自己食猴棗散

今日Ambrose好叻，坐新士的車無問題。夜晚飲左兩大碗湯，之後重自己“畢”飯食。臨瞓前我開左一小杯猴棗散氹佢自己飲，因為Ambrose食左成個月藥，由原本一食喊到好悽涼，到而家都係會叫喊但已經無眼淚，我好想train佢可以自己去飲，唔想下下用針筒令佢反感。今晚我氹左Ambrose一陣之後，原先重以為都係唔肯架喇，點知佢無啦啦真係肯飲，雖然佢只肯飲一啖，之後要佢飲埋都已經擰哂頭，但我都忍唔住要讚佢叻叻，其實d猴棗散都有d苦同有大陣藥味，Ambrose都可以鼓起勇氣第一次自己飲，真係勇氣可嘉，情形就好似大人飲苦茶咁，明知係苦都要提提氣“咕”一聲飲哂去，要Ambrose咁樣飲一啖真係好難得呀！雖然今次最後都係要用針筒餵，但相信呢個係一個好開始！

幼潛 － 第七堂

幼潛第七堂，今堂玩串大珠，姨姨俾左一枝用飲管包實嘅木筷子，然後係四粒好大嘅珠，不過珠雖然大，個孔都只不過係木筷子咁上下嘅粗度。姨姨要小朋友好似篤魚彈咁串哂d大珠入枝木筷子度。Ambrose嘅表現都不過不失，不過因為飲管同木筷子痴埋時痴得唔好，木筷子入口粗左，令到原本已經啱啱好嘅入口更難入，要每次都幫Ambrose按一按筷子頭嘅飲管，扁左少少先至容易入到，基本上，呢一個遊戲Ambrose可以完成，不過我覺得佢手指未夠靈活，係可以加強訓練嘅！今日又有set場玩大肌肉訓練，不過似乎簡單左少少，個軟枕實在太細同矮，無咩難度，行蛋紙殼路有d小朋友好抗拒，但Ambrose一如以往，完全無事照行，基本上，我覺得Ambrose係幾enjoy玩大肌肉玩意，呢方面我覺得佢完全無問題，係跟得上。

細杯杯放入大杯杯，首先攞兩個size分別大嘅杯出黎要小朋友細杯杯放入大杯杯度，如果可以再加到三個，再到四個。其實杯套組Ambrose在家都成日玩，可以講係日日都有玩，長期放出黎嘅玩具之一，之不過又唔見得佢入大細杯好了得。平時套杯套組通常佢係將大至細咁叠上成一幢塔，當然要成功放啱哂十個杯我地都要從旁指導一下，除非佢自己順住成套杯次序攞出黎叠高就有可能全啱，如果打亂左佢都係會放漏。除左玩叠高之外就係收埋番九個杯入最大個杯度，概念都係細杯杯入大杯杯，不過唔知係咪九個太多，佢都會成日出錯，將大杯放在細杯上，而因為套杯個底係有一級，所以當佢大杯放入細杯中，又自然會叠到反向嘅塔出黎，總之要佢好好地將果d細杯順大細入埋就好難喇！今堂同佢試兩個時係得，再試三個時都勉強可以，試四個時唔知佢係咪心散，佢死都唔放，重要係咁望住人地玩自己唔玩，見佢咁又好無奈同隔離同學仔交換，顏色唔同左希望佢都肯玩，但結果都係一樣。姨姨黎到時就係佢唔肯玩嘅時候，其實Ambrose真係好少可唔肯玩到掂都唔掂，一向上playgroup佢都算合作，唔知點解今次唔玩！姨姨氹佢玩都花左d時間，再加上玩又玩得麻麻地，睇黎呢方面又係要加強訓練喇！姨姨話在家可以比唔同顏色嘅杯套佢入，等佢可以易分別大同細，其實屋企果套已經係唔同色，反而我又會覺得唔同色佢會認住顏色次序黎入多過真係識分大細黎入，anyway，反正有教具，都可以在家試多d嘅！

最後係用毛絨線穿剪碎嘅粗飲管，呢個上一期幼潛時Ambrose已經玩過，重要果時佢係穿到一條，可以將佢圍番條手鏈，由於佢果時都只係歲幾，佢做到我真係好開心，而且重珍而重之咁收起左條鏈，嘻嘻！只不過今堂要佢穿，佢都唔理我地，就算我自己扮穿得好開心佢都唔玩，唔知佢今堂攪咩！不過姨姨話呢次穿飲管，係訓練佢穿完識得放開隻手俾粒飲管“sir”落去，同之前一期要求佢穿到唔使放手唔同囉！玩完呢個穿鏈之後，姨姨俾左材料我地返屋企多多訓練，不過Ambrose一向對穿野都麻麻地，都真係好難訓練喇！

2011年2月27日

上完幼潛第七堂之後，爹爹揸車同我地去左apm食晏，因為實在覺得apm麻麻地好行，我地一入lift見住個水牌有邊間想食就直接去，諗住食完即走，今次去左紅螞蟻。

估唔到呢度都比較濶落，加上又有好正式嘅bb椅，我地可以舒服d食野。Ambrose今日好勁，我將我自己果碗蠔油冬菇酸辣湯底嘅冬菇用水洗左剪俾佢食，佢食左又無咩大反應，估應該都唔辣！之後俾左一碗朱扒飯Ambrose食，佢一路食，一路又好開心係咁向上望又騎騎笑，成碗飯食哂！到甜品時，爹爹俾左少少凍杧果Ambrose食，見佢食到皺哂眉，又用隻手掩住個口，唔知係唔好味定太凍，俾左兩次佢食之後，再俾佢都擰哂頭！

食完野，我地出發去太子睇吓我訂左嘅士的車，但因為Ambrose在途中已經瞓左，我都係自己去睇，見架車雖然唔係心目中咁輕，但都輕過原先用緊嘅坦克車，係我自己負擔到嘅重量，最重要係佢摺後可以企，真係好方便，市面上又好難搵，雖然成千一蚊一架士的車，我都最後自己仆搥買左！以後就可以同Ambrose去行街街，自己湊佢返playgroup都方便好多喇！

買完士的車去左姑姐到，Ambrose一去到停左車就醒喇！入到屋見到兩個表姐醒哂啦！又係三個小朋友一齊玩嘅時候！Ambrose見到有個結他仔好有興趣，係咁攪，係咁研究，幾次放低左玩第二d野之後又走去攞番起個結他，哈哈，其實我鍾意男仔拉小提琴多d，唔通Ambrose其實鍾意彈結他？

