華服@ 2014 (4y5m)

每年媽咪都會為Ambrose準備華服，等佢可以响新年著吓迎吓節，同埋，最主要原因，係學校每年都有華服日，點都要預備俾佢，哈哈！除左bb時期買過嘅連身華服，媽咪之後只買過一件薄身雙面華服，一面棗紅色一面金色，估唔到呢件華服一著就三年，哈哈！無法啦，Ambrose嘅bb期肥得好快，所以買衫都要買大一、兩個碼至得；到佢大到咁上下，開始又慢番落黎，個人高左自然就拉番瘦d，所以之前買落大左嘅衫，可以著好耐！

一家三口團年飯@2014 (4y5m)

Ambrose出世以黎，都好似未試過同佢一家三口食團年飯，過時過節，都係同長輩級齊齊過多。今年團年飯，兩邊家人都提早食，所以，難得年三十竟然無飯局，可以清清靜靜一家三口自家過！

剪頭髮(4y5m)

Ambrose咁耐以黎，都係爹爹同佢剪頭髮，出去理髮店嘅次數，兩隻手指數得哂！並唔係因為要慳家，所以自己同佢剪，而係剪過兩次頭髮，剪完後都總覺得麻麻地。媽咪唔太鍾意Ambrose剪得太短，媽咪鍾意少少長，跑起上來有飄逸嘅感覺，而且頭髮太短的話瞓醒覺就會炒埋哂，呢度飛一執果度飛一執出黎，好麻煩！出去俾人剪，通常都唔會剪到太長，仲要加埋剪碎偷薄，小朋友頭髮已經夠幼，仲要剪碎偷薄，輕上加輕，瞓醒唔炒都偷笑！所以試過兩次之後，都係自己同佢剪啱心水d！

 

趁就過年，早兩晚爹爹又同Ambrose剪頭髮，媽咪同爺爺都忍唔住出手剪吓，Ambrose真係威，三個人服侍佢，哈哈！爹爹話，唔知仲可以幫Ambrose剪到幾時？唔知佢幾時開始會嫌棄我地？！

醒獅遊戲派對(4y5m)

畫室於新年前後舉辦「醒獅遊戲派對」，有得玩醒獅，打鼓，仲可以做獅頭手工，媽咪知道，Ambrose一定會喜歡！個派對成三個鐘咁耐，$18X其實都幾抵！本來畫室仲有另一個小馬袋嘅手工班，兩個都參加的話，價錢更優惠，不過度黎度去d時間，真係安排唔到，所以乾脆只報醒獅算了，俾Ambrose去玩吓之餘，爹爹都可以有幾小時抖抖氣！

好彩有朋友仔都有報呢個派對，响門口影左幾張相俾媽咪，等媽咪返緊工都可以知道Ambrose玩緊d咩！不過，見到張相，先至知原來係幾個小朋友合作整一個獅頭，仲以為每個小朋友會整一個，可以帶回家玩添！有少少失望啦，但Ambrose係好開心嘅！

再買百科書(4y5m)

之前Ambrose成日都有問d水响邊度黎？佢知道有水塘儲水呢回事，但就唔係好知水塘嘅水點會黎到屋企個水龍頭度，媽咪都有解釋俾佢知，不過可能始終都無真正睇過，所以佢都成日不停咁問水嘅去向。媽咪記得之前曾經見過「自來水的旅行」呢本書，所以特地再去找找，希望可以買回去俾Ambrose具體化d咁睇，好彩都俾媽咪搵到，嘻嘻！

都是從太陽來的 & Spiderman Magical Story @ 學校書展(4y5m)

星期六學校家長日，一如以往，學校擺左一個小書展，邀請左出版社擺賣書籍。唔知點解，今年書展嘅書，非常的少！反正未見到老師，媽咪就同Ambrose去看看！點知一肚氣！ 

其實書就真係唔多，不過就有好多卡通人物書，當然，呢類書就一定好吸引小朋友，而且，學校嘅小朋友，大極都只不過係K3，小至兩歲，其實真係預期擺得出黎就會有小朋友睇架啦！成個書展得一個Sales，佢見到d小朋友行埋去，就會好緊張咁同小朋友講，唔好咁大力揭書，唔好整皺d書，媽咪都明白，緊張都係正常嘅，皺左無人買就蝕本，但個sales嘅態度就係最好唔好搞佢 d書囉！Ambrose只係攞起本Spiderman書，都未開始打開，個sales已經同佢講，係咪鍾意Spiderman呀？叫媽咪買丫！好乞人憎囉！就好似同媽咪講，買左先好打開睇呀！

