Ambrose上芭蕾舞班之七 (2y7m)

今日都係一換完衫就入左課室，一入左去又關左門，咩都睇唔到，完全唔知佢上左咁多堂學左d咩？！返埋今堂，又到公眾假期，再上多一堂後又要請一堂假去旅行，呢期芭蕾舞就會完，有時都諗，係咪重响度繼續學呢？

 

今堂Ambrose終於都儲夠六個印仔／貼紙可以換糖喇！媽咪响門口等佢出黎，重諗住會見到佢個開心興奮樣，點知見到Ambrose時又唔覺佢有咩特別喎，只係見到佢攞住自己d行季“裝”個頭出黎睇吓爹爹媽咪响邊咋喎！媽咪好奇之下打開佢本薄仔，見到明明有六個印仔／貼紙响度，點解會咩都無嘅？！好彩又唔覺Ambrose好失望個樣啫，好似媽咪失望多d咁，哈哈！

 

媽咪忍唔住走去問老師係咪夠六個印仔／貼紙就有糖換，佢話係，重問媽咪係咪夠左，咁媽咪當然即刻話夠啦，之後就叫Ambrose過去同老師攞糖喇！Ambrose攞左枝迷你珍寶珠不知幾開心，人都未行出黎已經係咁要搣包裝紙要食。攪左一輪終於都食到，佢個嘴重咪咪笑，好鬼開心！媽咪問Ambrose可唔可以同媽咪分享，佢又話好，媽咪本來諗住粒糖咁大粒，咬走少少等Ambrose可以食少d同食快d，點知一咬之下，成粒圓碌碌嘅珍寶珠無左整整一半，得番一半响枝棍度，Ambrose當堂大受打擊，怒喊，重郁手想打媽咪！媽咪都知道咁樣俾人食左半粒糖係好大打擊嘅，亦都明白好嬲好傷心之下好想打人，尤其是Ambrose視食物如命根，所以Ambrose郁手想打媽咪，媽咪都唔怪佢！Ambrose係咁鬧媽咪食左佢粒糖，媽咪都未得閒咬碎毀屍滅跡，唯有打開個口就咁同佢講話媽咪無食呀，雖然Ambrose都見唔到粒糖，不過佢打死都唔信媽咪無食佢粒糖囉！最後都係爹爹出馬先至擺得平佢咋！

 

唉！媽咪呢個醜人真係難做呀！又唔諗吓係邊個幫佢爭取到粒珍寶珠！！！恩將仇報！

Home Art Jamming@2012年3月30日 (2y7m)

今晚爹爹返工呀！Ambrose成日嘈住要做功課，媽咪索性俾左crayons同畫紙佢，自己入廚房洗埋d碗至出黎同佢玩！

 

洗完碗出黎，就見到Ambrose畫左呢幅畫，係佢自己一手一腳畫嘅！媽咪一睇就知呢架係巴士同埋馬路啦！不過媽咪事後俾爹爹睇，爹爹竟然估係蟲喎，激死人！

 

換左張畫紙，依然係車同馬路，不過好奇怪喎，Ambrose係將張畫紙打横黎畫，但架車同太陽嘅方向都係打直架喎！媽咪問Ambrose點解咁樣畫，佢將張畫紙打直之後就同媽咪講，咁樣咪阻住囉！原來因為張畫紙太大張，如果打橫就剛剛好可放上檯面，但打直的話，係唔夠長，張畫紙平放唔哂，真係估唔到Ambrose識得咁講！

再畫都係巴士，唔知點解Ambrose係都要畫好多車碌俾架車，攪到架車真係好似條蟲咁！重有係太陽伯伯，佢一定要幫太陽伯伯畫眼同嘴，哈哈！左手面果個係咩？爹爹估左好耐都估唔到，答案係紅綠燈！係Ambrose自己話畫，但唔明白佢點解畫咁多圈圈囉！

 

因為幅畫畫到亂哂，媽咪又見畫黎畫去都係車同馬路，媽咪索性問Ambrose識唔識畫蘋果，佢話識，跟手就畫左個蘋果加條桱，媽咪覺得似芒果多d，Ambrose自己話係梨黎架喎，哈哈哈！

Home Art Jamming@2012年3月29日 (2y7m)

今日爹爹放假，所以早左食完飯。媽咪見時間尚早，天氣又暖，又見Ambrose未沖涼，不如今晚開檀畫畫啦，好耐都無响屋企畫水彩喇！

 

媽咪一路set野，Ambrose一路幫手，真係大個仔喇！之前同佢玩水彩畫，都係媽咪一手一腳整，而家就有個小幫手，跟出跟入，哈哈！

 

好耐都無畫過水彩，之前都係媽咪就咁俾唔同工具Ambrose畫，都係亂畫嘅，今晚又攞左好多唔同texture嘅brush同roller俾Ambrose畫，見佢左碌右碌，媽咪覺得好似有少少無聊咁，係咪應該畫d有意思嘅野呢？媽咪提議畫公仔，點知Ambrose反而叫媽咪畫俾佢睇，哈哈！媽咪畫功有限，畫左架車同機械人，自己都頂唔住自己，媽咪索性畫左一條火車路軌出黎，要求Ambrose不如跟住畫火車路軌啦，估唔到Ambrose真係跟住畫，雖然佢未識控制顏料量同埋畫筆方向粗幼，但見佢都畫得似模似樣，唔再係以前咁亂掃亂畫一大餐，真係安慰！

 

