唔經唔覺，Ambrose自己揸筷子已經好幾個月喇！以前出街，都一定要帶兒童筷子、食物較剪俾佢，唔係好重嘅，不過都一定要記得帶囉！自從Ambrose自己揸筷子之後，媽咪已經無再自備私家餐具喇，都係用餐廳提供嘅餐具就算。雖然Ambrose唔係下下都一下夾到，但佢至好係唔怕煩，夾到夾到為止。滑如冬菇，佢都應付自如！而家出街真係可以咩都唔帶都得喇，好方便！
早排至為Ambrose未能讀書認字而煩惱，但當每次見到Ambrose嘅自理能力，例如早已全面戒片、自己揸大人筷子、食野從來唔需要餵等等，又覺得有點點安慰。
上星期無啦啦有幾日廸士尼有Annual
Pass優惠，用Annual Pass購物有六折，仲平過員工優惠六五折。本來媽咪都無咩特別野想買，但得知原來廸士尼有Lego賣，立即心癢癢想買俾Ambrose，奈何又無時間去買！好彩Kula入去血拼，幫媽咪買左幾盒Cars Lego，真係唔話得！咁多盒加埋都係$400，抵呀！
有一日，媽媽見Ambrose响檯仔埋頭畫畫，見佢畫左個女仔出黎，問佢，呢個係邊個黎架？佢竟然話係嫲嫲，嘩哈哈！嫲嫲即時話，紮條瓣咁青春，唔係佢黎喎，Ambrose好堅持話係，仲指住對耳環，話嫲嫲有耳環！唔知點解而家Ambrose畫女仔，好多時都會畫高踭鞋，實情係媽咪唔會著，嫲嫲亦唔會，究竟佢點會知道有高踭鞋呢樣野？同埋點解係女仔先會著呢？好奇怪！
一直以來都知道Ambrose對認字無咩興趣，亦都唔係好認到字，淨係簡單嘅A-Z / 1-10，都係上到K1先至算係認多左，好熟悉一定說不上，只係比之前好少少！當時下個個小朋友都一歲開始認字，兩歲未夠已經認到哂呢d基本字，三歲就話認讀到生字，甚至開始可以睇書嘅時候，媽咪內心點會唔著急呢？但明顯地Ambrose對文字仍未有興趣，亦未敏感，深知勉強要佢認字，只會事倍功半，更可能引起佢嘅反感，亦因為媽咪嘅懶，一直無教Ambrose認字。返學可以學到幾多，認到幾多，就由得佢，媽咪唔想自己勞氣教字又未必有結果，反而傷了母子感情，唔抵！反正，其實認真d去諗，Ambrose也只不過剛剛三歲半而已，呢d學術上嘅要求亦未免過高，與其花時間心機去教認字，倒不如趁佢對畫畫手工有興趣，就多花時間同佢玩呢d，學術麻，可以預期讀書路漫漫，日後只會更花時間，其他興趣嘅野，而家唔做，日後可能只會更少時間可以做！呀Q一d諗，暫且俾Ambrose多少少時間有快樂童年吧！
二月見過家長後，出奇地見到Ambrose可以做到份評估考卷，真係有d匪夷所思。媽咪一直都以為佢中文只係認到「小」字，原來佢都仲認到好幾個其他字，只係佢唔講，媽咪唔問，所以唔知道。唔知係咪家長日嘅原故，爹爹突然又對Ambrose嘅學業有d著緊，當媽咪話Ambrose對文字無咩興趣，未到文字敏感期時，爹爹就會話咁有無試過教過？無教當然唔識！呢種情況唔係第一次發生，每次唔知幾時佢會突然抽起條筋，表現對Ambrose學業嘅著緊，以上對話必定出現，每次也教媽咪氣難平！咁講其實係咪指媽咪唔教所以Ambrose唔識？咁如果係咁嘅話，爹爹係咪應該自己去教，「證明」俾媽咪睇，原來只要花時間教就一定有成果？也許係媽咪自己對號入座，將這樣一句說明歪曲成對自己嘅責難，但這也是媽咪真心的覺得意思就是媽咪的「問題」。一直以來，都係媽咪負責Ambrose學習上嘅野，上至安排playgroup同興趣班，下至做功課、workbooks、玩訓練小肌肉嘅玩意，畫畫手工玩貼紙、甚至買咩玩具等等，有邊樣唔係媽咪去搞？有邊樣唔係因應住佢嘅發展需要而去做？爹爹呢？佢咪主力同Ambrose出街踩單車、游水同玩囉！如果咁睇，爹爹呢一句無人教所以唔識，係咪可以理解成係媽咪無教呢？
