時佢都已經瞓左，所以爹爹雖然要送太嫲返屋企，中途都放低左我地，好等我地可以趁Ambrose仲未瞓著極速同佢白白豬，當然，最重要係洗頭啦！

 

Playgroup Day

媽咪幫Ambrose安排上幼潛係想訓練佢大小肌、手眼協調、五感以及social skills等等，但因為幼潛係以中文上堂，媽咪又好貪心想Ambrose有多少少機會接觸英文，所以媽咪一直以黎都係安排幼潛加英文playgroup星期六日上堂，好似又有自身嘅訓練又有學術少少嘅體驗。英文playgroup一直都係上開shining garden，貪佢近近地，有朋友仔上過話好，自己上過環境唔錯，上堂雖然成日都係重覆唱某d歌做某d野，不過老師同環境俾媽咪嘅感覺一直良好，所以都無諗住要試其他playgroup。

不過Wing姨姨之前話sunkids幼稚園有playgroup上，而個playgroup係外藉老師lead住，比起shining garden係中 國人 老師講英文，又好似幾吸引咁，見價錢唔係貴，都係百五蚊一堂，加上係星期六早上時間，啱哂我，四月份有開放日同復活節假嘅關係，成個四月得兩堂，所以媽咪決定同Wing姨姨一齊報四月班，上兩堂當trial試吓比較吓都好麻！

終於等到四月來臨，今日Ambrose個schedule係full左，上下午都有playgroup，而咁啱爹爹又係要返工，所以今日都係靠媽咪獨力湊Ambrose返學。今朝playgroup係十一點半，打的去嘅話都可以二十分鐘前出門口，媽咪就諗住同Ambrose早少少食粥，食左野媽咪就唔使攞太多野出街，可以輕裝上陣。點知今日Ambrose都瞓得晏，成九點幾先起身，飲奶嘅話出左去上playgroup後又要趕返黎食粥咁，見佢起左身又無話扭飲奶，媽咪就無開俾佢飲，同佢刷左牙，玩左一陣，直接餵粥仔佢食就算，好彩佢食粥都無扭，照單全收！食完粥媽咪就開始執野同埋換衫，等埋Wing姨姨過埋黎就出發，時間真係啱啱好呀，Wing姨姨一到，Ambrose同雅雯玩左一陣就出門口搭的士，不慌不忙，唔錯！