之後見隔離屋太麻有兩隻狗仔，我地又走左去睇狗仔。兩隻狗仔之中，其中一隻係怕人嘅，即刻匿埋响主人身後，另一隻就同三個小朋友玩。Ambrose帶著好奇又戰兢嘅心去同狗仔玩，佢一見狗仔超開心同興奮，伸手好想去摸，但到隻狗仔真係行近時佢又縮吓縮吓避開，好鬼好笑！隻狗一行開，佢又伸個頭去“莊”去搵隻狗，好得意呀！兩個表姐同狗仔比較熟，佢地無Ambrose又想又驚嘅表現，佢地重好攪笑咁係咁攞擺在地上嘅狗糧俾狗仔食，攪到一地狗糧。玩左半晝，食埋飯，我地就走喇！Ambrose走時竟然唔肯著自己對converse鞋仔，反而係咁指住晏晝借過表姐仔黎著嘅cros鞋仔，姑姐見佢要著，反正表姐仔都開始唔啱著，俾左Ambrose直接著走喇！爹爹一向唔鍾意cros鞋，點知囝囝似乎好鍾意，睇黎爹爹都要考慮吓讓步喇！

Shining Garden –Little Learner (第三堂)

今日Ambrose心情好似好好咁呀！一開始上堂就唱weather song，之前咁多堂我都係用手捉佢對手一齊跟動作做，今堂佢竟然可以自己做！what’s the weather自己伸手出黎，到sunny同cloudy都可以兩隻手做埋個動作，snowy都可以攬住自己打冷震，係rainy重未識做，雖然如此，都已經令我同爹爹好surprised！唱完歌仔要用隻碟同夾整太陽，揸住個太陽聽住歌圍圈行，時快時慢，Ambrose又係好投入，當叫faster，佢又真係會跑，重要係high到一路跑一路叫，好鬼開心咁！

之後派左兩枝wooden sticks，一路聽/睇住首歌一路做住動作，呢首歌係第一次聽，但Ambrose有d動作都跟到做到，而最令我surprised嘅係唱到hide時係要收埋兩隻手在背後，Ambrose竟然可以同一時間聽到而又做到！

今堂主題係Home Sweet Home，係教屋企唔同地方嘅名同入面應有嘅擺設。生字有：kitchen / refrigerator / living room / television / washroom / toilet / bedroom / bed。

上左三堂，每次教主題 時 老師會逐個小朋友去派咭仔，要小朋友讀番個生字，又或者係please先俾，我發覺一齊上堂嘅小朋友好多都講到，有時可能甩 一兩 個音，但都有跟講，有d重講到似模似樣，重要係男仔添，呢兩堂都忍唔住走去問身邊嘅同學仔家長小朋友幾大，原來已經有兩歲咁大，怪唔知得好似講野都幾叻啦，只係佢地體形細細粒令我以為佢地同Ambrose差唔多大又或者細過Ambrose，咁相比Ambrose都只不過剛歲半，真係仍有距離，等我都無咁驚！似乎Ambrose响呢一班入面都係偏細，希望到Ambrose差唔多兩歲時都好似呢d同學仔咁可以講得咁好啦！同埋希望同呢d比佢大成半年嘅同學仔上堂，佢可以快d學識就好喇！

 

“畢”波子

今晚又係爹爹返夜嘅日子，通常夜晚我都盡量同Ambrose玩吓d小玩意，訓練吓佢大小肌，尤其係佢小肌肉小手指係無大肌肉咁好！之前果排玩積木同貼貼子玩得多，尋晚同佢玩“畢”黑豆，要佢用匙將d黑豆“畢”落冰格度，一格一粒。但Ambrose實在太為食，佢係“畢”左之後擺入口想食，真係俾佢激死！見佢一係就想放入口，一係就“畢”極都將d黑豆彈左出地下或者隔離果格，似乎係黑豆太輕佢太大力，攪到d豆跳黎跳去。其實呢個idea之前係“畢”波子，只係我未買到一個較大嘅冰格俾Ambrose“畢”落去，咁就用左黑豆玩住先。睇完佢玩又覺得黑豆唔啱佢玩，一來危險，一定要睇到實一實；二來係佢太大力，豆太輕，所以我今日專登買左個格格盒俾佢“畢”波子。

似乎波子又重左少少，Ambrose“畢”到粒波子之後又唔係幾夠力定住再倒落d格格度，試左幾次，都見佢“畢”到定唔住倒落去，一係意外彈入格度，最後可能無咩成功感，佢索性用手拿起擺入格。可能佢第一次摸波子覺得好好奇好新穎咁，佢又攞d波子掉喇！最後要收起哂唔俾佢玩，睇黎我要再諗吓點樣modify呢個小訓練至得喇！

出牙

Ambrose出牙非常之慢，成十個月先出第一隻牙，一出又好快咁出左八隻，呢八隻牙仔都出左好耐重未有其他牙仔出喇！見其他小朋友有d真係好快，一歲左右已經出哂牙，又或者開始出大牙，Ambrose依然都重係果八隻！

歲半喇！八隻牙又好似少左d咁！有少少開始心急，始終出多少少牙，可以食多d唔同野同大粒d都得麻！我成日諗係咪奶粉問題呢？但食開隻奶粉又無咩大問題，唔想因為咁同佢轉啦！

平時Ambrose唔俾人掂佢個口，所以真係無得摸吓有無牙仔出。今晚抱佢嘅時侯佢丫大個口愕高頭，終於俾我見到佢牙槽有幾粒白點，原來佢已經出緊牙喇！一共有四隻，右上有兩隻，左上同左下各一隻，最衰摸唔到佢個咀仔啦，如果唔係都想摸吓佢右下牙槽有無牙出緊但又未露白點麻！

哈哈！之前都覺得Ambrose好多發展都係梗梗在應要發展到之前先至發展到，例如反身剛在六個月前幾天學識，行路又响十三個月前一兩天學識，出第一隻牙都要去到成十個月，重要開頭都只係兩隻咁多，出之後嘅牙仔都要去到成歲半先有，講野又重未講到，有時都真係會諗關唔關奶粉事，定還是Ambrose係比較慢熟嘅bb，唔知關唔關開刀生產事呢？睇文章話bb順產經過母體產道刺激，佢地會發展好d，唔通因為我開刀攞佢出黎，佢出世都無受過刺激，唔知咩頭咩路就俾人抆左出黎，所以發展都遲d？