只想講，有時媽咪都會很累，都會很氣餒，無心機去教一個根本對文字無興趣嘅仔去讀書識字，亦都唔識去教個仔點去容易d認到，所以一直也放著不理，心裡面不著緊嗎？點會唔著緊？！但，可以點呢？當一個小朋友每次打開本書未等人講完果頁嘅字就不斷指住圖畫問左問右越問越遠嘅時候，可以知道佢對圖畫嘅興趣及求知慾遠遠地大於文字，作為媽咪嘅對於佢某一方面嘅落後，雖然著急，但還是可以容忍的！教養孩子，本來就是一門學問，面對現實環境嘅強勁競爭，對學業上嘅著緊無可厚非，學業上能夠跑在起跑線上當然很好，如果資質上不容許，亦是沒辦法的事。況且，除了學業，三歲半的人仔亦應該有其他更重要的要去學習，例如自理、脾氣、社交技巧等等。對於Ambrose其他方面嘅發展，如大小肌肉、自理能力，媽咪可以從不同方面得到肯定；Ambrose對於繪畫嘅興趣及能力、對小提琴嘅興趣暫時亦可以話比上不足，比下有餘，對於如此進程，媽咪已經很滿意了！學業上若有驚喜，當然更理想；沒有的，媽咪亦很心足！教麻，還有少少時間，玩埋K1先，K2認真開始吧！
二月份請左一堂假，又撞左一堂過年，停左兩堂畫班，今日終於又可以返畫班學畫畫了，Ambrose好興奮！之前一直都同Ambrose報綜合班，即一星期畫畫，一星期手工，諗住一來可以多元化d，又可郁吓手指練吓小肌肉。不過由於見Ambrose小肌肉其實都唔錯，而手工班往往都係輕黏土手工，成品又看似較簡單，加上媽咪覺得Ambrose對畫畫好有興趣，好多時都要爹爹媽咪教佢點畫，爹爹媽咪資質有限，咁不如俾佢多集中學畫畫，所以今個月開始，Ambrose開始轉上純畫班了！
今堂可能是初八，都係新年頭幾日，老師教小朋友畫蛇！本來見上一班嘅小朋友响畫薄上畫蛇，放學出來時見到仲估係龍、蝦等等，點知最後發覺係蛇，真係好好笑！唔知係咪老師見到效果一般，所以到Ambrose上時，佢就轉而用畫紙撕開一半駁長張畫紙黎畫蛇，咁個效果好好多，起碼唔使打哂蛇餅以為係其他動物，哈哈！
開頭都無為意，以為條蛇脷係開叉，後來老師同媽咪講，Ambrose要佢條蛇有兩條脷喎，古靈精怪，再望吓其他人的，果真原來只有Ambrose嘅蛇有兩條脷，哈哈！平時見畫班嘅畫，Ambrose同表姐嘅背景顏色好多時一樣，唔知係咪佢地坐得近，一個用呢隻色另一個自然又會用同一隻，今次竟然見到佢地兩個唔同色。表姐畫的是日頭，仲有個太陽响度；Ambrose畫的是夜晚，畫左月亮同星星！
之前同Ambrose 去澳門旅行，因為酒店房有又大又深嘅浴缸，媽咪諗起可以俾Ambrose浸浴加玩水，又因偶然見到有LUSH的店舖，所以買左Bubble Bomb俾Ambrose浸浴時用。結果Ambrose一試愛上了，一個Bubble Bomb成幾十蚊，其實幾貴，不過見Ambrose咁鍾意，而且又係去旅行，花費少少都不為過吧，所以連續兩晚嘅澳門之旅，Ambrose都有浸浴缸。
