自從九月以黎，媽咪都斷斷續續俾Ambrose用較剪剪紙，雖然唔係成日做訓練，但Ambrose表現其實都唔錯，佢明白到較剪開合原理，點揸較剪剪紙，只係佢一直都唔識得自己一手揸住張紙一手揸較剪去剪，次次都係媽咪代勞同佢揸住張紙俾佢剪！
其實好耐都無同佢再剪紙喇，今晚忽然又興起，又再攞zebra較剪同紙張出黎俾Ambrose剪。媽咪今次鼓勵Ambrose自己試揸紙，佢唔肯，死都要媽咪揸住俾佢，媽咪再提議將一張A4 size嘅紙剪成一半俾佢自己揸住，今次佢又肯喎！就係咁，應該係張紙細左，佢比較容易控制張紙唔會“墜”左落去好難剪，佢竟然自己可以由頭剪到尾將張紙剪到一分為二，Ambrose自己剪到超開心，亦因為剪到嘅關係，佢就開始不斷剪喇！佢重要好叻，一路剪，一路隻手見就剪到就識避開，唔剪到手，真係好神奇呀！
下一步，媽咪可以訓練Ambrose剪指定嘅直線喇！
今晚Ambrose好攪笑，媽咪上完網入房準備瞓，點知佢無啦啦企左起身跳吓跳吓，喊住話要vivi，媽咪隱約見佢都好似開左眼架！不過見佢呢排成日出去拜年同玩，好似瞓少左晏覺，夜瞓又晏起身，諗住佢咁攰，又諗住佢唔知會唔會忍唔住vi左落片度又發顛，所以媽咪抱起Ambrose去potty度vivi。Ambrose本來上半身都枕在媽咪肩膀上，去到potty度當然係要企响度vivi啦。媽咪幫Ambrose整好條褲，就叫佢可以vivi喇，點知開始都重無咩野，唔夠十秒，媽咪已經感覺到Ambrose上半身重重咁壓响媽咪度，媽咪心諗，唔係吓麻，企响度vivi都瞓著左？！由於Ambrose係枕响媽咪肩膀，媽咪其實睇唔到佢開眼定閉眼，單憑佢成個人嘅力挨落黎估佢瞓左！但佢重vivi緊架喎，真係好笑！瞓著覺都有知覺要起身vivi唔痾落片度！
最後媽咪幫Ambrose著好褲，抱返佢上床，佢已經瞓到成隻豬仔喇，真係服左佢！
一直都無諗過要為Ambrose報芭蕾舞班，一來好少聽見男仔學芭蕾舞，二來媽咪其實覺得佢學功夫更有潛質，好難想像Ambrose學芭蕾舞個樣！之前媽咪去探朋友，發現朋友個仔本來都怕怕羞羞，今次見佢好似好左好多咁！朋友話俾左個仔去學跳舞，重join埋小演員，不時去表演同比賽，可能係咁個人自信左！大家重即席要個剛瞓醒覺嘅三歲幾小朋友表演，只見佢一聽到音樂已經識得跳舞！跳嘅又唔太似芭蕾舞，只係搖手fing腳擰pat pat轉圈，但佢完全跟到全首歌，令在場人士都覺得好神奇呀！媽咪見到呢個小朋友跳舞又唔係好女仔咋喎，又覺得Ambrose又係一d慢熱怕羞嘅小朋友，所以對於學芭蕾舞又有少少興趣喇，反正Ambrose成日都响屋企跳舞架啦，可以考慮俾佢試吓，練吓個膽都好喎！
就係咁，問朋友攞左資料，再搵埋二表姐一齊去學，今日試堂！本來媽咪之前擔心一個上午要Ambrose試完畫班再試跳舞班好似好難為佢咁，怕佢唔肯獨立上堂，但畫班嘅出奇順利令媽咪信心大增！果然，跳舞班又係好順利咁自己跟老師入課室，太好喇！由於課室有布簾遮住左一大半，媽咪同姑姐只可以好鬼祟咁“莊”佢地上堂，費時俾佢兩個見到分心！