換左張畫紙，Ambrose叫媽咪畫架車車，跟手，佢自己响車下油顏色，佢話果條係馬路喎！媽咪諗起Ambrose學左幾堂畫畫，唔知佢吸收左幾多，所以媽咪畫左隻bear bear，叫Ambrose跟住畫，Ambrose其實都叫畫到嘅，只係唔係聽媽咪指示，兩手兩腳要畫圓形，佢走左去畫一下就叫手同腳，重要加多條尾俾佢，哈哈！其實都叫合格啦！最攪笑係Ambrose响bear bear下低畫左一橫，問佢係咩黎，佢話係臭臭，俾佢笑死！之後佢再畫多左隻baby bear，知道無咩位，對腳都係點一下就成，叻仔！

再換張畫紙，媽咪畫左隻八爪魚，要Ambrose跟住畫，其實八爪魚都係上畫班時畫過，所唔同嘅係畫班用crayon畫，今晚用水彩！只見Ambrose畫左圓形先，再畫一條條嘅腳，佢畫嘅腳依然唔係媽咪所畫果隻用線圍住嘅長條形，而係真係一筆就係一隻腳！畫埋眼同口，咁就係一隻八爪魚喇！Ambrose話媽咪畫果隻係媽咪，中間好細紅色果隻係佢自己，左手邊紫色好多腳果隻係嫲嫲，藍色果隻係爹爹（巧合地爹爹面形又係比較方，呢隻八爪魚都係正方形架喎），右下角超細果隻係爺爺，Ambrose話爺爺戴眼鏡，所以幫佢畫埋眼鏡，重要話佢著左鞋喎，又識得畫對鞋出黎。呢幅八爪魚全家幅，真係幾靚！

又換過張畫紙，今次係畫車車！Ambrose首先响地下油左d顏色先，話係馬路，再响中間位置畫左架車，再油埋顏色。媽咪話架車咁高，條馬路响咁低，所以佢又將條馬路油高d，再畫多架姑丈車响後面，都幾似模似樣！個太陽都係Ambrose自己畫嘅，架挖泥車車身係Ambrose畫，不過佢整污糟左車上面嘅畫紙，媽咪幫佢將架車加多個泥兜，做左架挖泥車，哈哈！不過Ambrose要媽咪畫埋個司機，一畫司機又話佢要戴頭盔，真係考起媽咪！

最後Ambrose話要消防車喎，媽咪唔識畫啦，叫左爹爹畫俾Ambrose，Ambrose又係不斷响車下面畫馬路，真係好有原則！

第一次去Salon剪頭髮 (2y7m)

Ambrose嘅頭髮托賴都唔錯，出世頭幾個月甩哂之後好快再出番哂黎，一歲生日都有頭髮架，重要好柔軟添！之前同佢去過上海舖剪頭髮，爹爹話佢未入去已經喊到劏豬咁聲，所以剪唔成頭髮！無計可施之下，一直都係爹爹不定時同Ambrose剪頭髮！其實爹爹剪頭髮有度好，就係媽咪唔係好捨得同Ambrose剪太短，始終佢第日大左d頭髮一定粗d硬d，無而家咁飄逸，要長頭髮都只係而家先可以留到喇！所以一直以來，爹爹同Ambrose剪頭髮都盡量唔會剪到後面好短，只係修剪前面，同耳仔位，等d頭髮唔好篤眼篤耳就算，頂多同佢偷薄少少！

 

今日爹爹帶左Ambrose去Salon剪頭髮，係Ambrose嘅第一次！唔知係咪大個仔左，爹爹話佢全程好合作唔多郁咁俾人剪頭髮，好乖仔！出去俾人剪，人地就唔會是但剪兩下架喇！所以，剪完頭髮嘅Ambrose成個樣有少少唔同左！媽咪就覺得剪得好短，同埋好碎吓囉！除左耳仔位剪得靚d整齊d之外，都係爹爹剪得好睇d囉！

貼紙畫@2012年3月26日 (2y7m)

今晚又同Ambrose玩貼紙畫！

 

為左就番手上有嘅貼紙類型，所以好勉強咁畫左d草地，路軌同馬路，諗住一次過用盡d貼紙！點知Ambrose見到幅畫後就不斷問媽咪點解路軌同馬路响埋一齊？點解路軌同馬路會响草地度？點解唔見太陽伯伯？媽咪真係畫得咁差咩？

 

媽咪畫左棵樹，要Ambrose揸埋d顏色紙成球狀再痴上幅畫度，有紅有綠，媽咪話係蘋果樹，哈哈！樹幹就要Ambrose撕顏色紙再貼上，主要都係唔想成幅畫都係貼貼紙咁悶，有其他野做吓！媽咪知道Ambrose一定會掛住貼貼紙，所以一定要佢整左棵樹先攞貼紙出黎俾佢貼，果然，佢一路整棵樹一路嘈住要貼貼紙喇！

 

完成左嘅貼紙畫，都唔係好差啫！

Stickers @ Dymocks

Dymocks返左新野，同啱啱响Book Buddy買嘅手工sticker set同牌子，上次買左Mini Town，今日响Dymocks見到有得整夜光星球，都幾得意，所以買埋！

 

另外重見到有City Car and Truck同埋Fire Station Stickers，超級啱Ambrose呀，所以即使覺得少少貴，但都忍唔住買左，始終唔係成日見有呢d主題嘅貼紙麻！

Ambrose上新畫班之四 (2y7m)

今堂畫bear bear熊，好靚架！媽咪今日留左响課室外“裝”Ambrose上堂！

 