搬左屋之後，家中有一廁所有浴缸，本來也可大浸特浸，不過媽咪見Ambrose咁鍾意浸，反而唔俾佢咁輕易可以浸到，一定要佢乖至得！早排嘅好行為貼紙計劃，成功令Ambrose戒掉左要人托住頭洗頭髮嘅問題，而獎勵當然係浸浴缸啦。本來打算去海港城的LUSH買個Bubble Bomb俾Ambrose浸浴，點知去到發現成個counter空空如也，職員說LUSH撤離香港，令媽咪失落左好一陣子！
直至早排又再行過海港城，驚見LUSH再現，媽咪當然唔放過機會，想再買Bubble Bomb待用，但發覺款式極少之餘仲要好貴一個。望左一陣就發現一新產品“FUN”，一大舊以糖果包裝嘅物體，顏色好sharp，packing寫住可以俾小朋友當play dough玩，好似幾得意咁！店員介紹呢舊真係好似泥膠嘅物體可以起泡，其實泡泡浴媽咪都覺得幾好玩，但諗吓成身都係泡，又要過水洗，又要沖番乾淨個浴缸，都幾係野！但店員就話沖完泡泡浴其實可以唔過水，就咁抺乾著衫就可以。媽咪半信半疑，店員就即時示範用“FUN”開左一盤泡泡水，試上手，真係唔係滑潺潺果d，用紙巾一抺就已經好爽，完全唔怕無過水唔乾淨嘅問題！呢舊皂都成$90，好貴，但媽咪諗住唔需要太多泡，可以一舊分幾次浸都得，如果分三次，都係$30一次，比起Bubble Bomb
要$60、$70一次都化算好多了！最後揀左藍色lavendar味返去試吓！
今日終於攞左出黎俾Ambrose試，佢見到咁多泡泡勁興奮，睇見佢都真係好好玩咁！陣味唔勁，淡淡的，幾香幾舒服，正！有時間的話，媽咪都好想來一個泡泡浴呢！
今日同Ambrose 去飲茶，等緊野食無野做，最好嘅節目就係俾紙同筆俾Ambrose畫畫。今次佢就畫左一張床，上面係爹爹媽咪。見佢一張床畫左三個枕頭，但得兩個人，媽咪就問佢第三個枕頭係咩黎？點解唔見Ambrose？Ambrose諗左一陣就响側邊畫多左張床、枕頭同埋自己，然後就話爹爹媽咪瞓呢張床，Ambrose瞓隔離房。之後Ambrose跟手畫埋個月亮出黎，寫埋個“BED”字，哈哈！
唔知係咪睇左幾日叮噹，Ambrose好有印象，再加上媽咪發現家中竟然有個叮噹公仔嘅密實袋，見Ambrose有叫過爹爹媽咪教佢畫叮噹，所以靈機一觸，將個袋放响Ambrose檯仔度。唔知係第二日定過左幾多日，總之之後無啦啦有日媽咪執Ambrose檯時，就見到佢原來跟住個袋畫左個叮噹出黎，雖然係瘦版叮噹，仲係火柴手腳，但不失可愛！最搞笑係佢無跟住畫叮噹件籃球衫，竟然識去畫番原本的法寶袋。仲有個縮水籃球，好好笑，真係要俾個服字佢，哈哈！
一月尾至同Ambrose摘完士多卑梨，估唔到新年團拜又同同學仔再黎摘過！今次一行七個家庭去玩，天氣好好，甚至乎熱左d，但真係好開心。雖然今次比上次响園內玩嘅時間少左，但同學仔多，熱鬧好多！
玩完泡泡水，再摘士多卑梨，再玩電車。之後再到同學仔家燒烤，玩足一日，最後，當然臨走嘅時候，還是因為太疲累，少少事都喊一餐，扭一餐，很惱人！有時候，爹爹媽咪真係唔知應唔應該同佢去玩太多，呢個小朋友，真係要好好輔導吓至得，佢實在。太。易。喊！
