做功課

媽咪買嘅教材教具，絕大部份都會放入書房度，每晚因應時間同心情，加上Ambrose嘅興趣，先至決定攞咩出黎玩。其中，Ambrose特別鍾意玩顏色，做手工，每次玩呢d野佢都好肯聽指示同有耐性一齊做。加上返學之後每星期都有功課要做，久而久之，Ambrose將同媽咪一齊玩嘅野都當埋係做功課，哈哈！有時，佢重會自己跑入書房，一路學媽咪咁掃視兩邊書櫃，一路講“唔，我地做咩好呢？”真係俾佢笑死！慶幸Ambrose鍾意呢類型活動，鍾意做功課，所以當佢唔乖時，媽咪會話唔乖無得做手工，無得做功課，咁佢就會聽話喇！

 

今晚Ambrose又話做功課。啱啦，媽咪早排先至執起左d啱Ambrose程度嘅練習出黎，就係諗住同佢夜晚做吓玩吓，Ambrose話要做功課，咁媽咪就即刻攞左三本出黎同佢做！Ambrose真係超鍾意做，三本練習，每本一做都幾個，叫極都唔願收呀！睇黎，媽咪真係好快d物色多d唔同練習返黎俾Ambrose做至得喇，以咁嘅速度去做，一本都應該好快做完呀！

 

第一本係Kumon Workbook – Let’s Color，呢本個concept幾好，佢唔係平時填色冊咁有框有線俾小朋友填色，而係成個圖案一個部份留白左俾小朋友填色，去完成圖案，感覺上無框無線出左界都唔覺，增加自信去油！同埋媽咪發現，原來一小部份去油，Ambrose會好比心機咁油，太大面積嘅話，佢一輪塗鴉之後，都唔會理油好未佢就唔想油咁，可能太多又太難油會有挫敗感？今晚同Ambrose做呢本書，重有得著，就係每當要油其中一幅圖，媽咪都會教幅圖係咩黎，再問Ambrose咩色，再要Ambrose响顏色筆中攞番果隻顏色出黎油上本書度，咁樣做一個練習，唔單止練到手眼協調，手肌，重順便學埋生字，重有顏色，真係幾好，哈哈！Ambrose大致上都認到顏色，講到係咩色，真係要多得老師，形狀顏色都係學校學番黎，之前媽咪教極都麻麻地，返左學都無同佢溫習過，估唔到短短幾個月，Ambrose已經識左！

 

第二本都係Kumon Workbook，不過係Let’s Stick and Paste，呢本頭幾個練習都係用貼紙貼嘅，之後果d都要媽咪剪定先再俾Ambrose用膠水貼，真係有排預備喇！原本以為Ambrose貼貼紙都ok，點知唔知係咪耐無玩貼紙，Ambrose撕貼紙都係麻麻地，張貼紙緊貼張紙時佢好難掀出黎，同埋佢成日都懶，用一隻手去貼，所以有幾張要用貼紙遮住圖中嘅白點時，佢成日都貼到遮唔哂，要搣起再試！等我成日見Ambrose學校貼貼紙有d都貼到好靚，以為佢已進步左唔少，但今晚睇，佢貼到張貼紙皺哂，又唔似咁叻， 都唔知 老師係咪捉住佢對手同佢一齊貼喇！貼野都係要多加訓練呀！

 

第三本係動腦筋，雖然話係兩歲啱做，但都有d望落Ambrose重未ready咁，都係做頭頭圈野連線果d先啦！分大小對於Ambrose黎講無問題，平時見佢塗鴉大大力咁畫，但次次畫圈佢都細力到暈，要諗諗點去train佢至得！連線佢暫時都連唔到直線，不過媽咪只係要求佢答啱題目，同埋連到就ok！最搞笑係有一頁係生活習慣，食野前要洗手，幅圖一個隻手係污糟一個係乾淨嘅，問佢邊個先至啱，再响啱果個下面嘅圓點油顏色，點知媽咪講極Ambrose都係覺得隻手污糟果個先至啱！唔知佢係咪諗緊食野時隻手梗係會污糟架啦，因為佢自己都係咁，所以媽咪講極佢都係選錯，哈哈！