首先老師叫小朋友畫個大圓形，Ambrose真係畫左一個好大嘅圓形，大到成張畫紙咁大，媽咪諗，咁點好呢？重有個身同手手腳腳喎！老師無理，叫Ambrose油密顏色。不過Ambrose對於油咁大面積嘅圖形其實無咩耐性，明明有好多白左嘅地方都好似見唔到，成日 都叫 老師睇吓，老師就教佢要油埋d白色位。每一次Ambrose都應左老師跟手就油，不過次次都係油果兩下就叫老師睇佢，真係估唔到佢返學係咁嘅樣，媽咪重停留响覺得Ambrose好怕羞唔敢出聲嘅階段！如是者，Ambrose叫老師睇，老師又叫佢再油，每一次佢再油，都有意無意將原本已經好大嘅圓形再畫大左，真係唔知佢點收科！

 

之後個身，係一個細圓，由於Ambrose張畫紙已經無位，所以個圓形真係超細，好攪笑！呢兩個圓形都係肉色，老師之後俾左枝朱古力啡色小朋友，叫小朋友畫兩隻耳仔，Ambrose好快地即時畫左兩隻耳仔，不過兩隻耳仔都畫到好埋囉！由於好快咁畫完，老師又要周圍睇小朋友嘅情況，加上有d小朋友都會係咁叫老師睇佢幅畫，所以一早畫完耳仔嘅Ambrose，佢就無無聊聊咁自己又再加多幾筆，而且越畫就越不受控！佢對耳仔原本畫得好埋，俾佢加多幾筆之後就變左一隻，唉！每次老師發現佢越畫越離譜想話行去糾正佢時，老師都俾左第二個小朋友叫左去，如是者，到最 後 老師再返去Ambrose度，Ambrose幅畫已經變左一幅塗鴉！

 

再之 後 老師叫小朋友畫手手腳腳，其實老師係話畫四個圓形做手腳，不過Ambrose一聽到畫手腳，佢 都無理 老師講咩，一枝箭自己走左去畫左一條線，係手黎嘅！不過又係由於太快畫完又無其他instruction，Ambrose又開始多手又畫呢樣又畫果樣，原本幅畫都已經唔多似bear bear，而家重雪上加霜，不成bear形啦！不過又咁講，其實媽咪見到Ambrose畫野係知道個位置嘅，佢一聽完已經即時去畫，不過佢畫出黎並唔係大人心目中應該要嘅樣，媽咪覺得咩都唔似，一pat野，不過可能Ambrose自己唔係咁諗嘅！算啦！

 

最後畫完眼鼻後，老師俾左d水彩油底色！其實一直以黎媽咪都有少少疑惑點解Ambrose油底色好似都ok唔會油到個公仔，媽咪覺得Ambrose無理由識得避開，同埋無理由佢可以成功避開架麻！真相係，原來由油粉彩畫完畫，再用水彩油底色，即使油到落個公仔度，老師係可以用濕紙巾去抺番走，整番油粉彩畫嘅公仔出黎嘅！點解媽咪會知道？因為媽咪見到Ambrose係咁油，都唔理係咪油左落公仔個面度，真係見到想即時拍門入去叫停佢唔好呀！好彩老師抺得走，如果唔係，最後幅畫真係唔知變成點！

 

其實老師响後期已經同Ambrose講，話不如我地都係只畫bear bear熊面啦，相信因為佢個大圓形畫得太大，同越油越大同越亂嘅關係，隻bear bear熊已經無得補救喇，所以老師話只咁講囉！哈哈！

 

不過媽咪橫睇掂睇，都覺得呢隻野勉強似瞄頸鷹或者雞囉！

Twin Kids

市中心間Twin Kids做特價呀，全場三折，呢間野d衫平時賣到好鬼貴，搵個人睇吓都無架，今日媽咪見到有三折咪即管入去睇吓囉！見到呢件軍褸好鬼鍾意呀，不過原本想話買大少少年尾著，但己經斷碼，得100同130碼，左諗右諗都係好鍾意，見衫可以摺袖，衫身都中長，都唔怕年尾唔啱嘅，就係咁，買左100碼俾Ambrose！不過原來諗漏左一樣，就係圓周囉！Ambrose肚腩都唔弱，著起件褸，真係啱啱好拉到拉鏈咋！

 

不過著起上身，真係好靚好型！嘻嘻！

Lego Fire Engine

呢期Ambrose迷上左消防車呀！而家逢星期六夜晚都有個節目係講消防員，Ambrose一定坐定定係咁睇，次次一到廣告時間就不停咁話要睇消防員，好搞笑！重有一次講救火，成個畫面都係火，原本坐响電視前嘅Ambrose，唔使人叫佢，突然間自己走番埋去沙發睇，哈哈哈，唔知係咪以為d火係會燒埋去呢？原本屋企有架廸士尼嘅麥坤消防車，有聲同埋拉後可以自己行，不過買番黎無耐已經壞左！不過Ambrose都一樣成日玩住呢架消防車，好開心！

 

今日同Ambrose去左反斗城行，爹爹同Ambrose行過擺Lego嘅貨架，Ambrose一見到消防車就問呢樣問果樣，係咁問住架車嘅細節，爹爹見到咁就話買俾Ambrose，不過媽咪反對，因為佢地睇緊果架並唔係Duplo系列，係細細粒要慢慢砌果隻正常版！媽咪極力反對，因為Ambrose一定會係咁推架車，呢隻Lego推多幾推一定散哂，到時真係做死人呀，陣間唔見左幾粒都唔知去邊度搵好，同埋如果Ambrose叫媽咪再砌番俾佢，媽咪一定唔識囉！所以媽咪就話如果買，都係買番Duplo系列啦，大粒d又無咁易散！就係咁，無啦啦又買左盒Lego，上次果盒Lego泥頭車買左返去都未曾開！