DWE Action Card

我發覺Ambrose係好鍾意攞d咭呀，書呀俾我地讀，未夠一歲嘅佢就係成日都攞叠動物咭要我地讀完又讀，讀N咁多次都唔厭，我地口水都乾埋！可能就係咁佢好早已經識左好多動物，講中英文名佢都可以攞啱動物公仔俾我地！呢期佢又好鍾意攞DWE 嘅咭出黎要我地讀，有時佢自己會抆哂出黎玩，當然係攪亂檔啦！

今晚佢又攞叠Action Card出黎想我讀，我忽發奇想想睇吓佢識幾多呢d字，因為係Action Card，全部都係動作嘅字，所以我要佢每張咭攞出黎佢做番動作我睇。玩左一次，佢識做到相關動作嘅字有：

sleepy / bow / bend down / cheer / touch / sit / sad / giggle / pull / laugh / swim / blow / pour / wake up / knock / hit / cook / clap / happy / cry / dance / hungry / count / jump / run / write / drink / turn around / wave / smell / throw / listen / sleep / yawn / sing / skip / point / walk / throw away

另外，Ambrose已經識得自己碌咭睇字咭喇，雖然佢唔係張張都可以一take過放啱入去發聲，但我相信佢已經明白個運作原理，爭在嘅係佢要多練習令手眼協調好d，同埋入嘅力度大細控制得好d囉！

十八個月成長記錄

時間過得好快，Ambrose歲半喇，又係時候記錄吓佢嘅成長進程喇！  

一、                之前有段好短時間Ambrose肯用飲管杯飲水，點知個杯有次俾佢掉爛左之後再買過一個一模一樣俾佢，佢已經唔肯用喇！見佢咁樣都好沮喪，嘥哂我d錢買左咁多飲管杯！一次同佢出街用個暖水壺倒左少少水落個壺蓋度俾佢飲，佢又肯飲喎，自此之後我就完全放棄俾佢用飲管杯，直接跳去用水杯就咁飲就算！估唔到呢個方法可行，雖然佢都唔係飲得好多，但佢唔抗拒咁飲，而且飲得多佢都開始識得控制，係有時唔飲會就咁倒哂d水落地囉，整體上，佢都算快可以就咁用杯飲喇，見其他小朋友都重係用飲管杯又或者係奶咀頭飲管樽， 連幼潛 老師都讚佢叻！

二、                自己用牙簽篤食物食，已經好叻喇，連通粉一碗都可以自己篤哂黎食，乾淨企理。耐唔時晚飯都有俾匙Ambrose自己食飯，有時食得唔錯，有時會整到一地都係，更有時可能飽更加會用手玩飯，用匙方面有待改進啦！

三、                尚未進行戒片訓練，打算二十個月至開始，到時天氣暖d唔怕佢成日濕左凍親，target係返兩歲班前可以戒到！

四、                識得跑喇！同埋開始自己練習跳，可能佢都有番咁上下份量，又未掌握到跳嘅動作，都係十次有一次真係跳到！不過睇佢跳吓跳吓un吓un吓個樣真係好抵死架！

五、                上落梯級都有進步，不過都重係要再訓練多d，尤其係落樓梯！

六、                自由爬上同爬落屋企兩張床，唔使人幫！

七、                識得自己坐自己張椅子，唔使人幫！

八、                已經識放啱哂圖形、顏色及數字手抓板，正在加入英文字母手抓板俾佢，希望唔使好耐佢自己識擺啱哂！

九、                開始識得玩mega block唔係只係一粒一粒砌上去砌成一條，而係砌上塊底板度有幾幢嘅建築物喇！

十、                識得自己著拖鞋！

十一、        夜晚飲完奶奶識爬落床行入廁所刷牙！

十二、        食完飯幫手搬台同椅返原位！

十三、        唔再半夜爬過黎我地張床瞓，可以一晚到天光都瞓在自己床同自己枕頭，真係舒服好多呀！

十四、        說話能力依然無咩進展，自發而講到清楚係爹爹，其他我地講佢跟講

而聽得明嘅有：謝謝／爺爺／包包／餅餅／公公／婆婆／腳腳／鼻鼻／姨姨，跟講又講得唔清唔楚有大把，其中媽媽係最攪笑，有時佢係可以清楚講到媽媽，有時佢會講左爸爸，基本上，佢講野都係麻麻，好多時都係發到b同d音，m音t音好似幾弱咁！有人話男仔遲d識講野，我希望係啦！

唔知點解十二個月至十五個月嘅Ambrose好似明顯有好多唔同嘅進步咁，但到十五個月至十八個月又好似樣樣野都停滯左，唔知係咪因為佢越黎越大，我對佢嘅期望高左，以致到我覺得佢無咩太大躍進，定還是佢需要比較長時間去觀察同思考以致未有好多好明顯嘅進步表現呢？

歲半生日

昨天係Ambrose歲半生日，原本打算買個小蛋糕同佢慶祝吓，但因為上完playgroup行左陣之後怱怱返去婆婆度食飯，將買蛋糕呢一環完全忘記左，自己都有少少失望！

今日Ambrose無返幼潛，我自己一個人湊佢，本來都好想同佢去公園玩吓同去行吓街街，奈何當我想出去時佢又眼瞓，之後夜晚老爺又接左我地去姑仔家食飯，咁就邊度都無去過，好悶！爹爹八點幾放工黎到，佢竟然買左個小蛋糕俾Ambrose，真係喜出望外，以為歲半生日就咁無聲無色過左添！食完飯之後，攞埋個蛋糕出黎，兩個表姐都好興奮咁，不過Ambrose已經眼瞓有d吽，大家熄埋燈唱生日歌，姑丈負責錄影，超開心！一唱完生日歌兩個表姐左右夾擊Ambrose錫錫，場面又攪笑又溫馨。雖然只不過係一個小小切餅儀式，而且係遲左一日，但見三個小朋友都好開心，我自己都好開心呀！

幼潛 － 第六堂

今堂係第二堂爹爹唔可以同我地一齊返學嘅日子，經過上一堂好辛苦咁出去返學，眼見昨天又下雨，已經決定唔返學喇！費時冒雨又走出去咁辛苦，又病一餐就麻煩。點知今日一滴雨都無落到，而奶奶昨天因為諗住唔返學又無留在家，眼見天氣唔差，但得自己一個人，雖然好想同Ambrose出去上堂，但好無奈地我自己真係無信心可以手抱佢出去返學，最後都要放棄！好可惜呀！

