幼潛 － 第五堂

已經上緊第二期幼潛喇，呢一期報嘅時候爹爹都未轉工，所以報名時都有寫埋觀塘中心，希望中簽機會高d，點知抽就抽中左，但就真係去左觀塘，唔知點解簽號去到56咁前都派唔到第一志願尖沙咀，一心諗住都無問題嘅，都係揸車去，點知十一月時爹爹已轉工，上左之前果期覺得唔錯，既然都抽中左有得上堂，又唔想停，所以計過爹爹返工日子，十堂有兩堂同我地去唔到，最尾我都照去。

上左第一堂，問題就黎喇，觀塘社區中心位置都唔係難去，我相信自己去搭巴士落車都唔使行好耐，但係上堂地點位於四樓，係無lift上，要行樓梯，呢個係最大問題，如果我自己同Ambrose返學，第一難係要我自己同佢搭巴士，成個鐘頭車程唔計等車，如果佢一扭我都幾頭痕，我都當自己攪得掂，但係果四層樓梯，我點樣同時攞BB車同抱Ambrose上呢？真係好難攪！諗過買架輕嘅士的車，咁樣就算平時自己同佢去街都方便d，唔使吓吓都要行路搭唔到車，但係物色一架又輕又可摺起都企得又要揹得上肩嘅士的車，原來幾難！市場上無咩士的車摺左之後可以自己企，有嘅又唔再出！搵左一排都無，又唔想是但買一架，結果都係放棄左，就由奶奶陪我一齊出，有個照應解決左第一堂先！

真係屋漏兼逢連夜雨，已經要出到咁遠上堂，重要自己搭車去，重要落埋雨，天氣又超凍！爹爹早上打俾我叫我唔好上堂，因為落雨驚我地咁樣出去好辛苦，但我覺都交左錢又無咩特別原因唔想咁輕易走堂，爹爹提議我地搭的士出，我覺得可行，但奶奶已即時拒絕，覺得搭巴士一定得！就係咁，我地要冒雨出發！

Ambrose一出門口無耐已經在BB車入面瞓左，我地行去車站時竟然見有車，巴士停紅綠燈時我地推住架BB車跑去站頭，希望搭到呢架巴士唔使在雨中等車咁狼狽！其實追到架車都好難攪，Ambrose瞓左係幾難好快咁上到車，我嘅信心都唔大，但又真係俾我地啱啱响架巴士埋站時去到站頭，不過我地係最後上車嘅人，奶奶一手抱起Ambrose上左車，而我就負責收車同搬架坦克車上巴士。真係次次唔急都唔出錯，次次急住要開車收車，次次都唔知點解開唔到收唔到，今次又係咁，我已經做哂要做嘅步驟，我又唔係唔識收車，我都收過好多次車，但唔知點解都係收唔到！眼見奶奶同Ambrose已經上左車，我重响度收極都收唔到，個人都急哂，又落雨，真係超狼狽，要成車人等我收車，真係好尷尬，我好幾次都望吓個司機，佢又好似都諗住等埋我，咁我咪唯有不斷收車。見收極都收唔到，諗住成架車搬上巴士上左車至算啦，奈何架巴士係舊式白巴，個門口超細，撞正我架坦克車，我好辛苦成架舉上左架巴士度，但轉唔到彎入埋去，頂住頂住，又要放棄！心諗想叫奶奶落番車我地搭下架啦，點知奶奶單手抱住瞓左嘅Ambrose，單手走埋黎同我扶住架車轉少少位成架車上，真係有驚無險先上到車，我成身除左落雨淋濕之外，重係急到出哂汗，裡裡外外都濕哂！安頓好Ambrose俾我抱番後，奶奶去收部BB車，佢收第一次都唔得，到第二下即刻攪掂，真係吹脹！最吹脹係上左車安頓好之後，我發覺落車門係濶落好多，如果一早醒起落車門係大d，一早叫司機開落車門俾我上左先咪唔使攪到成車人等我收車咁核突囉！個司機又一d都唔醒喎，真係唔知嬲唔嬲佢好喇！

到站時Ambrose重瞓緊，落車比上車情況好少少，一落車又要擺番Ambrose落BB車，咁樣一整佢又醒左喇！都好嘅，都就上堂！去到觀塘社區中心，另一個挑戰，就係搬BB車同抱Ambrose上四樓！奶奶負責搬車，我抱Ambrose。基本上奶奶係逐級拖行架車上，我見到咁樣都覺得架車好傷，但又無辦法啦，唔通叫佢舉起上咩！幾經辛苦上到四樓，真係散哂，又凍又攰，重要上成個鐘頭堂，真係攰死人！