只見兩表姐弟都算投入上堂，係有時會痴埋一齊企，要老師分開。見到老師要小朋友圍圈跳跑，Ambrose好開心咁，但次次都見佢跑到某地方之後唔見佢同表姐跑出黎，甩左隊，哈哈！唔知佢兩個攪咩？！老師之後分組，要圍圈開車買朱古力拜年喎，開車要對手不斷前後轉，似乎Ambrose未協調得好好，不過都算係咁啦，有聽指令去做！
由於實在“莊”得太辛苦，兩表姐弟上堂應該無問題，所以媽咪同姑姐都離開喇，去睇吓其他興趣班嘅單張比較吓！
落堂時，見Ambrose面仔都紅哂，可能又跑又跳有d熱啦！問Ambrose開唔開心，佢話開心，問佢學左咩，佢又無出聲！媽咪去問老師，兩表姐弟上堂情況，老師話表姐成日都要痴住Ambrose，佢地太熟，所以要不時分開佢地，哈哈哈！不過佢話Ambrose好少少，大部份都聽指令囉，媽咪都知佢應該無太大問題架喇，重會幾鍾意跳舞添！不過媽咪無即時交學費繼續學呀，因為當媽咪見個個小朋友套芭蕾舞衫都靚靚咁，已經覺得套衫唔平，上完堂問過老師，一套衫連鞋唔包外套要成四百幾蚊，男仔重要貴過女仔果套，重要少咁一件，好貴呀！如果買埋件外套，加多百幾二百蚊，成套衫加埋要六百蚊呀！媽咪感覺上投資好似好大咁，萬一學多幾堂Ambrose無興趣咁套衫真係好浪費喎！再加上媽咪一心想Ambrose學畫畫，再大少少就學樂器同功夫，跳舞其實玩玩吓成份多，無諗過要佢長學同埋考試，六百蚊買套衫只係玩玩吓，加埋學費實在太貴，要再諗吓囉！
媽咪之後都不時問Ambrose學畫畫開唔開心，學跳舞開唔開心，佢兩樣都開心，問佢學邊樣好，佢又答學畫畫，“之後”學跳舞，哈哈！夜晚返到屋企，再問佢學跳舞學左d咩野，佢竟然識講話攞隻腳仔出黎咁咁咁！爹爹見到就話咁真係要學喇，唔好諗咁多，就六百啦！
不過，媽咪重要考慮囉，要搵吓邊度有平d嘅芭蕾舞班先！
見Ambrose對畫畫有興趣，又鍾意做手工油顏色，所以媽咪一直都想幫Ambrose報畫班，不過始終佢年紀細，出面畫班好多都要三歲以上先得，所以媽咪一直等一直搵！終於，媽咪搵到一間收N班小朋友嘅畫班喇！因為畫班唔係親子，要小朋友自己獨立上堂，一上又係一個鐘咁耐，媽咪擔心Ambrose未必肯，所以只係同佢報左一堂試堂，睇左佢情況點先至決定！
今日一早起身就去上畫班，因為新年關係，中心都唔多小朋友上堂，計埋Ambrose只係得三個人，而Ambrose係最細嘅！同Ambrose著左手工衣，佢有少少怕羞咁企左响個位度唔坐，媽咪真係擔心，唔知呢堂會唔會告吹呢？好彩過左一陣佢就ok喎，坐定定等埋其他人一齊上堂！中心其實好細，只係一個商舖大細，一行入去就已經係上堂地方，門口玻璃貼有中心海報，但仍可望入去睇到上堂情況！
今堂老師教畫龍，不過明顯Ambrose太細唔係好跟到老師，老師要再三教佢點畫，可幸是Ambrose都有反應，唔係一碌木咁坐响度！有 時 老師可能叫佢攞指定顏色出黎，Ambrose有時都要攞 一兩 次先啱，都好嘅，順手學埋認顏色麻！眼見其他兩個小朋友都畫得ok，人地真係畫一條龍，但Ambrose果條又細又幼，成條蟲咁嘅樣，媽咪都忍唔住隔住玻璃笑左出黎！哈哈哈！最攪笑係老師教佢畫龍兩邊面，要成“Z”形咁畫，但Ambrose似乎完全get唔到，佢停左响度發夢，之 後 老師再教，佢又唔多明，又走左去畫龍額頭，攪到條龍有“蔭”咁，不特止，佢可能太confused唔知點畫，重用手托住個頭，好似好煩惱咁，超攪笑！
