金獎@全港標準舞及拉丁舞公開系列賽 3 (4y4m)

Ambrose上小演員班已有一年，見佢對於比賽表演已經唔驚，又覺得好多時芭蕾舞比賽都係成組人去，就算有獎盃都係歸跳舞學校，參與學生極其量亦只有一張證書，甚至乎咩都無都試過。有感當初報小演員班係想Ambrose有多d舞台經驗練大膽d，而家佢都做到喇，上k2後時間更緊張，所以上年八月時無再同佢報名繼續參加了。

估唔到學校大匯演之後，照理無參加小演員班就應該無機會去參加比賽，但竟然Ambrose果班就有呢個機會，十一月參加跳舞比賽，跳的正是之前表演的「土人」！


不過，其實當媽咪見到個比賽名，就記得係上次出證書出哂成村人果個比賽，不無反感！但見比賽地點只是在區內，就當是難得機會俾Ambrose作最後比賽吧！一如以往，去到又是一輪呆等，仲要一早換哂衫，衣衫單薄，埸地又凍咁等！其實見到個比賽名係標準舞同拉丁舞，見人家比賽亦都是標準舞同拉丁舞，都覺得點會同芭蕾舞扯上關係？！

比賽安排响人家標準舞同拉丁舞比賽之後，有不同隊伍出場表演，但全部隊伍都係跳舞學校的學生，其實都頗不是味兒。Ambrose跳完舞之後，還有一隊要出場，再之後，幾乎係九秒九的完場！Ambrose衫都未換好，工作人員已經開始離開。

可以咁講，媽咪唔覺得呢個係一個比賽，似乎只是陪襯吓個event咁囉！再有下次都唔會再去呀！

今日收到呢個比賽嘅證書，先知得金獎！不過，咩獎都唔重要啦，可能當日所有隊伍都係金獎都唔定！仲要張證書，咩都無，只有比賽名、日期同埋成村人嘅名，連隻舞叫咩名都無，好流吓！