準時去到sunkids，估唔到佢個入口咁細，我以為佢間學校好大，連門口都應該幾大吓，點知唔係！一入去小朋友唔知點解唔使除鞋，但大人就要著鞋套，有d奇怪咁！細路仔d鞋都可以好污嘈架喎！推入玻璃門，外藉老師要求各人去洗手間洗手，我見有分男女廁，都好企理，同埋個洗手盆係小朋友高度，距離唔遠，又係彩色紙皮石舖出黎幾靚，印象唔錯！洗完手入課室，見有三張圓台仔有矮椅，好隨便就坐低左，一個外藉老師同兩個助手齊齊企响出面，其實個感覺好odd，好似真係上堂咁，我無心理準備playgroup係咁上法，加上大人坐矮椅再望出去睇住企起度嘅老師，其實都幾辛苦囉！所以呢度感覺麻麻地！重要一開始外 籍 老師話今日主題係Africa，首先要做手工，係用兩個舊廁紙筒用顏色紙同玻璃紙包好痴埋做望遠鏡，然後用白紙碟開孔再用貼子顏色筆裝飾再加一條繩做帽，不過佢全個製造過程都係企响出面一路講一路係咁易示範，其實媽咪覺得小朋友一定跟唔到你講咩做咩，佢重係將兩個手工做法一次過講哂先開始做，媽咪覺得好似有d急進，似係講俾大人去做多d咁，又係扣分嘅地方！兩個助手開始派發材料，媽咪一路自己揸實Ambrose對手係咁捲，又要去攞膠紙要求Ambrose幫手痴，不個成台有三、四個小朋友，膠紙先得兩卷，捲得黎個膠紙座又去左唔知邊度，又要去飛象過河攞番黎，媽咪覺得有d麻煩囉，係痴到後期先至派到每人一個膠紙座用咋！膠水又係喎，用用吓枝膠水又唔知俾人攞左去邊，真係整到火都黎埋！响做手工期間，外藉老師都無行過過黎睇，媽咪就覺得有d無聊，又唔係話好鍾意做手作野，又要同阿仔一齊做，其實就係自己做多！做完手工好似係聽吓歌仔係咁易叫小朋友起身郁吓跳吓舞咁，又唔係特別活躍，又無咩動作，媽咪又係第一次聽，跳完都唔知咩事咁！都唔記得係手工前定手工後無啦啦行出去課室外又話free play五分鐘，但果度有d軟墊又話要除鞋玩，真係麻鬼煩！再之後課室入面排左兩行椅子係扮搭飛機，椅上係有條seat belt，其實都係一條普通有扣嘅帶，坐左上去扣好就話搭飛機去Africa，期間外 籍 老師同助手搬黎一個電視紙箱出黎，再用圖片人手去轉動介紹番Africa嘅少少資料，之後就解開seat belt行出課室外扮落機。課室外一個大玻璃窗，上面有d手繪公仔，呢個時候外藉老師就叫我地睇住個玻璃窗，原來入面個助手攞左d動物公仔圖片再用長飲管(定棒？)痴實舉高露d動物出黎行行吓咁樣，外藉老師就在旁介紹，Ambrose見到動物當然又係好興奮啦，雖然媽咪覺得有少少悶，不過見Ambrose鍾意都覺得ok嘅！睇完動物，其實都唔知個外 籍 老師介紹左d咩，真係得個睇字，唔係動物嘅話都唔知會點，哈哈！睇完又話行去洗手入房snack time，都唔知佢地有無抺番乾淨張台，因為媽咪之前搽膠水都整到張台有，又覺得d助手完全係無咩效率同投入咁，都諗住唔掂張台架喇！因為係以Africa為主題，外藉老師話snack time食物係salad，老師畢好在碟上俾小朋友自己mix當係做salad，講真，咁細個小朋友媽咪都唔expect可以點整salad，但用個碟黎叫小朋友用spoon或者fork去mix salad，咁真係擺明玩野囉，佢地一叉一mix，果d生果都唔知飛左去邊啦，媽咪心諗好心俾隻碗仔扮mix啦，重要枝叉鬼咁大枝好難handle架麻！食完salad都差唔多落堂喇，唱埋bye bye歌就走得，臨走時媽咪問其中一個助手有無成人洗手間，佢竟然要走去問其他人先答到媽咪，真係扣哂分呀！

總括黎講，媽咪唔太鍾意呢度，雖然個環境都幾新幾乾淨，出面玩嘅地方幾大，不過唔係上佢幼稚園都應該唔會點用到佢其他設施，所以都無咩關係。媽咪主要唔多鍾意成堂都要行出行入，好似好活動形式，但其實老師同學生之間少d亙動，唔知呢d係咪叫活動教學呢？另外，媽咪覺得Ambrose未去到上呢種playgroup嘅階段，因為佢都未有咩英文底子，外藉老師係以正常速度去講英文講解，媽咪覺得對於太細小朋友黎講係可以慢少少等佢地易聽d，同埋唔使一連串介紹d唔知咩資料出黎，可能對於三四歲有少少英文底，又自己會做手工嘅小朋友黎講會啱d，加上成個感覺係好上堂feel，老師同助手嘅投入情度真係幾一般吓，所以媽咪上完呢一堂之後已經別無他想，一心都係諗住繼續shining garden就算喇！

呢個就係Ambrose有份做嘅望遠鏡同帽喇！

放左學之後，媽咪同Wing姨姨一齊去公園俾Ambrose同雅雯玩一陣，可能係中午時份，天氣都幾熱吓，Ambrose唔係好玩都頭髮仔濕哂，所以玩得一陣媽咪都頂唔住要走喇！上左的士，Ambrose竟然要咀，媽咪諗住佢下午要上另一個playgroup一定要瞓一覺，所以即使係搭車途中都照俾咀佢，以免佢返到去未瞓又唔願瞓就大件事，點知Ambrose可能出左一身汗好攰，一食咀就瞓著左，可憐媽咪我要抱住佢上樓，好彩Wing姨姨叫司機停正樓下俾媽咪落車咋，唔係真係腰都斷呀！

