郊遊@大尾篤

星期五啱啱先攞左架八人車，星期六我唔太舒服睇左醫生無出街，今日都係忍唔住要發揮吓部車喇！載埋姑仔同兩個姨甥女，我地決定去大尾篤走一轉！

以我地嘅個性，尤其是我唔熱愛大自然嘅個性，真係諗住兜架車過去，落車行個圈跟住返歸就當郊遊左架喇，點知麻麻又真係好熱衷呢d親子活動，佢已經自動波買哂野去整滷水雞翼腸仔。就係咁，我地呢一個郊遊，無啦啦變左郊外野餐！

去到大尾篤燒烤場，好意外竟然有標位泊車，重要係好容易就有位。好順利泊完車，一行人就搵左個位坐低野餐喇！話就話野餐，因為我地係去左燒烤場，而呢個場係整得好企理，爐邊有台有椅，全雲石，只係用濕布一抺就乾淨可以放心坐。我地帶左Ambrose架單車俾佢坐吓玩吓，推住佢行左一陣佢都笑笑地。可能今日雖然唔係勁曬，不過都比較熱，佢有少少打唔開大對眼咁，又有少少“吽”，無咩笑容，唔知係咪似我唔鍾意戶外活動呢？！

之後我地抱左Ambrose出碼頭望人釣魚，唔知係咪無去過海灘（Ambrose極其量好似去海港城泊車會見到個海之外無正式見過海），佢一見到個海就手指指，指住個海，又係咁望住“哥哥”咁，好似係問我地“咩黎架？”係呢個時候先比較提起精神d！

因為實在唔習慣郊遊，又熱又立，唔夠兩個鐘，我地已經話走人喇！不過呢度真係一個幾好嘅地方，天氣涼少少，燒烤應該一流，到時可以租家庭單車踩一陣又食一陣，如果夠膽又可以同Ambrose划艇，附近洗手間又大又尚算乾淨，對於我呢種城市人黎講，真係好ok！我諗我地而家開始都要訓練自己多d去郊外走走，Ambrose越黎越大，真係唔可能個個星期都係行商場囉！

八人車

終於都換左架自動波八人車喇！可以响車入面換片唔使左撞右撞！哈哈！同埋，有機會我都可以揸番車，等老公試吓湊住個仔响架車入面左爬加爬嘅滋味喇！不過都有少少驚，話就話個牌都有差唔多六年，之但係除左考到牌果陣有揸過幾次之外，都好似未揸過車喇！重有係，我由始到終都唔識泊車，嘩哈哈！

一歲成長紀錄

直至今日為止，Ambrose一歲大，大致有以下嘅進程：

一、                飲水依然係天一半地一半，無論俾飲管杯定就咁飲嘅學習杯都會一身濕！之但係如果係我地飲開野佢又要痴埋黎飲，佢又會濕少d架喎！

二、                俾奶樽佢自己揸住飲奶，已經識得揸住奶樽瞓响度飲，唔使我地輕推喇！

三、                粥仔依然係一日兩餐，每餐一大碗！等佢過埋打針嘅影響，我諗可以同佢轉一日三粥喇！

四、                爬行速度極快，有時快到會唔小心叉錯手“線”親撞到口仔添！

五、                扶物企後橫行可以一連串做到，期間無需停頓。推步行車行撞物唔能夠前進，佢之前會自己扶去車頭掉轉推，而家已經唔會咁stupid，識得移過少少避開頂住佢嘅野繼續前行。有時重可以離手自己行 一兩 步喇！

六、                識得爬上梳化，亦都知道落梳化要掉轉個人用腳仔落先。暫時如果梳化無人俾佢當扶手，佢自己係唔會就咁落地，如果有人坐左响度，佢會識爬去個人度再扶住用腳仔落地。

七、                坐响地下，以pat pat為圓心，原地用腳自轉。

八、                唔知幾時開始佢嘅hello & bye bye由大動作揮手改為用手仔不斷開合，真係諗唔明點解佢識咁做，因為我地每次hello同bye bye都一定係揮手，無試過教開合手做bye bye！

九、                之前見佢成日fing手同un身，而家更加多見，不過我地已經好肯定佢係對音樂有所反應，同埋佢而家聽到音樂，尤其是佢喜歡嘅歌仔，佢重識得左右搖個身，舉高雙手，好攪笑！

