星期日個肚“那”住痛，有少少似M痛咁，無理佢呀，唸住自己唔係呢度痛就果度痛，唔想下下都太緊張。星期一朝早未夠六點就醒左，個肚依然係痛，都開始擔心，事關呢幾日小b大幅郁動得幾多，唔知有無關係。响張床唸黎唸去，睇私家普通科又唔會有咩結果，私家專科又一定book唔到，去急症室會唔會誇左d呢？唸吓又等吓睇吓會唔會好d，終於老公都醒左，發現我重未起身返工，我話個肚重痛緊，我想去睇急症，唔返工嘞！老公一聽“急症”就好大反應，問我係咪痛醒，咁好彩我唔係，只係早醒而又發覺痛囉！本來老公都話睇私家，但係我都一口拒絕，因為我都幾擔心，唔想好似上次咁周圍撲去book私家“攝”位，就係咁，我攤多左一陣就同老公去樓下食埋早餐搭的士入急症室喇！
好天真唸住咁早唔會太多人，起碼d人可以去睇私家，唔似得夜晚咩都無就迫住去急症，點知．．．．．．勁多人，成個大堂都坐哂人，重多人過夜晚！無辦法啦，都要睇架嘞！登記嘅時候，counter個人問我住址，因為我係用親戚灣仔嘅住址先可以去瑪麗生，所以當佢問我地址嘅時候，我就驚驚哋，唔知有無咩關係同後果，我之前又無醒起會問地址，所以無背到，口窒窒咁講出黎，我老公重同我講果個街號唔同，好彩個人好似聽唔到，嚇死！
登記完好快就叫名做分流，又估唔到佢define我係urgent喎，等左一陣就叫左我入去等睇醫生喇！醫生問我咩事，我話肚痛，佢又問有無穿水見紅，我都無，又問痛左幾耐，我話尋日到依家．．．．．．呢d問題其實响分流站已經問過兩次，都唔明d人問完寫低左第二個又問返一様嘅野，咁寫黎做咩？個醫生全程嘅態度都好差，如果佢係好cool好冷漠我就唔覺得有咩問題喎，响得急症，係咁架啦，成日都有好多唔同case，冷漠係正常嘅！但係呢個醫生係好似“腳un un”咁，又唔係好耐煩咁，說話又輕佻，簡直就係d死仔咁，一d尊重都無！佢問完就叫我跟住佢去另一間房照，入到去一坐低佢就攞住張表格，一路口up up鬼食泥咁背台詞“解釋”將要照陰超嘅責任問題，一路隻手就响張表格上面tick tick tick，其實我一d都聽唔到佢講咩，我知道佢想做咩係因為上次入急症嘅時候都係咁，所以大概知道個程序，我到最後先至好清楚咁聽到佢講「無問題嘅話响度簽番個名」。好彩我有上次經驗知道發生咩事，唔係就儍吓儍吓簽左！上次就話週數細要照陰超，而家都廿幾週，肚照都睇到啦！唔明點解一定要照陰超，加上我突然醒起巫醫生好似提過我胎盤低易出血，一定唔可以照陰超，同埋記得同醫生講。咁我咪同個衰醫生講話我胎盤低係咪唔照得，佢即刻拍枱，唸都唔使唸，問多一句都無，就話咁你唔使照啦，入醫院啦，個様重好幸災樂禍咁嘅様，好開心唔使佢做咁，真係想扯佢一巴！佢見唔使跟我，就話咁快走左，個姑娘叫我行入去等出牌板入院。老公全程唔可以陪我見醫生，唔知咩事，見我一出黎，又聽到姑娘講咩入院，佢都呆呆吓咁。我哋坐埋一邊，我咪同佢講我唔照得陰超，所以要入院用其他機check囉！不過可能真係唸都無唸過咁大陣像咁，大家都靜哂！