畫完條龍，老師俾活動眼睛小朋友痴上，Ambrose無問題，一見已識做！之 後 老師俾左張錫紙小朋友，要小朋友撕成細片再痴上龍身。但Ambrose撕紙唔係好得，見到佢攞住張紙用九牛二虎之力去搣，面仔都紅哂都搣唔到，真係又可憐又可笑！老師其實都唔係好理到佢，同埋都睇唔到佢有困難，最後Ambrose都勉強搣到，但張張都大大張咁貼上龍身，笑到媽咪死死吓！
整好哂之後，老師就幫小朋友剪條龍出黎，再整埋觸鬚，再剪開後落活動釘，加兩條幼幼飲管就可以舞龍喇，呢個手工又真係幾特別喎，做完又玩得，唔錯唔錯！
媽咪全程都企左响Ambrose前面嘅玻璃度睇佢上堂，只有幾張海報貼住，但Ambrose全程都睇唔到媽咪，可想而知佢係幾咁專心上堂！最後，媽咪都有幫Ambrose報左下個月嘅畫班，即時攞埋個畫袋袋住條龍！
總結：呢堂整龍真係幾好，不過唔知係咪因為新年，所以只有一個老師在中心內，今日只有三個小朋友都可以，但如果八個小朋友都齊哂，一個人好似handle唔到咁多咁！今日係第一堂試堂，驚行開左Ambrose唔肯會想走人，雖然門已關上，但都有少少怕佢會走到出黎，加上Ambrose只係著左底褲仔入去，媽咪一諗起佢可能有機會想去vivi，得老師一個人可以點攪呢？所以媽咪唔敢行開囉！希望過埋年再上堂會多個人睇頭睇尾啦，至少有小朋友想去廁所都有一個人可以帶到去麻！雖然話有人手同中心太細好似好易走到出黎問題，但媽咪欣賞老師唔會因為要交差而去幫Ambrose完成畫龍，佢真係俾佢自己黎，無點幫過佢，不過實情又可能係佢都忙於不斷攞手工材料出黎，所以佢都無時間理Ambrose咁多，如果之後真係返齊八個小朋友，唔知情況會唔會重差d，所以媽咪雖然報多一個月畫班，都係抱住個心態係試多幾堂睇真d情況先至決定繼唔繼續响度學落去，反正又唔算好貴，買左嘅畫薄同油粉彩唔再上堂都可以在家玩，唔算投資太大丫！
趣事一則，落堂 時 老師叫小朋友將手工衣除左收拾入畫袋度，但Ambrose試堂無畫袋，佢竟然自己除左之後走埋去對面個同學仔度，將自己件手工衣塞入人地個畫袋度，笑死媽咪喇！
今日同Ambrose落左樓下睇舞獅，佢就開心啦，睇完表演，再去左幾幢樓睇醒獅同接生菜，全程都係媽咪抱住佢咁濟，結果，一條蔥都接唔到，媽咪抱住咁重嘅Ambrose手都震埋呀！不過媽咪有排隊攞燒肉同米線，叫做攞左少少意頭野啦！响樓下擾攘左一輪，返到屋企爹爹就瞓醒喇，佢提議去西貢，Ambrose可以去踩單車喎！
原本就諗住一家三口去，點知最後係十個人去，架車迫爆左！本身攞左架三輪車同滑板車去，但兩個表姐加Ambrose就三個細路，有一個無得玩，果個一定係二表姐啦！出發前已經同左Ambrose講要佢借部車俾表姐玩，開頭佢唔肯，之後佢話佢踩廸士尼（米奇三輪車），佢會借滑板車俾表姐玩！果然，佢一到步就急不及待坐上架單車上面，死都唔落地，哈哈！而大表姐當然就係玩架滑板車啦！無法啦，大表姐同Ambrose一向都好霸道，好難叫佢地讓玩具出黎，尤其是三個人得兩架車時，真係好煩！好彩二表姐一向都逆來順受，又無扭計要一齊玩，總算平靜！
