B型人

我最近發覺我真係一個徹頭徹尾嘅B型人！我嘅血型係B型啦，就連我嘅身型都係！

 

都唔記得係幾時開始嘅事，胸部同腹部都脹左，可能係「漸」，令到我唔覺唔覺，到有一日，忽然間胸嘅底部竟然可以觸及腹嘅頂部，我不由得驚訝，原來胸大嘅感覺係咁嘅，呢種咁奇特嘅感覺好可能係我人生裡面嘅唯一一次！唔，我唸好多人都會覺咁様得都幾好，但係，我就覺得認真麻麻喇！真係好難想像d人可以時時刻刻都feel到自己個胸，某個程度，我覺得好難受！好似夏天好熱嘅時候，B型人會發現汗水都“攝”在那貼在一起嘅兩團肉内，好唔舒服！又好似當你食飽飽嘅時候，個胃自然又再脹d，呢個時候，無論你坐得幾直都好，個胃都好似會摺住左，好似B字俾人壓住左咁，好辛苦！唔知其他大肚婆係咪都同我一様有呢種B型困擾，定還是得我自己有呢d問題，事關我以前應該係Ｉ型人，即係柴人，完全無試過肉貼肉嘅感覺，所以一旦貼住左，果種累贅嘅感覺，真係好難會習慣！

 

有時都會唸我哋大肚婆就無得選擇要做B型人，唔同嘅係個B型嘅程度，但係我見响街度有好多仿B型人或者係疑似B型人，點解佢哋唔潔身自愛d去擺脫呢個B字呢？呢d仿B型人或者係疑似B型人嘅表徴同真正B型人係一様，所唔同嘅係佢哋行路無咁“呀吓呀吓”，因為佢哋根本唔使就住個肚黎行，雙腳可以貼近d，唔似我哋呢d真正B型人，雙腳無可能拍埋一齊！另外，就算佢哋都係“呀吓呀吓”咁，佢哋絕對可以彎低身去執地下嘅野，而真正嘅B型人亦無可能咁做，事關小b會第一個投訴，跟住就係你身邊嘅人，所以真正嘅B型人通常都唔需要自己彎身，佢隔離果個會幫佢架喇！迫不得已，真正嘅B型人只會整個人向下蹲！

 

可能而家實在有太多仿B型人或者係疑似B型人啦，一般人都慣左，所以我哋呢d真正嘅B型人無論响邊度，都無咩人會禮讓你，甚至乎會遭人白眼，例如有好幾次行得慢，俾後面嘅人爬完頭重要擰轉頭“厲”你！搭地鐡企左响門口個肚頂住行唔到入去，出面嘅人都照“標”上車，眼神中責怪你見佢上車都唔行入d俾佢入！坐村巴嘅三人位最入，中間果個疑似B型人一上車就打開大脾坐迫住哂，又唔係幾好意思話佢唯有忍左佢，點知佢一起身落車果下先發現原來係佢著條裙扮B型人，佢根本上唔係，呃左我嘅容忍力！坐村巴嘅三人位中間果個，最入果個要落車，坐出面果個梗係可以成個身轉出去讓路啦，坐中間果個可以點？就係盡量坐直個人縮埋對腳俾人過，但係B型人對腳縮極有限，咁又無啦啦俾人“啤”完再毫無顧慮下踩住腳面出囉！如此種種，真係層出不窮，雖然話係d人無品，無咩公民意識，但某程度上，如果唔係有太多仿B型人或者係疑似B型人嘅存在，我唸d人都唔會咁麻木！