Lego @ Oxford (3y5m)

之前行灣仔玩具街，爹爹見到有國內版細粒

Lego，牌子係「啟蒙」，款式幾多，價錢又勁平，都有買過返屋企砌。砌過後嘅評價都唔差，除左有d位好實要大力砌至＂啪＂得實，Ambrose可能未必夠力自己砌；但因為實，砌出黎嘅玩具感覺紮實d，無話好易散哂！試過收到同學仔嘅國內版Lego，不知名牌子，質量真係幾差，有d位麻麻地，砌完都好鬆，甚至一攞起就散散地。正式Lego當然就最好，位fit又易砌，但下下幾百蚊一盒其實都幾貴，亦無「啟蒙」咁結實。有過砌唔同牌子Lego嘅經驗，爹爹就話其實「啟蒙」都買得過，而其他非「啟蒙」嘅Lego就真係搏唔過喇！不過「啟蒙」都要少少冒險，就係有可能一盒裡面有機會少左一件parts，咁就砌唔到喇，但勝在十蚊、幾十蚊，大大盒都係百幾蚊，值唔值就人見人智！

 

有見Ambrose都可以砌到之前買嘅蜘蛛細粒Lego，媽咪諗起公司樓下有間玩具店有賣韓國牌子嘅Lego。以前問過，店員話同平時嘅Lego係compatible嘅，款式亦感覺幾新鮮，印象中當時睇嘅價錢係平過Lego，所以見Ambrose可以砌到細粒Lego，媽咪即時諗起呢間玩具店。

 

今日lunch就走左入去睇Lego，原來個牌子係「Oxford」。睇左一輪，見大盒果d其實都要幾百蚊，咁又好似同平時Lego差不多，只係可能平少少咁，款式特別少少咁囉，同埋唔知點解攞上手好重，好聚手咁！未試過呢隻牌子唔知好唔好，而且山長水遠攞返屋企，所以媽咪都主要睇細盒果d就算，試左好唔好砌先！

 

揀左一輪，想要嘅又賣哂，最後只係揀左盒軍車，同埋一盒機械人。盒機械人都幾特別，同系列有三款，一盒可以砌到一款，如果買齊三盒，可以撈埋一齊砌隻大機械人。不過見未試過唔知好唔好砌，都係試左先！原本兩盒價錢應該要百六、七蚊，但因為之前join左member，原來member個價係唔同嘅，埋單兩盒只係$128，都算幾抵！起碼抵過上次買果盒變形俠醫Lego，$170，仲要其實唔可以砌落Lego檯到玩！