Ambrose上新畫班

今日Ambrose上新畫班喇，由於就得地點同日期黎好難就埋時間，所以星期日原本返十點嘅畫班而家改左十一點，係晏左少少，但都好丫，起碼媽咪都重有一日可以瞓晏少少麻！

 

今日爹爹都有一齊湊返學，佢對環境好滿意呀，哈哈！咁真係好喇，起碼媽咪應該唔會再收order一定要企响度等到放學！老師安排Ambrose同表姐背住門一齊坐，因為老師話表姐上兩堂向門坐成日唔專心，望出去喎！但媽咪擔心一齊坐會唔會太熟搞搞震，老師又話唔怕，咁好啦，信佢啦！都好嘅，第一堂，背住門坐，媽咪可以“莊”佢，哈哈！

 

正式上堂，聽見老師同學生講今日有新同學加入（係Ambrose），所以一齊唱首歌歡迎佢，估唔到上畫班都好似上playgroup咁，會唱歌仔架喎，都幾好，起碼見到Ambrose口郁郁跟住唱，俾機會佢warm up吓！唱完歌介紹完就開始上堂，媽咪見Ambrose無咩特別，又爭取時間閃左去樓下書展，睇吓有咩好野尋日睇漏，哈哈！

 

十一點十上番去，已經見到Ambrose畫好哂畫，正响度貼貼紙！今日原來係畫一缸魚，魚缸入面有好幾條魚咁嘅，但奇怪地，Ambrose果幅，係一條好大嘅魚，差唔多見唔到個魚缸，嘩哈哈！如果唔係表姐一齊上堂，見到表姐幅畫係點，都真係唔知今日係畫魚缸魚，呵呵！只見佢都幾專心搣貼紙貼，老師又逐個學生行埋去同佢地數畫入面有幾多條魚，Good！數完魚，老師重俾濕紙巾小朋友抺乾淨對手，再多一個Good！老師見小朋友抺得唔夠乾淨都會幫手抺，真係唔話得呀！上次果間，係一上完堂叫小朋友執埋d野就行出黎，家長至同小朋友响門口抺架咋！抺完手，重唱埋bye bye song，排埋隊先開門落堂，感覺真係幾好，雖然有d似上playgroup咁，但對於小朋友黎講，唱吓歌仔開心吓，真係好好多架喎！見Ambrose一出黎已經心情好好咁就知啦！

 

落左堂之後媽咪重同姑姐入返課室影作品，又叫表姐同Ambrose揸住作品黎影，擾擾攘攘攪左一輪，負責人都無嫌我地阻住，任影唔嬲，真係好好呀！重要影完相對手又污糟番，再攞埋佢地嘅濕紙巾黎抺手，哈哈！唔知係咪間中心重係新，無咁多人同多班，所以佢兩班相隔成半個鐘，咁我地咁攪一輪都唔阻到佢地囉！希望如果佢地做大左，都可以保持而家咁free啦！不過媽咪又好衰，見人地咁多人手，師生比例又細，班又疏，收費又無特別貴，又有少少驚佢地做唔住囉，到時又要再煩搵畫班就慘喇！

 

老師話兩表姐弟一齊坐無搞搞震，正常上課！係表姐慢熱d，Ambrose開頭都少少，但warm up左就好多野講喎！老師重話係Ambrose要畫大魚魚喎，所以佢果條魚真係全班最大架！唔知幅畫又幾多係Ambrose手筆呢？Anyway，見幅畫又有粉彩又有水彩同貼紙，對Ambrose黎講都應該幾好玩架喇！