今晚同Ambrose做貼紙畫！見之前買落好多海棉貼紙無咩用，又見Ambrose鍾意玩情景貼紙，所以靈機一觸，諗起自己畫少少背景出黎，咁就可以慳慳地當玩sticker book之餘，又可以用咁d海棉貼紙，唔好浪費！
之前媽咪已經將畫紙油左個海出黎，以媽咪畫畫嘅天份，其實都只係將畫紙嘅一半油左藍色就當係海，哈哈哈！攞左事前已經執好左嘅貼紙出黎俾Ambrose玩，果然，佢真係好鍾意！好耐無玩海棉貼紙，Ambrose嘅手指仔似乎比之前再靈活多少少，好多都可以自己搣好哂，唔使媽咪幫，不過佢貼貼紙就麻麻地，將d海洋生物貼到好鬼密，唔識分開d貼，要媽咪提佢貼遠d！
除左海洋生物，咁啱有幾張船同飛機嘅貼紙，順便都玩埋，俾Ambrose分番邊d野係响天空、海上同埋海入面！
沒有留言:
張貼留言