Shining Garden –Little Learner (第二堂)

今堂Little Learner係Ambrose嘅第二堂，朝早勞碌完去左聖彼德堂參觀再趕去元朗睇士的車，隨即趕黎上堂，Ambrose表現尚算可以！唱過哂例行嘅歌仔同彩虹傘之後，又係主題學習時間，個個拉椅子霸頭位去聽。今堂主題係：Healthy Food / Junk Food，學習生字為：french fries / water / chocolate / vegetables / chips /ice-cream。同上堂一樣每個生字都有相對嘅咭仔俾小朋友，而老師準備左兩個大公仔，一個係fat boy，一個係strong boy，介紹完每種食物之 後 老師教小朋友將食物咭仔或實物玩具放入相對嘅公仔口入面，教佢地咩係healthy food 同 junk food。雖然我覺得生字都叫實際生活上都可應用到，不過要將佢分埋healthy food 同 junk food，好似對於歲半嘅Ambrose黎講都叫困難咁。介紹哂所有生字同放入公仔口之後，遊戲就開始喇，老師响中間預備左兩台食物咭仔同實物玩具，小朋友在台上攞一件然後自己行去相應公仔度放入口。好難囉！Ambrose只係走去攞左咭仔之後唔行埋去放，一尾揸實唔知做咩，成個遊戲都係得個睇字，真係無佢符！

之後就係worksheet同stickers，將食物貼子貼在worksheet上相應嘅欄位中，呢個又係要靠媽媽好落力咁幫手完成！食埋餅餅clean up埋又係時侯bye bye喇！

青山聖彼德堂幼稚園

今日係青山聖彼德堂幼稚園開放日，呢間係我地心儀嘅幼稚園其中一間，爹爹之前接表姐放學時同Ambrose去玩過，反而我一直都無入過去睇個環境係點，適逢表姐要表演加開放日，我一定唔會錯過去參觀吓啦！

點知，一家三口實在太好瞓，一瞓就瞓到十一點幾，我地諗住攪得Ambrose食埋粥仔出門口，表姐都表演完兼開放日都完埋，所以好失望咁都係放棄唔去响屋企hea多陣好過。誰不知奶奶有少少勞氣話，唔好再瞓，“拿拿林”攪埋出門口啦！可想而知佢好想去睇個孫，我地都唔敢怠慢，旋風式出門口，去到已經成十二點，表演開始左喇！

因為表演地點响隔離教堂，今日又凍又落雨，我地入左幼稚園先知在隔離表演，重要係就黎完，所以都無無冒雨行過去，只係入左間課室食魚彈俾個身回暖吓。又凍又落雨，Ambrose又掛住食魚彈，我自己行黎行去參觀吓。其實果度好似有三幢校舍咁上下，集中埋一齊，有少少唔太歸一咁，不過唔係太大地方，行兩行都大概知道邊度通邊度。見到課室入面有少少舊嘅感覺，可能落雨嘅關係好似有少少暗咁，個心其實都麻麻地架喇，望吓佢地下正中有個露天遊樂場，反而果度都幾光猛，感覺幾好，樓上幼兒園隔離有個有蓋遊樂場，唔太大都唔係細，睇落都唔錯！再望吓廁所有分男女，裡面重有屏風遮住，真係一個正常廁所，因為之前見過有d入口有分男女但入面係互通嘅廁所，又有馬桶與馬桶之間無遮擋嘅，感覺怪少少囉，所以呢度個廁所係正常。洗手盤在廁所外，好乾淨！雖然如此，佢嘅舊都令我感覺麻麻，但當我入去班房見到d老師同小朋友玩遊戲時嘅態度係好好，好友善，唔會唔耐煩咁，而所玩嘅遊戲又都幾啱咁細個小朋友玩，唔似之前有學校攪開放日但d遊戲完全唔係俾我地呢d小bb，感覺真係幾好！因為覺得老師友善，遊戲有心思，即時對佢課室舊已經無咁介懷喇！哈哈！

不過以我估計幼兒園係在樓上上堂，有少少擔心嘅係Ambrose咁細個日日都要行樓梯，唔知會唔會好易唔小心“碌”落樓梯就真，如果落雨撇濕樓梯，好似今日咁都要好小心行啦，佢咁細個邊識要小心呢，到 時d 老師會唔會睇唔實咁多小朋友架！

呢間學校要夠十八個月先可以入表，我地等左好耐，今日Ambrose已經夠十八個月，但今日開放日又唔收表喎，唯有過幾日再入表啦！佢地schedule八月出世小朋友要到五月中先有得interview，我估真係全屯門最遲有得interview嘅學校，真係等死人喇！

圖形及顏色手抓板

Ambrose十四個月左右嘅時候，Ellen同0907媽咪淘寶團購玩具／教具，佢好好咁問我有無野買可以搭佢單一齊買。一上網見到d教具／玩具真係又平又好啱我嘅要求，真係唔使點諗就買買買！其中一個玩具／教具係圖形手抓板，圍番港幣加埋運費都唔使二十蚊左右，重要佢係一塊好plain嘅手抓板，板面完全無公仔，板上每個圖形係唔同顏色，孔入面嘅顏色係同塊手抓板相應嘅，唔會好似有d板一攞開入面個孔係其他野，例如係公仔之類，完全符合我嘅要求，而且响香港基本上我都搵唔到呢種咁plain嘅手抓板，只有反斗城超花巧超多公仔嘅板，但要成四十蚊，所以一直都無買到，好彩而家有團購買到我嘅心頭好！

因為諗住Ambrose都無咁快識玩，所以都無即時開出黎俾佢。到大概十五六個月時先至攞出黎俾Ambrose玩，當然，佢係唔識玩嘅，唔好話配對番啱嘅圖形，連扭正一個圖形放入個孔度都有難度呀！我預期佢都可能要玩上好幾個月先識，就好似當初幾個月時買左個粗彩虹柱俾佢入大細環，擺左同教左好耐都唔識玩只係識食，係無啦啦有一日又識左，本住呢個經驗，我都照放塊手抓板出黎俾佢玩，等佢自己鍾意去玩吓攪吓學吓都係一件好事！點知過左一排，我諗都無一個月，Ambrose已經學識左玩圖形手抓板喇，雖然睇佢個樣都唔係特別有興趣或者好鍾意塊板！