創意畫班@第五十七堂(4y5m)

尋日請左假，所以今日補番堂！補得堂都預左唔會係Ms Chen架喇，要就自己時間表又要就中心開放時間，如果仲要就埋老師，真係好難安排！

今堂Ambrose畫左幅大揮春「大吉大利」！一見到張揮春嘅時候，媽咪第一時間就問，吓，係得咁多架喇？爹爹話，係呀，係畫呢幅揮春咋！幅揮春，係幾得意嘅，亦好應節，而且又多一個賀年裝飾，大大張，好不熱鬧！

男拔小開放日(4y5m)

唔經唔覺，Ambrose已經K2了，好快，又要考小一喇，考N同K1似乎都唔係好耐之前的事，轉過頭，又要搞小一了，真係沒完沒了！其實媽咪都唔係一定要考名校，而以Ambrose現階段嘅情況，似乎考到直資私小嘅機會亦唔大，媽咪已經有預備要大抽獎的覺悟了，只是都想堅持試一試，始終，叫做試過，俾過機會 Ambrose，若第日大左問起爹爹媽咪，都有個交代！

男拔小，相信好多家長都想子女入到，媽咪都唔例外嘅，哈哈！不過，難矣！適逢開放日，媽咪點都要去一去睇吓，入唔到去讀，都叫入過去行吓見識吓麻，嘩哈哈！

挑戰Day and Night積木(4y5m)

一月份某晚，Ambrose突然摷左盒 Day and Night積木話想玩。呢盒積木，早在Ambrose兩、三歲時已經體驗過，當時嘅Ambrose沒多大興趣，通常玩完頭幾關之後，就開始唔跟圖，隨心意亂放一通，又或者叫極都唔跟圖，直接就咁亂玩就算，所以，媽咪唯有收起，諗住等佢大少少，可以坐定少少玩table game至再玩過喇！

 

呢一收，真係將盒積木完全忘記了，甚至乎，當Ambrose摷番出黎，個樣好似好有興趣想玩咁，媽咪都有問Ambrose，記唔記得之前其實都有玩過？當然，Ambrose都係無印象啦，仲以為份積木係新買番黎咁，哈哈！

Lego Super Heroes 76012 (4y5m)

上兩星期行過尖沙咀反斗城見到有一系列嘅Batman同Lego Movie嘅Lego放哂出黎，仲有成品做display，Ambrose見到真係兩眼發光，睇完又睇，睇左好耐都唔捨得走！佢仲揸住盒新版Batmobile，個樣勁可憐咁想爹爹買俾佢，哈哈！媽咪之前買左盒Batwing都無攞出黎俾Ambrose，見佢咁恨要，於是回到家時，終於都攞左出黎俾佢砌。

 

以為就咁就平息左，點知Ambrose仍念念不忘架Batmobile！於是，兩個星期後，爹爹忍唔住買左俾佢喇，哈哈！

星星老師@第二十七堂(4y5m)

延續新年嘅主題，今堂手工係整新年嘅掛飾，Ambrose嘅黏土水仙花，媽咪覺得整得唔錯，見同學仔嘅花瓣都係長條形的，而Ambrose竟然整左圓圓的，雖然唔知道老師教嘅時候係點，但感覺圓圓的其實和真的都幾似啊！可惜Ambrose嘅花少左d，如果多幾朵，會更豐富呢！

抄畫(4y5m)

今晚見有時間，媽咪攞左Ambrose一份興趣班的功課出黎做。呢個興趣班嘅功課，係optional，做唔做，交唔交都得，主要都係想train個小朋友自發攞功課出黎做（當然，Ambrose只會自發做學校的功課，興趣班的甚少自發囉）。而且，呢間的功課紙上，亦從來無字句指示係要做d咩，所以媽咪有時見到都唔知做咩，哈哈！應該係老師上堂時有講，要小朋友自己記住然後回家攞出黎做吧！當揭到一頁，見到上面有幅圖，下面一個空格，媽咪都唔知咩事，仲諗住都可以唔使做了，以Ambrose記性及個性，佢都唔會知做咩架喇！正當媽咪想話收工之際，Ambrose突然好緊張話好想做呢頁。媽咪就問佢，你知道點做咩？Ambrose就話知，係要將上面幅圖，一模一樣咁畫番出黎！怪唔知得記得啦，原來，剛剛遇著佢最大興趣－畫畫！

