Sing Along CD Player

之前行Itsmagical見到部portable嘅CD機連兩咪可以唱歌仔，好似幾好玩咁，不過要$699，好貴呀，即時唔會諗啦！之後Wing姨姨買左，Ambrose都有試過，不過可能當時Ambrose唔好話唱歌，連講野都唔多識，所以佢都只係揸住個咪發呆，就係咁，媽咪更加無諗住會買！

 

Ambrose返左學之後，講野真係多左好多，又成日唱歌，簡直係成日開演唱會咁，哈哈！早排姑丈買左兩枝真咪俾兩個表姐，Ambrose竟然已經識爭咪唱，所以爺爺專登攞左兩枝咪俾Ambrose，一枝放响屋企，一枝放响姑丈度，減少爭咪機會！不過其實佢地唱歌，係要求唔整走人聲跟住唱，如果一無聲，佢地就唔唱架喇！媽咪有感成日望住個電視唱歌仔唔係幾好，現階段小朋友都唔識睇住歌詞黎唱，所以有無得睇住電視其實無影響，所以媽咪忽然又諗起Itsmagical果部Karaoke機，不過真係得個諗字，咁貴，又有真咪可以唱歌，唔知爹爹會唔會話無需要買！

 

今日去左Mega Box行街街，竟然俾媽咪見到呢部Sing Along CD Player，外形簡直同Itsmagical果部一樣咁濟，只係Itsmagical果部係白色撞綠色，呢部只有粉紅色！望吓個價錢，原價都只係$450，特價$360咋！即刻問吓爹爹意見，佢竟然都話好，嘻嘻！就係咁，雖然部機係粉紅色，大家都無異議，即時揀左機面花紋係花花而唔係心心，睇落無咁女仔就算，哈哈！

 

結果，Ambrose真係好鍾意，係咁點唱！

 

媽咪當然有睇番Itsmagical本catalog，睇吓部機係咪真係一樣！原來外形係完全一樣，只係Itsmagical有一邊機身重有排製，媽咪估可能係收音機嘅轉台製，其他真係無咩大分別！不過呢部係可以插濕電，但原來火牛係唔包嘅，而Itsmagical果部係包埋嘅！咁計番其實Itsmagical唔係話真係好貴嘅，不過媽咪只係想要Karaoke功能，有無收音機又真係無所謂，所以平d但無收音機真係再好不過啦！只係要去買番個火牛先得囉，因為乾電要六粒中圓電，Ambrose心急要玩之下，爹爹去左買電，盛惠$60，都幾貴！當然，用乾電就真係可以portable，係方便d嘅！