家長日後買書 (3y5m)

曾經有段時間媽咪好瘋狂地係咁買練習書俾Ambrose，因為Ambrose好鍾意做，一做可以成本成本咁做完，所以之前媽咪一見有啱就買買買，結果，懶惰嘅媽咪又配合唔到，成日都好懶無同Ambrose做，一係有心機嘅時候又多數同Ambrose做手工多，一係就同佢玩吓，顛吓就算。

 

直至家長日睇到Ambrose做嘅評估試卷，真係唔敢相信佢已經可以做某d題目，又覺得係咪有老師幫至做到，滿腹疑惑，亦突然覺得，原來媽咪真係要的起心肝跟一跟佢學術上嘅進度喇！

 

當日見完家長之後，就响學校嘅室內遊樂場度有個小型書展，應該係新雅擺嘅，媽咪趁機買左幾本練習書，又俾Ambrose自己揀左兩本故事書。

 

下學期，要俾d心機至得喇！