西貢人多，其實都好難玩滑板車，踩單車都重還可以，事關滑板車太滑，大表姐又掌握唔到，成日橫衝直撞，好危險！因為有兩個小朋友玩車，所以我地行得好慢，由停車場行去碼頭位置都用左好多時間！之後大表姐扭住要搭船，但媽咪有少少保留，驚住架船好似上次去大澳睇中華白海豚果d船咁，勁貼海同勁拋！而且，搭得船好似係去地質公園行，媽咪真係麻麻地，又悶，又湊住三隻小鬼，真係唔想攪咁多野囉！不過Ambrose其實都好鍾意搭船，大家為左滿足呢幾隻小鬼頭，同船家傾左，只係純遊船河唔上岸，亦唔想遊太耐，所以最後我地就遊左半個鐘咁大把，哈哈！
班細路就開心啦，又踩單車又遊船河，之後重走左去掃街（响街邊食燒賣魚蛋）！食埋個海鮮餐，西貢半天遊就完滿結束喇！Ambrose今日大滿足，又睇舞獅又踩單車同遊船河，好充實呀！
唔記得左寫行年宵添！今年年宵又近屋企d，唔想同人迫餐矇，都係同Ambrose下午行過去兜個圈睇吓！臨行前樓下保安姨姨叫我地買番隻狗仔汽球俾Ambrose玩吓啦，$30好抵，佢話好多小朋友都拖隻返黎喎！
去到年宵市場，好細，比上年嘅位置細左好多，成個市場好大地方都係賣花嘅。我地唔睇花，姑仔老公開花園，我地都唔會買，亦唔鍾意放，所以呢part成part可以唔行。除左花，好大地方嘅係撈金魚，雖然有一刻媽咪都想俾Ambrose玩吓，但一來媽咪好怕果d水好污糟，撈金魚一定會掂到水，陣間抺到落個口同眼就唔多好；二來媽咪同爹爹都覺得撈金魚係幾慘架，d金魚。玩果刻咪開心囉，要攞番d魚返去養就煩，d魚好易養死，雖然唔撈佢地，佢地都唔會長命得去邊架喇，不過媽咪爹爹總係唔想做呢個兇手囉！所以，都係睇人撈左一陣就走喇！
乾貨區，得幾檔，真係一眼睇哂咁濟！差唔多間間都有汽球賣，爹爹問左一間要$40一個，唔買啦，保安姨姨話$30一個之麻。過左對面果檔再問，真係$30，咁就買左一隻俾Ambrose，佢鬼咁開心，真係以為自己拖住隻狗，一路行，一路望後面隻狗，好傻豬呀！
成日都唔記得寫低Ambrose幾時學識左d咩野，呢個媽咪真係好唔細心呀！
無寫低Ambrose第一次識踩三輪車係幾時，都係靠記憶去推斷番，Ambrose應該响十月左右已經識向前踩幾步，之後就係識自如咁向前踩，要轉彎就成個人同架車搬起一齊轉，到大概兩星期前，佢已經可以踩住自己轉彎，可以話係好自如咁踩單車喇，咁計落佢應該係二十六個月開始識，二十八個半月已經靈活操控到三輪車喇！見佢學得好似好快咁，爹爹今日買左個滑板車俾Ambrose挑戰吓，呢架滑板車係由一塊滑板加一枝桿組成，控制轉左轉右並唔係好似單車咁就咁轉枝桿，而係對腳踩响滑板車上，由對腳嘅偏側黎控制轉嘅方向，其實都幾難，因為平衡要好，如果唔係就成日會側死一邊，行唔得遠又快跌！由於滑板車都滑得快又易失控，都要買埋個頭盔俾Ambrose至可以俾佢玩，唔係一定出事！