十、                識得用手指指住再講“哥哥”黎表示佢想要果樣野，而家成日“哥哥哥哥”，唔知係咪想講“果個”。

十一、        識得點蟲蟲。有時佢會一隻手指點落一隻手板度；有時係成梳手指一齊點；有時係一梳手指點落另一隻手板度；再有時係一隻手指點落腳板度，哈哈！

十二、        屋企有d識字咭有圖有字，佢而家好鍾意摷哂出黎然後逐張逐張攞俾我地要我地讀俾佢聽，重要係張咭掉轉左佢識得掉番正先俾我地！其中佢最鍾意同我地相信佢認得嘅係“馬”同“狗”！佢可以响兩套唔同嘅圖咭，一套係公仔一套係實物，都可以抽出“馬”出黎要我地讀，再手指佢果隻馬車（其實係toy story入面果隻驢），唔知佢係咪真係識得呢幾樣野其實係一樣呢？！有一次問佢，“狗狗”呢？佢唔係响圖咭搵番出黎，而係指住梳化“哥哥”，因為梳化有三隻狗公仔，哈哈，果次真係俾佢笑死！

十三、        識得扒响地去睇櫃底嘅野，重會去執番碌左入櫃底嘅波波。真係好得意，佢一扒地個pat pat又“拮”起，好好笑！

十四、        同佢著衫叫佢逮手同逮腳都可以。

十五、        好鍾意刷牙仔！因為佢一定唔俾人伸手入口抺口腔，佢未夠一歲我已經同佢用牙刷喇！食完夜晚最後果枝奶，我會用佢枝牙刷快速同佢刷上下排嘅門牙，佢一定會搶，所以要好快手，一刷完就俾枝牙刷佢揸住刷。不過其實佢係撩吓咬吓多，唔係真係識刷，我都當佢係刷左牙架喇！之但係佢一路刷我會揸住隻牙杯，我會叫佢耐唔耐浸番枝牙刷入牙杯度洗吓，佢由開頭唔識轉隻手入去個杯度，到而家勉強都識點放入隻杯度喇，當然，我會裝半杯杯，因為太少水佢點扭都掂唔到d水，滿d就易浸好多啦！

一歲返健康院打針

Ambrose一歲喇！要返健康院打針，終於可以準確同佢度高磅重喇！之前成日响屋企同佢磅都好似比之前輕左咁，攪到唔知關唔關轉食兩餐粥事！上網又見0908嘅bb個個都好高咁！我專登買左度高尺返屋企貼，貼啱位架！總之响屋企就重二十至二十 二磅 不等，高就72厘米！

今日返去健康院，用番佢個磅，Ambrose有10.51kg，即 二十三磅 鬆dd，高原來有76.5厘米，原來Ambrose一d都唔矮，姑娘重讚佢條腿又長又多肉，哈哈！不過明明屋企個度高尺係啱，唔知知點解有咁大出入，唔通企直度同健康院瞓住度真係有分別嘅？！今日見姑娘原本以為都有好多唔同測試要做，點知好多都係問我bb識唔識呢樣果樣，答左就算，無另外要佢做一次睇吓。可能朋友响果度做啦，佢撩Ambrose玩嘅時候有叫佢bye bye同俾俾，就係咁，正當個姑娘問我Ambrose識唔識呢兩樣時，朋友仔入黎聽到就話之前同佢玩佢做到喎！唯一一個係要Ambrose做嘅係攞星星餅。開頭Ambrose都唔係好郁架，差d要出動我果d小饅頭至得，之後Ambrose用右手先去攞餅，正當佢想放入口嘅時候，又俾姑娘攞番，要佢用左手攞，今次佢又唔攞，停左响度望，隔左一陣先得，我覺得Ambrose攞得唔靚，因為佢唔係用第一二隻手指去攞，係用哂成隻手去攞，不過姑娘又無話有問題，重話佢手指叻，我都無野好講，就係咁，Ambrose個一歲發展測試就做完喇！姑娘問我有咩發展問題問，我話Ambrose好似有時會企唔穩，不過姑娘都無回應我，可能覺得呢個階段係正常啦！我又話Ambrose唔識擺野，次次要佢擺，佢都唔擺，只會攞哂d野出黎走左去，我見上playgroup嘅小朋友個個都得架，無論係放圈圈定入通粉！姑娘又話佢識“俾”，所以佢係識，只係唔識聽指令要佢放入特定位置喎，叫我地訓練吓就得！佢又唔知我地已經好早教，都訓練左好耐架喇，都唔知佢係唔鍾意定唔識囉！又係話正常，咁我又費時再問喇，唯有睇Ambrose打歲半針時嘅進程係點先啦！