出左牌板入得院，有個呀叔推住架輪椅過黎，都唔知原來佢係要推我上去，咁我見唔使我行，雖然都有d唔好意思，但我都無抗拒照坐！上到婦產科收症處等，見有個太太個肚勁大又話肚痛，我唸佢生得嘞！有個姑娘埋黎幫我帶手帶，又問d同様嘅問題，最尾又問我唸住餵人奶定奶粉，大佬呀，講到我入黎就生咁，心都寒埋！跟住就瞓上床按肚，有d實，再係咁易照肚，跟手個姑娘俾左套病人衫我換，老公全程又係無得參與，得個等字，見到我嘅時候我都已經換哂衫，我唸佢好擔心！姑娘見我換左衫就叫我等一陣俾埋個床號我，重叫老公幫我攞走d貴重野就走得，唔可以入去，探病時間（下午六點至八點）先黎得，好彩都重可以攞埋電話，我拿拿林攞定八達通同少少現錢，in case要買野食都有錢！我重記得响我臨入去病房之前，老公企响counter度望住我入去果個情景，我唸當時大家嘅心情都好複雜，千言萬語都只可以用一個眼神怱怱交代，幾唔願意，都要揮手再見！呢一幕，我唸我呢世都會記得！
入到去上左病床，姑娘要我熄電話，話要同我駁住部機check野，佢又叫我瞓平個人唔好郁，我有左之後不嬲都係側瞓，打平瞓會扯住唔舒服，但姑娘叫到無辦法啦！check左唔知幾耐就有人走埋黎問我痛唔痛，我話痛，佢就話你應該唔係幾痛，後來我至知，果部機應該係check住d宫縮，睇吓你有幾痛，同埋生得未！其實其間都成日有人走黎問我野，我都攪唔清咩人打咩人，醫生定護士，因為有d醫生著白袍，有d係著套藍色衫褲，有男有女，我都幾混亂吓！後尾有個男醫生走黎睇我，問過哂d野，又問我點痛法，其實我都唔知點形容，總之就係痛，咁佢就好認真按我個肚，按到有個位好痛我就叫左出黎，氣都唔敢大力抖，咁佢又响附近按，都痛，但我忍到，後尾佢竟然大力按實我話好痛果個位，按完又大大力敲喎，都唔知係咪得罪左佢，之後佢走左。我一路响床上面唸吓唸吓，又驚又痛又嬲又委屈，俾佢咁大力按完就更加痛，好似扭埋左咁痛，我忍唔住瞓响張床流眼淚，都唔敢大喊，流流吓眼淚又有個女醫生走埋黎，唉，俾佢見到我喊緊，鬼咁尷尬，佢又係問差唔多嘅野，真係煩到爆炸，之後佢話要同我照超聲波，問我自己行唔行到，我啱啱先俾人按到勁痛，我咪話唔得囉，唸住唔係好遠，佢會搵人推輪椅推我過去，點知佢哋係搵左張床過黎，都算，最stupid嘅係唔係姑娘幫我過床，而係自己死過去，好人好姐就話“look”過去都得，我大住過肚點“look”？咪又要起身慢慢“扇”過去再瞓番低囉！推到去照肚，個醫生又無咩講，最尾只係話無咩唔正常，係右腎有少少腫，但懷孕都叫正常，小b都健康無問題，呢様都安心d！無咩發現，又推番我去病房，又係好stupid咁自己過床，真係後悔話自己行唔到，其實過床重麻煩重痛！
返番張床打側瞓吓，開始好d。唔知過左幾耐，原來已經十二點半，開始派餐。果碟唔知咩瓜白色架，又乾又無味，個碟肉碎木耳，正如對面個肥婆所講，好似人哋嘅嘔吐物咁，見到都唔想食！我係咁易食左少少飯飲左d湯，唸住晏d可能走得又或者晏d落去食茶餐廳！响醫院度無野做好悶，早醒同喊完好眼瞓，所以都瞓左一陣，不過可能周圍都係大陸人，佢哋就算唔識都可以講一大餐，好嘈！對面個肥婆一d都唔似大肚，如果响街見到佢，應該唔會想像到佢係大肚囉！佢係咁講係咁講，唔係同呢個講就同果個講，成日都話快d“劏”佢個肚，講到我個心都唔係幾舒服，我隔兩個床位果個大肚婆應該係香港人，聽得出佢都唔太願“搔”個肥婆！