Ambrose識玩塊圖形板之後我都無特別收起，繼續俾佢鍾意先攞出黎玩，雖然好多時候佢都係攞左塊板出黎再倒哂d圖形板走左去唔係玩！十七個月時，Ambrose已經可以好純熟咁入哂d圖形，有時候佢甚至可以响二十秒內入好哂九個圖形。但我發覺佢有時會混淆左棱形同正方形，我再去觀察嘅時候，發覺每個圖形係唔同顏色嘅，唯獨是棱形同正方形一樣係同一隻綠色，呢個發現令我諗究竟Ambrose識入呢d圖形係認到顏色再去配對番定係真係認到個形狀呢？我有嚐試講圖形要佢攞俾我，但佢唔合作，唔肯同我玩，所以真係測試唔到佢。但另一方面我地有一盒積木，有個面板係唔同形狀嘅，Ambrose大致都可以入啱形狀，唔知係咪因為立體問題定其他原因，入形狀積木又無玩形狀手抓板咁快，所以我諗緊係咪應該買多個顏色手抓板俾佢train埋佢認顏色呢？

無咩地方買呢d手抓板，結果都去反斗城望吓，見到有一個顏色手抓板係全部魚仔，每條唔同顏色，魚尾係手抓板揭起做配對，雖然成塊板個底都幾彩色唔plain，但佢做到同一個形狀唔同顏色，咁應該唔存在認圖形黎入呢個問題，所以最後我都買左呢塊魚魚手抓板俾Ambrose。

買返黎第一晚我同Ambrose，發覺佢玩得一般，一來發覺佢放條魚尾都幾難，要對準成個魚形入落去，又加上塊板新，d孔緊緊地有d難入；二來我覺得佢好似對橙色黃色呢d近似色有少少混淆同猶豫，我有d擔心佢會唔會好似爹爹咁有色弱呢？第二日同爹爹講呢個問題時，爹爹話同佢玩過無問題喎，Ambrose已經可以入啱色同入啱魚尾，我心諗，之前果晚先同佢玩完麻麻地，第二日就已經可以？係有d難以置信！當晚返去睇佢玩一次，發覺爹爹真係無錯，Ambrose順利玩到哂所有色兼且無第一晚咁入唔落條魚尾，實在好神奇呀！

玩多兩日顏色手抓板，Ambrose重好攪笑咁首先放一放啱條魚尾，之後好快會放落一條錯嘅魚尾度，望吓我地自己擰擰頭再重新放番落啱嘅顏色度，真係好鬼馬！見到佢咁快已經認到形狀同顏色，好慶幸有買呢兩塊板俾佢玩呀！

情人節

今年情人節爹爹book左機場富豪酒店住宿晚飯兼spa嘅package，係好surprised！不過當日我要返工，我都係放左工由灣仔出發去機場，七點左右已經到喇！間房對正架大飛機，好正，如果Ambrose睇到嘅話！諗住第二日六點先退房，酒店又有個playroom，加上又有lunch buffet買一送一卷，諗住第二日叫奶奶湊Ambrose過黎玩吓！

在房間settle左之後就落去做spa，好耐都無咁relax俾人按摩，真係超正，好舒服，差d瞓著左！之後我地去左居酒屋食晚飯，不過佢地上野食真係超耐，我地都係d無咩耐性坐响度食野食好耐嘅人，最尾甜品都要催佢地快d上！

酒店個package有紅酒同朱古力送，不過我唔啱朱古力，我地另外買左少少零食去送紅酒，一路睇住電視做“情陷紅磨坊”一路食零食，真係最高享受！因為自從有Ambrose之後，我地已經戒絕電視，睇戲更加少上加少，Ambrose而家我地食咩佢又要食，佢唔瞓我地都唔可以食零食，終於又有得睇戲又有得食零食，按完摩真係超爽呀！

可惜第二日醒嘅時候發覺周身唔多妥，個人好似俾人打左一身，頭重重，個人好熱！原來我發燒呀！爹爹又超頭痛，佢重痛到入左洗手間嘔，嘔左好幾次先出返黎，身上最慘無頭痛藥，結果，本來諗住可以接埋Ambrose入黎玩同食buffet，都要取消，拿拿林打返公司請假，退房返入屯門睇醫生！而爹爹嚐試响機場買頭痛藥，點知搵左兩間萬寧都無，至慘佢唔係隻隻藥都食得，想買第二隻牌子都唔得，重要開車返入屯門，好慘呀！

我去睇醫生果陣個人真係好虛，不時打冷震，全身肌肉閃電式痛，掂到少少又痛，最慘係要等，等左成個鐘先入到去見醫生，見完又要等攞藥，真係攞命！食左少少野返屋企食藥瞓覺，瞓醒就起身食野，點知半夜又再發燒，我好耐都未試過發燒喇，重要一發退左又再發過咁利害，好彩我已經一早將自己隔開左另一間房瞓！呢一次病我足足攞左四日病假，自己昏迷左幾日，瞓到翻天覆地，不知時日過，好番嘅時侯已經係星期六喇！

2011年嘅情人節真係好難忘！多謝爹爹安排左咁好嘅節目俾我，奈何又用盡唔到兼病到懞左收場，不過都好開心，耐唔時有咁relax嘅時間可以二人世界，真係超正！希望下年又會有surprise啦！哈哈！

幼潛 － 第五堂

已經上緊第二期幼潛喇，呢一期報嘅時候爹爹都未轉工，所以報名時都有寫埋觀塘中心，希望中簽機會高d，點知抽就抽中左，但就真係去左觀塘，唔知點解簽號去到56咁前都派唔到第一志願尖沙咀，一心諗住都無問題嘅，都係揸車去，點知十一月時爹爹已轉工，上左之前果期覺得唔錯，既然都抽中左有得上堂，又唔想停，所以計過爹爹返工日子，十堂有兩堂同我地去唔到，最尾我都照去。

上左第一堂，問題就黎喇，觀塘社區中心位置都唔係難去，我相信自己去搭巴士落車都唔使行好耐，但係上堂地點位於四樓，係無lift上，要行樓梯，呢個係最大問題，如果我自己同Ambrose返學，第一難係要我自己同佢搭巴士，成個鐘頭車程唔計等車，如果佢一扭我都幾頭痕，我都當自己攪得掂，但係果四層樓梯，我點樣同時攞BB車同抱Ambrose上呢？真係好難攪！諗過買架輕嘅士的車，咁樣就算平時自己同佢去街都方便d，唔使吓吓都要行路搭唔到車，但係物色一架又輕又可摺起都企得又要揹得上肩嘅士的車，原來幾難！市場上無咩士的車摺左之後可以自己企，有嘅又唔再出！搵左一排都無，又唔想是但買一架，結果都係放棄左，就由奶奶陪我一齊出，有個照應解決左第一堂先！