今日係打肺炎鏈球菌加強針同麻疹針，一共兩針。因為麻麻要覆診嘅關係，今次由爹爹同我一齊陪Ambrose打針。我地之前一晚仲講緊邊個做衰人拑實佢俾人打針，爹爹話唔想破壞佢同Ambrose嘅關係（因為Ambrose係勁痴爹爹架），佢叫我捉實Ambrose喎！咁如果我係可以，我就唔使叫爹爹都放假啦，我就係驚我唔夠力捉實Ambrose先叫爹爹一齊咋！我就話我同Ambrose關係無佢地咁好，我唔想進一步破壞我地原本已經唔太好嘅關係，我叫爹爹捉實Ambrose！哈哈！其實都無定案架！不過因為Ambrose太痴爹爹，佢都唔肯俾我抱，咁好順理成章，都係爹爹捉實佢打針！哈哈！最好笑係爹爹問姑娘可唔可以叫其他姑娘捉實Ambrose，佢話佢都好驚喎，我地又响個姑娘面前討論邊個去捉，佢又驚我又驚！我唔驚睇實姑娘入針，我真係驚我唔夠力鬆手枝針會打歪！爹爹都好心驚膽氈咁捉實Ambrose，而我，因為聽左個朋友講話記得準備餅仔氹番，因為佢個女喊得好勁，咁我就好快手已經開定條餅仔出黎。姑娘好快已經打左一針，啱啱見佢打完就聽到爹爹問得未，姑娘話打完一枝，佢重好驚訝咁快打完添！打完呢枝針，Ambrose無喊，我都想俾餅讚Ambrose叻叻，俾姑娘叫唔好，話要打哂兩枝先好比。之後果針，可能因為爹爹拑住左Ambrose呢個動作好耐，又加上可能真係痛，Ambrose一入針就叫左一聲，我一見姑娘打完我就想用條餅仔氹番Ambrose，心諗呢個大好人留番我啦！點知Ambrose只係叫左一聲，之後喊兩下唔大聲就收哂，含住兩泡眼淚即時同個姑娘做bye bye手勢，都睇唔到我係咁俾條餅仔佢！係我最尾塞入佢隻手度，佢先識攞住食咋！Ambrose重攪笑到出左打針房見到個靚女，佢見人地又要入去果間房，就係咁狂講野報串，好似叫人唔好入去呀，好痛架，搵笨架咁！哈哈！

Ambrose真係好叻，好勇敢呀！

出賣

今晚原本諗住留Ambrose响麻麻屋企過夜架，不過當我地走左返到自己屋企，好輕鬆食緊消夜嘅時候，麻麻就打黎話Ambrose喊到連佢平時好寶貝果枝夜奶都飲唔哂呀！成個電話過程中，我都係咁聽到Ambrose嘅喊聲！爹爹一知Ambrose喊唔肯瞓，已經二話不說換番衫衝出去接返佢返黎！返到黎之後，我開多少少奶俾Ambrose飲埋就遊行完先瞓！

爹爹話Ambrose見到佢之後都無出過聲，好似嬲左佢咁喎，神情好似話爹爹好出賣佢，賣甩佢咁！呵呵！心痛死佢喇！不過我地都重諗緊究竟Ambrose唔肯瞓原因係咩？係認人？認地方？定係我地走嘅時候無同佢交代好？之前我試過去姑仔屋企過夜，得我同Ambrose，佢肯瞓架喎！唔通佢係要認我？呵呵！我地重計畫試多一次，試吓我或者爹爹留低陪佢又肯唔肯瞓，事關如果佢係要認地方嘅話，咁我地想帶埋Ambrose去旅行咪唔得？！

365天人像相poster

隨住Ambrose一歲嘅來臨，我地個365天人像相poster呢個大project終於都可以完工攞去印！今日去取poster，真係好靚！d同事都大讚我地有心機有心思！其實有心思同有心機果個係爹爹，唔係我！呢個idea係爹爹帶出黎嘅，我只係儘量配合，响佢開會返唔到黎嘅日子要幫手影相。講真，要選相去做個softcopy整poster其實唔難，只要唔好日日嘅相都精挑細選！最難嘅係日日都要同Ambrose影相！我地要日日remind自己放工返去記住影相，無論係幾忙、幾累，又或者同Ambrose玩到幾開心忙哂型都好，我諗真係唔係人人都做到！所以真係要讚吓爹爹有呢份堅持，唔係都唔會有呢張poster面世呀！睇住張poster，由day 1去到一歲，Ambrose真係日日都唔同樣，曾經佢d頭髮甩哂又生番，曾經佢塊面豬登有兩大舊肉脹卜卜，曾經有過迷人雙眼皮，曾經係無牙bb到而家有四隻牙仔．．．．．．

