等左好耐至出考試範圍，即係可以知道要溫哪十首詩，對於記憶力弱嘅Ambrose黎講，出左範圍至開始溫係好重要，但今次出範圍嘅時間遲左，減番d時間之後，發覺只有兩個月左右的時間！
媽咪集中同Ambrose溫背詩，同埋練習朗讀短句。為左令Ambrose認得中文字，媽咪將短句嘅中文字拆成詞語造成字咭分階段貼在Ambrose房中，等佢可以熟悉字型。同Ambrose溫短句時，更加要逐字指住同佢一齊讀。初期以為Ambrose都未必認讀到，但過左幾星期後，就發覺似乎有一點成效了。與此同時，發覺背詩進度好差，Ambrose嘅記憶力真係好有限，背好左一、兩首再同佢練第三、四首，佢又會唔記得之前果一、兩首，真係令媽咪苦惱！於是，媽咪看看考試大綱，其實入面係寫朗讀兒歌，寫得係讀，咁即係應該唔使背啦！為左唔使Ambrose咁辛苦背詩，媽咪膽粗粗打左電話去考試機構問，朗讀兒歌係咪有字可以睇住讀，唔需要背。職員好巧妙咁話，係有張紙俾小朋友睇嘅，但係要識字囉！於是，見短句認讀略有成效嘅媽咪，即時改變策略，唔再要求Ambrose背，仲教佢一路指住每個字一路認讀，果然，呢個方法對Ambrose真係有效。雖然，其實Ambrose未必真係認到所有字，但佢認讀到某d字之後，其實真係幫到佢輕易讀出成首詩！呢個改變，令Ambrose好有滿足感，而佢亦由之前唔多享受背詩，到後來一話溫普通話就即話要讀詩，仲想學埋其他不用考試的詩，呢個結果真係始料不及！
至於其他兩part，媽咪真係無咩時間可以同Ambrose溫，可能媽咪一心覺得朗讀係最難吧，所以花了差不多所有時間在朗讀上。聆聽部份媽咪雖然有自製道具，但媽咪一心都只是覺得這part靠Ambrose功力應該不難應付，只係擔心有時佢唔睇清楚好衝動咁答左，呢樣真係控制唔到！另外就係看圖對答，要答長答已經有少少難度，最大問題係d圖，有時可能真係唔太清楚，又或者Ambrose太creative，有時理解錯左幅圖，答錯答案，又係控制唔到！最後，稍為可以控制到少少嘅係問答，至少，起碼都有特定答案，如果Ambrose唔臨時改答案的話，其實呢part背哂都好穩陣！不過，Ambrose一來唔係好背到，二來佢好鍾意改答案，所以對於佢黎講，呢part都係另一個變數！所以總括黎講，成個考試，真係無咩邊part係有把握！
十二月初考試，考試前一星期，Ambrose突然要入醫院，完全係意料之外的事！開頭以為只係入去一日半日Check完走得，點知當晚至發現想走都唔易，醫生要等report出哂至可以決定幾時走，仲話起碼住四、五日，嚇死爹爹媽咪！媽咪一來擔心唔知Ambrose係咪真係中左肺炎，二來就係辛苦準備左兩個月嘅考試隨時去唔到，再考的話，已經唔係果d範圍，即係又要從新黎過！幸好，住左三日，經爹爹催促之下，醫生終於放Ambrose回家！剛好趕得切考試！最好笑係，入院之後，爹爹因為擔心Ambrose考試進度，一度將平時溫習用嘅書同道具都帶入醫院，諗住無夥做時把握時間溫習。但攞到去之後又發覺住院都要溫書好怪獸，所以都無掂過了！
今次考試，Ambrose最後只取得「優良」級別，並未如上次般取得最高級別的「卓越」，其實媽咪試前已預計得到，而且，媽咪更預計最差僅得「熟練」級別。雖然收到成績時也曾有過些微失落，總有一絲希望Ambrose會否在考試時爆發小宇宙（其實佢都係呢類小朋友）又或有幸運之神眷顧而僥倖取得「卓越」。但失落過後，媽咪回想過去兩個月的溫習時光裡，Ambrose真的很努力，而且佢的而且確克服左佢嘅弱項，好比心機認讀哂十首詩，十幾句短句，於媽咪一早認定佢最唔得嘅「朗讀」一part中，反而取得了「卓越」，媽咪心感欣慰，亦真心覺得取得「優良」的Ambrose真係好叻！其實「優良」已經反映左Ambrose水平去到邊。一張證書，有靚嘅成績，當然很好，但對考小一係咪真係有幫助，始終係未知之數。如果執意追求「卓越」，亦只是往臉上貼金而已。媽咪並唔希望為得到「卓越」，又再要Ambrose死背果d佢根本未有生活體驗嘅問答：香港公園响邊（中環），維多利亞公園响邊（銅鑼），中國首都（北京），咩國家嘅人（教極都話自己係香港人，唔係中國人）等等，真係太煎熬，亦太無意思！考過，就算了！不如叠埋心水，努力練習對話拼音，更有得著！畢竟，考試、證書，並唔係唯一證明能力嘅途徑吧！
沒有留言:
張貼留言