 

Ambrose超鍾意架Fire Engine，晏覺都唔瞓，屋企都未返就話要開盒Lego玩！

Find NEMO Read Along Storybook @ Jusco

趁Ambrose學跳舞，媽咪又走去行街街，不過咁早都無咩地方開左門，唯一只有吉之島，所以次次都係行近近地嘅bb部，文具同玩具部，都真係行到無咩好行咁！哈哈！

 

雖然如此，媽咪都有收獲喎！見到故事書連CD，一本原價$58，特價$28，重要再有八折，折左即係$22.4，好抵呀！故事書有廿幾頁，好薄嘅一本！但字體都幾細，一頁都幾多字，未係好啱Ambrose睇！不過見咁平，買住一本先，唔睇字聽吓隻碟都抵麻！

Ambrose上芭蕾舞班之六 (2y7m)

今日爹爹媽咪好早出門口，所以Ambrose今日係第一個小朋友返到跳舞學校。換好鞋後，Ambrose就衝左入課室，佢次次入課室後都必定去攞d地墊黎砌，今日無人同佢爭，佢係咁砌，不知幾開心！問佢d地墊係咪用黎跳舞用架，佢話唔係，話一人一張攞黎坐架喎！

貼紙畫@2012年3月22日 (2y7m)

今晚同Ambrose做貼紙畫！見之前買落好多海棉貼紙無咩用，又見Ambrose鍾意玩情景貼紙，所以靈機一觸，諗起自己畫少少背景出黎，咁就可以慳慳地當玩sticker book之餘，又可以用咁d海棉貼紙，唔好浪費！

 

之前媽咪已經將畫紙油左個海出黎，以媽咪畫畫嘅天份，其實都只係將畫紙嘅一半油左藍色就當係海，哈哈哈！攞左事前已經執好左嘅貼紙出黎俾Ambrose玩，果然，佢真係好鍾意！好耐無玩海棉貼紙，Ambrose嘅手指仔似乎比之前再靈活多少少，好多都可以自己搣好哂，唔使媽咪幫，不過佢貼貼紙就麻麻地，將d海洋生物貼到好鬼密，唔識分開d貼，要媽咪提佢貼遠d！

 

除左海洋生物，咁啱有幾張船同飛機嘅貼紙，順便都玩埋，俾Ambrose分番邊d野係响天空、海上同埋海入面！

買書＠Book Buddy

早幾日去左Book Buddy睇書，又有收獲！

 

見到有sticker kit手工套裝，有好多唔同主題，媽咪揀左Mini Town俾Ambrose，等佢decorate吓d屋之後，可以攞埋佢d車仔同埋Lego馬路玩，重有之前响馬莎買落嘅fire station，一定好好玩！

 

再見到有I Can Spell abc嘅Flip Flap書，等Ambrose大d嘅時間學串生字，有本書揭吓玩吓，應該易記好多！

 

重有係之前鍾意玩開嘅Sticker Book系列，原來呢度有得賣，揀左Numbers俾Ambrose，配合學校近期教數字，加強佢認讀！重有揀左Ambrose至愛嘅車車，呢本Big Trucks佢一定鍾意呀！

 

最後就係Thomas嘅Sticker Pad，唔唔係貴，買黎自用或送人都好啱使！

問題天天都多 – 消防員

早幾日放工，一入門口就見Ambrose揸住個消防員公仔跑埋黎，皺住眉頭好肉緊同媽咪有以下對話：

 

Ambrose：做咩事消防員要戴頭盔嘅？

媽咪：因為消防員做野好危險，所以佢地要戴頭盔保護個頭囉！

Ambrose：做咩事消防員掉轉頭盔黎戴嘅？

媽咪：無呀，佢邊有掉轉啫？啱喎！

Ambrose（即時指住消防員頭盔後面突出黎果條邊）：呢度唔係咁架！

 

媽咪攞起個消防員睇左一陣，又係喎，點解個頭盔後面有條邊突出黎嘅？呢個消防員係消防處嘅紀念品，唔會整錯架喎，咁即係啱啦！

 

媽咪（唔識答）：呢個係佢個裝備，係咁架！

Ambrose：做咩事係咁嘅？

媽咪（真係投哂降）：媽咪唔知呀，不如下次見到真嘅消防員去問佢地丫！

Ambrose：做咩事消防員要擺條水喉去個口度嘅？

媽咪（想講救命）：因為呢個係公仔黎架，消防員攬住條水喉去救火，佢攞高左咋！

 

因為最近電視有做關於消防員嘅節目，爹爹媽咪都有俾Ambrose睇，佢睇到眼定定，有時又會好緊張咁！不過一路睇就一路都會問住點解消防員有時戴頭盔，但有時又唔戴！如果出街佢見到消防車，佢又真係會見到真嘅消防員有無戴頭盔，成日就問點解消防員戴同唔戴頭盔？真係唔知點答佢！其實消防員緊急出車時係咪一定要戴埋頭盔先啱呢？如果唔係緊急出車，係咪唔使戴架？定係其實佢地鍾意戴就戴，唔戴就唔戴呢？！

呻

好想呻吓囉！

 