真係屋漏兼逢連夜雨，已經要出到咁遠上堂，重要自己搭車去，重要落埋雨，天氣又超凍！爹爹早上打俾我叫我唔好上堂，因為落雨驚我地咁樣出去好辛苦，但我覺都交左錢又無咩特別原因唔想咁輕易走堂，爹爹提議我地搭的士出，我覺得可行，但奶奶已即時拒絕，覺得搭巴士一定得！就係咁，我地要冒雨出發！

Ambrose一出門口無耐已經在BB車入面瞓左，我地行去車站時竟然見有車，巴士停紅綠燈時我地推住架BB車跑去站頭，希望搭到呢架巴士唔使在雨中等車咁狼狽！其實追到架車都好難攪，Ambrose瞓左係幾難好快咁上到車，我嘅信心都唔大，但又真係俾我地啱啱响架巴士埋站時去到站頭，不過我地係最後上車嘅人，奶奶一手抱起Ambrose上左車，而我就負責收車同搬架坦克車上巴士。真係次次唔急都唔出錯，次次急住要開車收車，次次都唔知點解開唔到收唔到，今次又係咁，我已經做哂要做嘅步驟，我又唔係唔識收車，我都收過好多次車，但唔知點解都係收唔到！眼見奶奶同Ambrose已經上左車，我重响度收極都收唔到，個人都急哂，又落雨，真係超狼狽，要成車人等我收車，真係好尷尬，我好幾次都望吓個司機，佢又好似都諗住等埋我，咁我咪唯有不斷收車。見收極都收唔到，諗住成架車搬上巴士上左車至算啦，奈何架巴士係舊式白巴，個門口超細，撞正我架坦克車，我好辛苦成架舉上左架巴士度，但轉唔到彎入埋去，頂住頂住，又要放棄！心諗想叫奶奶落番車我地搭下架啦，點知奶奶單手抱住瞓左嘅Ambrose，單手走埋黎同我扶住架車轉少少位成架車上，真係有驚無險先上到車，我成身除左落雨淋濕之外，重係急到出哂汗，裡裡外外都濕哂！安頓好Ambrose俾我抱番後，奶奶去收部BB車，佢收第一次都唔得，到第二下即刻攪掂，真係吹脹！最吹脹係上左車安頓好之後，我發覺落車門係濶落好多，如果一早醒起落車門係大d，一早叫司機開落車門俾我上左先咪唔使攪到成車人等我收車咁核突囉！個司機又一d都唔醒喎，真係唔知嬲唔嬲佢好喇！

到站時Ambrose重瞓緊，落車比上車情況好少少，一落車又要擺番Ambrose落BB車，咁樣一整佢又醒左喇！都好嘅，都就上堂！去到觀塘社區中心，另一個挑戰，就係搬BB車同抱Ambrose上四樓！奶奶負責搬車，我抱Ambrose。基本上奶奶係逐級拖行架車上，我見到咁樣都覺得架車好傷，但又無辦法啦，唔通叫佢舉起上咩！幾經辛苦上到四樓，真係散哂，又凍又攰，重要上成個鐘頭堂，真係攰死人！

由於搭巴士都已經好狼狽，又Ambrose一出門口瞓左到落車，我完全唔記得佢未食野，佢上親幼潛有餅仔食都比在屋企時食得慢同斯文，好多時佢都只係食一塊唔會添食，但今堂佢竟然食完一塊走左出去添食，一食就食左三塊， 連 老師都話佢好少會添食，重要三塊，佢講笑話Ambrose係咪未食野，佢一咁講，我即刻醒起Ambrose真係未食野，七點幾枝奶去到點幾鐘，怪唔得知佢係咁要餅啦，笑到我同老師死死吓。上完堂，見Ambrose咁肚餓，又驚出去搵地方同佢食野都要時間，咁我地同佢响課室食埋粥至再出發apm！

過去apm又唔係想像中咁容易！我地行到天橋要過對面，發覺係樓梯，真係好煩，嚐試行去天橋另一面，期望果邊係自動樓梯，點知都係一樣！落住雨，又要抱番起Ambrose，又要收車抬車，地下又濕立立污污糟糟咁，真係頭都大，又係我抱Ambrose，奶奶拖車，好辛苦至上到去行過去apm，過到去又要搵lift搭，真係挑戰我嘅EQ！入左lift奶奶要食王家沙，王家沙响六樓，但架lift原來只去到五樓，真係一波幾折，想食野都咁難！

食完野我地就去搭巴士返歸，唉！個車站又在馬路邊，雨又唔停，我又驚好似朝早咁有巴士到先收車會攪唔掂，所以一去到站頭就收車先，叫奶奶同Ambrose行埋入面舖頭等有得遮吓同安全d，一等又等左成十至十五分鐘，真係想死！車一到奶奶即冒雨抱埋Ambrose上車，我又收傘同搬架BB車上巴士，又係淋濕哂，都唔理得咁多。Ambrose上左車又唔肯瞓，又唔肯坐，攪左一大餐臨入到屯門先瞓左覺，真係激死，又要抱佢落車！

原本我地之前諗好今日爹爹返早，我地上完幼潛返屋企抖一抖再出動去機場接爹爹收工兼行吓食埋飯先返屋企，但係舟車勞動左一餐之後，我同奶奶都得番半條命，我地都係決定放棄，重要一返到屋企攪掂左Ambrose上床之後我自己都大昏迷，真係超級辛苦呀！

講番呢一期幼潛，上左五堂又係唔太記得做過d咩喇，人老喇，唔即刻寫低過得幾日就無哂記憶咁！幼潛呢期上觀塘嘅中心，有度好係間房好大，可以容許父母一齊入去睇，更甚係其他家人都可入去，但在地墊上堂只可一人陪同，比起尖沙咀地方太細只可一個人入房又真係唔錯，起碼上堂大家都知玩過d咩唔使再講多次，而且房間係一般校舍，有天然光入，環境舒適，好過尖沙咀好似商業大廈咁密封左，又泊車好方便，如果唔係四樓無lift搭同埋爹爹而家要返shift未必次次同到我地一齊上堂，呢度係好好！連上堂個姨姨都好好笑容，感覺親切好多，但呢度就無左尖沙咀放學要排隊同姨姨攞手冊呢個我覺得好好嘅step！