由於搭巴士都已經好狼狽，又Ambrose一出門口瞓左到落車，我完全唔記得佢未食野，佢上親幼潛有餅仔食都比在屋企時食得慢同斯文，好多時佢都只係食一塊唔會添食，但今堂佢竟然食完一塊走左出去添食，一食就食左三塊， 連 老師都話佢好少會添食，重要三塊，佢講笑話Ambrose係咪未食野，佢一咁講，我即刻醒起Ambrose真係未食野，七點幾枝奶去到點幾鐘，怪唔得知佢係咁要餅啦，笑到我同老師死死吓。上完堂，見Ambrose咁肚餓，又驚出去搵地方同佢食野都要時間，咁我地同佢响課室食埋粥至再出發apm！

過去apm又唔係想像中咁容易！我地行到天橋要過對面，發覺係樓梯，真係好煩，嚐試行去天橋另一面，期望果邊係自動樓梯，點知都係一樣！落住雨，又要抱番起Ambrose，又要收車抬車，地下又濕立立污污糟糟咁，真係頭都大，又係我抱Ambrose，奶奶拖車，好辛苦至上到去行過去apm，過到去又要搵lift搭，真係挑戰我嘅EQ！入左lift奶奶要食王家沙，王家沙响六樓，但架lift原來只去到五樓，真係一波幾折，想食野都咁難！

食完野我地就去搭巴士返歸，唉！個車站又在馬路邊，雨又唔停，我又驚好似朝早咁有巴士到先收車會攪唔掂，所以一去到站頭就收車先，叫奶奶同Ambrose行埋入面舖頭等有得遮吓同安全d，一等又等左成十至十五分鐘，真係想死！車一到奶奶即冒雨抱埋Ambrose上車，我又收傘同搬架BB車上巴士，又係淋濕哂，都唔理得咁多。Ambrose上左車又唔肯瞓，又唔肯坐，攪左一大餐臨入到屯門先瞓左覺，真係激死，又要抱佢落車！

原本我地之前諗好今日爹爹返早，我地上完幼潛返屋企抖一抖再出動去機場接爹爹收工兼行吓食埋飯先返屋企，但係舟車勞動左一餐之後，我同奶奶都得番半條命，我地都係決定放棄，重要一返到屋企攪掂左Ambrose上床之後我自己都大昏迷，真係超級辛苦呀！

講番呢一期幼潛，上左五堂又係唔太記得做過d咩喇，人老喇，唔即刻寫低過得幾日就無哂記憶咁！幼潛呢期上觀塘嘅中心，有度好係間房好大，可以容許父母一齊入去睇，更甚係其他家人都可入去，但在地墊上堂只可一人陪同，比起尖沙咀地方太細只可一個人入房又真係唔錯，起碼上堂大家都知玩過d咩唔使再講多次，而且房間係一般校舍，有天然光入，環境舒適，好過尖沙咀好似商業大廈咁密封左，又泊車好方便，如果唔係四樓無lift搭同埋爹爹而家要返shift未必次次同到我地一齊上堂，呢度係好好！連上堂個姨姨都好好笑容，感覺親切好多，但呢度就無左尖沙咀放學要排隊同姨姨攞手冊呢個我覺得好好嘅step！

上左幾堂幼潛，其中有兩三堂都有set場玩大肌肉嘅活動，比起之前一期係玩多左。大肌對於Ambrose黎講係完全無問題，爬上爬落捐隧道，佢一d難度都無，行唔同質感嘅路亦都無話驚，重幾enjoy去行添，行平衡木都無問題，係行彩虹石，有高有低同石與石之間有隙要誇過去行，Ambrose第一次行時好似掌握唔到點行，可能見我同奶奶同表姐都响哂度又分心，第一轉佢行得麻麻，試第二次時已經得左，之後亦都無問題喇！