Ambrose呢一覺一定瞓得好甜，因為媽咪同佢除埋條褲仔瞓，爽爆！不過時間差唔多都要叫醒佢起身食埋野上shining garden，媽咪都有d唔忍心！瞓到懞鬆鬆嘅Ambrose其實好可愛，眼仔細細又四圍望，好似好似想再瞓咁，但又無扭計俾媽咪叫醒！

上堂因為去左長隆玩所以無上一堂，今堂上番Ambrose似乎有少少陌生左咁！今堂一開始係做小手工，只係响一個doctor kit形狀嘅worksheet不斷蓋印裝飾,其間同其他小朋友交換印仔再印，之 後 老師俾左doctor kit入面嘅工具如膠布、mask、探熱針等嘅貼子，俾小朋友貼响個doctor kit入面，好簡單，而且又啱Ambrose年齡做，媽咪又覺得輕鬆！

今堂嘅hello song係新歌，唔同平時唱開果首，Ambrose就更加陌生，坐定定望實老師唱唔郁唔做動作亦都唔“un”身。唱weather song係一樣，不過可能未瞓醒又陌生左，唱埋新hello song再黎weather song，Ambrose都已經唔係好有反應喇，重要係平時如果sunny day，係用夾同膠碟夾個太陽出黎揸住行住唱歌仔，今日又轉左用神奇畫板畫個太陽出黎再揸住行住唱歌仔，硬係覺得怪怪地咁，Ambrose都唔算投入，只係行住唱歌仔可能比較輕鬆，都叫有少少反應！

今日主題係doctor，生字都幾深，有mask / thermometer / syringe / stethoscope，後兩個生字媽咪都唔識讀，都係靠老師教學埋一份，自己都讀到繞哂口咁！又係每樣都有實物或咭仔派，要小朋友試讀至俾，再輪流出去放入相對袋袋度，Ambrose都可放啱，無錯亦耐心等待到自己出去先出，好叻仔！教完哂所有生字又係時候混埋一齊小朋友自己取一件自己配對入袋度，Ambrose都無問題，睇黎佢開始明白呢個遊戲係點玩法，不斷攞野去入啱袋就攪掂，真係比佢第一二次玩唔攞唔行只係睇有進步！

最後當然又係worksheet時間同snack time時間，再唱埋bye bye歌攞番哂worksheet 同doctor kit就落堂喇！媽咪又係同Ambrose去tea一tea再到婆婆家食飯啦！

DIY影子配對咭及顏色咭

好耐之前無意中在cannon的website見到有好多唔同printings俾人free download，全部都係手工野，有年曆、相框、心意咭、立體公仔、節日accessories等等，係一個唔錯嘅網！Ambrose生日在家攪左嘅生日會banner同皇冠都係呢度出品。其中裡面有少少educational教具，係動物同蔬果嘅影子配對，媽咪梗係一早download同印左，不過見未係時候用，一路都唔開始製作，直至最近見Ambrose玩手抓板咁叻同咁有興趣，已經諗起呢兩套影子配對咭可能已經啱玩，加上幼潛姨姨有一堂又係玩影子配對板，唔同嘅係真身係一分為二嘅拼圖板，影子係一塊過，再加上早幾日意外發現Ambrose竟然以蔬果磁石板入圖，媽咪諗Ambrose真係可以根據唔同圖形進行配對，唔係單單焗限於簡單圓形正方形三角形嘅線條，而係進步到去配對比較覆雜嘅線條喇！

