醒獅遊戲派對(4y5m)

畫室於新年前後舉辦「醒獅遊戲派對」，有得玩醒獅，打鼓，仲可以做獅頭手工，媽咪知道，Ambrose一定會喜歡！個派對成三個鐘咁耐，$18X其實都幾抵！本來畫室仲有另一個小馬袋嘅手工班，兩個都參加的話，價錢更優惠，不過度黎度去d時間，真係安排唔到，所以乾脆只報醒獅算了，俾Ambrose去玩吓之餘，爹爹都可以有幾小時抖抖氣！

好彩有朋友仔都有報呢個派對，响門口影左幾張相俾媽咪，等媽咪返緊工都可以知道Ambrose玩緊d咩！不過，見到張相，先至知原來係幾個小朋友合作整一個獅頭，仲以為每個小朋友會整一個，可以帶回家玩添！有少少失望啦，但Ambrose係好開心嘅！

小插曲：朋友告知今日上堂多達十幾二十人，Ambrose同朋友被分配一組，同埋幾個小朋友一齊整獅頭。話說Ambrose好快手油完，想話幫同組其他小朋友油，點知小朋友拒絕佢仲出手推佢，聽說仲要係先後有一男一女較大小朋友咁對Ambrose，而朋友就話Ambrose好叻，「竟然」無還手，話佢EQ高左！媽咪聽到當然心痛其他人咁對Ambrose啦，不過有時候，係要俾佢受吓挫折，佢先至會成長，都唔心痛得咁多！欣賞Ambrose對於接連遭受不禮貌待遇而沒有發難，不過其實Ambrose一向都唔係脾氣差，只係性格剛烈較易著火，媽咪一直都唔覺得佢EQ低，佢著火都總有可理解嘅理由的。Anyway，最後媽咪問朋友，Ambrose之後的反應係點，估唔到，Ambrose真係有聽爹爹媽咪講，當遇到其他人刻意推撞，如果佢覺得無受傷可以唔使找大人投訴，如果發覺係連番的刻意推撞，就要找大人處理，今次，佢好叻咁走左去同老師講！