自己食猴棗散

今日Ambrose好叻，坐新士的車無問題。夜晚飲左兩大碗湯，之後重自己“畢”飯食。臨瞓前我開左一小杯猴棗散氹佢自己飲，因為Ambrose食左成個月藥，由原本一食喊到好悽涼，到而家都係會叫喊但已經無眼淚，我好想train佢可以自己去飲，唔想下下用針筒令佢反感。今晚我氹左Ambrose一陣之後，原先重以為都係唔肯架喇，點知佢無啦啦真係肯飲，雖然佢只肯飲一啖，之後要佢飲埋都已經擰哂頭，但我都忍唔住要讚佢叻叻，其實d猴棗散都有d苦同有大陣藥味，Ambrose都可以鼓起勇氣第一次自己飲，真係勇氣可嘉，情形就好似大人飲苦茶咁，明知係苦都要提提氣“咕”一聲飲哂去，要Ambrose咁樣飲一啖真係好難得呀！雖然今次最後都係要用針筒餵，但相信呢個係一個好開始！