問左第一檔汽球，出價$98，貴得過份。早上才聽到朋友說在花市買個汽球講了價才$58，$98真的太貴了吧！問過檔主可否平宜一點，結果是沒有的。爹爹原本打算貴都要買，但媽咪堅持再去另一檔問問先！Ambrose見爹爹媽咪唔買汽球，好想喊，又扭計。已經解釋過要看看其他攤檔先，佢就已經鎖定左要哪一款汽球，話不用再揀！好嬲定好笑？！同一款汽球，第二檔開價$89，其實兩檔只要是隔鄰，價錢都可以有分別，再問問檔主有沒有得平宜一點，今次，檔主答最多$80賣給媽咪，聽起來已經比第一檔平宜，但$80一個汽球實在太貴了，看著心急想買到汽球的Ambrose，媽咪有一刻也心軟起來，$80就$80啦！不過最後又係要令Ambrose失望，媽咪擠過人群，再到第三檔問價錢。其實第三檔也只是第二檔的隔鄰，但這檔就大大隻字寫住$60一個，感覺不是太海鮮價，而且人實在太多，太迫，再格價下去也不是辦法，既然價錢已經和朋友買的差不多，還是快快買完就走！
本來Ambrose揀的是哨牙嘜die cut汽球，點知檔主大叫沒貨，問問Ambrose要其他款式好不好，本來媽咪仲以為佢又會問點解，唔會咁順利，唔知佢係咪驚住又買唔成，佢好順攤咁話好丫，第二款丫，一take過揀埋，超爽快！哈哈！
最後，本來想再行埋入面的攤檔，但人實在太多，一家三口加埋舅母及姪女，在人海中迫呀迫的，還是站在相同位置，絲毫沒有前進過，見出口只是在身後不遠處，還是放棄，打道回府算了！
有見Ambrose都可以砌到之前買嘅蜘蛛細粒Lego，媽咪諗起公司樓下有間玩具店有賣韓國牌子嘅Lego。以前問過，店員話同平時嘅Lego係compatible嘅，款式亦感覺幾新鮮，印象中當時睇嘅價錢係平過Lego，所以見Ambrose可以砌到細粒Lego，媽咪即時諗起呢間玩具店。
今日lunch就走左入去睇Lego，原來個牌子係「Oxford」。睇左一輪，見大盒果d其實都要幾百蚊，咁又好似同平時Lego差不多，只係可能平少少咁，款式特別少少咁囉，同埋唔知點解攞上手好重，好聚手咁！未試過呢隻牌子唔知好唔好，而且山長水遠攞返屋企，所以媽咪都主要睇細盒果d就算，試左好唔好砌先！
揀左一輪，想要嘅又賣哂，最後只係揀左盒軍車，同埋一盒機械人。盒機械人都幾特別，同系列有三款，一盒可以砌到一款，如果買齊三盒，可以撈埋一齊砌隻大機械人。不過見未試過唔知好唔好砌，都係試左先！原本兩盒價錢應該要百六、七蚊，但因為之前join左member，原來member個價係唔同嘅，埋單兩盒只係$128，都算幾抵！起碼抵過上次買果盒變形俠醫Lego，$170，仲要其實唔可以砌落Lego檯到玩！
點知，Ambrose唔核突果盒都唔攞，竟然話要Lord
of the Rings系列嘅蜘蛛！見咁肉酸，又貴，爹爹媽咪係咁不斷攞其他嘅俾佢揀，佢死都唔肯要其他，一係就走去揀盒成千蚊嘅恐龍場景，真係服左佢！搞左一輪都改變唔到Ambrose嘅決定，最終都敗左盒帖蜘蛛返去！
呢隻蜘蛛最終都係由Ambrose親手砌出黎，當然爹爹要响佢身邊提點佢點睇圖搵啱Lego砌啱位啦！Ambrose砌完之後不知幾開心，係咁揸住佢走黎嚇媽咪，自己就笑到咯咯聲！
之前團購左Bom City嘅套票諗住同Ambrose玩吓角色扮演，差d唔記得左，好彩過期前記得即刻去約！
套票包左兩個半小時，可扮演四個角色，兩名家長陪同小朋友入內。準時去到Bom City，發現商場幾乎咩都無，食左野去都仲ok，但玩完想食野真係幾難喇！登記左之後，職員俾左個時間表，睇啱想做咩野夾啱時間去排就可以了。不過唔係個個職業都不停開，所以揀嘅時候都要有少少策略。第一樣扮演嘅係飛虎隊，原本以為會好型，有得玩槍，點知原來只係入去玩特訓，捐隧道、行平衡木，枝槍只係個staff攞左出黎介紹俾小朋友識，係咁多！仲要明明玩飛虎隊，但就俾頂警察頭盔，真係好古怪！都仲未計原來件制服只有上半身，下半身係自己褲，真係求其左少少囉！
