Harry哥哥與狼

今晚帶左Ambrose同Ellen姨姨及浠浠一齊去睇“Harry哥哥與狼”，因為係八點鐘開始，而媽咪放工返到去最早都七點喇，所以拜托爹爹湊Ambrose出去同Ellen姨姨及浠浠搵位食住晚飯等媽咪返黎！原本諗住媽咪一到，爹爹就功成身退，點知爹爹一走，Ambrose又喊，唔俾爹爹走，真係難纏呀！媽咪好擔心Ambrose又會好似上次咁扭計唔入會場呀！

 

本來想話呃Ambrose話爹爹返工要走，不過爹爹話唔好呃佢，照同佢講話爹爹無買飛唔同得佢一齊入去聽音樂會，不過爹爹會响出面等Ambrose。似乎Ambrose都比較受爹爹嘅說話，同媽咪入場無扭，入到去都肯自己坐，只係之後有人坐左佢前面好高咁，佢至要坐上媽咪大脾！

 

講番今次個位先，上次去屯門大會堂睇波波show意外咁坐到第一行，好開心，今次買飛時就梗係買越前越好啦，不過又好奇怪，有d好前嘅位反而係平飛！一路都唔明，直至去到會場，媽咪先至明白！因為今次係管絃樂音樂會，坐得越前其實睇到嘅只係台最前嘅樂器，反而坐後d坐高d就可以睇哂成個台全部樂器嘅擺位，怪唔知得啦，真係唔試過唔知！今次媽咪買第四行位，係好前呀，不過就只係見到指揮同出面果排嘅第一小提琴、中提琴同大提琴，係好可惜！不過因為音樂會有Harry哥哥出黎表演吓講野咁，坐第四行睇Harry哥哥相對又清楚好多嘅！

 

音樂會一開始嘅時候可能音樂突然好大聲，嚇到Ambrose即時話“ok”，即係話睇完喇，走啦！講左幾次，好彩媽咪都氹到佢，無咩野！又後來有d時候，Ambrose又搵爹爹，不過情況都唔嚴重，唔難攪，真係感恩，呢一次嘅音樂會真係順利！

 

講番內容，其實有部份都幾得意，尤其是Harry哥哥玩魔術，雖然唔知Ambrose睇唔睇得明白，但見佢有時都想行前睇，感覺佢都有d興趣咁！係最後Harry哥哥講彼德與狼個故事，唔知係咪要配合音樂，見佢成日睇住本書先catch up到講落去，成個故事超簡單但又花左好長時間講，係比較悶d，Ambrose又係講左幾次“ok”想走人，哈哈！

 

不過最開心係Harry哥哥教小朋友一路唱“Who’s afraid of the big bad wolf”一路做動作，Ambrose真係好投入咁跟住做，比起以前成舊飯咁聽音樂會，佢又大個仔左喇，哈哈！

 

最後，散場後Harry哥哥响會場外同人簽名影相，媽咪豬左啦，爹爹一直在外面等都唔識叫佢去排定隊，媽咪一出到去時發覺條龍排到出去門外！咁多人，點排丫！見Ambrose好似好想睇Harry哥哥同隻狼，唯有係咁易行去簽名台附近俾佢睇吓望吓，離遠影吓相，算係影左合照啦，哈哈！不過Ambrose實在太攪笑喇，佢見到Harry哥哥就係咁叫佢，攪到Harry哥哥同人簽緊名影緊相都唔好意思唔理佢，同佢講左幾句，最後大家重亙相飛吻添！唔使排隊都可以同到Harry哥哥有互動，勁呀！