瞓吓瞓吓，又有個男醫生走黎，姑娘叫醒我！男醫生都係問吓d差不多嘅問題，又或者太多人成日走黎問，我都唔太記得問左d咩，醫生問我行唔行到去照肚，我心唸，又照？今次我梗係話行到啦，事實上瞓過吓又真係開始唔太痛，無咩咁，咪自己行過去囉！呢個醫生都好cool咁，但當佢問我睇開邊個私家嘅時候，一聽個名就好緊張問我佢以前响邊間醫院做，我點知喎，跟住又問我佢後唔後生，幾多歲咁，我又點知喎，都係估估吓話佢知咋！一開始照肚一陣，佢就定住左，我以為有咩事，佢問我可唔可以幫佢揸住個scanner，咁我咪揸住囉，見佢行左去我左手邊撥開盞燈，返埋黎佢話佢老花，盞燈“殘”住佢睇唔到喎，我覺得佢幾攪笑。佢都好有心機每part都睇好耐，佢又係話我胎盤低，問我知唔知係點，想唔想睇吓，我話好，佢就撥左個monitor俾我睇，重解釋個程況係點，雖然我望住個monitor都想像唔到邊度打邊度，但係都好appreciate佢嘅態度。佢照照吓突然又同我講，叫我唔好縐埋眉頭，唔使咁緊張，放鬆d，我都唔知自己縐緊眉！照完一輪，佢話所有可以check嘅野都正常，問我有無問題，我咪問佢會唔會係小b踢住左我某個位所以我覺得痛，佢就問番我，我覺得呢？我點知喎，知就唔使問你啦！佢其實都好似好得閒咁，定係佢有耐性呢？佢不斷問我有無野要問佢，其實我真係唔知問咩好？都已經話係正常，咁即係無問題啦，係唔知點解痛，有咩好問喎！佢見我都無咩問，開始主動講我胎盤低嘅情況，佢話好彩我唔係生响古代，如果唔係，會死人！嘩！嚇死人咩！佢又開始解釋點解會咁複雜，胎盤點様同子宫分離，點解胎盤低（即胎盤前置）分娩時會流血不止，做手術又會點，攪到我越聽越驚！佢話我都要知吓d解剖學嘅野，瞭解多d自己嘅情況喎！我心唸，係咪佢覺得我無野問所以以為我唔知自己嘅情形唔係好似其他人咁順利，所以講咁多野黎嚇我？我趁機問佢我嘅胎盤前置係第幾期，佢話一般要响二十八週後先可以certified係胎盤前置，因為始終都有機會升番而無事，所以唔能夠太早下定論。咁我話我而家都二十六週，如果以我現時情況睇，係第幾期，佢就畫埋圖俾我睇四期有咩唔同，以第四期為最嚴重，我係第三期喎！聽到後都幾唔開心，唔怪得上次巫醫生講到我做硬手術咁啦，第三期喎，就算俾我升番，係咪可以升到無事？好似難d咁！俾我升番去第一、二期，都唔係一定可以唔開刀，何況係咪可以升番咁多都唔知，淨番嘅時間就越黎越短！不過由見完巫醫生feel到佢覺得我係要開刀開始，我都叫自己去接受，因為我都無得選擇，只可以慢慢tune番心情。而家唯有慶幸自己唔係第四期咁差，向好嘅方面唸，可能真係突然升得番呢！最後，我問佢我幾時可以出院，佢話你唔係唸住而家走得麻？唉！即係我點都要响度過夜？！！！
返番張床度，開始覺得肚餓，但我知出面門口要密碼先可入番黎，都唔知可唔可以出去，忍唔住捉住姑娘話我好肚餓可唔可以落去買野食，佢話你梗係唔得啦，之後叫左嬸嬸俾左兩包餅乾同一包奶俾我。果兩包餅乾，每包得兩塊，食完都feel唔到有飽嘅感覺，我對奶係有d敏感，但係真係好肚餓，頂硬上都照飲！唉！六點先係探病時間，重有幾個鐘，食得果幾塊餅仔，真係好難捱！唯有瞓吓無咁肚餓！
我發覺隔離床（其實係隔左條巷仔）個女人著左手術袍瞓左响度好耐，我食親野都望住我，我唸佢可能就生得，所以唔俾食野，佢一定好肚餓！佢駁住左d機，其中一部係bb心跳聲，成日响度“伏”“伏”“伏”，好嘈咁！