一歲喇

Ambrose今日一歲喇！

為著Ambrose一歲生日，之前都有諗過同佢去廸士尼酒店過一晚，不過因為價錢真係幾貴，去一晚package都要成二三千，我就唔係幾捨得喇，加上Ambrose已經入過樂園，我就更加唔想嘥錢只為瞓一晚！寧願俾多幾千蚊之後同佢去吓旅行都重好似抵d！之前都有個package係海洋公園加酒店嘅，大概一千蚊，不過到我地打去book時，個優惠又只去到七月尾！見Ambrose生日又係平日，請假慶祝又好似誇左少少咁，又無特別地方去，所以最後我地都係無請假返哂工。

今日同平時一樣，我地返工放工無特別！因為姑姐放假同兩個女去影樓影相，麻麻又帶埋Ambrose去襯熱鬧，咁Ambrose生日都叫做有出過街喇。原本諗住橫掂Ambrose都有去影樓，想話叫姑姐幫佢ad hoc影一攝造型照，都係貪得意吓，不過老公就話我地無得同佢影家庭照好似唔係幾好，咁就告吹左喇！

食完晚飯，我地特登攞左個箱仔出黎放蛋糕，個箱係啱啱好就到Ambrose高度，佢一行埋去個蛋糕就响佢心口仔同肚嘅位置，嘻嘻！Ambrose見到個蛋糕就開始八掛想去摸，至斃係佢企唔得穩要爺爺扶住企，點知爺爺又係咁唔俾佢掂個蛋糕，終於攪到佢喊喇！生日流流攪到人喊都有！我即時用叉拮左一粒蛋糕面嘅蜜瓜俾Ambrose揸住止喊先，再抱佢上張high chair等佢坐响度慢慢食！見佢好陶醉食粒蜜瓜，我地竟然冒住俾Ambrose撥落地嘅危險，將個蛋糕放左响佢high chair張台面度！好神奇地，佢無撥落地，重不斷伸手想掂個蛋糕又縮番埋，再繼續食佢果粒蜜瓜。真係機不可失，我地不斷同佢影相，雖然佢掛住食無咩點笑，但我都覺得d相好靚！

Ambrose，生日快樂呀！媽咪祝你身體健康，聰明伶俐呀！

迷你生日會

八月十五日，中午先參加完baby kingdom 0908果個生日會，完左之後我地就趕返屋企開另一個迷你生日會，主要係同姑姐及姨婆一齊切蛋糕，食pizza，簡簡單單咁！

之前一兩日在公司偷偷地自製左一歲生日banner，雖然好簡單兩條banner，不過由印到剪，都用左我一日咁多時間！星期六晚趁Ambrose瞓左，我同老公就掛左上牆度。第二朝Ambrose瞓醒抱佢出黎佢見到有新banner，佢好攪笑，佢真係伸高隻手去捉條banner！見到佢咁鍾意成日要去掂條banner，真係覺得好值得花左咁多時間去做呀！

我地無特別訂做生日蛋糕俾 Ambrose，因為一訂蛋糕又起碼要 兩磅 起，真係食唔哂，其實都無所謂，Ambrose又食唔到個蛋糕嘅，我地都係選番我地想食嘅蛋糕就算！之前一日响公公婆婆度切蛋糕，買左個thomas嘅，已經好colourful。今日我地選左個北海道3.6牛乳芝士蛋糕，夠哂plain，之前已經特登買左一枝顏色嘅“ １” 字candle同埋一d煙花candle，放上呢個咁plain嘅蛋糕可以襯托一下。可惜嘅係果d煙花candles，唔知係咪我地驚太勁火花，所以只插兩枝，煙花效果真係好少，唔夠勁，我諗下次可以試吓放多d同密d，我諗應該幾靚！見個蛋糕咁plain，我都破例俾Ambrose試左一啖仔咁多啦！之後我地不停响條banner下面影相，我重幫Ambrose自製左皇冠同生曰尖帽帶住影相，不過佢就係咁撥走頂帽囉，哈哈！原來條banner雖然好似好簡單，影相出黎好靚好sharp，個個都讚靚，我真係好開心！

Baby Kingdom 0908一歲bb生日會

Ambrose八月生日，早在四月嘅時侯，我就已經幫佢報左八月呢個大型生日會。報呢個生日會，一來係想識吓其他同齡嘅bb，二來係希望Ambrose一歲生日會有個特別嘅回憶，畢竟，八十個bb嘅生日會真係好特別，就算Ambrose而家無印象，將來攞番d相出黎睇都應該好開心，好有紀念性！