小肌肉佢就麻麻地，唔太記得全部有d咩玩過，其中有俾個袋要佢自己開拉鏈攞入面嘅野出黎，佢都無咩興趣咁，一係拉開左少少之後就响開左個孔度格硬挖開個袋，咁條拉鏈自己都會開左，一樣係攞到入面嘅野，佢好少會肯好好地拉哂成條拉鏈黎攞野！另外，將一粒餅仔或者係小朋友鍾意食嘅野包入張紙度，包嘅方法係藥材舖執藥果隻包法，要小朋友用手打開攞入面粒餅仔黎食，但唔可以撕爛張紙。食對於Ambrose黎講都幾吸引，雖然佢不嬲手指仔唔係咁叻，但佢都完成到，重添食左幾次！小肌肉都有貼貼子，一張紙畫左十二格，要小朋友每格貼一張貼子上去，可以train到手指仔，加強空間感同埋專注力，Ambrose當日一面十二格好快就貼好哂，重反轉埋去後面果頁貼多幾格，望吓其他人都重未完成到一頁，都覺得Ambrose好勁， 連 老師都讚佢快！之前一期都有玩過插木柱，果時都得，今期又有得玩，Ambrose好快插好哂，但唔知點解次次Ambrose好快做到嘅野姨姨好似都睇唔到，因為快完成到，Ambrose通常又會攪亂檔，又抆哂出黎又掉，而呢d咁搗蛋嘅行為次次都咁啱係姨姨黎到佢個位時睇到哂，唉，有時知道個仔識，但無奈姨姨睇唔到囉，上一期玩插柱，都係發生一模一樣嘅事，令我決定第二次上堂時都盡量坐在姨姨對面，等佢都易睇到同埋同Ambrose有多少少眼神接觸先得！

認知方面都有玩過攞一件小朋友物件出黎，圍住堆物件唱首歌，之後叫小朋友去攞番佢地件物件，睇佢認唔認得邊樣野係自己嘅，好明顯Ambrose成日俾其他人嘅野吸引左，成日係咁望住未唱完歌就想行埋去攞，又會攞左人地件野黎玩，再叫佢搵番自己件野又要d時間先搵到，佢搵野係慢少少囉，好多時有樣野放响佢前面或附近叫佢攞佢都要搵一段時間咁！其他小朋友大部份都做到，Ambrose都係要玩左幾次先得，不過都唔係快搵到，要包尾囉，哈哈！另外，又攞幾樣野出黎，果日攞左梳，車仔，毛巾，同唔記得重有咩，先叫小朋友攞你想要佢攞嘅野出黎，睇佢識唔識攞，如果得，可以再進一步唔講物件名，只講個用途，要小朋友幫手攞啱嘅物件出黎。呢個遊戲唔知點解我對Ambrose無咩信心，梳都還好少少，因為平時同佢洗完白白都要佢自己梳頭，其他真係唔知道唔講名佢得唔得，點知一玩原來Ambrose都識哂，真係估唔到！

第一堂教左唱太陽伯伯，要跟住做動作，因為Ambrose都好鍾意聽歌仔，所以我地成日同佢唱，佢一聽會好開心，一個星期落黎佢都可以做到動作，係太陽伯伯要伸對手出黎放面兩傍佢係唔攞出黎之外，其他都好神似，ok架，上第二堂時爹爹重提姨姨不如唱呢首歌等Ambrose可以表演吓，好攪笑！

說話能力方面，姨姨而家點名時都要小朋友除左舉手之外，都要佢地試吓講“到”，當然Ambrose係講唔到啦，不過對於聽到名舉手就無問題。另外姨姨要小朋友出去攞野都要講謝謝，Ambrose上期幼潛都重未識講，呢一期已經識喇，不過唔知點解唔大聲，好似講秘物咁嘅聲囉！另外重有吹泡泡，要小朋友用口吹破肥皂泡，Ambrose都得！吹泡泡係講求口肌控制，而講野都係運用到口肌，所以呢個遊戲對講野係有正面嘅作用。另外係吹哨子，果日姨姨派哨子要小朋友吹，佢一路話唔係個個小朋友呢個age都可以做到，而且做到又未必好大聲，Ambrose其實都已經吹到好幾次，點知佢一講完唔係好大聲，Ambrose無啦啦吹左一聲好大聲而且唔係一秒就停果隻，咁啱姨姨又埋到去佢度，嚇左姨姨一跳，當然，姨姨又讚Ambrose叻啦！不過雖然佢係做到，但講野又真係一d進展都無，唔知Ambrose會唔會有speech delay呢？ 

幼潛上左五堂感覺都重係幾好，雖然有好多時教左嘅玩法未必响屋企有時間做到，但都感覺上左堂係有得益，知道Ambrose有咩強弱點同埋進度有無落後，玩d咩可以幫到佢，最重要係Ambrose上堂時係比响屋企表現更乖，服從指令，守規矩，所以下一期都有照報而且又抽中番返尖沙咀，希望Ambrose返耐少少幼潛，再大少少識野多d時會可以在家都一樣咁乖同埋習慣返學係要守秩序啦！