戒片

一直都未係好正式同Ambrose戒片，只係响屋企嘅時候會盡量同佢著底褲，不過其實Ambrose返半日學，放學返黎瞓覺當然要著片，咁其實佢响屋企著底褲時間都唔係好長！至於學校，一開始就係適應問題，老師話唔好一返學就同佢試，好喇，等到習慣左之後，老師又話要睇Ambrose係咪真係ok。其實Ambrose一直都能夠示意去vivi，不過媽咪都有少少擔心佢响學校唔出聲唔識講，所以都無積極同佢戒，再後來，媽咪問老師意見，老師又話冬天唔好試戒片喎！講到尾，老師都係唔多想同佢試戒片咁！

 

不過Ambrose其實真係好少失手，只係試過一次掛住玩，無啦啦一話vivi就真係有vivi出，整濕左條褲！其實媽咪見佢都ok，都諗住再同老師講戒片架喇，不過天氣凍，又無左件事！直到聖誕前一兩星期左右，唔知點解Ambrose大個仔左喎，我地發現佢瞓晏覺已經唔會濕片，瞓夜覺到朝早起身飲完枝奶，佢就會落床叫話要vivi，而條片又係乾，我地都明白到Ambrose真係ready喇！就係咁，放聖誕假果排開始，日頭大部份時間都係著底褲，瞓覺都係要片片安全d，出街我地都開始唔同佢著片喇！Ambrose算係叻仔，試左幾個星期，佢都可以示意去vivi，暫時未尿濕過褲！不過辛苦爹爹喇，有時行行吓街，Ambrose要vivi，爹爹都要好快咁同Ambrose衝去廁所，哈哈！有一次，Ambrose話要vivi，果日唔記得同佢換底褲出街，本來行緊反斗城，爹爹又唔知行左去邊，媽咪好衰咁叫Ambrose痾落片片度先，佢都唔肯，好彩最尾搵到爹爹，爹爹怪責媽咪，之後即時同Ambrose去廁所！

 

假期某一日早上，爹爹起左身响洗手間梳洗，Ambrose飲完奶自己落床，走左去拍廁所門話要vivi，但爹爹沖緊涼即時開唔到門，Ambrose由開始拍門叫vivi到喊哂拍門叫爹爹，真係好可憐，呢個媽咪重昏迷左响床上瞓緊無去理。點知原來Ambrose可能忍唔住vi左响條片度，可能係咁，佢唔開心，喊哂囉！

 

又有一晚，爹爹話半夜迷迷糊糊間聽到Ambrose瞓住覺，喊住話要vivi，之後喊住話痾左落片片度，證明Ambrose開始真係好介意自己會vi濕片！

 

一月三日，Ambrose放完假第一日返學，其實都唔知佢會唔會唔記得左返學係點，唔知佢會唔會唔慣，扭計，但媽咪已決定同佢著底褲返學，唔理老師，唔理天氣凍，都要同佢戒片喇，唔係再唔戒，真係會退步架喇！响Ambrose書包放定多兩條底褲同面褲，第一次只著底褲返學，結果係．．．．．．．． 連 老師都讚佢叻仔，無尿濕！返左一星期，都無事，真係好！所以，有d野真係急都急唔黎！

 

不過，最令人頭痛嘅係Ambrose仍然要有片先肯poo poo，佢唔肯坐馬桶或potty，一無片佢就唔poo poo架喇！而由於而家佢著片嘅時間開始更少，無片唔poo真係好大件事架麻！

 

好似有一日去左婆婆度，無片，佢成晚同媽咪講要vivi，媽咪好辛苦咁同佢去左好幾次廁所，由第一次真係有vivi，到之後幾次得幾滴甚至係無vivi，媽咪已經估到Ambrose其實想去poo poo，迫不得已，媽咪問Ambrose著片片好唔好，佢話好，就係咁，一著左片唔夠半分鐘，就已經見到Ambrose嘅poo樣！

 

類似事件嫲嫲都講過有响屋企發生，大家都覺得無理由知佢想poo，都唔俾片佢囉！就算唔係即時俾佢，都起碼臨瞓前俾佢解決左，唔係谷住到第二日都好辛苦啫！咁樣做雖然唔係幾好，但又可以點呢？

 

尋晚出左去食飯，Ambrose又係咁喇，成晚叫住要vivi，酒樓廁所有幾乾淨丫，要同佢去咁多次廁所，Ambrose又成三十幾磅，又要就位唔好俾佢衫褲high到地下，都咪話唔辛苦呀！重要Ambrose真係好攪笑囉，佢無poo到，次次抱完佢去vivi都話要抺pat pat，真係多得佢唔少！氹佢poo落廁所又唔肯，氹佢著番片片都唔得呀，真係攪佢唔掂！最後，都係爹爹出馬，响飯台旁圍住佢同佢著番條片咋！又係著完條片一陣就poo左啦！

 

唉！都唔知幾時先可以poo落廁所度喇！