生日會安排在 八月十五日 舉行，剛在Ambrose生日前幾天，真係啱啱好！期待已久嘅生日會終於都到喇！之前我成日都擔心Ambrose會唔舒服病左去唔到，所以心情真係好緊張！之前果晚去公公婆婆屋企同Ambrose慶祝生日，我地買左個Thomas朱古力蛋糕切，其實Ambrose都未食得蛋糕（因為之前佢疑似蛋敏感），加上個蛋糕係朱古力，又係致敏食物嘅其中一種，我無諗過要俾Ambrose試，連一啖都唔得呀！點知公公鬼死咁熱情，係咁餵朱古力蛋糕俾Ambrose，我竭力阻止，我真係驚萬一就係為左呢一啖蛋糕去唔成個生日會，真係喊都無謂！公公開頭都唔理我照餵架，我係咁話唔得唔好佢都當我無到，後尾真係忍唔住鬧鬼佢，哈哈！無法啦，除左有機會去唔成生日會好失望之外，我更擔心嘅係蛋加朱古力會令敏感更嚴重，有咩後果真係唔知點算，亦都分唔到究竟係蛋定朱古力敏感呀！

有驚無險，Ambrose終於可以參加生日會，真係叻仔！生日會响城大舉行，好彩之前上forum睇應該有泊車優惠，唔係嘅話，我地會泊又一城，又一城要二十蚊一個鐘，而泊城大就二十蚊四個鐘，真係差好遠，嘻嘻！

上到生日會場，已經見到不少人到場，場面都幾浩大，攝影師都好似有成team人咁，好似好pro，哈哈！我地响門口個balloon arch度影左相就去登記，一登記就有一大袋紀念品加贈品samples，之後，估唔到嘅係通知我因為有攝影公司sponsor我地呢個活動，所以之前交左五十蚊攝影費有即時refund。再有嘅係即時抽獎，我抽左份生字puzzle，好靚！我記得反斗城差唔多都賣緊五十蚊！呢個生日會我地係百三蚊一個人，唔計bb，所以我地俾左二百六，一入門口就已經一抽二抽咁，登時覺得真係抵喇！

大會安排左張近大門口位嘅台俾我地，其實就麻麻地靚，不過再入面台與台之間又有少少迫，人來人往穿插咁，又唔方便擺bb車，所以我地都幾滿意個位，我地重可以唔收車就咁擺車，所有奶粉袋、禮物袋、相機袋同puzzle都可以放哂上車度，好方便！不過同台一齊嘅係一對couple，一家四口加個賓賓同埋遲左到嘅另一家四口嘅family，都係d唔太熱衷識朋友仔嘅人，我地同對couple都叫有兩句傾吓，同隔離一家四口加賓賓嘅就完全無野講，因為佢地都自己顧自己，又係咁點個賓賓攞野，我都費時阻佢地，遲到嘅一家四口都係中尾聲先有兩句傾到，不過佢地都唔係坐到尾就走左，所以基本上我地係無識到新朋友仔嘅！

生日會中間有個爬行比賽嘅環節，係要抽中先有得玩，好彩地Ambrose第一round已經被抽中，我不知幾開心，因為除左上次好辛苦先報到嘅爬行比賽之外，近期坊間根本無爬行比賽舉行，再遲下Ambrose識行嘅話，就再玩唔到爬行比賽架喇！我地即刻衝出去報到，不過因為賽道都幾窄，一個bb比賽又會有起碼兩個家長响度，真係幾迫同混亂！老公負責响終點揸機拍片，我當然係負責引Ambrose爬啦！擾攘一輪之後見隔離bb開始爬，個個都起勢爬，以為開始左，只係聽唔到，點知原來真係未開始得，因為未講賽制，大家笑左一大餐又返去起點度！今次講賽制快過上次好多，所以我都唔使同Ambrose搏鬥一番，一開始我又放條蟲蟲出黎引佢，唔知係咪地面舖左塊布而唔係上次嘅地墊，條蟲開頭行唔到，行到都唔快，加上Ambrose唔知點解狀態麻麻，一路都無話情緒高漲咁，佢都麻麻地肯爬。我唯有一個箭步衝去前面引佢，雙管齊下之下，果然佢又係發動摩打咁爬爬爬，超快！我見其他bb都重慢慢諗慢慢望先爬，又係以為Ambrose會第一啦，點知去到近終點位，今次係無計時員，但好衰唔衰竟然有個大會攝影師“得”左落我地條線道嘅尾度，Ambrose又係差一個身位到終點就停左落黎，我已經不顧儀態係咁用手拍個攝影師隻腳叫佢走開，奈何Ambrose已經停哂摩打，點引同點叫佢都唔郁，真係激死人呀！個攝影師可能拍緊片唔方便即時行開啦，佢過左一陣先移師去再後嘅位置，我見Ambrose唔肯爬已經扁哂咀望實個攝影師，怪佢好“得”响度攪到Ambrose唔爬！攝影師都好無奈，都有幫手引Ambrose衝線，不過都係徒勞！Ambrose係等個個都衝左線之後佢先施施然爬多兩步衝線，真係好有性格！全個過程老公都有影到，我地睇返都覺得好好笑！