第一日入黎做野，叫左我去影印，果部咁嘅老爺機，影廿幾份野，影唔夠五份就同我係咁jam紙！一路影，一路攪，重要部影印機影到咁上下，出黎嘅紙係燙熱架，我都係第一次用d咁老爺嘅機！結果一份三十幾頁嘅文件，雙面影印二十二份，用左我個幾兩個鐘至走得！點解唔擺低撳左製去做住野等？因為部影印機响office出面，係成層樓最篤篤果個位，重要响正一個directorate嘅房門口，部野係咁jam紙，我根本唔可以行開！

 

第一次見識政府嘅文件file係一個皮，入面咩都無，文件唔係用夾夾實，而係用一條綠繩穿住！果條繩，咪就係公開試答題薄要加紙時一定會俾果條繩仔囉！d文件咁樣穿住，如果個file厚，一攞出黎d文件已經彎哂，有時重會sir黎sir去，真係好煩！

 

唉！呢d都算喇！唔知點解次次我要去攞d文具，打開個櫃，次次都係要咩無咩。要膠紙無膠紙，問個ACO去攞，講完都係無，結果無得用都要用之下，自己走去買！重有呀，果d咁嘅膠水，一定係至cheap架，個樽鬼死咁林，個海棉頭又薄，都算！至慘果d膠水次次都係耐唔時用一次，開左用完，下次想再開黎用，d膠水已經gel住個海棉頭，永遠都擠唔到出黎，大力d擠咩，連個海棉頭都擠爛，成pat膠水擠到一檯都係！都唔明點解要訂呢隻膠水？平？一次用少少，但次次就係用果少少，之後就成樽用唔番，為咩？不如買貴少少，買漿糊筆都無咁嬲，耐用好多！同一道理，果d改錯液，重係用緊開蓋有枝掃，有枝天拿水溝浠果種，而家咩世代呀？重用呢隻野？！而家d人幾可要寫野丫，個個都用printer架啦，偶然寫錯野用吓佢，下次再用時基本上連蓋都開唔到，啜實左，扭極都開唔到，你會唔會咁得閒去攞枝天拿水去洗番個樽口開番佢呢？唔好話買改錯帶咁貴喇，其實係咪應該考慮買走珠果隻改錯液呀？起碼可以保證用得哂成枝喎！

 

人人都有一部大大舊嘅printer响檯面，好似好好咁，但成個office十幾人，每季原來都係得兩盒白紙！攪到同事成日要去其他section撻紙用，又或者厚住面皮同人攞環保紙！重要前上司竟然慳到用我陀b時嘅醫生紙影印本背頁做環保紙“特別”循環再用做我份operation order！使唔使慳成咁呀？嬲到我要走去同我直屬老細投訴囉！

 

果個咁嘅打孔機，唔係平時可以放响檯面撳落去就打到孔果隻，係好似一把鉗咁，用隻手大大力撳埋佢先至打到果隻，即使係打一張，都係要咁大力，次次打完孔，隻手“鏈”埋個下都整到隻手鬼咁痛，都唔知邊個發明呢d打孔機，重要而家都重用緊喎！

 

尋日係我成年中最忙嘅一日，想話打開個文具櫃搵萬字夾，摷左十分鐘，又無！好日都唔去攞文具架啦，次次去攞，真係要咩無咩，真係激死人！結果，諗住搵盒象筋啦，都搵左一輪至搵到一千零一盒，重要係開過無咁一半嘅！點解呢d文具資源可以咁缺乏咁落後架？既然成個文具櫃咩文具都無，照計應該唔使點摷。錯喇，成個櫃入面，有無數咁多枝鉛筆、紅色side pen、綠繩、staple remover、“用完即棄”嘅膠水同改錯液、顏色夾文件顯示急件待簽嘅紙仔，總之就係無數你唔會用嘅文具啦！最好笑係有釘書機唔明點解又會有stable remover嘅存在？有無數咁多枝鉛筆，但我無見過有鉛筆刨囉！

 

曾經有同事話我咁富貴買私家文具，好似覺得我好清高咁，我真係好想講，有邊個想貼錢返工架？公司d野咁唔掂，叫人點做野呀？唔好玩啦！我用少少錢幫自己添置文具去便利自己做野，令到工作效率高d，人都無咁忟，咁有咩問題先？又要話人，又要耐唔時就問我借改錯帶，咁叻就唔好問我借啦，自己去慢慢開枝改錯液囉！

Ambrose上新畫班之三 (2y6m)

今日Ambrose好早起身呀，八點幾起左身之後就係咁叫醒媽咪，又話同佢出去玩，又話唔好瞓，媽咪唔理佢繼續瞓，佢就又扮慘咁話隻手指痛要貼膠布，真係頂佢唔順呀！明明隻手都無咩事，奶都無叫媽咪沖，係咁要貼膠布，完全唔明佢做咩事咁鍾意貼膠布？！

 

既然Ambrose起左身，所以媽咪索性早d同Ambrose出街食左早餐至返學！

 

一如以往，媽咪都無留低睇Ambrose上堂，都係臨放學至去等！今日畫花花，見每朵花都係用唔同圓形組成，以為都唔太難，點知見到Ambrose幅畫，d圓形係好圓，好明顯一定唔係Ambrose畫架啦！下低果d顏色塗鴉亂哂龍，果d先係Ambrose手筆！好明顯係佢畫到一大pat，老師幫佢on top畫d圓形出黎令朵此突出d啦！最好笑係媽咪等等吓聽到Ambrose大大聲話“爛左呀”！媽咪即時望入去，原來佢幅畫左面一個角俾佢自己搣爛左呀！應該係佢幅畫油左水彩，張畫重濕，佢又大大力咁想攞起幅畫，所以搣爛左囉！估唔到媽咪成日諗Ambrose返學應該係唔聲唔聲果d小朋友，竟然唔係，仲咁大聲講野同求救喎！