特訓完，本來Ambrose一直都話要做入油員，但去到排隊至發覺無人排，職員又話最好五歲夠高至好玩，所以爹爹媽咪都不斷游說Ambrose不如扮育嬰員湊bb，最後Ambrose當然ok啦！
扮完育嬰員，再去玩駕駛考試，呢個要有$10工資至玩得，所以之前打左兩份工，啱啱好可以夠錢玩呢個，一心以為可以揸車，可以去油站俾入油員入油。點知，入到去坐上車度俾大會影左相之後就入左間房仔度教睇signs，唔係麻？！考完筆試出返黎就考路試，每人揸車兜一個圈撞唔到野就pass，真係超快，一分鐘唔夠就pass左，俾張certificate俾Ambrose，係就咁俾，張certificate上個名又錯，張野又流，其實都幾渣！
最後原本諗住做廚師，但廚師要$5工資至玩得，但原來駕駛考試員除左要俾錢之外，係無人工，所以玩完之後無錢做廚師，激氣！無得做廚師都幾失望，行來行去，都唔知做咩好，入油員又無開，最後去左做外科醫生，無得睇，唔知佢入左去做過d咩？！
好想講嘅係佢每個角色扮演都係一入去就著衫，之後就係official影相，先至開始，玩得果一陣就要除衫，攞工資就出黎，講真，真係好趕，真係係咁易俾小朋友玩過做過，媽咪感覺真係麻麻地，仲要d職員全部都係後生仔女，又唔覺得佢地好有愛心耐心。好似之前飛虎隊要換衫，個職員都有同Ambrose除褸再著衫，件褸會掛起。但之後去育嬰員，個職員竟然格硬將件開左少少口嘅制服著上Ambrose身上，褸都未除，件褸又厚，搞到佢件衫唔上唔落咁，最後都要要再除過，件褸除左仲要攞番出黎俾媽咪。媽咪見之後個職員同小朋友除制服，都係格硬除，除到個小朋友下面果件底衫都褪到上心口，成個肚打哂出黎都唔幫手拉下，真係好唔掂！總括，一d都唔好玩，到喉唔到肺，一味掛住同小朋友影相。到最後，等埋d相曬出黎，係幾靚嘅！梗係啦，佢地雖然有哂玻璃俾家長响出面睇住，又可以影相，但佢地嘅setting，小朋友全部都背住家長，家長都好難影到正面靚相，所以大會相咁是正，慢慢擺好先同佢地影，一定靚！個價錢麻，四個角色，四張相，索價$298，仲貴過套票入場個價錢，最後當然無買走人啦！呢度唔會再有下次啦！
相比起之前參加過嘅烈火童心，雖然係小朋友自己入左去玩一個鐘，又唔知入左去做咩，價錢還要貴點，但感覺好d，起碼人地套制服係成套，連對鞋都換埋，入面玩嘅相大會有影，當然就唔會有自己小朋友大頭相，但有張group photo，出黎有張靚靚certificate，仲可以影一陣相至還衫，感覺好好多囉！
經歷過N班兩個學期嘅家長日，對於呢個咁重要嘅日子，媽咪無咩期望，亦無準備應該問老師甚麼問題，想她們也只會對媽咪說Ambrose在學校無咩特別，ok之類的說話。
爹爹今日要返工，無請假，所以今日只有媽咪同Ambrose返學校。原本時間都好鬆動，在家搞東搞西，最終竟然遲左出門，好好彩地截到的士，準時到達學校！等左一陣就到媽咪，老師話唔好帶小朋友入課室，好彩媽咪有朋友在外等待，可以幫忙看一看Ambrose，如果唔係，真係要由佢响個室外遊樂場自生自滅喇！