創意畫班@第五十六堂(4y5m)

今堂繼續畫埋幅搖搖木馬，唔知係咪因為就到新年嘅關係，幅畫突然以新年做背景，有少少搞笑！老師話Ambrose畫左兩個人仔，就話呢兩個人就係佢同Matthew。真係服哂 Ambrose，畫畫都不忘死黨，好似情人咁纏綿呀！

GAPSK幼稚園（k2-k3）普通話水平考試 （4y4m）

考完兩次普通話試之後，媽咪一心諗住一鼓作氣繼續考埋GAPSK幼稚園（k2-k3）普通話水平考試，咁下學期就唔使再為考試而不斷溫書，可以專攻其他科目，又或集中訓練普通話對答拼音等。其實，經過兩次考試之後，媽咪深明Ambrose的記憶力唔多好，要佢背太多野真係有難度，而GAPSK幼稚園（k2-k3）普通話水平考試真係要背好多野，淨係詩都有十首，問答更有百幾二百題，無特定範圍，最令媽咪擔心嘅係朗讀短句呢part，因為Ambrose基本上認字好差，而呢part如果唔識字，其實係讀唔到出黎，咁即係唔使考！考試共分三大part，聆聽、對答同朗讀，媽咪其實最擔心係朗讀呢part！

等左好耐至出考試範圍，即係可以知道要溫哪十首詩，對於記憶力弱嘅Ambrose黎講，出左範圍至開始溫係好重要，但今次出範圍嘅時間遲左，減番d時間之後，發覺只有兩個月左右的時間！

Home Craft Time @乳牛紙手偶 (4y4m)

一月份某個晚上，Ambrose突然想做手工，由於時間已經唔早，加上家中SET裝手工存貨不多，有亦都製作需時，所以媽咪一度婉拒Ambrose。但Ambrose苦苦哀求，已經識得自己講話做 d好快嘅手工啦，聽到佢咁講，亦自問近年已經疏於和Ambrose做手工了，媽咪仲可以點拒絕呢？！

Home Art Jamming @ 爹爹媽咪(4y4m)

Ambrose今次畫左兩個人，見佢畫得好得意，一個人係正常的，另一個對眼的黑眼珠係一上一下，好似反白眼要暈咁嘅樣；一個伸脷向上，另一個伸脷向下。油完顏色後，反白眼的眼白竟然油左藍色，搞到都唔係好睇得清眼珠！

金獎@全港標準舞及拉丁舞公開系列賽 3 (4y4m)

Ambrose上小演員班已有一年，見佢對於比賽表演已經唔驚，又覺得好多時芭蕾舞比賽都係成組人去，就算有獎盃都係歸跳舞學校，參與學生極其量亦只有一張證書，甚至乎咩都無都試過。有感當初報小演員班係想Ambrose有多d舞台經驗練大膽d，而家佢都做到喇，上k2後時間更緊張，所以上年八月時無再同佢報名繼續參加了。

估唔到學校大匯演之後，照理無參加小演員班就應該無機會去參加比賽，但竟然Ambrose果班就有呢個機會，十一月參加跳舞比賽，跳的正是之前表演的「土人」！

美國隊長 (4y4m)

Ambrose係Batman嘅小Fans之外，其實有關Super Heroes嘅人物，佢都好鍾意，而且特別對面罩情有獨鍾！家中已有Spiderman，Batman，綠衣人，仲有蒙面超人等等嘅面罩，爹爹又買左個美國隊長面罩俾佢，呢個面罩，出奇地fit，而且只係十幾蚊，真係好抵！

星星老師@第二十六堂(4y4m)

今堂畫金魚，Ambrose共畫了四條，條條都肥肥地，好可愛呀！

創意畫班@第五十五堂(4y4m)