今日試玩，Ambrose都好鍾意，不過睇黎佢會比起三輪車學得慢d喇，因為都真係幾難吓，加上Ambrose仍然熱愛三輪車，應該會熱愛一輪之後先慢慢會想鑽研滑板車架喇！
今日發生左件事，爹爹話覺得Ambrose自尊心係超強！
Ambrose一向vivi都可以示意到俾我地知，極罕有會失手，記憶中佢只有一次同兩個表姐玩到顛哂突然間話要vivi就即時vi左，就係呢次濕褲咁大把！月頭同佢返學都著埋褲仔，亦從未失手過，日日都可以著校服放學，好叻仔！
話說佢今日去拜年，又同表姐玩到顛哂，點都唔願瞓，由朝早起身開始就玩，直踩到黃昏六點幾七點。見Ambrose實在太攰，開始郁吓都扭計喊，爹爹捉左佢入房瞓，撳住佢唔夠五分鐘就豬左，可想而知佢幾攰！到唔知幾點佢起左身，可能無人陪佢瞓，起身之後又發現唔係熟悉地方，又喊到飛起，由於要等人未食得飯，爹爹就整左個蘋果俾三表姐弟一齊食，一人一兜坐响地下食得好滋味！突然間Ambrose暴喊，大家嘅矛頭都指向坐佢隔離嘅大表姐，以為佢又唔知又攪喊Ambrose，不過大表姐話佢食緊野掂都無掂過Ambrose，唔關佢事，我地好出奇有咩野會令到Ambrose食食吓心愛嘅蘋果都喊到咁慘，大家以為佢咬親個嘴！爹爹行埋去想話呵番Ambrose，一抱起先知道原來佢瀨左尿呀！重要果灘尿都唔少！爹爹一手抱起Ambrose去廁所善後，Ambrose一路喊得好悽慘一路話“我瀨左尿呀”，真係好鬼慘情！爹爹一路氹佢唔使驚一路話無事，但Ambrose都唔理，喪喊到收唔到聲！媽咪氹佢收聲出去食蘋果，佢都擰哂頭唔肯，只係不斷話“我瀨左尿呀”，雖然聽落好悽涼，不過諗落又好攪笑，使唔使咁慘呢？！所以爹爹同媽咪嘅結論係佢有超強自尊心，唔容許自己失手，尤其係咁多人面前失手囉！
下次瞓醒覺，真係要記得問佢使唔使去vivi喇，唔係佢瞓未醒唔識示意。今次佢失手，爹爹媽咪都有責任嘅，瞓前又無同佢去vivi，瞓醒又無問佢去唔去，攪到佢吽吽哣哣食蘋果唔出聲去vivi就瀨左喇！
今日同呀媽覆完診，個心都幾“up”，總係覺得自己唔係好孝順咁，以前已經唔係成日陪佢，今時今日有埋Ambrose就更加困身，新年就到自己都無時間去剪頭髮，莫講話陪呀媽！至慘係就算我肯辛苦少少帶埋Ambrose出去陪佢行街街都唔得，因為要捉住Ambrose就自然好難兼顧呀媽，呀媽係要繞實至得！所以如果唔放低Ambrose自己出去，基本上我都唔可能一個人睇一老一嫩！所以雖然呀媽都有埋怨過我無同佢行街，但我都無辦法！
今日難得病假陪佢去睇醫生，咁就順便同佢行吓吉之島，想買對波鞋俾佢。不過吉之島真係人來人往，多人到要拖實呀媽行都好辛苦。最後我決定左直接行去允記睇波鞋，唔好行黎行去喇！一向同呀媽買野都好煩，佢呢樣又話唔好果樣又話唔好，總之，唔明佢點解有咁多criteria！今日去買波鞋都係搵自己笨，因為臨近新年，人人都去買鞋，波鞋舖更加係人頭湧湧！响允記入面轉黎轉去真係唔易，攪左一輪都無咩邊對特別啱心水，又同佢去左對面馬拉松睇！攪左一輪終於都搵到對啱心水嘅試，點知試左又細得濟，大多個碼都重係細，再想試大多個碼已經無喇！重要當初無預試鞋，呀媽都無著襪，試試吓要同佢走去買襪，人又多，真係一片混亂！好喇，無碼都唔知點算，因為又要由頭再揀過！又係揀左一輪，想話同呀媽去返允記睇，好彩又發現到之前試果對同款有另一隻色啱心水，唔行喇，有碼就即試埋啦！試啱左就即俾錢走人啦！
