Dermes Free Trial

早幾日收到Dermes職員來電，話佢地可以offer一個free trial俾我！其實好耐之前都有想過去做一做upperlip架喇，叫過Ellen refer我，但好似要等open day先有free trial，結果拖拖拉拉之下又不了了之，始終呢d野又唔係好必需，所以都無話好堅持要去做囉！早幾日收到呢個電話，有free trial同有枝Bioderma潔面水送番，近近地响銅鑼灣做，所以咪應承去囉！都有諗過上到去好hard selll好難走到，不過諗住真係幫襯，upperlip都好似五千樓下一定攪得掂，所以都膽粗粗上左去！

 

上到去Dermes，淨係個reception位已經好大，職員指示我入去坐低等一陣，呢個等侯區又係好大，重可以有free drink。果然，收得貴都有原因嘅，哈哈！等左一陣就有人黎俾張form我填，填好，就有個治療師帶我入房介紹吓！主要都係講用咩機同原理去做，其實我都唔多care啦，都唔識嘅！傾左陣計，治療師有問我平時d生活習慣，好似有無搽防曬，平時有無打理吓塊面即有無搽防曬、做facial又或者自己做mask！當然我咩都無啦，哈哈，懶精一名！不過好彩治療師都話以我咁懶咩都唔做嘅情況之下，皮膚狀態都可以，只係有少少斑！我都覺得係，佢都叫好中肯！

 

傾完一輪之後，治療師就帶左我入去治療室，同我講之後會做d咩，俾哂心理準備我黎緊會發生d咩事，到呢一刻，我至開始有d驚！治療師先在我左手畫左四條白線，話係要做spot check喎！其實就係用laser打落去隻手度睇反應，如果做完後皮膚會紅腫又或burn左，佢話唔適宜做laser喎！就係咁，治療師幫我帶左眼罩，我開始聽到d聲，幾嘈吓，佢話係較緊部機！睇唔到野又唔係好知會係點，真係好驚吓！好快，好似有d野吹落隻手度，跟住有閃光，治療師問我有咩感覺，我咩感覺都無，如是者，一共打左四次，四次都無感覺！過左幾分鐘，治療師話我無特別反應，可以做upperlip喇！原來之前諗到好驚，到做落真係可以無咩感覺架喎，哈哈！

 

跟手好快做埋upperlip，前後都唔使五分鐘，快過打針，哈哈！做完又去返之前間房，治療師講左價錢後，完全無sell過我，只係問我想俾咩咭，哈哈，完全唔預我話唔做！不過其實折左只係三千幾蚊，見又快又唔痛，既然都黎左喇，做左佢啦，橫掂以前都想做架啦！眼lasik就唔多夠膽做啫，upperlip真係好mild，幾千蚊，氹吓自己開心都唔算好貴！

 

出乎意料之外，治療師無再sell我做埋underarm，真係三千幾蚊落樓，唔知係咪之前傾計我表現得對自己真係太無要求呢？哈哈！