Tieramid Circle Set 彩虹積木 (3y6m)

Ambrose一歲左右就已經買左呢盒Tieramid Circle Set 彩虹積木，一直以黎，媽咪都無攞出黎俾Ambrose玩，可能因為媽咪當初太早俾佢玩過一次，覺得佢都係搗蛋多，未ready真係識玩，所以收埋左。咁樣一收，媽咪自己都唔記得左佢嘅存在。

 

直至搬屋時再見到呢盒積木，而搬左屋之後，大部份嘅玩具都已經放哂入Ambrose房，佢自己可以攞到，所以最近就見Ambrose終於對彩虹積木有興趣，自己攞出黎玩喇！Ambrose開始時係憑自己想像砌雪人、人仔，後來媽咪見佢砌極都係唔同樣嘅人仔，突然諗起隨積木一齊嘅pattern
cards，可以俾Ambrose跟住咭上嘅圖案砌多d唔同嘅野！

 

果然，Ambrose一見到咭上嘅圖案，真係好有興趣砌。之不過，原本媽咪以為都係跟住咭仔砌，無咩難度，但原來對於Ambrose黎講，都唔係想像中咁易！隻蟹係Ambrose响無任何指導下跟咭砌，但個蟹箝左右對掉左，哈哈！大象嘅象鼻方向，Ambrose完全攪唔掂，係媽咪教佢點砌嘅。不過當媽咪教佢點砌時至發現，原來唔係就咁放啱位置就得，有d位置其實係要其他積木叠住，好似象鼻、象耳、象牙咁，有一小部份其實係叠在塊面嘅積木下面，當中砌嘅先後都可能影響到平衡，媽咪自己砌都要研究左一陣，所以真係唔可以睇少份積木！海豚係媽咪示範左一次，之後整亂再俾Ambrose自己砌，雖然唔係咁整齊，但都叫做砌到，哈哈！

 

見Ambrose咁有興趣，原本套pattern cards係刻意分開擺的，媽咪最後都放埋入積木盒度，俾Ambrose平時自己想砌時可以攞出黎砌，唔一定要等媽咪响度時至可以有咭砌！