其實近新年，間間波鞋舖都做緊全店八折，我都無為意有d係無折嘅！到我去俾錢時見到佢無計折俾我，我問佢佢就話我果對無折，我都覺得好奇怪，唔係話全店八折咩？不過實在擾攘左好耐，都試啱左，費時又攪過喇，俾完錢就行！不過去到門口都忍唔住叫呀媽企定定等我，我行去睇吓d海報，真係寫住全店八折，除左公價貨喎！咁我咪又行去貨架度睇囉，原來貨架上幾乎所有波鞋都扣住個牌寫八折，唯獨是我地買果對係無架，再望吓成間店嘅鞋，講真，真係無咩邊對係無牌掛住架喎，我地真係咁好彩，咁多對都唔揀，竟然揀左對無減價嘅波鞋，唔話自己有品味都唔得，哈哈！
今日攞左病假同呀媽覆診，無法啦，夾左成個月都夾唔啱一日同佢去睇眼，本來諗住上次都無咩野，今次去都係去望一望同配眼鏡，等到二月先睇啦，點知呀媽突然落order話要盡快睇醫生，因為佢話隻眼近一個月都成日眼濕濕勁流眼水，佢驚手術傷口有問題喎，佢落旨當然要即睇啦，邊等到丫？！
去到診所，姑娘先同呀媽驗眼，又係望住個營螢光幕，睇一個超大英文字，都睇唔到，我都預左架喇，第一次同呀媽黎驗眼，佢已經係咁，當時真係好驚訝，而家已經唔會喇！姑娘可能都知道睇螢光幕字都無咩用架喇，所以都即時放棄左，轉而係行去呀媽前面少少位置舉起幾隻手指問有幾多隻，見到咁樣其實都真係幾心酸，有時都想問點解次次都係我去陪呀媽去睇醫生覆診，次次都要我受呢d咁令人心酸嘅野？唔知點解今次舉手指，呀媽好似好多都見唔到答唔出同埋答錯，其實姑娘只係企响呀媽前兩三尺，幾多隻手指都答唔出，真係唔知呀媽平日係點樣去買餸煮，又係諗起都心痛！原本我以為只有我覺得呀媽好似未做手術前睇手指答得好少少，出左黎之後連呀媽自己都話點解好似之前答得好d，今次差咁多咁！我都無言以對，又唔想令佢唔安樂，唯有就話都係差唔多，可能隻眼成日流眼水先至係咁！呀媽話咁其實都唔使配眼鏡啦，因為根本都幫唔到！講真，驗完眼我都覺得係，其實有無都無分別，配黎都好似好浪費錢咁，但唔通咁樣同佢講咩？唉！
入左醫生房，一講話流眼水問題，個醫生即時望吓佢對眼，即時話傷口無問題，佢話呢排佢有好多病人返黎都係話有流眼水問題，佢話係天氣太濕喎，其實都唔係好明點解天氣濕就流眼水咁攪笑，同埋點解只有做左手術果隻眼至流呢？醫生只係話如果我地再唔理另一隻眼都係咁，就咁就帶過左喇！不過我忍唔住同醫生講話呀媽隻眼好似睇得無之前咁好咁，醫生又話無可能！咁我一直都明做左手術唔會好幾多，只係有個希望d野光多少少啫，只係無諗過會差左囉！而家唯有希望呀媽清番眼水之後隻眼會好d啦！
呢本sticker book係兩、三個月前俾Ambrose玩嘅，佢一路貼一路咯咯笑，可能佢都覺得d眼耳口鼻好funny，係咁一路笑唔停，蠱蠱惑惑！