上左幾堂幼潛，其中有兩三堂都有set場玩大肌肉嘅活動，比起之前一期係玩多左。大肌對於Ambrose黎講係完全無問題，爬上爬落捐隧道，佢一d難度都無，行唔同質感嘅路亦都無話驚，重幾enjoy去行添，行平衡木都無問題，係行彩虹石，有高有低同石與石之間有隙要誇過去行，Ambrose第一次行時好似掌握唔到點行，可能見我同奶奶同表姐都响哂度又分心，第一轉佢行得麻麻，試第二次時已經得左，之後亦都無問題喇！

小肌肉佢就麻麻地，唔太記得全部有d咩玩過，其中有俾個袋要佢自己開拉鏈攞入面嘅野出黎，佢都無咩興趣咁，一係拉開左少少之後就响開左個孔度格硬挖開個袋，咁條拉鏈自己都會開左，一樣係攞到入面嘅野，佢好少會肯好好地拉哂成條拉鏈黎攞野！另外，將一粒餅仔或者係小朋友鍾意食嘅野包入張紙度，包嘅方法係藥材舖執藥果隻包法，要小朋友用手打開攞入面粒餅仔黎食，但唔可以撕爛張紙。食對於Ambrose黎講都幾吸引，雖然佢不嬲手指仔唔係咁叻，但佢都完成到，重添食左幾次！小肌肉都有貼貼子，一張紙畫左十二格，要小朋友每格貼一張貼子上去，可以train到手指仔，加強空間感同埋專注力，Ambrose當日一面十二格好快就貼好哂，重反轉埋去後面果頁貼多幾格，望吓其他人都重未完成到一頁，都覺得Ambrose好勁， 連 老師都讚佢快！之前一期都有玩過插木柱，果時都得，今期又有得玩，Ambrose好快插好哂，但唔知點解次次Ambrose好快做到嘅野姨姨好似都睇唔到，因為快完成到，Ambrose通常又會攪亂檔，又抆哂出黎又掉，而呢d咁搗蛋嘅行為次次都咁啱係姨姨黎到佢個位時睇到哂，唉，有時知道個仔識，但無奈姨姨睇唔到囉，上一期玩插柱，都係發生一模一樣嘅事，令我決定第二次上堂時都盡量坐在姨姨對面，等佢都易睇到同埋同Ambrose有多少少眼神接觸先得！

認知方面都有玩過攞一件小朋友物件出黎，圍住堆物件唱首歌，之後叫小朋友去攞番佢地件物件，睇佢認唔認得邊樣野係自己嘅，好明顯Ambrose成日俾其他人嘅野吸引左，成日係咁望住未唱完歌就想行埋去攞，又會攞左人地件野黎玩，再叫佢搵番自己件野又要d時間先搵到，佢搵野係慢少少囉，好多時有樣野放响佢前面或附近叫佢攞佢都要搵一段時間咁！其他小朋友大部份都做到，Ambrose都係要玩左幾次先得，不過都唔係快搵到，要包尾囉，哈哈！另外，又攞幾樣野出黎，果日攞左梳，車仔，毛巾，同唔記得重有咩，先叫小朋友攞你想要佢攞嘅野出黎，睇佢識唔識攞，如果得，可以再進一步唔講物件名，只講個用途，要小朋友幫手攞啱嘅物件出黎。呢個遊戲唔知點解我對Ambrose無咩信心，梳都還好少少，因為平時同佢洗完白白都要佢自己梳頭，其他真係唔知道唔講名佢得唔得，點知一玩原來Ambrose都識哂，真係估唔到！

第一堂教左唱太陽伯伯，要跟住做動作，因為Ambrose都好鍾意聽歌仔，所以我地成日同佢唱，佢一聽會好開心，一個星期落黎佢都可以做到動作，係太陽伯伯要伸對手出黎放面兩傍佢係唔攞出黎之外，其他都好神似，ok架，上第二堂時爹爹重提姨姨不如唱呢首歌等Ambrose可以表演吓，好攪笑！

說話能力方面，姨姨而家點名時都要小朋友除左舉手之外，都要佢地試吓講“到”，當然Ambrose係講唔到啦，不過對於聽到名舉手就無問題。另外姨姨要小朋友出去攞野都要講謝謝，Ambrose上期幼潛都重未識講，呢一期已經識喇，不過唔知點解唔大聲，好似講秘物咁嘅聲囉！另外重有吹泡泡，要小朋友用口吹破肥皂泡，Ambrose都得！吹泡泡係講求口肌控制，而講野都係運用到口肌，所以呢個遊戲對講野係有正面嘅作用。另外係吹哨子，果日姨姨派哨子要小朋友吹，佢一路話唔係個個小朋友呢個age都可以做到，而且做到又未必好大聲，Ambrose其實都已經吹到好幾次，點知佢一講完唔係好大聲，Ambrose無啦啦吹左一聲好大聲而且唔係一秒就停果隻，咁啱姨姨又埋到去佢度，嚇左姨姨一跳，當然，姨姨又讚Ambrose叻啦！不過雖然佢係做到，但講野又真係一d進展都無，唔知Ambrose會唔會有speech delay呢？ 

幼潛上左五堂感覺都重係幾好，雖然有好多時教左嘅玩法未必响屋企有時間做到，但都感覺上左堂係有得益，知道Ambrose有咩強弱點同埋進度有無落後，玩d咩可以幫到佢，最重要係Ambrose上堂時係比响屋企表現更乖，服從指令，守規矩，所以下一期都有照報而且又抽中番返尖沙咀，希望Ambrose返耐少少幼潛，再大少少識野多d時會可以在家都一樣咁乖同埋習慣返學係要守秩序啦！

禍不單行

今日爹爹返早，奶奶出街，所以今日又係我獨力湊仔日！

晨早七點幾，Ambrose起身要飲奶，撐起身出去沖好奶，個心不斷期望佢飲完會瞓番，咁樣我先有覺好瞓！如意算盤打唔響，Ambrose一向飲完枝奶都好快有poo poo，今朝都唔例外，無辦法，一定要起身同佢換片洗pat pat！唉！

