執漏

師傅話今日執漏，因為九號一定要搬，所以無得再改日期，我唯有攞日補假去跟．．．．

點知真係太多野要執嘞，執到夜晚都攪唔掂，最激氣係個師傅好遲先黎，又要call其他師傅攪水電，其實今日都無咩執到ｄ咩野，浪費了我一日假！

最經典係我同個師傅鬧大架，事緣係：

之前傾裝修問過在廚房整沙鋼，因為貴同唸唸下無咩必要，我地都決定唔整。今日個師傅攞住塊鋼，我不以為意，見佢揭開廚房個假天花，以為重有野要整，咁我一路無出聲無問，而我聽到師傅話塊鋼唔啱size要攞去俾人界細，我都無疑問，我以為佢攪過個天花．．．．

直到我掃完地行出去睇下ｄ師傅攪咩，見到爐頭上有塊白色野整左上去，我多口問係做緊咩，佢話係沙鋼，我話我都無話整，佢話我老公叫整，我話無可能，佢叫我即刻打俾佢問．．．．

我心唸，我自己個廚房我梗清楚啦，我老公點會無啦啦俾ｄ咁既surprise俾我喎，不過我都照打去問，expected既答案，係無叫過，老公重叫我唔好俾佢整．．．．師傅大驚下去check張單，驚同第二個單位攪亂左，但佢攞住張單話有寫要沙鋼，我都驚驚地．．．不過張單係佢既，佢一向都無加野落我地張底單到，只係自己成日鬼畫符係自己既單寫野，等自己唔好唔記得做左咩同收錢，所以果張單基本上係佢自己既notebook，佢自己先識睇！我寸佢話張單有寫用黑金沙做廚房地磚，而家都唔係啦，佢就話佢地做裝修既講左寫左就係，唔係成日改喎。佢問我重要唔要，我話唔要！佢拆都拆唔切。原來佢用左「釘膠」去貼塊沙鋼，一定要趁未乾就拆，否則就拆唔到！

當我見到佢旋風咁拆左出來，後面塊磚牆好似俾屎扶到周圍都係，我真係好心痛，亦都開始alert到我幅牆有既危機：「就係ｄ釘膠根本抺不掉」！我見個師傅抺呀抺，重叫個仔碌落去買天拿水，我個心真係好寒！重要個師傅一路做一路鬧我地玩野，攪到佢蝕錢，一路用粗口噪噪閉，話我响度見到佢塊沙鋼，見到佢地要攞去改size都無出聲話唔整喎，我不知幾想喊！好地地幅牆俾佢攪成咁重要怨我，我點知果塊叫沙鋼喎，未脫張白膠紙既時候根本就同廚房天花塊鋼係一樣既，我又無一路睇佢响廚房攪咩，我又唔係做裝修，點鬼知你用咩野攪咩野喎，你唔記得我地話唔要又話我地玩野，如果我真係要整根本無可能唔同你夾果塊鋼cover到邊個位，而家淨係爐頭上面有沙鋼咁怪，我都無可能話要你咁做啦，我做客都要俾人鬧，都係第一次！

師傅都無理我，佢有佢整，佢有佢噪，後來佢好勞氣話唔收我錢，要我俾佢整番上去，我見幅牆已經黃哂（ｄ釘膠係咖啡色，抺過後幅白磚牆變左無咁白，重要抺唔清），我就死死氣話好，咁佢又係一路鬧一路做，之後我地响屋度再無出聲，有成十五分鐘，因為大家都好嬲！

老公返來見到都唔太鍾意，不過真係無辦法。奶奶就話我可以堅持唔要，重要叫佢做過幅牆，一日未俾錢，佢都要做咁話喎！我心唸你講就易，我個人咁細膽，我對住個師傅真係唔知點講，同佢噪完已經好叻架啦，早知搵我奶奶去睇住，咪唔使我無一日假之餘重俾人鬧獲金既，重唔使俾佢貼番幅沙鋼篤眼篤鼻！