政府超聲波

今日一早去贊育照超聲波，九點二要去到，唉，真係重早過返工！我同小b講，我哋食少少野出發，應該好快照完，照完先去嘆番個熱辣辣嘅早餐，小b好乖，踢左幾吓話好就瞓番嘞！

 

八點九去到贊育，因為照超聲波要俾錢，所以要先去會計部，點知會計部又未開，成條人龍响度！我約左九點二，咁唯有排住隊先，驚會計開左先排再上三樓照就遲到嘞！唔係企左好耐就累嘞，可能食得少少野啦！同埋我寧願行多過企定定，隻腳掌會企到無力咁！排得隊俾埋錢上到三樓都差唔多夠鐘，個超聲波部又係無人返工咁，reception無人架，全場得我同另一個大肚婆到左，都唔明佢咁早好似無人返工咁，但又約我哋咁早到喎，衰到死！咁咪又係等囉，好彩佢哋好多BB雜誌睇吓，都無咁悶！坐坐吓都開始有人出現，亦都多左d夫婦到左，我戴左口罩，唔知係咪咁，有d夫婦都眼望望，覺得我怪啩！又或者奇怪我自己一個人黎啩！

 

終於都到我，我唸都成九點半，入到去，有個大肚婆行埋黎話佢係黃醫生，今日黎呢度係睇小b嘅器官結構嘅，不過我哋都係盡量睇架咋，睇得幾多就幾多啦！佢講到咁不負責任，聽完都慶幸之前book私家照左。重有個醫生呀，我响出面坐緊嘅時候，佢先施施然返黎，都唔知佢返幾點嘅！我覺得如果約到我咁早，起碼都真係有人咁早返工囉，如果唔係點解要我咁早到喎！

 

我對政府檢查不嬲都無咩期望，只係上次巫醫生講到我胎盤低，好大機會升唔到咁，所以都想睇吓政府點講。個醫生雖然係大肚，但係同巫醫生真係差好遠，講bb嘅時候一d感情都無！我不期然唸佢點睇自己個bb嘅呢,，會唔會好職業化咁都係覺得無咩野，成日都見架啦，個個b都差唔多架啦！

 

今日小b都無咩郁，可能知道醫生要睇佢啩！醫生都好靜，無咩講過野，成間房都靜英英咁，可能係咁，醫生都係耐唔時講呢個係頭仔，腳仔咁，又唔會同你講多一句，正唔正常呀咁．．．．一開始佢都有問我有無去私家照，我話有，佢就問我私家有無話d咩特別野，有無唔正常呀咁，我都唔想理佢，覺得我有照還我有照，你都要睇架啦！我同佢講話大致正常囉！佢照小b手仔腳仔都無同佢數齊唔齊，可能佢一眼睇到齊又無數出黎啦！總之就佢有佢照，我有我瞓响度啦！開頭小b“僕”左响度睇唔到嘴仔鼻仔，佢話返轉頭先睇，後尾佢返轉頭睇，小b都係咁上下姿勢，佢就問我私家有無講嘴仔鼻仔有無問題，嘩！我真係嬲嬲哋架！我如果無睇咁點算呀，你下下都問番我！我覺得佢唔想煩，問左我如果無咩事就好似唔會幫小b睇咁，我梗唔想啦！我咪話上次小b兩隻手伸左上黎遮住，都唔係睇得好清楚，“應該”無事啩！個醫生係咁易震吓我個肚就話睇到嘞！我忍唔住問佢係咩，佢就話，嗱，佢個嘴咪响度妹妹吓囉！唔．．．．我都唔係幾睇到，都唔知係咪嘅！都無法啦，佢係醫生，佢話係就係囉！下次睇巫醫生都係叫佢望多次穩陣d！

 

去到尾聲，醫生同我講我個胎盤低，我話佢知私家都係咁講，見佢又無咩意思further解釋吓或者講多少少，好odd！講完你知又唔講多少少，咁即係點呀？我又唔醒起問佢有幾低，只係問佢我仲可唔可以順產，佢答我如果以我而家嘅程況去到尾都無變嘅話，我唔可能順產喎！唉！我真係應該問咁差幾多先可以．．．．但係我當時又唔識問，出左黎先唸起！醫生叫我三十二週再返去照，睇吓到時有無髙番先決定開唔開刀！三十二週．．．．．．有排忐忑嘞！

 

臨走時重唸住book埋果d產前講座，我都知我遲遲哋，不過都無唸過book唔到，點知放工後嘅堂全部無哂，得d平日早上嘅堂，即係要請假去聽，咁我一堂都無去過，驚驚哋，唯有都報左先算啦，不過佢哋都話有d都full左，有無攪錯架？！