 

放左學，同老師講開，佢話表姐未係好掌握畫圓，不過幫佢畫左之後佢係可以自己油顏色！媽咪聽到之後就問Ambrose呢？老師都尷尬話佢畫線條未係好掌握到，都係塗鴉期，但以佢嘅年齡黎講，係好正常喎！都係嘅，原本俾Ambrose去學畫畫，都唔係諗住佢真係學到點畫架啦，都係諗住俾個環境佢去多接觸多培養興趣啫！

第一次貼膠布 (2y6m)

早幾日Ambrose揭書時被書頁“界”到手，媽咪返到屋企同佢食飯時，佢係咁同媽咪講話隻手痛，唔肯食飯！媽咪氹佢話食完飯同佢落街買靚靚膠布，佢至乖乖食埋碗飯，但都不時做個慘樣同媽咪講隻手好痛！

 

媽咪聽見Ambrose係咁講話痛梗係拿拿聲同佢落街買膠布啦！去到萬寧，公仔膠布就只有嘉菲貓同埋Hello Kitty，結果Ambrose揀左Hello Kitty！原本佢一買完膠布已經想話即時貼架喇，但當媽咪想話開嘅時候，佢又話返屋企至貼喎！

 

返到屋企，開左盒膠布，裡面有粉紅色同綠色嘅膠布，媽咪俾Ambrose揀，好彩佢揀左綠色，哈哈！呢個Ambrose成日整個慘樣出黎話好痛，但到貼膠布時，媽咪叫佢伸隻手出黎，佢竟然伸左隻無受傷嘅手出黎先，又即時收番再伸番隻真係有受傷嘅手出黎，可想而知，有幾痛？？！！

 

貼左膠布嘅Ambrose，真係好攪笑，佢係咁伸直手指公，盡量避免唔掂到佢，連瞓著覺都係咁，真係服左佢！最攪笑係，佢第二日出門口返學，見到任何人都豎起佢隻貼左膠布嘅手指俾人睇，重要鬼咁開心，似係show-off多過想搏人同情，頂佢唔住！

 

重要，其實個傷口真係唔嚴重，佢就日日要媽咪同佢貼膠布，貼左幾日都重要貼。同埋，貼左膠布隻手，唔俾人拖，真係俾佢笑死！

大滿足

今日Ambrose真係大滿足呀！朝早跳完舞就去左麥當奴食薯條、飲橙汁，之後出左尖沙咀，爹爹趁住媽咪專心揀書嘅時候，竟然買左杯雪糕俾Ambrose食！不特止，食完雪糕，行埋反斗城，因為有推廣，消費夠一定金額有屋仔朱古力奶送，Ambrose又飲左大半盒朱古力奶，真係開心到暈喇！

扮小巴司機叔叔

唔知點解Ambrose好鍾意搭巴士同小巴，成日同佢搭的士，都扭計話要搭小巴或巴士！明明市中心返屋企係搭小巴，佢係都要搭巴士，咁就要响屋企附近落車，行多條大斜路先返到去。有好幾次同佢搭巴士返屋企，又嫌坐得唔夠耐，要落車又唔肯落車，有時真係俾佢激死！

 

搭小巴嘅時候，佢又發揮佢問題王嘅本性，成日問媽咪，點解小巴司機叔叔要戴帽，又問點解佢要戴太陽眼鏡，某程度上媽咪都幾佩服佢留意到司機叔叔有呢d打扮，佢唔問起，媽咪真係無為意過真係就算係唔同司機，佢地都會又戴帽同太陽眼鏡，不過佢就成日重重覆覆又大大聲聲咁問，係有d攪笑囉！

 

今日起身出發去上芭蕾舞班，Ambrose竟然走去扮小巴司機叔叔，真係俾佢笑死！扮扮吓重要攞起條魚舞黎舞去，咁啱佢又著左件乾濕褸，爹爹話佢十足一個雨夜屠夫咁款，嘩哈哈！

Ambrose上芭蕾舞班之五 (2y6m)

Ambrose對於上芭蕾舞堂已經無反感喇！今日一同佢著好芭蕾舞鞋後，佢已經急不及待跑入課室玩拼地墊，重要一路玩，一路聽到佢同老師講“睇吓”！真係服左佢！

 

媽咪又係無留低等Ambrose，都係爹爹留守，媽咪去左食早餐，到咁上下時間至返去等放學！因為上堂吸印仔一吸就有三個，爹爹媽咪以為每堂會有三個印仔，儲夠六個就有糖派！點知，同左Ambrose講今堂有得派糖，但其實之前點解有三個印仔，原來只係補印前三堂嘅印，今堂只有一個貼紙，即係合共四個，重未有糖派呀！Ambrose當然好失望啦，一次又一次嘅期待換黎嘅係失望喎！就係因為咁，爹爹提議去麥當奴安撫吓Ambrose脆弱嘅心靈，媽咪都無異議！

 

今堂，Ambrose學識左講“何家公雞何家猜”！其實都唔係好明點解學芭蕾舞會學到呢句野，其他野又唔見佢學得咁快！

Dora the Explorer – Easy Sudoku

今日買左呢本Dora Sudoku俾Ambrose，都幾得意，用圖黎代替平時嘅數字，似乎都啱初學嘅小朋友，又可訓練埋Pattern，唔知Ambrose幾時先識玩呢？

