Marriott Vacation Club簡介會

11年12月尾，突然收到Marriott嘅staff打俾我，話有個簡介會想邀請我去！原本呢d唔知咩推廣電話，我一聽完間公司名後一定會同佢講唔需要，之後就唔理佢講咩野同埋講完未，我一定會收線，係就係無咩禮貌，不過佢地都無問我方唔方便就一輪咀講，真係好乞人憎架麻！之但係呢日我聽到係Marriott打黎時，我無即時收線，重好有心機咁聽佢講野！因為早响成年前我已經聽聞過，去Marriott嘅簡介會，係會有禮物，通常會係幾百蚊嘅cash coupons又或者酒店住宿，好多人都話去一去聽就有禮物攞，真係唔錯！聽就耐唔時都聽過，但呢d電話又真係從來都無收過，哈哈！果日一接到呢個電話，都幾開心架！個staff同我講今次禮物係$500 cash coupon，而個簡介會只需90分鐘，不過就要同伴侶一齊去囉！最後，我梗係為左呢$500，一定要老公同我去啦！

 

不過其實約左時間後都有驚過上去都係俾人sell野多，唔知會唔會好煩同好難甩身，我特登上網search過，見人話其實都ok唔會hard sell，唔會走唔到，咁我都放心d！

 

Marriott Vacation Club係咩，當然我都有睇過吓人地點講至上去聽，唔係人地真係sell我野我都唔知咩黎就唔多好啦！Marriott Vacation Club其實係sell會藉，買左佢個會藉（唔同分數），就可以每年去旅行住酒店唔使錢，佢地呢個係“分時渡假”concept！一個one off 嘅價錢就可以成世（去到2056年）旅行住五星級酒店唔使錢，諗落都知唔係平啦，所以都好放心去呢個簡介會！

 

當晚同老公上到去，有個女sales出黎同我地傾計，言談間都有問過吓我地嘅工作，可能係摸我地底啦！佢一直都話我地後生，不過我同佢講出面嘅staff已核對過我地身份證，我地年齡係絕對fulfill到黎呢個簡介會嘅requirement！唔知係咪見到我地嘅style唔多似會buy佢地嘅concept，同埋知我地有個兩歲嘅小朋友，呢個sales都唔係好aggressive咁介紹佢地個club，感覺上佢好求其，成日都有dead air咁！係咪佢都知我地唔多啱，但我地上得黎公司都要佢地做足90分鐘野呢？感覺上真係sell得麻麻地，加上呢個會藉對於我地黎講又真係無需要，一來我地都唔會下下住貴酒店，二來我地都要睇番去邊度地方至決定住邊度方便，join左會咪即係一定全住佢d酒店至得？好似好煩咁，又要早d去book位，真係得個攪字！

 

不過一場上去，除左去攞禮物，都係當去見識吓，知多樣野囉！講完左一輪就埋位坐低到戲肉，sales提出左三個plans俾我地，佢話最低plan啱我地一年去兩星期旅行，佢一路講左好多數字出黎，我呢個數字白痴真係接唔住佢講咩，見老公都明，重有提問，咁即係我唔使明啦！哈哈！不過講完一輪，我先知係以美金計，佢sell我地果個plan，係$57,000美金，即係四十幾萬港幣！！！唔係麻，我上去之前以為只係sell十幾萬嘅野，都已經諗住唔會幫襯，而家佢講緊嘅係四十幾萬，佢地唔係覺得我地就咁上黎聽一聽佢講幾講，狂問你想去邊度旅行，咁就會落搭俾四十幾萬佢地麻？！

 

女sales可能都知我地無心同唔係佢地嘅targeted customers，所以佢無hard sell我地，行左出去話俾我地傾吓先喎！不過有咩好傾丫，去之前已經唔覺得有需要參加，去完知道咁貴就更加唔會啦，所以見個女sales行左出黎都叫住佢，話我地覺得貴同無需要，佢都好爽快咁話無問題，咁就再叫左個經理黎簽禮物俾我地。當然，呢個經理又點會放過最後機會丫，佢再counter offer左兩個再平d嘅plans俾我地，不過可以去旅行嘅日子就少左，其實平左係無咁著數咁，但對於我地黎講，唔係完全係錢嘅問題，而係真係無咩需要同興趣，有錢留俾Ambrose讀書上興趣班好過啦！個經理講完之後，都話俾時間我地傾吓，不過今次老公就一口話唔使喇，經理都好坦白問我地如果有十分，我地興趣有幾多？估唔到老公真係好決絕咁話介乎1-2，個經理一聽，無野講，直接簽埋禮物俾我地出reception攞！其實老公話佢都buy佢地個concept，同埋認同係抵，不過無情情攞幾十萬出黎，响呢個時候係唔啱timing囉！起碼Ambrose重咁細，讀書又未定到路向，真係好多未知嘅開支。同埋可能再過幾年到佢大左，要同我地旅行分床分房瞓時，咁呢個會藉就有用喇！

 

呢個經理，我就無咩好感架喇！佢响我地同個女sales傾野時入過黎一次，見我地買左張電墊，就問我地响邊買同幾錢，我答佢話係HSBC換購返黎，只係$400，佢就話佢都响Sogo買左一張千幾蚊，我同佢講我果張响Jusco賣緊都千幾蚊，佢竟然問我張墊made in邊度，好乞人憎囉！佢係咪覺得我地張墊係cheap野，係made in china先咁平呢？我真係好想問佢麥佢唔知HSBC全城熱購緊呢張墊咩，點解咁蠢走去買張千幾蚊嘅！呢d人咪狗眼看人低囉，以為我地買換購嘅野就好cheap，以為我地俾唔起錢咁（雖然都係，哈哈）！重有，呢個經理一知我地小朋友讀幼稚園就已經問我地讀邊間，好似佢識哂所有幼稚園定佢覺得我地一定會俾佢讀名校？我即時一句“得”埋去話講你都唔識啦！哈哈！除左個經理麻麻地之外，女sales雖然唔太想sell我地咁款，但都有禮貌嘅，所以我地都會有少少唔好意思嘅感覺，不過要做幾十萬生意，就預左唔係個個上去都會買架啦，我又覺得無話邊個阻邊個時間嘅！最出奇嘅係，佢地個receptionists真係超好笑容同有禮貌，感覺真係好好囉！

好順利用左個半鐘時間聽完個簡介會攞埋coupon就走得！超開心！