要讚嘅係個buffet都有好多選擇，未開始攞得之前我地出去睇過都覺得好靚好多野食咁，食完就覺得真係唔錯，唔係得個樣。最開心係有我至愛嘅沙律，重要唔止有生果沙律，重有係薯仔沙律同凱撤沙律，加埋粟米，真係yummy yummy，同去酒店食buffet有嘅salad bar係一樣咁正呀！整體食物係幾好，咁嘅價錢有咁嘅水準，我地進一步覺得勁抵呀！

食到咁上下係播片同投票時間，之前我地交左相報最燦爛笑容獎無入圍，笑笑小電影嘅片我地又無交，所以都無去理出面做緊咩！之前响baby kingdom識左個朋友仔重係住隔離座嘅，我地無坐埋一齊，就趁食完野嘅時侯出去影蛋糕同balloon arch。之後就再等大抽獎喇！我見出面嘅獎品都好吸引，除左有大量嘅puzzle之外，就有大盒禮物如滑梯、摺合單車同埋一套英文教材等等。我呢d師奶仔一聽見話大抽獎同埋中左叫名數三聲唔出現就無，我梗係慌死蝕左咁抱埋Ambrose出去等中獎喇！係等中獎！因為禮物數量差唔多係人人有獎，嘻嘻！不過話就話人人有獎咁濟，我一路等，又一路唔想佢咁早叫我，一路又驚真係唔叫會唔會我就係咁唔好彩果幾個無獎架！諗吓諗吓已經叫我個名喇！又係puzzle，今次係海底世界，有埋sticker可以玩嘅，雖然我都好想中條滑梯或者教材，不過中到獎都係好開心嘅！

抽完獎，大家都意興闌珊，有d未抽獎已經走左，抽埋獎就走得重多d。因為bb係不佔位，我地基本上係全程抱住Ambrose食同行，都好攰喇，Ambrose又好似好眼瞓咁，我地都有少少想走，不過最後嘅大合照又未影，如果唔影又好似無咁圓滿咁，所以我地都苦苦等待影埋先走！八十個bb要一齊出去影相都好混亂，又擾攘左一輪先影到，不過因為太多人，我地又啱啱企中間，企直又遮住後面，蹲低又比前面遮住，我要好辛苦半蹲個人，抓舉咁抱高Ambrose，真係攰死人呀！不過就係大合照先有紀念價值麻！唔係點睇得出有咁多bb一齊參與呀？！最好笑係我隔離果家人，見佢地都係掛住食完全無同其他人交流，最尾大合照嘅時候佢個bb瞓左，佢地竟然都抱bb出去影相，瞓住都照影，真係服左佢地！

今個生日會真係大豐收呀，連老公都話超勁抵，問我可唔可以報埋0909果個生日會，真係俾佢笑死我呀！

DWE – Fun with Words

之前上左一個DWE嘅playgroup，其實話就話係playgroup，我覺得係氹你去玩順便sell你去買佢套upgrade版fun with words多d！不過DWE都算係咁，唔使錢上左個playgroup之後，佢地都無hard sell套野，重任我地去試去玩！果日Ambrose睇到枝Mickey筆已經好似好鍾意咁，我地都無動搖，話考慮吓就走。果次之後我地都有心動過嘅，不過真係貴，其實我地都有fun with words，只係而家佢出左枝筆去玩果堆野，真係方便左好多，但要還哂自己本身果套野俾佢地再加多四千幾蚊，真係好貴囉！

書展期間我地買左智慧寶寶普通話系列，第一日用見Ambrose好似都好專注，老公又開始再諗番套fun with words，覺得揸住枝筆玩係好方便，又有得聽歌仔，又有Q&A，真係發揮到套教材！

BB展期間我地終於都去左買fun with words喇！因為係BB展嘅關係，有個Mickey手偶同沙灘袋送，好靚！重要個顧問都好好，會場有咩禮物送得都送哂俾我，有毛巾仔、紙板相架仔、海報同啦啦棒！重有一張即印嘅Mickey出世紙，有埋Ambrose個名同出生日期，真係靚到要好小心袋住唔好整皺呀！