問題天天都多 - 咪埋眼

早幾日同Ambrose玩lego，之前表姐已經砌左間屋出黎，所以媽咪就同Ambrose玩吓間屋！問題王Ambrose同媽咪有以下對話：

 

Ambrose：做咩事佢（lego人仔）要上樓梯嘅？

媽咪：因為睡房响二樓，張床响睡房度，咁咪要上樓梯囉！

Ambrose：做咩事間房咁黑嘅？

媽咪：因為間屋有屋頂遮住左d光，間房咪會暗囉！

Ambrose：做咩事間屋呢度穿洞嘅？

媽咪（心諗咁都識問嘅）：因為要有一邊牆開左先至玩到架麻，如果四面牆都封哂，人仔咪返唔到屋企囉？

Ambrose：做咩事佢要瞓覺嘅？

媽咪：因為夜晚囉！

Ambrose：做咩事佢唔返工嘅？

媽咪：佢放左工喇，佢放左工返屋企休息喇！

Ambrose：做咩事佢瞓覺唔咪埋眼嘅？

媽咪（頭都大埋）：因為佢係公仔，係假架，佢咪唔到眼架，你當住佢咪左先啦！

 

真係俾Ambrose笑死！

動動腦

玩完貼紙書，又攞左本動動腦出黎俾Ambrose做！之前同Ambrose做覺得佢都未係好ready，估唔到今晚同佢做，又覺得佢都可以喇喎！雖然媽咪都要解釋需要做d咩，但一講完佢就已經明白係點！Ambrose真係好鍾意做功課，一做就做左三十九頁呀！重要係爹爹同媽咪分別叫停佢去聽故事瞓覺先停到！

 

今次做功課最令媽咪驚訝嘅係配對唔同物件，好似掃把配垃圾剷，Ambrose幾乎係一見到幅圖就識得連線！見到雀仔就識指住個雀巢，媽咪重以為要講一大餐佢至明架麻！不過媽咪以為其中一頁果隻係蜜蜂時，重問Ambrose蜜蜂住邊度，Ambrose竟然指啱圖喎，媽咪當時已經好奇怪，點解蜜蜂唔係住在樹上嘅，橫睇掂睇幅圖都似係地底咁！當時媽咪不置可否，重諗住咁得意嘅，Ambrose點會咁揀架？等Ambrose瞓左，媽咪再去睇番果一頁，至發現果隻唔係蜜蜂，係螞蟻！隻螞蟻搬緊一粒食物，哈哈，所以螞蟻係真係住地底！但究竟Ambrose點解會知？媽咪諗Ambrose係咪識得用by elimination去揀答案，因為成頁得兩幅圖，一幅已配對左，另一幅自然係配對淨番落黎果幅圖啦！有無咁醒呀？

 

講番本動動腦，呢本書真係唔錯，入面包含左好多野，又有生活習慣、數數、數序、關連物配對、影子配對等等！爹爹見Ambrose一味做，做唔停，佢走埋黎問媽咪，佢咁做咪好快做完一本囉？媽咪話係呀！爹爹再問，咁幾錢一本呀？媽咪答，四十蚊架！爹爹即時嘩左一聲！哈哈！爹爹唔好話媽咪成日買書喇，因為真係做起上黎，可以好快一本架，唔係講笑！

史上最難搣嘅貼紙書

今晚又同Ambrose“做功課”，攞左本Colours Sticker Book出黎訓練佢認吓顏色。無記錯，呢本Colours Sticker Book係响Ambrose一歲左右，响新世紀某書店買嘅，見十蚊一本咁平，紙質幾好，所以買左一本等Ambrose大d時教顏色！ 

今晚攞本Colours Sticker Book出黎玩，見Ambrose係咁搏命搣都係成個貼紙連底一齊搣左出黎，之後見佢嘗試自行搣走張底紙，但佢搣極都唔多得！重有好幾次，Ambrose想搣張貼紙出黎，但就連底紙成個搣出黎嘅時候連張紙都搣爛埋！見佢咁輪盡，媽咪出手幫吓，先至發覺d貼紙可能係史上最難搣嘅貼紙，媽咪都好難由張紙上面搣張完整貼紙出黎！一係張貼紙要成個連底搣左出黎再搣底紙，一係就响張紙直接搣個貼紙出黎時梗係有d位痴實哂，cut邊唔夠徹底，攪到要自行搣開張貼紙，好易搣爛囉！怪唔知得Ambrose咁輪盡啦，等媽咪重話佢唔小心！

 

唔知係咁啱呢本至係咁定點？好彩只係買左一本咁多！！！雖然本書紙質同顏色幾靚，但真係差過淘寶十蚊買返黎果d貼紙書呀！相比起Jusco都係十蚊本sticker book（未加價前），Jusco果d真係平靚正，可惜唔係時時都見有得賣，亦唔係間間都有，真係撞手神至買到！

Ambrose上新畫班之二

 

今日Ambrose同媽咪齊齊瞓到九點幾，一起身就要趕住梳洗換衫去上畫班，真係裙甩褲甩！好彩落到樓下好快截到的士，有驚無險，無遲到，重要早左少少到，哈哈！Ambrose去到畫室都有少少怕醜，不過都無抗拒自己入房，重要表姐未到都無搵表姐喎，證明佢對呢度個環境感覺良好！

 