老師一入課室即時解釋，因為始終都會評論小朋友，所以唔希望俾小朋友聽到，以免影響佢地情緒，呢點媽咪都明白嘅。老師一開始就已經攞左一份之前在評估周時做的一份卷出黎逐頁解釋，只見入面份卷，Ambrose頁頁都有Excellent，係真唔係呀？！尤其是到左一頁認字，媽咪一向只知Ambrose只認到個＂小＂字，其他應該唔識架喇，但份卷入面有好幾個唔同嘅字，佢都做啱左，有d質疑係咪真係佢自己做囉！老師話佢無幫過Ambrose，係佢自己當時果刻做到。反而有幅圖要畫線同圓圈，應該係評估佢writing skills，佢畫得好核突囉，最後只拿了個satisfactory！再望埋學校個report，嘩！真係唔可以相信，Ambrose個report有好多Excellent，中文幾乎全部都係，淨係writing係fair，英文嘅writing都係fair，Oral係Good，其他都係Excellent！Phonics就差少少，Listening同Oral分別係Good同Fair，其實都好合理，事關早兩日至同d同學仔媽咪講開，問學校教左Letter Sounds未？因為未聽過Ambrose提起，以為未教，點知原來已經教左！以Ambrose慢吸收嘅個性，拿到Good同Fair已經好好了！而其餘嘅Maths, General Knowledge 同Mandarin都係Excellent，真係有少少＂R＂頭！學術上嘅成績，媽咪反而唔著緊，始終都只不過係K1，跟唔上的還有下個學期再追，相信Ambrose再大少少，敏感期一到，自然會很快追回，就好似佢講野要成兩歲至開始，但而家講野已經叻過好多小朋友咁，爹爹媽咪希望而且相信Ambrose有呢個爆炸力，時間到，就會爆發出來！
老師講完份卷同report，開始講Ambrose平日嘅野，老師話佢係好可愛同活躍嘅小朋友，比較鍾意郁手郁腳同埋扮惡樣，好多時同同學仔玩都會有少少推撞，同學仔受推撞又會投訴俾老師聽。老師話其實知道Ambrose唔係有心，佢亦唔係打人，只不過佢係鍾意郁手郁腳呢d肢體動作黎同人玩，其他小朋友唔知，以為佢有襲擊性，會投訴佢。其實爹爹媽咪之前已經留意到有呢個問題，都已經不斷提醒同教佢，希望可以慢慢糾正番，而家老師都留意到，希望雙管齊下，Ambrose可以斯文番少少啦！
講完呢樣之後，老師話有樣野要讚Ambrose，老師話Ambrose油顏色畫畫好好，問媽咪係咪有俾佢出去畫畫，當老師知道Ambrose上開畫班之後，就話上開畫班係唔同d！老師話Ambrose用色好豐富，而且油顏色油得唔錯。呢d其實媽咪應該仲清楚過老師，不過老師讚到，媽咪當然都好開心啦！
外藉老師無咩特別comment，可能佢只對英文上會有comment，其他如行為問題完全沒有題及。都係話Ambrose 英文OK啦，雖然答問題未必能做到full sentence，但有時係可以，一般短答無問題，而且外藉老師同佢對話佢都會明白，只係可能oral要等佢個vocab list多d鞏固d先至可以講多少少。問外藉老師Ambrose係咪以英文同佢溝通，老師話係，Ambrose唔會同佢講中文喎，咁都好d！希望多讀一個學期，佢可以開始講到英文啦！
總結今年嘅家長日，雖然見老師時間都很短，老師都好趕急地不停向外望，所講嘅野應該之前已經prepare好，剛好講完就走得，但明顯地有heart好多，起碼講出Ambrose嘅問題，證明平日老師有留意學生，呢點我真係好appreciate！
