圖形及顏色手抓板

Ambrose十四個月左右嘅時候，Ellen同0907媽咪淘寶團購玩具／教具，佢好好咁問我有無野買可以搭佢單一齊買。一上網見到d教具／玩具真係又平又好啱我嘅要求，真係唔使點諗就買買買！其中一個玩具／教具係圖形手抓板，圍番港幣加埋運費都唔使二十蚊左右，重要佢係一塊好plain嘅手抓板，板面完全無公仔，板上每個圖形係唔同顏色，孔入面嘅顏色係同塊手抓板相應嘅，唔會好似有d板一攞開入面個孔係其他野，例如係公仔之類，完全符合我嘅要求，而且响香港基本上我都搵唔到呢種咁plain嘅手抓板，只有反斗城超花巧超多公仔嘅板，但要成四十蚊，所以一直都無買到，好彩而家有團購買到我嘅心頭好！

因為諗住Ambrose都無咁快識玩，所以都無即時開出黎俾佢。到大概十五六個月時先至攞出黎俾Ambrose玩，當然，佢係唔識玩嘅，唔好話配對番啱嘅圖形，連扭正一個圖形放入個孔度都有難度呀！我預期佢都可能要玩上好幾個月先識，就好似當初幾個月時買左個粗彩虹柱俾佢入大細環，擺左同教左好耐都唔識玩只係識食，係無啦啦有一日又識左，本住呢個經驗，我都照放塊手抓板出黎俾佢玩，等佢自己鍾意去玩吓攪吓學吓都係一件好事！點知過左一排，我諗都無一個月，Ambrose已經學識左玩圖形手抓板喇，雖然睇佢個樣都唔係特別有興趣或者好鍾意塊板！

Ambrose識玩塊圖形板之後我都無特別收起，繼續俾佢鍾意先攞出黎玩，雖然好多時候佢都係攞左塊板出黎再倒哂d圖形板走左去唔係玩！十七個月時，Ambrose已經可以好純熟咁入哂d圖形，有時候佢甚至可以响二十秒內入好哂九個圖形。但我發覺佢有時會混淆左棱形同正方形，我再去觀察嘅時候，發覺每個圖形係唔同顏色嘅，唯獨是棱形同正方形一樣係同一隻綠色，呢個發現令我諗究竟Ambrose識入呢d圖形係認到顏色再去配對番定係真係認到個形狀呢？我有嚐試講圖形要佢攞俾我，但佢唔合作，唔肯同我玩，所以真係測試唔到佢。但另一方面我地有一盒積木，有個面板係唔同形狀嘅，Ambrose大致都可以入啱形狀，唔知係咪因為立體問題定其他原因，入形狀積木又無玩形狀手抓板咁快，所以我諗緊係咪應該買多個顏色手抓板俾佢train埋佢認顏色呢？

無咩地方買呢d手抓板，結果都去反斗城望吓，見到有一個顏色手抓板係全部魚仔，每條唔同顏色，魚尾係手抓板揭起做配對，雖然成塊板個底都幾彩色唔plain，但佢做到同一個形狀唔同顏色，咁應該唔存在認圖形黎入呢個問題，所以最後我都買左呢塊魚魚手抓板俾Ambrose。

買返黎第一晚我同Ambrose，發覺佢玩得一般，一來發覺佢放條魚尾都幾難，要對準成個魚形入落去，又加上塊板新，d孔緊緊地有d難入；二來我覺得佢好似對橙色黃色呢d近似色有少少混淆同猶豫，我有d擔心佢會唔會好似爹爹咁有色弱呢？第二日同爹爹講呢個問題時，爹爹話同佢玩過無問題喎，Ambrose已經可以入啱色同入啱魚尾，我心諗，之前果晚先同佢玩完麻麻地，第二日就已經可以？係有d難以置信！當晚返去睇佢玩一次，發覺爹爹真係無錯，Ambrose順利玩到哂所有色兼且無第一晚咁入唔落條魚尾，實在好神奇呀！

玩多兩日顏色手抓板，Ambrose重好攪笑咁首先放一放啱條魚尾，之後好快會放落一條錯嘅魚尾度，望吓我地自己擰擰頭再重新放番落啱嘅顏色度，真係好鬼馬！見到佢咁快已經認到形狀同顏色，好慶幸有買呢兩塊板俾佢玩呀！