今堂比放學時間提早了近十分鐘去等Ambrose，一心諗住睇吓佢上堂情況，點知去到時竟然見到Ambrose已經執好哂野揹住個袋，一個人自己企左响counter位置等放學，都唔知佢等左幾耐，見得番佢一個人自己企又無人理，真係可憐呀！媽咪不知幾唔開心，都唔知有無搞錯！媽咪唔介意如果Ambrose早畫完畫可以早d放學，但早d放學並唔係等於可以叫佢自己企响度等囉！其實點解唔可以俾佢坐返入去是但一個位度等，咁起碼老師忙於教其他小朋友時，眼尾都望到Ambrose囉！而且亦唔會好似要佢自己一個罰企咁囉！嬲！今堂返學時明明都見跟開嘅老師响度，都好放心擺低Ambrose就走，但接放學時就已經唔見個老師，細問Ambrose之下，原來今日都唔係跟開嘅老師教佢，唔怪知得啦！分分鐘個老師以為佢係上一個鐘，所以根本都未夠鐘就要佢放學，同埋以為媽咪掛住行街遲接仔添呀！

Batman Fans (4y4m)

响馬莎見到有Batman衫，雖然無減價，但都係忍唔住買俾Ambrose！呢件其實同Gap果件差唔多一樣，都係一大個logo放在心口，不過感覺呢件比Gap嘅cutting修少少，而且，最重要係呢件有帽，而頂帽兩邊係有兩隻耳仔，有細節位，讚！

星星老師@第二十五堂(4y4m)

今堂畫班為迎接新年而以水仙入畫！估唔到呢幅畫好有中國畫feel！細問Ambrose，原來幅畫真係用毛筆畫架！d花望落朵朵都幾似吓，唔知係咪用物料印成的呢？！最鍾意Ambrose個名用紅色托底，好有中國印章feel呢！

創意畫班@第五十四堂(4y4m)

尋日有同學仔開生日會，所以畫班就改左期今日上。無刻意check係咪Ms Chen的時間，因為Ambrose話過其他老師都好好，所以，費時夾黎夾去，一堂半堂就是但補左先！

今日畫嘅係薑餅人水晶球，一睇就知真係唔係 Ms Chen教，因為幅畫係無起稿嘅，不過都無所謂啦！同埋，放假前有幅薑餅人糖果屋，未油底色，今堂都無油返！

GAP (4y4m)

以前GAP未進駐香港嘅時候，媽咪都有美國代購吓；反而，GAP黎左香港之後，好少去行，亦都無買過野！

Home Art Jamming @ 聖誕老人、火箭及魚缸 (4y4m)

Ambrose又埋頭苦畫了！畫左一大餐，估唔到又畫得有板有眼！今次佢畫左聖誕老人、火箭同埋魚缸！個魚缸入面真係有魚、蟹同海草，不過就唔知點解又分左唔多顏色咁油！問吓Ambrose個魚缸點解咁大嘅，同個聖誕老人一樣咁高嘅？！佢有d唔滿意咁答媽咪，我鍾意丫麻，嘩哈哈！

書@台灣 (4y4m)

今次旅行前，曾經已經諗好左幾樣must buy items，不過發現，一大班人出發，唔係包車就係打的，無咩時間行逛，仲要帶住小朋友，完全係無shopping時間！ 

幸好，竟然發現入住嘅酒店樓下就係金石堂，加上最後一日行程竟然去到誠品，所以點都掃左d書俾Ambrose！

2013跨年旅行@台中台北 (4y4m)

今年同朋友們約埋一齊去旅行，六日五夜嘅台中台北之旅，真係好開心！第一次幾個家庭一齊搭飛機去旅行，第一次响街食左幾個鐘頭西北風等倒數，第一次六個大人抱住三個昏睡嘅小朋友行左兩個捷運站都未落到月台搭車，第一次去旅行唔見左隨身物同bb車，第一次住成二千蚊嘅酒店但一入房門就係床，仲細過東京酒店。。。。。。好多第一次，好多難忘片段，好多歡樂時光！

暫時，真係無咩時間追blog寫番咁多日行程出黎！不過，點都要出一篇記錄住先！

但願，明年都可以一齊再去過旅行，目標係星馬Legoland！