呢本Flying High Sticker Book係响上次灣仔書展買嘅，d貼子話係reusable，重要係飛機主題嘅，啱哂Ambrose！最主要嘅係，當時只係賣$10，媽咪見書底重貼左三聯張$25價錢牌响度，平左咁多，想搵多一本都無呀！
Ambrose細個都好鍾意玩貼紙，曾經有段時間佢朝朝都要媽咪俾貼紙佢玩，不過媽咪入左好多貨後，Ambrose就唔多玩喇！媽咪以為佢對貼貼紙無咩興趣，點知又唔係喎！原來佢唔多鍾意無目的咁貼貼紙，如果有目的，咁又唔同喎！早排同Ambrose做功課，其中一本功課係需要佢搣貼紙貼落指定地方，Ambrose好比心機去貼。今晚，Ambrose又話要做功課，佢話要貼貼紙，媽咪諗起呢本sticker book，所以攞出黎同佢玩！
呢本以飛機為主題嘅sticker book真係好吸引Ambrose，原本媽咪只係諗住玩一、兩頁，點知佢係都要做哂去至安樂！第一頁係搵番啱嘅飛機影去貼，Ambrose都貼到，重要知道要將張貼紙成張遮住個影唔露出黎，醒！不過佢搣貼紙嘅技巧真係要多多練習，教左佢將張貼紙摺一摺，咁張貼紙就會彈出黎好易搣，但佢就成日都唔知究竟响邊摺，攪到d貼紙唔彈起又話唔得；一係佢就整起左張貼紙，但搣出黎嘅時候又唔alert自己隻手指撳住左貼紙部份，攪到一搣出黎時張貼紙又一分為二，哈哈！
唔知點解媽咪覺得Ambrose細個玩影子配對好叻，果時都唔明佢點解咁都知咁都識，今晚同佢玩呢本sticker book，其實好多都係影子配對原理，但佢就真係要花少少時間去搵，無細個時反應咁快！呢本sticker book，佢做得最好嘅係In the sky（shapes）同埋S.O.S果兩頁，唔需要提示咁濟！哈哈！不過粒星星就貼得差d，教左佢角對角咁貼，佢左扭右扭想對正貼但都係貼唔準！貼數字果頁，似乎佢只係認得“2”字，其他數字都係亂估亂撞，要媽咪教先貼啱！不過飛機隻數佢就可以自己貼啱哂，當然係因為佢認住d飛機樣去做matching多過知道“量”啦！最後顏色果頁，真係俾Ambrose激死！早幾日至同佢油Kumon Workbook，果晚問佢咩色，要搵邊枝顏色筆佢都答啱哂攞啱哂架，今晚要佢做呢頁，只係將相同顏色飛機貼上彩虹相應顏色度，重要有埋個飛機影可以配對到，Ambrose都好似亂黎咁，都唔知佢係唔識定玩野！！！
本sticker book 中間果頁係自己create場景，Ambrose好醒，一攞起就搣左架車出黎，貼响跑道上面，之後搣架飛機出黎，已經知道係貼响天空！由於飛機貼紙太多，媽咪叫Ambrose貼架飛機落水池度，佢問，架飛機跌左落水呀？哈哈！果然知道飛機要响天空唔應該响水度！不過媽咪話有d飛機可以降落水上面架，佢就自己攞左一隻再貼落水度，之後又話跌左落水，重响度笑添！
鍾意呢本sticker book嘅紙質，滑面，Ambrose貼得唔好，佢自己都會搣番起再貼番靚，所以滑面真係好方便！如果係平時嘅sticker book，一貼左少少落去就好難起番張貼紙出黎，一定要大人幫手先可以搣到唔爛囉！想搵吓有無類似嘅書，又搵唔到喎！