訂左套fun with words，星期二就送貨喇！貨一到我地就開始每晚都同佢玩，Ambrose真係好鍾意枝筆，只要我地一攞枝筆同本書，佢無論响幾遠，只要一見到，佢都會“啪啪啪”衝過黎，真係好好笑，相比之下，佢就對智慧寶寶無興趣，除左第一二日攞出黎同佢玩佢會專心睇哂之外，之後佢都一係就搶枝筆，一係就搶咭，要自己打開，再唔係佢就爬左去！我地睇到個分別都幾明顯，老公見Ambrose真係會好專注玩套fun with words唔會走左去，就覺得套fun with words好抵！有時，抵同唔抵，真係要睇小朋友鍾唔鍾意！雖然四千幾蚊好赤，我都不得不認同DWE真係幾好，貴得黎都叫抵嘅！

智慧寶寶初體驗

星期一成十點先送貨黎，Ambrose都已經瞓左覺覺豬，無得玩。尋晚食完飯同佢玩左一陣爬左一陣，我就急不及待抽d咭俾佢玩喇！無schedule响手，都唔緊要啦，都係字咭，我諗都唔難自己操作嘅！我無直接跟分類嘅先後次序俾咭Ambrose睇，一去就想搵d佢熟悉d嘅字圖，咁我就毫不猶豫搵左身體部位俾Ambrose睇喇，佢應該要識同埋唔難响日常生活中見到丫。一抽就抽左十張字咭出黎，Ambrose無話好興奮咁要搶住笑住，反而係好專心咁睇d咭，我地點讀詞語普通話同廣東話後，揭開再睇圖點讀多一次詞語同埋隔離果句句子，先叫完成一張咭。Ambrose一口氣睇哂十張咭，只係中間都有曾嘗試要自己揸筆同攞咭，不過都真係唔係搗蛋，而係好奇，亦都唔係話掛住玩筆而無望咭，佢係幾留心d咭，見佢咁我同老公都好開心！點讀十張咭並唔需要太長時間，見Ambrose意猶未盡個樣，我地繼續再點讀俾佢睇，不過因為驚一次過要佢睇太多咭，我地再抽起其中五張重覆點讀一次就停左喇！雖然我地唔係用哂杜曼閃卡嘅方法，不過我地都認同係見好就收，响Ambrose未開始煩厭之前就停，希望可以引起佢對呢d字咭嘅興趣！呢五張咭，我打算同佢點足一星期先會再轉喇！

智慧寶寶 － 送左貨喇

上星期一已經落單，sales話一星期內會送貨，幾時會送係有人再打俾我通知喎！等左幾日都無聲無氣，有一刻覺得會唔會間野執左笠走左佬俾人搵左笨架！哈哈，我就係成日會向壞果邊諗先，係有少少杞人憂天！

星期日，終於有人打俾我confirm星期一送貨喇，果然好準時，話一個星期真係一個星期，不多不少。約左六點至九點之間送貨，重以為我放左工返到去會見到d貨，點知等到成八點九，個司機打俾我話佢响天水圍爆左車胎等緊人去救佢，佢好有禮貌咁話唔好意思，不過佢今日一定會送到俾我，我見佢都未到住就同Ambrose落去行惠康等奶奶可以沖吓涼休息吓喇！

一等就等到十點鐘，Ambrose都扭眼瞓，d貨先送到黎。都好，趁佢瞓左我可以專心點貨。首先係兩份贈品，一個字咭袋，一個係唐詩拼音書連點讀筆。因為係零零舍舍就咁兩樣野送黎，我就打開左個字咭袋先。一打開已經見到有一撻仔污物在個袋上，近睇應該係有少少霉左，我用左消毒濕紙巾去抺，好彩都輕易抺走，不過心裡面就覺得有無攪錯，咁污糟都有架，贈品都唔使咁吓麻。之後拆左枝唐詩點讀筆黎睇，攪左一大餐先入到電芯去試玩，點知一開就大聲到成個人彈起，拑極個細聲制都好似咁上下大聲，因為Ambrose介乎瞓與未瞓著之間，奶奶見咁大聲都撲出黎叫我細聲d，我見好似拑極都咁大聲，唯有用手遮住個出聲位先叫好少少。點讀左d拼音書同唐詩，都幾好，係枝筆略嫌輕身d望落去好似跌幾跌會散咁，同埋呢套野嘅書係全簡體字，我唔想Ambrose會有混亂，我諗都可能要自己動手加工吓轉番繁體字喇。