與此同時又有朋友仔淘寶團購玩具，媽咪見到都有類似嘅影子配對木玩，不過全部都係公仔，媽咪一來唔想要太公仔嘅配對，好似無左d真實感，二來又覺得影子配對玩具真係只玩一陣咁多，因為無其他變化，唔可以用黎做其他用途，一盒木玩都唔輕，要找地方收藏又好煩，媽咪都係決定唔買木玩，就以cannon呢兩套影子配對咭試一試，睇吓Ambrose有咩反應先再決定值唔值得再投資，都只係用紙印好再過膠，成本都係幾蚊一set，玩到唔玩掉左都無咁赤麻！再唔係真身果張有埋生字，都重可以做生字咭，比起木玩又好似多一個用途，最重要係佢嘅圖片唔係公仔，好理想丫！

就係咁，媽咪將之前已經印好嘅影子配對咭剪好過膠，好興奮咁又同Ambrose試玩。首先係蔬果先，將影子全放出黎，再逐個俾個真身佢去搵影子，估唔到Ambrose都玩得唔錯，其中pumpkin同onion個影就有ｄ難，可能因為兩個都係橢圓形咁上下，係有少少凹凸位，但成個形狀都唔係太多突出位，媽咪要同Ambrose講onion個頂係洋蔥頭有開叉，而pumpkin係咩都無，佢至識放。不過又好攪笑喎，之前塊磁石生果入面嘅pumpkin係有“訂”嘅，同呢個有少少唔同，媽咪覺得要再搵一個好d嘅描述教佢點分，唔係只係睇有無“訂”有無開叉，不過媽咪暫時未諗到，哈哈！之後再玩動物嘅影子咭，Ambrose玩呢一set係明顯反應快d，連平時我地好少會教佢嘅鷹、蟹同企鵝佢都配到，反而係入面嘅天鵝同鴨就有d難度，唔知係咪張咭係白咭，兩隻動物個身都係白色，成個圖像望落唔係幾清晰呢？媽咪已經好努力咁教，天鵝係長頸無腳嘅（幅圖係坐左响度無腳架），而鴨頸係短d同有腳，Ambrose經提點之下都可以配對番。另外係海豚同鯨魚，可能大細都係差唔多，魚身彎法有些微唔同，配對影子好似有d唔順，開初Ambrose係可以配對到海豚，但再俾鯨魚佢配，佢搵唔到，又走去揭番起條海豚想放鯨魚落去，又覺得唔係幾啱，媽咪又係要提佢有咩分別再引佢望其他位先搵到！不過第一次玩呢套咭都叫唔錯，估唔到不知不覺間原來Ambrose識咁多野，有時都唔係好明點解有d野我地都無教佢唔知點識？就好似呢set影子咭咁，我諗Ambrose都未識咩係影子，但佢都可以睇圖搵番個影出黎，真係唔知佢點樣學番黎，bb真係好神奇呀！

媽咪之前睇其他人嘅blog，又自製左一set顏色色板，其實都只係將唔同顏色嘅色紙貼左上白咭度再過膠，一隻色兩張。見手抓板都玩得ok又轉吓玩法玩咭仔睇吓Ambrose其實係識配對色定只係認到塊板嘅位。將一set顏色咭放响Ambrose前面，媽咪將另一張顏色咭逐一俾Ambrose睇，要佢搵番相同顏色咭出黎俾媽咪，Ambrose都無負媽咪期望，好快咁攞到俾我，完全無猶豫，好叻！再轉個玩法，媽咪將所有色咭放哂响Ambrose前面，教佢將顏色相同嘅咭一pair咁攞俾我，開頭佢都唔係好知我做咩，不過我示範左一次佢就明白，又將一樣顏色嘅咭，兩張兩張執起叠一叠再俾我，咁樣轉左玩法Ambrose似乎未慣，佢都要多少少時間完成，無之前俾佢睇再去搵一張咁快囉！不過Ambrose都可順利完成。

媽咪覺得自製教具真係唔錯，又平，玩一陣唔啱玩嘅野下下要買都好浪費架麻，而且可以做到一般玩具做唔到嘅野，至少媽咪每次放嘅位都唔同，Ambrose根本唔可能記位而識，佢係真係識，真係幾靈活！不過搵free download教材教具都唔係易，媽咪要好俾心機先搵到一d啱心水而好用嘅DIY教具，真係要走訪唔少其他媽咪嘅blog先至睇到改良到，媽咪真係要努力努力喇！