男拔小開放日(4y5m)

唔經唔覺，Ambrose已經K2了，好快，又要考小一喇，考N同K1似乎都唔係好耐之前的事，轉過頭，又要搞小一了，真係沒完沒了！其實媽咪都唔係一定要考名校，而以Ambrose現階段嘅情況，似乎考到直資私小嘅機會亦唔大，媽咪已經有預備要大抽獎的覺悟了，只是都想堅持試一試，始終，叫做試過，俾過機會 Ambrose，若第日大左問起爹爹媽咪，都有個交代！

男拔小，相信好多家長都想子女入到，媽咪都唔例外嘅，哈哈！不過，難矣！適逢開放日，媽咪點都要去一去睇吓，入唔到去讀，都叫入過去行吓見識吓麻，嘩哈哈！

開放日只開放下午幾個小時，以為會幾多人，好虛滔吓，但遲左d去，發覺亦唔算太多人！可能，好多人點都會報考呢間，去唔去參觀都無所謂掛！今次參觀其實都無行哂成間學校，只係行左入幾間房而已。每間房都有唔同活動，我地玩左畫畫、剪「大吉」，做過連線同油顏色，仲聽埋鱷魚食人同埋Gruffalo嘅故事，都幾充實！值得注意嘅係，每間房都有唔少學生做helper，相信並無特別挑選吧（因為都算幾多學生helper），亦有唔少學生表演，感覺唔錯，至少好多學生可以involve到，唔會只係少部份人！

今日Ambrose剪左個大吉字樣揮春，算係大部份都係佢剪嘅，有d轉角位佢好難轉較剪，同埋有時剪剪吓原來只係剪緊上面果張無一齊剪下面果張，所以，媽咪有時都要出手幫忙。最搞笑係，有d位Ambrose剪深左，連接位有少少想斷開咁濟，個helper見到即時Oh my god嘅樣，好想我地攞過張再剪過咁款，但Ambrose無理佢照繼續，個helper已經頂唔住走左，哈哈！最後大功告成，係有d位真係想斷咁，媽咪建議Ambrose不如去問老師攞膠紙貼番住佢啦，原以為佢未必肯咁做，估唔到，佢真係行左去問，仲要個老師開頭見佢唔到又聽佢唔到，Ambrose都無走番黎問媽咪點算，直到個老師向住佢時，佢又再問過，最終，都攞到膠紙，Ambrose滿心歡喜話要將個大吉痴响屋企。其實，Ambrose唔要求，媽咪都打算貼起，因為，係Ambrose第一次親手做嘅賀年裝飾麻，仲要幾靚架！