同佢除左片，將佢抱起去洗手盤度諗住洗嘅時侯，唔知係佢郁定係我抱唔實，總之有一刻我係覺得自己唔夠力想抱好d佢時，突然覺得佢頭重尾輕，電光火石之間，Ambrose已經趺左响地下度！我登時驚到死咁濟，個腦第一個念頭係佢會唔會暈左？使唔使打999call白車？佢咁跌法會唔會有骨折，我可唔可以抱起佢呢？個心好驚好驚，不自覺自己一邊尖叫一邊蹲下去抱起Ambrose，見佢大喊反而有少少心安，起碼佢都識喊！不過自己都未鎮定到自己，一路大叫一路問佢有無事一路講對唔住同埋一路攪住佢，我真係嚇到自己都好想喊！Ambrose反而又無喊到回唔到氣，佢喊左一陣，可能我又呵番佢又攬實佢，反而佢好快無事收聲。雖然佢望落無事，我摸佢又唔覺邊度起樓，但之前都有睇過書，小朋友跌到個頭有時未必即刻嘔或者昏迷，係要觀察三日，所以我都唔敢放心哂！可能因為喊過，Ambrose玩左一陣個樣好攰咁，我就同佢再去瞓，但個心又即刻諗佢啱啱跌完而家瞓覺會唔會瞓左唔識醒？好唔好都係去一轉急症室？

佢瞓左之後，我心情都開始平伏，我再諗番頭先果刻，究竟係點樣將Ambrose倒左落地，唔知係咪個人太驚，我竟然一d都諗唔番起件事係點發生，只係記得我望見佢响地下時係有少少打側身，有無跌到“卜”一聲我都唔知道，唯一記到嘅係我嘅尖叫！雖然我唔係跌落地果個，但我親身體驗呢個咁恐怖嘅一刻真係好驚嚇，呢d係咪咩創傷後遺症？我再去回想頭先嘅情形，如果佢果刻唔係跌落平地上面，如果係企缸“駁”咁咪好金？如果係條頸撞落個“駁”度呢？後果又會點？如果個馬桶無關埋，又會唔會趺落馬桶度呢？呢幾個情景都令到我覺得好不安，原來頭先由咁高跌左落地已經係幾好彩，我發誓，我唔會再抱Ambrose洗pat pat，用濕紙巾抺或者索性同佢沖涼就算，我再經唔起另一次咁嘅意外！

下午如常返shining garden個playgroup，今堂起Ambrose升班，由原本係little baby班升左上little learner班，由原本返星期六早上九點鐘到而家星期六下午三點九！升左班之後，一堂由九個字加長到一個鐘，內容其實同little baby有d係一樣有d係唔同。平時一開始係free play，clean up，hello song，weather song，彩虹傘，呢d都無變，玩完彩虹傘而家要攞椅子去鏡果邊以主題形式學生字，今日主題係情人節，生字教左：ring / hug / heart / rose (flower)/ chocolate。呢part之前little baby後期都有，不過唔使攞椅子，同埋而 家 老師會要小朋友嘗試讀個字再俾咭仔再要小朋友配對番放返入個膠套入面，個concept係唔錯，不過一時間一學完要佢地咁樣放入去配對，我有少少保留。放完咭仔，再有遊戲，都係將所學生字咭仔放入個大兜撈勻哂，小朋友自己攞完行去入落相對膠套度，Ambrose基本上係唔識字又唔識玩，一係就得個睇字一係去攞左咭仔揸起手玩，完全唔跟大隊去入咭咭！好辛苦先同到佢攞起一張heart，再氹佢行埋去嚐試放入個膠套入面，唔知係咪佢有玩形狀板，雖然形狀板係無心形，但佢都直接行埋去心形個膠套度入左入去，雖然唔知佢係真係識定撞手神放啱，但都令我超開心！玩完配對就返埋位做手工，呢part又係之前無，又或者係之前無咁正式要坐埋台坐定定做，做嘅手工又係圍繞番之前教嘅主題。再之後就係snack time，食埋野clean up，唱埋bye bye歌，再排隊攞番之前做嘅手工同stickers，一堂就係咁完結，算係好充實！

上完playgroup餓到抽筋，好辛苦行到去大家樂趕住食茶餐，點知買好野諗住等人送埋台先至發現無哂bb椅，真係大件事！無bb椅我好難食野，一隻手食野另一隻手又要扶實Ambrose驚佢跌！周圍望見有人攞左張bb椅但無bb坐，我唯有叫個侍應幫我去睇吓有無人唔用讓出黎，點知一個侍應用手回應左我就行左去，另一個侍應就十十吓，返黎同我講無bb椅，唉！真係激到彈起！坐左一陣，終於有人送餐過黎，點知遇著另一個十侍應，捧一份餐佢都竟然可以成杯凍檸茶倒瀉哂，好彩唔係倒落我身度，唔係真係火都黎埋呀！我湊住個仔又無bb椅，遇著佢地又倒瀉野，手腳又慢，真係攞命，佢地抺完張台都係濕立立，重要就咁走左去，好想走去鬧爆佢地，攪到Ambrose又去攪我又要去抺，真係麻鬼煩！

夜晚去左婆婆度食飯，二佬都返左黎，表姐一見Ambrose好開心，Ambrose又係鍾意同d大少少小朋友玩，所以佢地都玩得黎！表姐個人都比較穩陣，Ambrose同佢玩我可以放心少少，唔使全天侯戒備，加上二佬都望住，湊左成日咁辛苦，我咪上facebook輕鬆一下囉！點知上唔夠一分鐘就聽到“卜”一聲，Ambrose成個人瞓左响地度面向天，我忍唔住彈左句點解咁架，表姐話佢踩到地下d玩具自己“線”到落地，我撲埋去抱起佢，個心好赤佢同一日內咁樣跌到兩次，又好內疚自己無好好睇實佢，再好忟點解二佬唔係睇實，點解响自己屋企咁少撞到頭咁少意外，黎到婆婆度硬係耐唔時都整到撞到！個心又肉赤又忟憎，見到Ambrose喊到咁悽涼，我自己都忍唔住喊埋一份，抑壓左成日嘅驚恐，一次過爆發出黎，我重喊到收唔到聲，反而Ambrose見我喊就開始收聲望住我，表姐逮紙巾俾我時話佢驚到“標”汗，我先驚覺原來表姐都好驚，唔知係驚我怪佢定整喊我，作為一個大人响後輩面前喊到咁都有少少面懞，加上表姐話驚，我真係唔忍心同唔想嚇到佢，亦唔係怪佢，所以我都登時收聲。

返到屋企Ambrose同平時一樣無大特別，我先開始再放心少少！