今日可能有同學請左假，一開始計埋Ambrose只有三個人！老師又係唱吓歌仔先開始，媽咪“莊”吓Ambrose都有口郁郁，之後好快就聽到佢把聲，哈哈！今堂係畫八爪魚，真係好，Ambrose應該好開心！老師教小朋友先畫一個大圓形，畫左之後就填色，媽咪原本以為Ambrose唔識畫，點知佢好快畫左個大圓形而且開始油喇！表姐遲到，入到課室時Ambrose都重醉心油顏色，重要油得好快，第一個油好個大圓形！媽咪睇到呢度就走左喇，因為要去茶樓搵位食野喇！

 

距離放學十分鐘左右上到去等，只見Ambrose已經畫好哂隻八爪魚！不過見佢隻八爪魚有用黑色綑哂邊，唔知係老師畫定Ambrose畫喇！重有就係貼左d貼紙，其實真係唔多明點解要俾d九唔搭八形狀貼紙俾佢地貼，攪到幅畫怪怪咁，之前果間畫室用活動眼睛好好多，而且媽咪重見到d貼紙係由老師搣個底紙俾小朋友貼上去，咁就失卻左訓練小手指嘅意義啦！

 

Ambrose幅八爪魚，真係好花，本來臨走時見佢畫個大圓面都好地地，可能媽咪走左之後佢無停繼續係咁油，越油越唔見左圓形，花哂喇！唔知係咪因為太花，所以老師索性畫上黑色邊，咁先睇得出係八爪魚呢？見表姐果幅油到密一密，又無畫邊好靚咁，究竟係Ambrose聽唔明點畫？定係佢嘅小肌未得？差半年真係差咁多嘅？定還是表姐真係畫畫叻d？

Chipmunks Playhouse

同Ambrose同學仔去左荃灣嘅Chipmunks Playhouse玩，班小朋友好開心，鬼死咁high！估唔到以前Ambrose唔多鍾意玩波波池，今日佢好多時間都响入面玩！仲要好似跳水咁跳入個池度，勁開心！最衰唔記得帶單反去同佢地影相，用部Iphone影唔夠光同埋佢地動作太快，好多都只係影到鬼影，真係可惜！

 

其實Ambrose甚少去playhouse，呢次應該係佢第二次去，哈哈！第一次重係爹爹同佢去黃埔果個，媽咪都無去！感覺呢個playhouse都幾大，但爹爹話黃埔大好多喎！原以為Ambrose會鍾意玩彈床，點知佢都無咩興趣，只係沉迷波波池，同埋運波波，就連一個場邊嘅小小圍欄圍成嘅波波池都唔放過，想跳埋入去，叫都叫佢唔住！佢跳完咪知痛囉，哈哈，好彩唔係頭落咋！不過個playhouse衛生程度就有d保留啦！雖然入口有拖鞋換，但並唔係人人都換上，媽咪就無喇，只係除鞋！而去廁所果時，媽咪就去左換拖鞋，先至發覺，有d人係真係會著對拖鞋入場行黎行去，但對拖鞋其實又踩過入廁所，諗起都覺得唔多好啦！

 

個場出面有幾張檯俾人坐吓食吓野，都叫唔錯，起碼，中途休息食吓野飲吓野都有個位可以坐麻！會唔會再黎？撇除衛生問題，呢度其實都ok幾好玩，有機會都可能再黎嘅，因為朋友仔俾左d特價coupon我地，平日六折，假日八折，但問題果度無free parking，咁樣去一去就白俾停車場，去得playhouse玩都一定幾個鐘架啦，停車場費重貴過入場費，真係要諗諗，一大班人去玩就抵d囉，如果只係自己去又入場費又停車場費就唔多抵啦！

Ambrose上芭蕾舞班之四 (2y6m)

Ambrose應該已經習慣左上芭蕾舞喇，因為而家叫佢換芭蕾舞鞋已經無難度，重要今堂換左鞋之後叫佢入課室同同學仔玩住先，佢都無問題，完全無問起表姐去左邊度，哈哈！

 

今堂媽咪聽見又係唱太陽花，幻想Ambrose扮花花個樣應該都幾攪笑嘅，不過始終都希望佢可以聽Classical Music上堂，好似正宗一d咁！睇吓上多 一兩 期Ambrose有無興趣先，如果真係有，都想同佢轉番間好少少嘅學校學！

 

今日爹爹接放學，佢話今堂Ambrose又係湊埋去老師度好似好期待派珍寶珠咁，點知老師只係吸印仔，話吸夠六個印仔至有糖。Ambrose今堂至有薄仔帶番去吸印仔咋，得三個印仔，無糖！爹爹話見到Ambrose好想喊，但忍住無喊！聽到媽咪心都實埋，雖然媽咪從來都唔鍾意Ambrose食糖，亦唔主動俾佢食！不過媽咪見過上堂Ambrose好期待個樣，就知道佢今堂好想要糖但又無果種心情，明知要放手等佢遇到適度嘅挫折從而學習，但又唔忍心佢會有受傷嘅感覺！好小事，但對於小朋友黎講就係天咁大件事！媽咪真係要自得調節自己嘅心情至得喇！

Jusco Sticker Book II

Jusco買嘅另一本sticker book！Ambrose要跟據貼紙嘅類別貼番去唔同店舖嘅架上面！不過似乎佢未係好分到，而且佢唔會揭前揭後去搵啱店舖，都係要媽咪幫佢揭啱果頁佢至貼！衣服店果度重攪笑，明明d衫要貼去個架度或衣架夾住，但Ambrose死都要貼落公仔個身度同佢著衫著鞋，咁有創意，媽咪都由得佢喇！