Check完兩份贈品我就開箱檢查套智慧寶寶喇。紙箱一打開係好colour嘅一個大紙箱，佢成個紙箱都係好colourful印刷，但唔知點解又有張一樣圖案嘅貼紙貼住包邊，果d邊位全部都貼唔實飛哂出黎，重要其實都唔係貼得靚，同埋好大塵，我忍唔住一邊用濕紙巾抺，一邊心諗有無攪錯，做咩好似d倉底貨架，入箱前都應該抺吓先啦，同dwe送黎果d一箱箱真係差好遠囉。打開左個蓋，就係四個手偶同公仔，可能我地之前都無咩點問套野實際包左d咩，真係唔係好知有幾隻公仔，同埋又唔知呢幾隻野係咩名有咩作用，見到就有d頭痛唔知可以收去邊。攞開公仔就係一兜一兜發聲厚配對咭同埋枝筆加火牛。見枝筆就咁一枝，又唔見佢話連埋嘅膠套，心諗唔通無？會唔會個sales呃鬼我原來係無架，再睇番個checklist，原來係有膠套同頸繩，好明顯佢地漏左俾我啦！攞開個大紙兜，下面就係果五百幾張揭揭咭同唔知幾多本嘅書仔。打開d書仔睇，都ok，係細本少少同好薄，好似揭幾揭就睇哂咁，不過由於我自己覺得成套野嘅重點係d揭揭咭，我都唔會對佢嘅書仔好大期望。

五百幾張揭揭咭要點都幾難吓，唔同dwe果d咭有兩個大紙盒有蓋入住重有index方便你搵咭，呢五百幾張咭係就咁放哂响度，無index。好彩佢d揭揭咭都有分類號碼同排序號碼，個checklist有列明咩分類有幾多張咭，我就就咁對每個分類總咭數啱唔啱就算喇！不過一路掃過去都有發現有 一兩 張放錯左位同double攝住左。睇黎到我開始真係用嘅時候，一定要換走佢個核突紙箱再自己自製index至得喇！

到點果六十張厚紙發聲配對咭喇，個list係show哂邊六十樣野，唔點由至可，一點真係有d勞氣。果六十張咭分別放左响三個厚紙兜度，無蓋，最緊要係佢無分號，同埋係亂放一餐，我一路點，一路對番個checklist搵番果樣野黎tick，眼都花埋。再有就係，鬼死咁大塵，點完哂成手都“鞋十十”呀！再有就係我發覺呢六十張咭唔知佢地用咩criteria抽出黎喎，有顏色，不過只係得兩隻色；有中國字嘅一二三，不過又唔係齊哂十個數字又唔係順序架喎；有形狀，都係果句，得 一兩 種！做咩唔集中幾個主題去做呢d配對咭呢？一樣一d咁好似好亂！不由得個心會諗人地dwe真係貴得有道理架，某程度上有一刻會覺得呢set野，四千幾都嫌貴左呀！不過再睇番果d揭揭咭，都叫係過膠面，有圖有字有拼音，自己都好難同無心機整啦，重有埋枝發聲筆，自己又唔識普通話，咁個心都覺得呢四千幾蚊都係要花嘅，如果Ambrose真係學識哂呢五百幾張咭嘅字，咁呢四千幾蚊又唔係使得貴嘅，係佢packing唔精美囉，咁嘅價錢都唔可以要求太高喇！

不過最最最激氣都唔係果d飛邊同大塵，而係佢地竟然將果八張（定七張）海報捲埋一卷，當我地一打開卷野，成卷又自動捲番埋，就算我地反捲番，果d海報真係捲到無倫，點整都唔直，重要我地反捲番又會令張海報有痕，有少少皺！真係唔明佢咁樣俾d海報我地究竟想點，呢d海報唔係suppose周屋貼俾小朋友睇架咩，咁難都捲唔番直又點貼呀？玩咩？！我地唯有好辛苦將d海報攝响地墊同地之間，希望“扎”多佢幾日會直番啦！

而家就等枝筆差好電試吓點咭work唔work，再要追番個膠套同頸繩，最緊要係佢話寄個schedule都未收到，真係要打去“咋型”呀！

連續兩個月

Ambrose之前每個月都一定至少要去睇一次醫生，潺仔搴因而得名。佢自從五月尾因為食左蛋有敏感要去睇醫生後，到而家，已經係連續兩個月無睇過醫生喇！真係好叻！希望佢可以繼續，同埋希望佢八月尾打一歲針可以順利過渡啦！