重以為老公會sharp六點衝入黎探我，點知一路見其他人黎都唔係佢，幾失望呀！到八點咋，重唔黎，好肚餓！五點半派果餐我都忍唔住食左少少飯，等到六點半，老公同奶奶終於都到，重有好豐富嘅晚餐同橙，我竟然食哂，佢哋都好驚訝！佢哋都唔知我餓左幾耐！好彩我叫左老公攞左兩包荳奶同排飽俾我，夜d肚餓都有野食吓！
七點半佢哋就走喇，無辦法啦，佢哋都未食飯！老公買左雜誌俾我睇，都可以打發時間等睇柴九！柴九嘅吸引力都好大，九點半一做嘅時候，好多人都起身睇！睇完個個去刷牙，原來十一點就熄燈！不過我係走廊第一張床，所以好光，就算我拉埋左d布，都係光！同埋周圍都小嘈，最煩係隔離床果部機，“伏”“伏”“伏”都未停過！食完飯之後我至知佢原來痛左好耐都未開到夠數，但佢又開始痛到忍唔到，係咁話要開刀，d姑娘又話佢一時時話要開刀，問佢佢老公係咪同意，佢又話佢老公知，姑娘叫佢call佢老公黎商量左先決定。醫生又黎過同佢講手術嘅風險，隱約聽到原來佢個b得三十二定三十四週，唉！
成晚，隔離床個女人係咁call姑娘問幾時開得刀，好嘈，瞓得唔冧！小b呢幾日都大幅度踢我，响醫院全日都係咁，突然間至唸起小b會唔會都覺得嘈？會唔會驚所以係咁郁呢？我摸住個肚同小b講叫佢唔使驚，媽咪响度，聽日我哋就走得架嘞！忍耐吓啦！好神奇，小b真係靜左，我真係大意，都無唸過小b都會不安！到半夜聽到終於有位俾隔離床個女人開刀，即刻推走左佢，無哂d“伏伏”聲，我先可以瞓到。不過之後四點幾，又開哂燈，見到有醫生同個病人檢查，唉！到唔知幾點，d姑娘交更，開哂燈，叫醒我哋量血壓；唔知幾點，探體溫；唔知幾點，派餐；唔知幾點，聽小b心跳，煩死人！瞓吓瞓吓，又有個荗利叫醒我問我個早餐無食過，要唔要喎！再瞓，又有人叫我，話醫生巡房，要起身！GOD！！！呢個醫生係尋日好有耐性果個，原來佢姓張，張醫生問我個肚重痛唔痛，講真，都有少少，但係又唔係成日，既然都知無咩事，我咪話唔痛囉！因為之前果晚有醫生黎睇我，我話過好頭痛，又check血壓又check眼，check左一大餐都唔肯俾藥我，可能佢有寫落牌板，所以朝早張醫生問我重有無頭痛，我話重痛緊，佢問我係咪瞓得唔好，我都係苦笑點頭！我問佢可唔可以開頭痛藥俾我，佢好爽快咁話可以！佢又講多次我個case好麻煩，其實都唔知有幾嚴重，一時又話唔可以咁早certified，一時成日煞有介事咁話我個case複雜，希望我會好好彩，攪到我都唔知佢係咪想暗示d咩！做咩唔直接d同我講！之後我問佢我幾時出得院，佢都有d縐眉，話我又肚痛又頭痛，我係咪覺得可以．．．．．．．．．我心唸，我再唔走留响度嘅話可能重多呢度痛果度痛呀！我話我想返屋企休息，佢唯有俾我出院，寫左五日假俾我。不過佢話我等得黎都要lunch之後先走得，果時都係九點幾，重有成個上午咁耐！我開始幻想lunch出去之後可以食番餐好嘅！
老公呢個禮拜放大假，之前成日都好愁無野做，點知佢放假第一日我就入左醫院，佢重話我令到佢個假期突然變得好充實喎！都唔知好嬲定好笑！Anyway，佢呢個假雖然無啦啦有我陪佢，我唸佢都好悶，因為我又唔出得街，兩個人呆响度，你眼望我眼！
